Atamai i Aoaoga Faavae Iloiloga 9

Malamalama ma le Faamalamalamaina o Upumoni

O fuaitau o mau o le atamai i aoaoga faavae o loo i ai upumoni taua e uiga ia Iesu Keriso ma Lana talalelei. O lenei lesona e mafai ona fesoasoani e te malamalama ai i le aoaoga faavae o loo aoaoina i fuaitau o le atamai i aoaoga faavae ma faamalamalama atu i isi.

Fesoasoani i tagata aoao e atiina ae tomai e talanoaina ai talitonuga o le talalelei ma isi. O le faamalamalamaina o aoaoga ma mataupu faavae, faasoaina o malamalamaaga ma aafiaga talafeagai, ma le molimau atu e uiga i upumoni paia e mafai ona faamanino ai malamalamaaga a le tagata aoga i aoaoga ma mataupu faavae o le talalelei ma faaleleia atili ai le tomai o le tagata aoga e aoao atu ai le talalelei i isi. Tuuina atu avanoa faifaipea mo tagata aoga e faamatala ai mea o loo latou aoaoina.

Sauniuniga a le tagata aoga: Valaaulia tagata aoga e o mai saunia e faasoa mai e uiga i se taimi na faamanuiaina ai o latou olaga e ala i se tasi na faamalamalamaina tusitusiga paia ia i latou pe o le taimi foi na mafai ai ona latou faamanuiaina le olaga o se isi tagata e ala i le faaaogaina po o le faamalamalamaina o tusitusiga paia.

Gaoioiga e Ono Mafai Ona Aoao Ai

Atonu e manaomia ona aoao atu se lesona o fuaitau o le atamai i aoaoga faavae e suitulaga i lenei lesona toe faamanatu. Tagai i le faasologa fuafuatatau ua saunia e le faatonu po o le taitai faamaopoopo o le eria po o le lisone ina ia mautinoa o lesona taitasi o fuaitau o le atamai i aoaoga faavae o le a aoaoina a o faagasolo vasega seminare.

Faamalamalamaina o upumoni mai tusitusiga paia

Faaali atu le fesili lenei mo tagata aoga ma valaaulia i latou e tusi a latou tali i luga o le laupapa.

• O a nisi o tulaga e mafai e lou tomai e malamalama ma faamatala ai tusitusiga paia ona faia pe na faia ai se suiga i le olaga o se tasi?

Na faasoa mai e Elder Arnulfo Valenzuela o le Fitugafulu se aafiaga ina ua mafai ona ia faamanuiaina isi e ala i le aoaoina manino atu o tusitusiga paia. Matamata le vitio “Faalolotoina o lo Tatou Liua ia Iesu Keriso” mai le faailotaimi 6:34 i le 7:31, o loo maua i le ChurchofJesusChrist.org, pe faitau le faamatalaga o loo i lalo.

A o auauna atu o se alii talavou i se misiona, sa ou maitauina o le a’oa’o atu i tusitusiga paia, na suia ai olaga o le toatele o tagata. Sa amata ona ou malamalama i le mana o loo ia i latou ma le auala e mafai ona suia ai o tatou olaga. O tagata taitoatasi sa matou a’oa’oina i ai le talalelei toefuataiina o se tagata tulaga ese e i ai manaoga eseese. O tusitusiga paia—ioe, o valoaga na tusia e perofeta paia—na aumaia ai i latou i se faatuatua i le Alii ma i le salamo ma sa suia ai o latou loto.

Sa faatumulia e tusitusiga paia i latou i le olioli a o latou mauaina musumusuga, taitaiga, faamafanafanaga, malosi, ma tali i o latou manaoga. O le toatele o i latou na filifili e faia ni suiga i o latou olaga ma amata ona tausia poloaiga a le Atua. (Arnulfo Valenzuela, “Faalolotoina o Lo Tatou Liua ia Iesu Keriso,” Liahona, Nov. 2021, 60)

• Aisea e te manatu ai na i ai se aafiaga loloto o tusitusiga paia i tagata na aoaoina e Elder Valenzuela?

  Atonu e manaomia e tagata aoga sina taimi e toe manatunatu ai i fesili nei. Atonu e aoga le fai atu o fesili ma valaaulia tagata aoga e mafaufau e uiga i a latou tali a o e faasoa atu lau lava tali.

• O anafea na faamanuiaina ai lou olaga e ala i se tasi na faamalamalamaina tusitusiga paia ia te oe?

• O anafea na mafai ai ona e faamanuiaina isi e ala i le faamalamalamaina o tusitusiga paia ia i latou?

Mafaufau loloto pe mafai faapefea ona e atiina ae atili ou tomai e malamalama ai ma faamalamalamaina tusitusiga paia. Mafaufau pe mafai faapefea e le faia o lena mea ona fesoasoani ia te oe e avea atili ai e faapei o le Faaola, o lē sa masani ona faaaogaina tusitusiga paia e aoao atu ai isi (tagai Luka 24:27; Ioane 10:34–36).

Atamai i aoaoga faavae o le Tusi a Mamona

O fuaitau muamua e 12 o le atamai i aoaoga faavae o le Tusi a Mamona o loo lisi atu i lalo. Mafaufau e faailoga fuaiupu nei faatasi ai ma o latou fasifuaitau o mau autu pe afai e lei mae’a ona e faia.

Faaali atu le siata lenei ina ia mafai ona faasino i ai tagata aoga i le gasologa atoa o le lesona.

