Մոսիա 27.24–37

«Ծնված Աստծուց»

Ալմա Կրտսերի և Մոսիայի որդիների ապաշխարությունը կարող է հույս տալ յուրաքանչյուրին, ով կասկածում է, թե հնարավոր է փոխվել: Այս երիտասարդ տղաներին, որոնք նկարագրվում էին որպես «մեղսավորներից ամենանողկալիները» (Մոսիա 28.4), Փրկիչն օգնեց փոխվել և հասնել «արդարակեցության վիճակի» (Մոսիա 27.25): Այս դասը կօգնի ձեզ ապաշխարել և հավատք ունենալ, որ Փրկիչը կարող է փոխել ձեր սիրտը:

Օգնեք ուսանողներին ճանաչել Հիսուս Քրիստոսին: Երբ ուսանողներն ինքնուրույն ճանաչեն Փրկչին, կարող են սովորել Նրանից և գիտակցաբար ձգտել Նրան նմանվել: Նրանք կարող են սովորել՝ իրենց ողջ կյանքում ընդունել Նրա օգնությունը, հույսը և բժշկումը: Նրանք կկարողանան զգալ Աստծո սերը:

Ուսանողի նախապատրաստում. կարող եք ուսանողներին առաջարկել, որ մտածեն բնության այնպիսի երևույթների մասին, որոնք կտրուկ փոխվում են (օրինակ՝ թիթեռի թրթուրը): Նրանք կարող են որևէ բան լուսանկարել և ցույց տալ դասարանին:

Հնարավոր ուսումնական վարժություններ

Ինչպես փոխվել

Ուսանողներին առաջարկեք կիսվել բնության մեջ հանդիպող այնպիսի բաներով, որոնք կտրուկ են փոխվում, օրինակ՝ ծաղիկը, որը դառնում է միրգ կամ սերմը, որը դառնում է ծառ: Ապա ցուցադրեք այս նկարը՝ տալով ստորև ներկայացվող հարցերը:

• Մեր հոգևոր առաջընթացն ինչպե՞ս կարող է համեմատվել թիթեռ դարձող թրթուրի հետ:

• Աստված ի՞նչ հնարավորություն է տվել մեզ, որպեսզի փոխվենք և Իրեն նմանվենք:

Մի պահ մտածեք, թե ի՞նչ առաջընթաց ունեք Աստծուն ավելի նմանվելու գործընթացում: Ի՞նչը կցանկանայիք փոխել կամ լավացնել ձեր մեջ: Այդ ցանկալի փոփոխությունները կատարելիս ի՞նչ դժվարությունների կարող եք հանդիպել:

Այսօր ուսումնասիրելու եք մի քանի երիտասարդ տղաների կյանքում Փրկչի կատարած հրաշագործ փոփոխության մասին: Ուսումնասիրելու ընթացքում լսեք Հոգու հուշումներն այն մասին, թե Փրկիչն ինչպես կարող է ձեզ նույնպես օգնել փոխվել:

Ալմա Կրտսերը և Մոսիայի որդիները

Կարող եք ցուցադրել հետևյալ նկարը և որևէ ուսանողի խնդրել դասարանին հիշեցնել նկարում պատկերված պատմությունը: Օգտագործեք ստորև ներկայացվող պարբերության տեղեկությունը միայն անհրաժեշտության դեպքում:

Հիշեցրեք, որ Մոսիա 27 գլխի առաջին մասը ներառում է այն պատմությունը, որում Աստված պատասխանում է Ալմայի աղոթքներին: Աստված հրեշտակ ուղարկեց, որպեսզի համոզի Ալմա Կրտսերին և Մոսիա թագավորի որդիներին իրենց սխալ ուղիների մասին: Այս իրադարձությունից հետո Ալմա Կրտսերն օրեր շարունակ չէր կարողանում խոսել կամ շարժվել (տես Մոսիա 27.19, 23): Այդ ժամանակ նա աննկարագրելի տառապանք էր զգում իր մեղքերի համար: Երբ նա վերջապես կարողացավ կրկին խոսել, նկարագրեց, թե ինչ է արել Տերն իր համար:

Կարող եք որևէ ուսանողի առաջարկել դասարանի համար գրատախտակին պատկերել հետևյալը, որպեսզի դասի ընթացքում ուսանողներն օգտվեն դրանից:

