Մոսիա 28

Անձնական դարձ և ավետարանի տարածում

Հիսուս Քրիստոսի ավետարանով կիսվելու ի՞նչ փորձառություն եք ունեցել: Դարձից հետո Մոսիայի որդիները գնացին թագավորի մոտ, որպեսզի ավետարանը Լամանացիներին քարոզելու թույլտվություն խնդրեն: Մոսիա թագավորը նախ Տիրոջը հարցրեց, ապա թույլ տվեց իր որդիներին գնալ և Աստծո խոսքը փոխանցել Լամանացիներին (տես Մոսիա 28.1): Այս դասը նախատեսված է օգնելու ձեզ մեծացնել ավետարանով կիսվելու ձեր ցանկությունը:

Ուսանողներին օգնեք գտնել ավետարանի ճշմարտությունների կարևորությունն ու առնչությունը մեր կյանքին: Որոշ ուսանողներ կարող են դժվարությամբ տեսնել, թե ինչ կապ ունի ավետարանն իրենց ամենօրյա կյանքի հետ: Աղոթքով փնտրեք, թե ինչպես կարող եք օգնել նրանց զգալ, որ այն, ինչ սովորում են, կարևոր և օգտակար է նրանց անձնական հանգամանքների, հարցերի ու կարիքների համար:

Ուսանողի նախապատրաստում. կարող եք ուսանողներին առաջարկել խոսել մեկի հետ, ով իրենց կարծիքով, իրապես դարձի է եկել դեպի Հիսուս Քրիստոսի ավետարանը: Ի՞նչն օգնեց այդ մարդուն դարձի գալու իր ճանապարհին: Կարող եք ուսանողներին առաջարկել նաև գնահատել ավետարանով կիսվելու իրենց ցանկությունը:

Հնարավոր ուսումնական վարժություններ

Կիսվել և դարձի գալ

Կարող եք որևէ առարկա բերել (կամ ցուցադրել դրա նկարը), որն այնքան շատ եք սիրում, որ հաճույքով կիսվում եք ուրիշների հետ: Նախքան հաջորդ հարցը տալը՝ այդ առարկան ցույց տվեք ուսանողներին:

• Նշեք մի քանի բան, որ այնքան շատ եք սիրում, որ ցանկանում եք կիսվել դրանցով ուրիշների հետ:

Տասներկու Առաքյալների Քվորումից երեց Դեյվիդ Ա. Բեդնարն ուսուցանել է, որ մեզ համար կարևոր բաներով ուրիշների հետ կիսվելն անսովոր երևույթ չէ: Դիտեք «Կիսվելու բարիքներ» տեսանյութը (2:21) հետևյալ հղումով՝ ChurchofJesusChrist.org կամ կարդացեք ստորև ներկայացվող խոսքերը:

Good Things to Share

Այլ մարդկանց հետ կիսվելը այն բաներով, որոնք մեզ համար առավել կարևոր են կամ օգնել են մեզ, բոլորովին էլ անսովոր չէ:

Այս նույն օրինակը հատկապես ակնառու է մեծ հոգևոր կարևորություն և հետևանք ունեցող հարցերում: …

Հրավերները, որոնք մենք հղում ենք ձեզ՝ մեր ուղերձն ընկալելու և փորձելու վերաբերյալ, գալիս են այն դրական ազդեցություններից, որոնք Հիսուս Քրիստոսի ավետարանը թողել է մեր կյանքում: Երբեմն մենք գուցե տարօրինակ, բուռն կամ նույնիսկ անդրդվելի լինենք մեր փորձերում: Մեր պարզ ցանկությունն է կիսվել ձեզ հետ այն ճշմարտություններով, որոնք մեծագույն արժեք ունեն մեզ համար: (Դեյվիդ Ա. Բեդնար, «Եկեք և տեսեք», Լիահոնա, նոյեմբեր 2014թ., 109, 110)

1-5 միավորով գնահատեք, թե հետևյալ պնդումները որքանով են ճիշտ ձեզ համար (1-ը ճիշտ չէ ձեզ համար, իսկ 5-ը՝ շատ ճիշտ է ձեզ համար).