Fuaitau ma Fasifuaitau Autu Muamua e 12 o le Atamai i Aoaoga Faavae

Tusi Lesona a le Faiaoga o le Tusi a Mamona (2024)

Mau Faasino	Fasifuaitau Autu o le Mau
Mau Faasino 1 Nifae 3:7	Fasifuaitau Autu o le Mau “O le a ou alu ma fai mea ua poloaiina e le Alii.”
Mau Faasino 2 Nifae 2:25	Fasifuaitau Autu o le Mau “Na pa’ū Atamu ina ia i ai tagata; ma ua i ai tagata, ina ia latou maua le olioli.”
Mau Faasino 2 Nifae 2:27	Fasifuaitau Autu o le Mau “Ua latou saoloto e filifili le saolotoga ma le ola e faavavau … pe … [o] le faatagataotauaina ma le oti.”
Mau Faasino 2 Nifae 26:33	Fasifuaitau Autu o le Mau “Ua tutusa tagata uma i le Atua.”
Mau Faasino 2 Nifae 28:30	Fasifuaitau Autu o le Mau O le Atua e “tuu atu i le fanauga a tagata lea fuaitau i luga o lea fuaitau, ma lea mataupu i luga o lea mataupu.”
Mau Faasino 2 Nifae 32:3	Fasifuaitau Autu o le Mau “Ia taumamafa fiafia i afioga a Keriso; aua faauta, o afioga a Keriso o le a taʼu mai ai ia te outou mea uma e tatau ona outou faia.”
Mau Faasino 2 Nifae 32:8–9	Fasifuaitau Autu o le Mau “E ao ina outou tatalo e le aunoa.”
Mau Faasino Mosaea 2:17	Fasifuaitau Autu o le Mau “Pe a outou auauna atu i o outou uso a tagata, ua nao lo outou auauna atu lava lea i lo outou Atua.”
Mau Faasino Mosaea 2:41	Fasifuaitau Autu o le Mau “O i latou o e e tausi i poloaiga a le Atua … e faamanuiaina i latou i mea uma.”
Mau Faasino Mosaea 3:19	Fasifuaitau Autu o le Mau “[Tuu] ese le tagata natura ma [avea] ma tagata paia e ala i le togiola a Keriso le Alii.”
Mau Faasino Mosaea 4:9	Fasifuaitau Autu o le Mau “Ia talitonu i le Atua; … ia talitonu ua ia te ia le poto uma.”
Mau Faasino Mosaea 18:8–10	Fasifuaitau Autu o le Mau Ia “papatisoina i le suafa o le Alii, o se molimau … ua outou ulu atu i se feagaiga faatasi ma ia.”

© 2023 by Intellectual Reserve, Inc. Ua taofia aiā tatau uma.

Mafaufau pe mafai faapefea e le faaaogaina o le mamanu lenei ona fesoasoani ia te oe e malamalama atili ai ma faamalamalama upumoni mai tusitusiga paia.

Faaali pe tuu atu i tagata aoga le mamanu lenei e tolu laasaga.

• Laasaga 1: Malamalama i le matalalaga o le mau ma fuafua pe faapefea ona faamatalaina i au lava upu. O le matalalaga e mafai ona aofia ai le nofoaga o mea na tutupu ma po o ai o loo talanoa i ai ma pe aisea. O le faitauina o le ulutala o le mataupu ma ni nai fuaiupu o loo siomia ai e mafai ona fesoasoani i lenei taumafaiga.

• Laasaga 2: Ia lava le malamalama i upumoni o loo maua i le mau ina ia mafai ai ona faamalamalama atu. Ina ia fesoasoani ia te oe, mafaufau e fesili ifo ia te oe lava ni fesili e pei o nei: O a ni savali autu o loo taumafai le tusitala e faasoa mai? O le a le mea o loo aoao mai e le fuaitau e uiga i le Tama Faalelagi ma Iesu Keriso? E mafai faapefea ona ou faailoa atu upumoni i se auala faigofie? O a nisi o tulaga e ono manuia ai se tasi mai le malamalama ai i lenei savali?

• Laasaga 3: Mafaufau pe mafai faapefea e upumoni na e mauaina ona fesoasoani i le tagata o loo e faamalamalamaina atu i ai. Mafaufau i tulaga o o latou olaga ma faafitauli o loo latou feagai. Fai ni fesootaiga i le va o upumoni ma nei tulaga ma faafitauli.

Faataitai

Filifili se fuaitau o le atamai i aoaoga faavae se tasi pe lua mai le siata o i luga e te manao ia malamalama atili i ai pe e te lagona o le a avea ma se faamanuiaga ia te oe po o se tasi e te iloa. Faaaoga le mamanu lea faatoa e aoaoina nei e tusi ai i lalo pe faapefea ona e faamatalaina atu i se isi tagata.

A uma ua lava se taimi e suesue ma saunia ai, mafaufau e valaaulia tagata aoga e faatino le faamalamalamaina o upumoni faaletusi paia i le tasi ma le isi.

A maea ona e faia, tali fesili nei.

• Na faapefea e le faaaogaina o lenei mamanu ona faalolotoina lou malamalama? Na faapefea ona fesoasoani lea ia te oe a o e saunia ma faamalamalama atu le fuaitau i isi?

• E mafai faapefea e upumoni sa e malamalama i ai ma faamatalaina ona fesoasoani ia te oe i ou lava tulaga patino?

• E mafai faapefea e le faaaogaina o lenei mamanu ia malamalamama faamalamalama atili ai tusitusiga paia ona fesoasoani ia te oe ia avea atili e faapei o le Faaola?