Մի թուղթ վերցրեք և վերևում գրեք «Փոփոխությունը հնարավոր է Հիսուս Քրիստոսի միջոցով»: Ապա երկու ուղղահայաց գիծ տարեք՝ թուղթը երեք հավասար սյունակների բաժանելու համար: Ձախ սյունակն անվանեք «առաջ», մեջտեղի սյունակը՝ «Հիսուս Քրիստոսի դերը», իսկ աջ սյունակը՝ «հետո»:

Ստորև ներկայացվող սուրբ գրությունն ուսումնասիրելու համար դասարանի մի կեսին առաջարկեք կարդալ 8–10 հատվածները, իսկ մյուս կեսին՝ 32–37 հատվածները: Ապա ուսանողներին առաջարկեք գրատախտակին գրել իրենց գտածը:

Կարդացեք Մոսիա 27.8–10, 28.4 հատվածները և ուսումնասիրեք, թե նախկինում ինչպիսին էին Ալմա Կրտսերը և Մոսիայի որդիները իրենց կյանքում: Նրանց մասին նկարագրությունները գրեք ձեր թղթի «առաջ» սյունակում:

Այժմ կարդացեք Մոսիա 27.32–37 հատվածները և «հետո» սյունակում նկարագրեք, թե ովքեր դարձան նրանք:

Մեկ րոպե ընդմիջեք և մտածեք, թե ինչ փոփոխություն եք նկատել այն մարդու մոտ, որն ապաշխարել է Փրկչի հանդեպ հավատքով: (Կարող եք նույնիսկ ձեր մասին մտածել): Սյունակներում ավելացրեք նկարագրություններ այն մասին, թե նա (կամ դուք) ինչպիսին էիք նախկինում և ինչպիսին եք այս փոփոխությունից հետո:

Ուսանողներին առաջարկեք գալ գրատախտակի մոտ և յուրաքանչյուր սյունակում գրել որևէ փոփոխություն, որը նկատել են այն մարդու մոտ, որի մասին մտածել են:

Կարդացեք Մոսիա 27.23–26 հատվածը և փնտրեք արտահայտություններ, որոնք նկարագրում են այն փոփոխությունը, որը մեզ անհրաժեշտ է Փրկչին նմանվելու համար: Օգտակար կլինի իմանալ, որ մարմնական բառը (հատված 25) կարող է նշանակել աշխարհիկ կամ զգայական, իսկ «դառնալով [Աստծո] որդիներն ու դուստրերը» արտահայտությունը (հատված 25) կարող է վերաբերել նրանց, ովքեր «ժառանգում են Աստծո արքայությունը» (հատված 26):

Ձեր թղթի «Հիսուս Քրիստոսի դերը» սյունակում գրեք այն արտահայտությունները, որոնք տպավորեցին ձեզ: Մի պահ մտածեք դրանց նշանակության մասին: Անհրաժեշտության դեպքում, եթե ցանկանում եք որևէ բառ ավելի լավ հասկանալ, փնտրեք Թեմաների ուղեցույցում կամ Սուրբ գրությունների ուղեցույցում:

Ուսանողներին կարող եք առաջարկել կիսվել իրենց գրած արտահայտություններով և դրանց նշանակությամբ: Կարող եք նաև հարցնել, թե որքանո՞վ են դրանք լավ նկարագրում այն փոփոխությունները, որոնք նկատել են դեպի Փրկչը դարձի եկած մարդկանց մոտ: Ուսանողների գտած որոշ արտահայտություններ կարող են լինել.

• Փրկագնված Տիրոջով

• Վերստին ծնված

• Ծնված Աստծուց

• Փոխված իրենց մարմնական վիճակից

• Դառնալ նրա որդիներն ու դուստրերը

• Դառնալ նոր արարածներ

Այս հատվածներում ուսուցանվող ճշմարտություններից մեկը հետևյալն է. ողջ մարդկությանն անհրաժեշտ է փոխվել Հիսուս Քրիստոսի Քավության միջոցով:

Կարող եք Հիսուս Քրիստոսի նկարը տեղադրել գրատախտակի կենտրոնում և տալ հետևյալ հարցերը.

• Հիսուս Քրիստոսի միջոցով հնարավոր դարձած փոփոխությունները նկարագրող ո՞ր արտահայտություններն են ամենակարևորը ձեզ համար: Ինչո՞ւ։

• Մենք ինչպե՞ս ենք փոխվում՝ ստանալով Փրկչի ներումը:

• Ըստ հատված 24-ի՝ ի՞նչ է պահանջվում մեզնից, որպեսզի հրավիրենք Փրկչին փոխել մեզ:

Փոփոխությունը գործընթաց է, այլ ոչ թե իրադարձություն

Տասներկու Առաքյալների Քվորումից երեց Նիլ Լ․ Անդերսենն ուսուցանել է.