Կարող եք ուսանողներին ցուցադրել ստորև ներկայացվող պնդումները, երբ նրանք խորհում են իրենց կյանքի մասին:

• Փրկիչ Հիսուս Քրիստոսի և Նրա ավետարանի մասին ճշմարտությունները մեծ արժեք ունեն ինձ համար:

• Ես ցանկանում եմ ուրիշների հետ կիսվել Նրա ավետարանով:

Մոսիայի որդիների կյանքն ու օրինակները ուսումնասիրելիս խորհեք Փրկչի ավետարանով կիսվելու ձեր ցանկության մասին: Փնտրեք հայտնություն՝ իմանալու, թե Տերն ինչ քայլեր կցանկանար, որ ձեռնարկեիք, որպեսզի ավետարանով կիսվելն ավելի մեծ նշանակություն ունենար ձեզ համար, և ավետարանով կիսվելու ձեր ցանկությունը մեծանար:

Մոսիայի որդիները

Հիշեք, որ դարձից հետո Մոսիա թագավորի որդիները քարոզում էին ավետարանն իրենց երկրում՝ ձգտելով շտկել իրենց սխալները (տես Մոսիա 27.32–37):

Կարդացեք Մոսիա 28.1–5 հատվածները և փնտրեք, թե ինչ էին ցանկանում Մոսիայի որդիները և ինչու: (Կարող եք ձեր սուրբ գրքերում նշել այն, ինչ կգտնեք:)

• Այդ հատվածներում ո՞ր բառերը կամ արտահայտություններն էին տպավորիչ ձեզ համար: Մոսիայի որդիները Լամանացիների հետ ավետարանով կիսվելու ի՞նչ պատճառներ ունեին:

  Մի քանի ուսանողի կարող եք առաջարկել կիսվել իրենց գտածով:

• Դրանք ինչո՞ւ կարող են ավետարանով կիսվելու խթանող պատճառներ լինել:

• Ի՞նչ ճշմարտություններ սովորեցիք այս հատվածներից:

Ուսանողները կարող են տարբեր սկզբունքներ նշել: Եթե ուսանողները չնշեն ստորև ներկայացվող թավագիր սկզբունքը, կարող եք տալ հետևյալ հարցերը. Ավետարանով կիսվելու մեր ցանկությունն ի՞նչ կապ կարող է ունենալ մեր անձնական դարձի հետ: Ինչո՞ւ։

Այս հատվածներից մեր սովորած ճշմարտություններից մեկը հետևյալն է. որքան խորանում է մեր դարձը դեպի Տերը, այնքան մեծանում է ավետարանով կիսվելու մեր ցանկությունը:

Առաջին Նախագահությունից նախագահ Դալլին Հ. Օուքսը հաստատել է այս ճշմարտությունը, երբ ուսուցանում էր հետևյալը.

Ավետարանով կիսվելու մեր ցանկության մեծությունը մեր անձնական դարձի գալու աստիճանը որոշելու հրաշալի ցուցիչ է (Դալլին Հ. Օուքս, «Կիսվեք Ավետարանով», Ensign, նոյեմբեր 2001թ., 7):

• Մոսիայի որդիներն ի՞նչ փորձառություններ ունեցան, որոնք օգնեցին նրանց դարձի գալ դեպի Հիսուս Քրիստոսը և Նրա ավետարանը (տես Մոսիա 27.34–36, 28.4):

  Կարող եք հետևյալ հարցերը ցուցադրել ուսանողներին, որպեսզի նախքան պատասխանելը խորհեն այդ հարցերի շուրջ և պատասխանեն դրանց իրենց օրագրերում:

• Ի՞նչ փորձառություններ են օգնել ձեզ կամ ձեզ ծանոթ մարդկանց՝ ավելի շուտ դարձի գալու դեպի Հիսուս Քրիստոսը և Նրա ավետարանը:

• Ի՞նչն եք սիրում Հիսուս Քրիստոսի և Նրա ավետարանի վերաբերյալ, որով ցանկանում եք կիսվել ուրիշների հետ: (Օրինակ՝ գուցե Փրկչի ներման, Աստծո սիրո, աղոթքի հետ կապված կարևոր փորձառություններ եք ունեցել:)

Նույնիսկ դեպի Տերը դարձի եկած ժամանակ կարող ենք ունենալ պատճառներ, թե ինչու ավետարանով կիսվելը կարող է, այնուամենայնիվ, դժվար լինել:

• Եթե Մոսիայի որդիներից մեկը լինեիք, Լամանացիներին ավետարանը քարոզելու հետ կապված ի՞նչ մտահոգություններ կունենայիք:

Որպես նրանց հայր և թագավոր՝ Մոսիան բազմաթիվ պատճառներ ուներ անհանգստանալու, երբ որդիներին ուղարկում էր Լամանացիներին ավետարանը քարոզելու: Մոսիա թագավորը վախենում էր ոչ միայն իր որդիների անվտանգության, այլև այն բանի համար, որ եթե որդիները հեռանային, նա ժառանգ չէր ունենա որպես նեփիացիների հաջորդ թագավոր կարգելու համար:

Կարդացեք Մոսիա 28.6–8 հատվածները և փնտրեք, թե ինչու Մոսիան թույլ տվեց իր որդիներին այդպիսի վտանգավոր առաքելություն կատարել:

• Տերն ի՞նչ օրհնություններ խոստացավ Մոսիային

Ձեր հաջորդ քայլերը

Թվարկեք, թե դուք կամ ուրիշները ավետարանով կիսվելու հետ կապված ինչ մտահոգություններ կարող եք ունենալ:

Ուսանողների պատասխանները գրի առեք գրատախտակին: Որոշեք, թե որը կլինի լավագույնը. ընտրել մեկ մտահոգություն, որի վրա կկենտրոնանա ամբողջ դասարանը, թե հանձնարարել ուսանողներին աշխատել անհատապես կամ փոքր խմբերով:

Ընտրեք այս մտահոգություններից մեկը և սուրբ գրություններն ուսումնասիրելիս աղոթեք՝ ուղղորդում ստանալու համար։ Մտածեք, թե ինչպես հաղթահարել այդ մտահոգությունը: Օրինակ, եթե ընտրել եք ստորև ներկայացվող մտահոգություններից մեկը, կարող եք խորհել հարցերի շուրջ և ուսումնասիրել պնդումներից հետո ներկայացված սուրբ գրությունները:

Կարող եք ցուցադրել հետևյալ պնդումները կամ գրել դրանք գրատախտակին:

Ես վստահ չեմ, որ բավարար չափով դարձի եմ եկել՝ ավետարանով կիսվելու համար: Մոսիայի որդիների օրինակն ինչպե՞ս կարող է օգնել ձեզ: (տես Մոսիա 28.1–5) Հետևյալ հատվածներից մի քանիսը կարդալու ընթացքում փնտրեք եղանակներ, որոնցով կարող եք ավելի լավ դարձի գալ. Գործք 3.19, Հակոբոս 5.20, Ենովս 1.2–5, Մոսիա 3.19, 5.2, 27.25, Ալմա 5.12–14, 22.15–18, 53.10, Հելաման 15.7, 3 Նեփի 9.20:

Ես վախենում եմ մերժվելուց: Մոսիա 28.2–4 հատվածում վերանայեք, թե Մոսիայի որդիներն ինչ պատճառներով էին ցանկանում կիսվել ավետարանով, նույնիսկ երբ շատերը կարծում էին, թե Լամանացիները հակված չեն ընդունելու այն: Այդ պատճառներն ինչպե՞ս կարող են օգնել ձեզ: Մտածելով այն մասին, թե ինչ է արել Փրկիչը ձեզ համար (և կարող է անել ուրիշների համար), ինչպե՞ս կարող եք օգնել ձեզ հաղթահարել ձեր վախը:

Ես ավետարանով ապրելու լավագույն օրինակը չեմ եղել: Նախքան դարձի գալը Մոսիայի որդիներն ավետարանի դեմ էին քարոզում (տես Մոսիա 27.8–10), սակայն ապաշխարելուց հետո նրանք դարձան Մորմոնի Գրքի ամենալավ միսիոներներից մի քանիսը (տես Ալմա 17.4): Նրանց օրինակն ի՞նչ է ոգեշնչում ձեզ անել: Սուրբ գրություններից ի՞նչ այլ օրինակներ կարող եք մտաբերել, որոնք կարող են օգնել:

Մի քանի ուսանողի առաջարկեք կիսվել գտածով, և ինչպես կարող է գտածն օգնել փարատել մտահոգությունը:

Երբ ուսանողները խորհում են և իրենց օրագրերում պատասխանում են, կարող եք նրանց ցուցադրել ստորև ներկայացվող նախադասությունները:

• «Մոսիայի որդիներից իմ սովորած ամենակարևոր բաներից մեկն է՝ …»

• «Ես զգում եմ, որ Մոսիայի որդիների օրինակին հետևելու համար Տերը կկամենա, որ …»

• «Որպեսզի արդյունավետ գործողություններ ձեռնարկեմ դրա համար, ես կարող եմ …»

Ուսանողներին առաջարկեք կիսվել: Կարող է օգտակար լինել դասն ավարտել՝ կիսվելով ձեր վկայությամբ, զգացողություններով և տպավորություններով կամ առաջարկելով մեկ-երկու ուսանողի կիսվել:

Բացատրական և պատմական տեղեկություններ

Ինչպե՞ս կարող եմ ուրիշների հետ ավելի արդյունավետորեն կիսվել ավետարանով:

Տասներկու Առաքյալների Քվորումի նախագահի պաշտոնակատար նախագահ Մ. Ռասսել Բալլարդը մի արդյունավետ եղանակ է առաջարկել, որով Եկեղեցու անդամները կարող են կիսվել ավետարանով.

Անդամների հաջող միսիոներական աշխատանքի գաղտնիքը հավատքի գործադրումն է: Տիրոջ և Նրա խոստումների հանդեպ ձեր հավատքը ցուցադրելու եղանակներից մեկն է՝ աղոթքով օր ընտրել, որպեսզի որևէ մեկին նախապատրաստեք միսիոներների հետ հանդիպման: Ես հարյուրավոր նամակներ եմ ստացել այն անդամներից, որոնք գործադրել են իրենց հավատքը այս հասարակ եղանակով: Թեև ընտանիքներում չկար որևէ մեկը, ում հետ նրանք կարող էին կիսվել ավետարանով, նրանք նշանակել են օր, աղոթել են և հետո խոսել են ավելի շատ մարդկանց հետ: Տերը Բարի Հովիվն է, և Նա գիտի Իր ոչխարներին, որոնք պատրաստվել են լսելու Իր ձայնը: Նա կառաջնորդի մեզ, երբ Նրա ավետարանով կիսվելիս դիմենք Նրա աստվածային օգնությանը: (Մ. Ռասսել Բալլարդ, «Ստեղծել ավետարանով կիսվելու տուն», Լիահոնա, մայիս 2006թ., 86)

Ինչպե՞ս կարող եմ խորացնել իմ դարձը:

Յոթանասունից երեց Առնուլֆո Վալենզուելան ստորև ներկայացվող խոսքերում հաստատել է նախագահ Նելսոնի ուսմունքները ջանքերի և դարձի մասին.

Նախագահ Ռասսել Մ. Նելսոնը մեզ վերջերս սովորեցրել է․ «Որևէ բան լավ անելու համար ջանքեր են պահանջվում: Հիսուս Քրիստոսի ճշմարիտ աշակերտ դառնալու համար նույնպես ջանքեր են պահանջվում։ Ձեր հավատքը մեծացնելու և Նրան վստահելու համար ջանքեր են պահանջվում»։ Հիսուս Քրիստոսի հանդեպ մեր հավատքը մեծացնելու համար մեզ տրված առաջարկություններից մեկն այն է, որ մենք դառնանք ներգրավված սովորողներ, ընկղմվենք սուրբ գրքերի մեջ՝ ավելի լավ հասկանալով Քրիստոսի առաքելությունն ու ծառայությունը: (Տես «Քրիստոսը հարություն է առել․ Նրա հանդեպ հավատքը սարեր կտեղաշարժի», Լիահոնա, մայիս 2021 թ․, 103։) (Առնուլֆո Վալենզուելա, «Խորացնենք մեր դարձը դեպի Հիսուս Քրիստոսը», Լիահոնա, նոյեմբեր 2021թ., 59)

Օժանդակ ուսումնական վարժություններ

Լրացուցիչ մտահոգություն

Եթե օգտակար լինի, կարող եք վերևում ներկայացված «Ձեր հաջորդ քայլերը» վերնագրի տակ առաջարկվող վարժության մեջ ներառել նաև հետևյալ մտահոգությունը.

Ես չեմ կարծում, որ ճիշտ բան կասեմ: Կարող եք կարդալ Ենովքի (տես Մովսես 6.27, 31–34) և Մովսեսի մասին (տես Ելից 4.10–12): Ի՞նչ ուսուցանեց Տերը նրանց: Նրանց օրինակն ինչպե՞ս կարող է օգնել ձեզ:

Հիշատակարանները պահելու զորությունը և կարևորությունը

Մոսիա 28 գլխի մնացած մասն ավարտվում է՝ բացատրելով, որ Մոսիան տեսանողի իր ունակությամբ թարգմանեց հարեդացիների հիշատակարանը՝ այն թիթեղները, որոնք գտնվել էին Զարահեմլայի երկիրը գտնելու համար Լիմքի թագավորի ուղարկած խմբի կողմից (տես Մոսիա 8.7–9): Կարող եք ուսանողներին առաջարկել կարդալ Մոսիա 28.11–19 հատվածները և փնտրել արտահայտություններ, որոնք ցույց են տալիս մարդկանց զգացողություններն այդ հիշատակարանների հանդեպ: Ըստ ձեզ՝ նրանք ի՞նչ սովորեցին այդ մարդկանցից: Դա ինչպե՞ս է առնչվում ձեզ կամ սուրբ գրությունների հանդեպ ձեր ունեցած զգացմունքներին:

Հիշատակարանների թարգմանումը

Մոսիա 28.13–16 հատվածները որոշ պատկերացում են տալիս այն մասին, թե Մոսիան ինչպես և ինչու կարողացավ թարգմանել հիշատակարանները: Եթե ուսանողները հարցեր ունենան այս գործընթացի մասին, կարող եք առաջարկել նրանց ուսումնասիրել Մոսիա 8.13–18 հատվածները և «Մորմոնի Գրքի թարգմանությունը» Ավետարանական թեմաներում, որոնք հասանելի են այստեղ՝ ChurchofJesusChrist.org: Ուսանողներին խրախուսեք կիսվել իրենց սովորածով:

Այլ երիտասարդներից սովորեք դարձը խորացնելու և ավետարանով կիսվելու ջանքերը լավացնելու մասին

«Երիտասարդները կիսվում են իրենց փորձառությամբ» տեսանյութը (7:59), որը հասանելի է այստեղ՝ ChurchofJesusChrist.org, երիտասարդների փորձառությունների զորեղ օրինակներ է ներկայացնում, որոնք ուսանողները կարող են կիրառել իրենց դարձը խորացնելու և ավետարանով կիսվելու իրենց ջանքերում: Ուսանողները կարող են դիտել այդ տեսանյութը և թվարկել ավետարանով կիսվելու այն եղանակները, որոնք նշում են երիտասարդները:

Youth Share Their Experiences