Mosaea 27:24–37

“Fanauina i le Atua”

O le salamo o Alema le Itiiti ma atalii o Mosaea e mafai ona tuuina atu ai le faamoemoe i soo se tasi o tau mafaufau pe ono mafai ona suia. Sa fesoasoani le Faaola i nei alii talavou, o e sa faamatalaina o “tagata agasala sili ona leaga” (Mosaea 28:4), ina ia suia “i se tulaga o le amiotonu” (Mosaea 27:25). O lenei lesona e mafai ona fesoasoani ia te oe e salamo ma faaalia ai le faatuatua e mafai e le Faaola ona suia lou loto.

Fesoasoani i tagata aoga ia iloa Iesu Keriso. A faasolo ina iloa e tagata aoga le Faaola mo i latou lava, e mafai ona latou aoao mai ia te Ia ma taumafai ma le loto i ai ia faapei o Ia. E mafai ona latou aoao ia maua Lana fesoasoani, faamoemoe, ma le faamalologa i o latou olaga atoa. O le a mafai ona latou lagonaina le alofa o le Atua.

Sauniuniga a le tagata aoga: Mafaufau e valaaulia tagata aoga e mafaufau i mea i le natura e matuai iloga lava ona suia (e pei o se ketapila [e suia] i se lelefua). E mafai ona latou pueina se ata o se mea e faaali atu i le vasega.

Gaoioiga e Ono Mafai Ona Aoao Ai

Suiga

Valaaulia tagata aoga e faasoa mai ni mea i le natura e matuai suia maoae lava, e pei o le fuga e avea ma fua po o se fatu e avea ma laau. Ona faaali atu lea o le ata lenei a o e fai atu fesili nei.

• E mafai faapefea ona faatusatusa lo tatou alualu i luma faaleagaga i se ketapila ua avea ma se lelefua?

• Na faapefea ona faia e le Atua ia mafai e i tatou ona suia ma avea e faapei o Ia?

Mafaufau mo sina taimi e uiga i lou alualu i luma i le avea atili e faapei o le Atua. O i ai se mea e uiga ia te oe e te manao e suia pe faaleleia? O a ni mea faalavefau e ono feagai ma oe i le faia ai o nei suiga manaomia?

O le asō o le a e suesueina ai se suiga faavavega na faia e le Faaola i olaga o nisi o alii talavou. A o e suesue, faalogo mo uunaiga a le Agaga e uiga i le ala e mafai ai e le Faaola ona fesoasoani ia te oe ia suia foi.

Alema le Itiiti ma Atalii o Mosaea

Mafaufau e faaali atu le ata lenei ma fai atu i se tagata aoga e faamanatu i le vasega le tala o loo faaalia ai. Faaaoga le faamatalaga o loo i le parakalafa lenei pe a manaomia.

Manatua o le vaega muamua o le Mosaea 27 o loo i ai se tala i le taliina e le Atua o tatalo a Alema. Na auina mai e le Atua se agelu e faatalitonu Alema le Itiiti ma atalii o le Tupu o Mosaea i le sese o o latou ala. Sa le mafai e Alema le Itiiti ona tautala pe minoi mo ni aso ina ua mavae lenei mea na tupu (tagai Mosaea 27:19, 23). I lena taimi, sa oo ai o ia i se tiga e le mafaamatalaina mo ana agasala. Ina ua iu ina mafai ona ia toe tautala, sa ia faamatalaina le mea na faia e le Alii mo ia.

Mafaufau e valaaulia se tagata aoga e fatu mea nei i luga o le laupapa mo le vasega e faaaoga i le lesona atoa.

Tusi le “E mafai ona suia e ala ia Iesu Keriso” i le pito i luga o se fasipepa. Ona tusi lea o ni laina agai i lalo se lua e vaevae ai le pepa i ni koluma tutusa se tolu. Faaigoa le koluma i le itu agavale “amataga,” o le koluma ogatotonu “matafaioi a Iesu Keriso,” ma le koluma taumatau “mulimuli ane.”

Mo le suesuega nei o tusitusiga paia, valaaulia le afa o le vasega e faitau fuaiupu 8–10 ma le isi afa e faitau fuaiupu 32–37. Ona valaaulia lea o tagata aoga e tusi i le laupapa mea na latou mauaina.

Faitau le Mosaea 27:8–10; 28:4 e iloilo ai le tulaga na i ai Alema le Itiiti ma atalii o Mosaea i le amataga o o latou olaga. Tusi faamatalaga e faamatala ai i latou i le koluma “amataga” i luga o lau pepa.

Faitau nei loa le Mosaea 27:32–37, ma tusi faamatalaga e faamatala ai pe o ai na avea ai i latou i le koluma “mulimuli ane”.

Taofi mo se minute e toe manatunatu ai i le suiga ua e vaaia i se tasi ua salamo ma le faatuatua i le Faaola. (Atonu foi e te mafaufau ia te oe lava ia.) Faaopoopo faamatalaga i au koluma pe na faape’i i latou (po o oe) i le amataga ma le taunuuga o lenei suiga.

Valaaulia tagata aoga e o mai i le laupapa ma tusi se mea se tasi i lalo o koluma taitasi e faaali ai le suiga na latou vaaia i le tagata na latou mafaufau i ai.

Faitau le Mosaea 27:23–26, ma vaavaai mo fasifuaitau o loo faamatala ai le suiga e manaomia mo i tatou e avea ai e faapei o le Faaola. Atonu e fesoasoani le iloa o le upu faaletino (fuaiupu 25) e mafai ona faauigaina o le faalelalolagi po o le tuinanau, ma o le fasifuaitau “avea ma atalii ma afafine [o le Atua]” (fuaiupu 25) e mafai ona faasino ia i latou o e “fai mo o latou tofi le malo o le Atua” (fuaiupu 26).

I le koluma o le “matafaioi a Iesu Keriso” i lau pepa, tusi ai fasifuaitau e tulaga ese ia te oe. Faaalu sina taimi e mafaufau loloto ai i o latou uiga. Afai e tatau ai, sue soo se upu e te manao e malamalama lelei ai i le Taiala i Autu po o le Taiala i Tusitusiga Paia.

Mafaufau e fai atu i tagata aoga e faasoa mai fasifuaitau na latou tusia ma o latou uiga. E mafai foi ona e fesili atu pe faapefea ona avea i latou ma faamatalaga lelei o suiga ua latou vaaia ia i latou o e o mai i le Faaola. O nisi o fasifuaitau e ono maua e tagata aoga e aofia ai mea nei:

• Togiolaina e le Alii

• Toe fanaufouina

• Fanauina i le Atua

• Suia mai lo latou tulaga faaletino

• Avea ma ona atalii ma afafine

• Avea ma tagata fou

O le upumoni e tasi o loo aoao mai i nei fuaiupu o le o tagata uma e manaomia ona suia e ala i le Togiola a Iesu Keriso.

Mafaufau e tuu se ata o Iesu Keriso i le ogatotonu o le laupapa ma fai atu fesili nei:

• O a fasifuaitau o loo faamatalaina ai suiga na mafai ona faia e ala ia Iesu Keriso e sili ona taua ia te oe? Aisea?

• E faapefea e le mauaina o le faamagaloga a le Faaola ona suia ai i tatou?

• E tusa ai ma le fuaiupu 24, o le a le mea e manaomia mai ia i tatou e valaaulia ai le Faaola e suia i tatou?

O le suiga o se faagasologa, ae le o se mea e tupu.

Ua aoao mai Elder Neil L. Andersen o le Korama a Aposetolo e Toasefululua:

E ui mo nisi, o le faagasologa o le salamo e mafai ona tupu vave, e pei ona sa tupu ia Alema, o lenei tulaga o se tuusaunoaga nai lo le tulafono. O le toatele o i tatou e agai atu i lea laasaga ma lea laasaga, o lea inisi ma lea inisi agai atu i le lelei atili, ma sili atu le atoatoa i a tatou feagaiga, sili atu auaunaga ma tautinoga. (Neil L. Andersen, The Divine Gift of Forgiveness [2019], 11)

• Aisea e taua ai le manatuaina o le saunoaga a Elder Andersen?

Faaalu sina taimi e lisi ai nisi o faatinoga e mafai ona tatou faia e salamo ai ma faasolosolo ai lava ina suia e le Alii. (Mo manatu, toe faitau le saunoaga a Elder Andersen o loo i luga ma mafaufau e faitau nisi o fuaiupu nei: Mosaea 26:29; 27:35; Alema 36:18; 3 Nifae 9:22; Mataupu Faavae ma Feagaiga 6:9; 58:42–43).

• O le a se mea e mafai ona tatou faia e liliu atu ai i le Alii ma salamo?

• O le a sou manatu e mafai faapefea e nei taumafaiga ona fesoasoani ia i tatou ina ia suia malie e ala i le Faaola?

Matamata le vitio “O le Faamoemoe o le Malamalama o le Atua” (6:46), ma vaavaai pe na faapefea ona fesoasoani le Faaola i se tasi e suia “i lea laasaga ma lea laasaga, o lea inisi ma lea inisi e agai atu i le lelei atili.”

Molimau atu o le tala i le Mosaea 27 o loo faaalia ai le mana o le Faaola ma finagalo e suia soo se tasi e salamo ma le faatuatua ia te Ia.

Ona valaaulia lea o tagata aoga e faamae’a mea nei i a latou api talaaga mo suesuega.

Faaalu sina taimi e mafaufau loloto ai pe faapefea ona faatatau lenei lesona ia te oe. Faamaumau ni ou manatu e uiga i fesili nei i lau api talaaga mo suesuega.

1. O a ni suiga malie ua uma ona fesoasoani le Faaola ia te oe e fai? O le a sou lagona e uiga i au taumafaiga ma le fesoasoani a le Alii?

2. O le a le isi laasaga e te lagona e finagalo le Alii e te faia e salamo ai ma faaauau ai pea ona suia e ala ia te Ia?

3. O a ni faalavefau e ono feagai ma oe i lenei faagasologa, ma e mafai faapefea ona e liliu atu i le Alii e fesoasoani ia te oe e faatoilaloina?

Manatu ma Talaaga o Faamatalaga

Aisea ua ou le vaaia ai ni suiga faavavega e pei o Alema le Itiiti i lo’u olaga?

Na faamalamalama mai e Elder D. Todd Christofferson o le Korama a Aposetolo e Toasefululua:

Atonu e te fesili, Aisea e le vave ai ona tupu lenei suiga tele ia te au? E tatau ona e manatua ia faataitaiga ofoofogia a le nuu o le Tupu o Peniamina, Alema, ma isi i tusitusiga paia e faapena lava—le ofoofogia ae e le o se mea e masani ai. O le toatele lava o i tatou, e faifai malie suiga ma e umi se taimi e tulai mai ai. O le toe fanaufouina, e le pei o lo tatou fananau mai i la le tino, o se faagasologa nai lo se mea e tupu [i se taimi e tasi]. Ma o le galue ai i lena faagasologa, o le faamoemoega tutotonu lea o le olaga nei.

Ou te molimau atu a o outou faaauau ai i le ala o le toe fanauina faaleagaga, o le a aveeseina e le alofatunoa togiola o Keriso a outou agasala ma pisipisia o na agasala o loo ia te outou, o le a mou ese atu foliga faataumaoi o faaosoosoga, ma e ala atu ia Keriso o le a faapaiaina ai outou, e pei ona paia o Ia ma lo tatou Tama. (D. Todd Christofferson, “Toe Fanaufouina,” Liahona, Me 2008, 78)

Talu ai e alofa tele le Atua, aisea e manaomia ai ona tatou salamo ma suia?

Na aoao mai Elder Jeffrey R. Holland o le Korama a Aposetolo e Toasefululua:

“Sau i le tagata o e i ai,” o loo fetalai mai ai se Tama alofa ia i tatou taitoatasi, ae ua Ia faaopoopo mai, “Aua ne’i e fuafua e te tumau ai lava i le tagata o e i ai.” Tatou te soisoi ma manatua o loo naunau lava le Atua ia faia i tatou ia sili atu i lo tagata na tatou mafaufau e mafai ona avea ai i tatou. (Jeffrey R. Holland, “O Pese e Usuina ma Lē Usuina,” Liahona, Me 2017, 51)

Gaoioiga Faaopoopo e Aoao Ai

O le salamo ma le suia e alu ai le taimi ma taumafaiga faifai pea

Ina ia fesoasoani i tagata aoga ia malamalama o le salamo ma le suia ia avea e faapei o le Faaola o se faagasologa, ae le o se mea e tupu [i se taimi e tasi], mafaufau e valaaulia i latou e fai se mea e le mafai ona faia atoatoa i le taimi muamua. Ona valaaulia lea o i latou e faaleleia atili a latou galuega i ni taimi se tele. Mo se faataitaiga, fai atu ia i latou e tusi faavave se ata o lo latou fale, ona fai atu lea ia i latou e faaopoopo se mea se tasi i la latou atatusi pe sui se mea se tasi ina ia sa’o atili ai. Fesili i tagata aoga pe faafia ona mafai ona latou toe faia lenei faagasologa ma mafai ai pea lava ona faaleleia le ata. Ona faasoa atu lea o le saunoaga lenei a Elder D. Todd Christofferson o le Korama a Aposetolo e Toasefululua, ma fai i tagata aoga e faasoa mai pe faapefea ona fesootai lenei mea i le suiga na tautala i ai Alema i le Mosaea 27:24–26.

“O le taulimaina o se mea telē, atonu e tatau ona tatou galulue i ai i ni taumafaiga laiti, i aso taitasi. …

“O le faaaofia ai o amioga fou ma le aoga i o tatou uiga po o le faatoilaloina o amioga le lelei po o vaisu e masani ona faauigaina o se taumafaiga i le taimi nei ma sosoo ai ma le isi a taeao ma le isi, atonu mo ni aso se tele, po o ni masina foi ma ni tausaga. … Ae e mafai ona tatou faia aua e mafai ona tatou talosaga atu i le Atua … mo le fesoasoani tatou te manaomia i aso taitasi” (“O Le Iloaina o le Aao o le Atua i o Tatou Faamanuiaga i Aso Taitasi,” Ensign, Ian. 2012, 20–21).

Kukama ma piko:

Ina ia fesoasoani i tagata aoga ia malamalama i le suiga e tatau ai ina ia avea e faapei o le Faaola, mafaufau e valaaulia i latou e faitau le “Kukuma ma Piko” o se vaega o le lauga “E Ao Ina Toe Fanau Fouina Outou” saunia e Elder David A. Bednar o le Korama a Aposetolo e Toasefululua (Liahona, Me 2007, 19). Pe e mafai foi ona e faaalia le vitio o lana lauga mai le faailotaimi 1:18 i le 4:17. E mafai ona faaaoga lenei manatu e amata ai le lesona e sui tulaga i le faasoaina atu o mea e suia i le natura.