Թեև ոմանց համար ապաշխարության գործընթացը կարող է կտրուկ տեղի ունենալ, ինչպես Ալմայի համար էր, բայց սա ավելի շատ բացառություն է, քան կանոն: Մեզնից շատերը քայլ առ քայլ, աստիճանաբար շարժվում են դեպի ավելի մեծ բարություն, ավելի մեծ ճշգրտություն մեր ուխտերում, դեպի ավելի մեծ ծառայություն և նվիրվածություն: (Նիլ Լ. Անդերսեն, Ներման աստվածային պարգևը [2019], 11)

• Ինչո՞ւ է կարևոր հիշել երեց Անդերսենի խոսքերը:

Որոշ ժամանակ հատկացրեք և թվարկեք մի քանի գործողություն, որոնք կարող ենք կատարել ապաշխարելու և աստիճանաբար Տիրոջ կողմից փոխվելու համար (Գաղափարներ գտնելու համար վերընթերցեք երեց Անդերսենի՝ վերևում բերված խոսքերը, ինչպես նաև կարող եք կարդալ հետևյալ հատվածներից մի քանիսը. Մոսիա 26.29, 27.35, Ալմա 36.18, 3 Նեփի 9.22, Վարդապետություն և Ուխտեր 6.9, 58.42–43):

• Ի՞նչ կարող ենք անել դեպի Տերը դարձի գալու և ապաշխարելու համար:

• Ըստ ձեզ՝ այդ ջանքերն ինչպե՞ս կարող են օգնել մեզ, որպեսզի աստիճանաբար փոխվենք Փրկչի միջոցով:

Դիտեք «Աստծո լույսի հույսը» տեսանյութը (6:46) և փնտրեք, թե Փրկիչն ինչպես օգնեց մի մարդու «քայլ առ քայլ, աստիճանաբար դեպի ավելի մեծ բարություն» փոխվել:

Վկայեք, որ Մոսիա 27 գլխում նկարագրված պատմությունը ցույց է տալիս Փրկչի հանդեպ հավատքով ապաշխարող յուրաքանչյուրին փոխելու Նրա զորությունը և ցանկությունը:

Ապա ուսանողներին առաջարկեք իրենց ուսումնասիրության օրագրերում կատարել հետևյալ վարժությունները:

Մի պահ մտածեք, թե այս դասը որքանով է կիրառելի ձեզ համար: Սուրբ գրությունների ուսումնասիրության ձեր օրագրում գրեք հետևյալ հարցերի վերաբերյալ ձեր մտքերը.

1. Փրկչի օգնությամբ ի՞նչ աստիճանական փոփոխություններ եք կատարել արդեն: Ի՞նչ զգացողություններ ունեք ձեր ջանքերի և Տիրոջ օգնության վերաբերյալ:

2. Ձեր կարծիքով, ո՞րն է հաջորդ քայլը, որը Տերը կհանձնարարեր ձեզ կատարել՝ ապաշխարելու և Նրա միջոցով փոխվել շարունակելու համար:

3. Ի՞նչ խոչընդոտների կարող եք հանդիպել այս գործընթացում և ինչպե՞ս կարող եք դիմել Տիրոջը, որպեսզի օգնի ձեզ հաղթահարել դրանք:

Բացատրական և պատմական տեղեկություններ

Ինչո՞ւ իմ կյանքում ես չտեսա հրաշագործ փոփոխություններ, ինչպես Ալմա Կրտսերը:

Տասներկու Առաքյալների Քվորումից երեց Դ. Թոդ Քրիստոֆերսոնը բացատրել է․

«Հնարավոր է՝ հարցնեք․ «Ինչո՞ւ այդ փոփոխությունն ավելի արագ չի կատարվում ինձ հետ»։ Դուք պետք է հիշեք, որ Բենիամին թագավորի ժողովրդի, Ալմայի և մի քանիսի նշանավոր օրինակները սուրբ գրություններում հենց այդպիսին են՝ նշանավոր և ոչ սովորական։ Մեզանից շատերի համար փոփոխություններն ավելի շուտ աստիճանական են և տեղի են ունենում ժամանակի ընթացքում։ Վերստին ծնվելը, ի տարբերություն մեր ֆիզիկական ծնունդի, ավելի շուտ ընթացք է, քան իրադարձություն։ Եվ այդ գործընթացի մեջ մտնելը մահկանացու կյանքի առանցքային նպատակն է:

… Ես վկայում եմ, որ եթե շարունակեք մնալ հոգևոր վերածննդի ճանապարհին, Հիսուս Քրիստոսի քավիչ շնորհը կհեռացնի ձեր մեղքերը և այդ մեղքերի բծերը, գայթակղությունները կկորցնեն իրենց գրավչությունը, և Քրիստոսի միջոցով դուք կդառնաք սուրբ, ինչպես որ Նա և մեր Հայրն են սուրբ: (Դ. Թոդ Քրիստոֆերսոն, «Վերստին ծնված», Լիահոնա, մայիս 2008թ., 78)

Եթե Աստված այդքան սիրող է, ինչո՞ւ պետք է ապաշխարենք և փոխվենք:

Տասներկու Առաքյալների Քվորումից երեց Ջեֆրի Ռ. Հոլլանդն ուսուցանել է.

«Եկեք այնպիսին, ինչպիսին կաք», - սիրող Հայրն ասում է մեզանից յուրաքանչյուրին, բայց ավելացնում է. «Մի ծրագրեք մնալ այնպիսին, ինչպիսին կաք»: Մենք ժպտում ենք և հիշում, որ Աստված վճռական է, որ մեզ դարձնի ավելին, քան մենք պատկերացնում ենք, որ կարող ենք լինել: (Ջեֆրի Ռ. Հոլլանդ, «Երգված և չերգված երգեր», Լիահոնա, մայիս 2017թ., 51):

Օժանդակ ուսումնական վարժություններ

Ապաշխարությունը և փոփոխությունը ժամանակ և շարունակական ջանքեր են պահանջում

Որպեսզի օգնեք ուսանողներին հասկանալ, որ Փրկչին նմանվելու համար ապաշխարելն ու փոխվելը գործընթաց է, այլ ոչ թե իրադարձություն, կարող եք առաջարկել նրանց անել մի բան, որն առաջին անգամ անելիս հնարավոր չէ կատարյալ անել: Ապա առաջարկեք նրանց մի քանի անգամ բարելավել իրենց աշխատանքը: Օրինակ՝ խնդրեք նրանց արագ իրենց տունը նկարել, ապա խնդրեք նրանց մի բան էլ ավելացնել իրենց նկարին կամ մի բան փոխել՝ այն ավելի ճշգրիտ դարձնելու համար: Ուսանողներին հարցրեք, թե քանի անգամ կարող են կրկնել այդ գործընթացը՝ ամեն անգամ կատարելագործելով նկարը: Հետո ներկայացրեք Տասներկու Առաքյալների Քվորումից երեց Դ. Թոդ Քրիսթոֆերսոնի ստորև ներկայացվող խոսքերը և ուսանողներին խնդրեք կիսվել, թե ինչպես է դա առնչվում Մոսիա 27.24–26 հատվածներում նկարագրված Ալմայի փոփոխությանը:

Շատ մեծ գործ անելու համար մենք գուցե կարիք ունենանք դրա վրա աշխատել ամենօրյա փոքր բաժիններով: …

«Մեր բնավորության մեջ նոր և օգտակար սովորությունների ներառումը կամ վատ սովորությունների և հակումների հաղթահարումը հաճախ նշանակում է այսօր գործադրած ջանք, որին հաջորդում է վաղվա ջանքը, հետո մյուս օրվանը, գուցե շատ օրերի, նույնիսկ՝ ամիսների և տարիների: … Բայց մենք կարող ենք անել դա, քանի որ կարող ենք դիմել Աստծուն … օգնության համար, որը մեզ անհրաժեշտ է ամեն օր» («Ճանաչել Աստծո ձեռքը մեր ամենօյա օրհնություններում», Ensign, հունվար 2012թ., 20–21):

Թարմ և թթու վարունգները

Որպեսզի օգնեք ուսանողներին հասկանալ, թե ինչ փոփոխություն է անհրաժեշտ Փրկչին նմանվելու համար, կարող եք առաջարկել նրանց կարդալ Տասներկու Առաքյալների Քվորումից երեց Դեյվիդ Ա. Բեդնարի «Դուք պետք է վերստին ծնվեք» ելույթի «Թարմ և թթու վարունգները» հատվածը (Լիահոնա, մայիս 2007թ., 19): Կամ կարող եք ցուցադրել նրա ելույթի տեսագրության 1:18-4:17 հատվածը: Այս գաղափարը կարելի է օգտագործել դասը սկսելու համար՝ բնության փոխվող երևույթների փոխարեն: