Мозая 27:24–37

“Бурханаар төрлөө”

Залуу Алмагийн болон Мозаягийн хөвгүүдийн наманчлал нь өөрчлөгдөх боломжтой эсэхийг гайхаж буй хүн бүрд итгэл найдвар өгч чадна. Аврагч “адгийн нүгэлтнүүд” (Мозая 28:4) хэмээн дүрслэгдсэн эдгээр залуу эрэгтэйд “зөв шударга байдалд” (Мозая 27:25) өөрчлөгдөхөд нь тусалсан. Энэ хичээл наманчлахад тань, Аврагч таны зүрх сэтгэлийг өөрчилж чадна гэдэгт итгэхэд тусалж чадна.

Суралцагчдад Есүс Христийг таньж мэдэхэд нь туслах. Суралцагчид өөрсдөө Аврагчийг таньж мэддэг болсон үедээ Түүнээс суралцаж, Түүн шиг болохыг ухамсарлаж хичээх болно. Тэд амьдралынхаа туршид Түүнээс тусламж, итгэл найдвар, эдгэрлийг хүлээн авч сурна. Тэд Бурханы хайрыг мэдрэх боломжтой болно.

Суралцагчийн бэлтгэл: Суралцагчдыг байгаль дээр эрс өөрчлөгддөг (авгалдай эрвээхэй болж хувирдаг шиг) зүйлийн тухай бодоход урь. Тэд ангийнхандаа үзүүлэхээр ямар нэг зүйлийн зургийг авч болно.

Боломжит суралцах үйл ажиллагаа

Өөрчлөлт

Ижил зүйл байх нь бараг боломжгүй юм шиг санагддаг байгаль дээр эрс өөрчлөгддөг зүйлийн тухай бодохыг хичээ. Дараах зураг дээр нэг жишээг харуулсан байгаа.

Цэцгийн дэлбээ жимс, нэг үр том мод болдог шиг байгаль дээр эрс өөрчлөгддөг зүйлийн тухай хуваалцахад суралцагчдыг урь. Дараах асуултуудыг асуух үедээ энэ зургийг харуул.

• Авгалдай эрвээхэй болж хувирч байгааг хэрхэн сүнслэг ахиц дэвшилтэйгээ адилтгаж болох вэ?

• Бурхан хэрхэн бидэнд өөрчлөгдөж, Өөртэй нь адил болох боломжийг олгосон бэ?

Бурхантай илүү адил болох ахиц дэвшлийн талаараа хэсэг зуур бод. Өөрийнхөө талаар өөрчилмөөр эсвэл сайжруулахыг хүсэж буй зүйл танд бий юү? Эдгээр хүссэн өөрчлөлтийг бүтээхэд танд ямар саад бэрхшээл тулгарч болох вэ?

Өнөөдөр та залуу эрэгтэйчүүдийн амьдралд Аврагчийн хийсэн гайхамшигт өөрчлөлтийг судлах болно. Судалж байхдаа Аврагч танд ч мөн адил өөрчлөгдөхөд тань хэрхэн тусалж чадах тухай Сүнсний өдөөлтийг сонс.

Залуу Алма ба Мозаягийн хөвгүүд

Дараах зургийг дэлгэцэд харуулж, нэг суралцагчаас энэ зургийн дүрсэлсэн түүхийг ангийнханд сануулахыг хүс. Хэрэгтэй бол дараах догол мөр дээрх мэдээллийг ашигла.

Бурхан Алмагийн залбиралд хариулдаг түүхийг агуулсан Мозая 27-ийн эхний хэсгийг эргэн сана. Залуу Алмаг болон Мозаягийн хөвгүүдийг өөрсдийнх нь зам алдаатай гэдэгт итгүүлэхийн тулд Бурхан тэнгэр элчийг илгээсэн. Энэ үйл явдлын дараа Залуу Алма хэдэн өдрийн турш хөдөлж, ярьж чадсангүй (Moзая 27:19, 23-ыг үзнэ үү). Энэ хугацаанд тэрээр нүглийнхээ төлөөсөнд үгээр хэлэхийн аргагүй зовлон шаналлыг туулав. Эцэст нь тэр ярьж чаддаг болсныхоо дараа Их Эзэн түүний төлөө юу хийснийг тайлбарласан.

Дараахыг хичээлийн туршид ашиглахын тулд ангийнхандаа зориулан самбар дээр хийхэд нэг суралцагчийг урь.

“Есүс Христээр дамжуулан өөрчлөлт хийх боломжтой” гэсэн үгсийг цаасны дээд талд бич. Хоёр босоо шугам татаж, цаасыг гурван тэнцүү хэсэгт хуваа. Зүүн талын хэсгийг “өмнө нь”, голын хэсгийг “Есүс Христийн үүрэг”, баруун талыг “дараа нь” гэж тэмдэглэ.

Дараах судраас судлах хэсэгт ангийнхны талыг 8–10-р шүлэг, нөгөө талыг 32–37-р шүлэг-ийг уншихад урь. Олж мэдсэн зүйлийнхээ талаар самбар дээр бичихийг тэднээс хүс.

Мозая 27:8–10; 28:4-ийг уншаад, Залуу Алма мөн Мозаягийн хөвгүүд өмнө нь ямар байсныг давтан хар. Цаасан дээрх хүснэгтийн “өмнө нь” гэсэн баганад тэдний тайлбарыг бич.

Одоо Мозая 27:32–37-г уншаад, “дараа нь” гэсэн баганад тэднийг хэн болсон тухай бич.

Аврагчид итгэж наманчилсан хүнээс олж харсан өөрчлөлтийн тухай эргэцүүлэн бодохын тулд түр зогс. (Та өөрийнхөө тухай бодсон ч болно.) Багануудад тэд (эсвэл та) өмнө нь ямар байсан, өөрчлөлтийн дараа ямар болсон тухай тайлбарыг нэм.

Суралцагчдыг самбарт гаргаж, багана бүрийн дор бодсон хүнээсээ олж харсан өөрчлөлтийн тухай нэг зүйл бичихэд урь.

Мозая 27:23–26-г уншаад, бидний Аврагчтай адил болох шаардлагатай өөрчлөлтийг тайлбарласан үг хэллэгийг хайж ол. Эгэл (25-р шүлэг) гэх үг нь ертөнцийн мөн сэтгэлийн гэсэн утгатай байж болох ба “[Бурханы] хөвгүүд мөн охид болдог” (25-р шүлэг) гэсэн хэллэг нь “Бурханы хаант улсыг өвлөн авдаг” (26-р шүлэг) хүмүүсийг илтгэж буйг мэдэх нь тустай байж болох юм.

Цаасан дээрх “Есүс Христийн үүрэг” баганад өөрт онцгой санагдсан үг хэллэгээ бич. Ямар утгатай болохыг нь цаг гарган тунгаан бод. Шаардлагатай бол Судруудын удирдамжаас илүү сайн ойлгохыг хүссэн үгээ хайж ол.

Суралцагчдаас ямар утгатай, ямар үг хэллэг бичсэнээ хуваалцахыг хүс. Та мөн эдгээр нь Аврагч руу ирсэн хүмүүсээс олж харсан өөрчлөлтүүдийг хэр сайн дүрсэлсэн болохыг асууж болно. Суралцагчдын олсон үг хэллэгүүдэд дараах зүйл багтсан байж болох юм. Үүнд:

Их Эзэнээр гэтэлгэгдсэн

Сүнсээр төрөх

Бурханаар төрөх

Эгэл байдлаасаа өөрчлөгдсөн

Түүний хөвгүүд мөн охид болдог

Шинэ бүтээлүүд болдог

Эдгээр шүлэгт Есүс Христийн Цагаатгалаар дамжуулан бүх хүн төрөлхтөн өөрчлөгдөх ёстой гэсэн нэг үнэнийг заадаг.

Есүс Христийн зургийг самбарын голд байрлуулж, дараах асуултуудыг асуу.

• Есүс Христээр дамжин бий болох өөрчлөлтийг дүрсэлсэн аль үг хэллэг танд хамгийн их утга учиртай байдаг вэ? Яагаад?

• Аврагчийн өршөөлийг хүлээн авах нь биднийг хэрхэн өөрчлөх вэ?

• 24-р шүлэгт өгүүлснээр, Аврагчийг биднийг өөрчлөхөд урихын тулд биднээс юу шаардлагатай вэ?

Өөрчлөлт бол үйл явдал биш, харин үйл явц юм.

Арван хоёр төлөөлөгчийн чуулгын ахлагч Нийл Л.Андэрсэн ийн заасан.

Зарим хүний хувьд наманчлалын үйл явц нь Алмад тохиолдсон шиг илэрхий болж болох ч энэ нь дүрэм ёсоор гэхээсээ илүү онцгой тохиолдол юм. Бидний ихэнх маань илүү сайн сайхан байдал, гэрээнүүддээ илүү үнэнч байх, илүү их үйлчлэл болон амлалт руу алхам алхмаар, аажим аажмаар урагшилдаг. (Neil L. Andersen, The Divine Gift of Forgiveness [2019], 11)

• Ахлагч Андэрсэны мэдэгдлийг санаж байх нь яагаад чухал вэ?

Бидний наманчилж, Их Эзэнээр аажмаар өөрчлөгдөхийн тулд хийж болох зарим үйлдлийг жагсаан бичихэд цаг гарга. (Санаа авахын тулд ахлагч Андэрсэны дээрх мэдэгдлийг дахин уншаад, дараах шүлгүүдийн заримыг унш: Мозая 26:29; 27:35; Алма 36:18; 3 Нифай 9:22; Сургаал ба Гэрээ 6:9; 58:42–43).

• Их Эзэн рүү эргэж, наманчлахын тулд бид юу хийж чадах вэ?

• Эдгээр хүчин чармайлт нь бидэнд Аврагчаар дамжуулан аажмаар өөрчлөгдөхөд хэрхэн тусалж чадна гэж та бодож байна вэ?

 

Мозая 27-д Аврагчид итгэлээр наманчилж буй хэнийг ч өөрчлөх Түүний хүч ба хүслийг харуулсан түүхийг гэрчил.

Судлах тэмдэглэлдээ дараахыг хийж гүйцэтгэхэд суралцагчдыг урь.

Цаг гарган, энэ хичээл танд хэрхэн хамаатай болох талаар тунгаан бод. Судлах тэмдэглэл дээрээ дараах асуултуудын талаар бодлоо бич.

1. Аврагч танд ямар өөрчлөлт хийхэд тусалсан бэ? Та өөрийн хичээл зүтгэл, Их Эзэний тусламжийн талаар ямар бодолтой байдаг вэ?

2. Наманчилж, Өөрийнх нь тусламжтайгаар үргэлжлүүлэн өөрчлөгдөхөд тань Их Эзэний хүсэж буй, таны хийх дараагийн алхам юу вэ?

3. Энэ үйл явц дунд танд ямар саад бэрхшээл тулгарч болох вэ мөн та тэдгээрийг даван туулахдаа туслуулахын тулд хэрхэн Их Эзэнд хандаж чадах вэ?

Тайлбар ба нөхцөл байдлын талаарх мэдээлэл

Яагаад би амьдралдаа Залуу Алмад тохиолдсон шиг гайхамшигт өөрчлөлтийг үзээгүй юм бэ?

Арван хоёр төлөөлөгчийн чуулгын ахлагч Д.Тодд Кристоффэрсон ийн тайлбарласан.

Энэ хүчирхэг өөрчлөлт яагаад надад илүү хурдан гарахгүй байгаа юм бэ? гэж та өөрөөсөө асууж магадгүй юм. Та хаан Бенжамины хүмүүсийн мөн Алмагийн болон судар дахь бусад хүний онцгой жишээнүүд нь онцгой тохиолдлууд байсан төдийгүй байнга тохиолддоггүйг санах хэрэгтэй. Бидний ихэнхэд өөрчлөлт нь алгуур, урт удаан хугацаанд явагддаг. Дахин төрнө гэдэг нь хүүхэд төрөхтэй адилгүй бөгөөд нэг удаагийн үйл явдал биш, харин урт хугацааны үйл явц юм. Энэхүү үйл явцыг туулах нь мөнх бус амьдралын гол зорилго юм.

… Та нар сүнсээр дахин төрөх замаар цааш алхсанаар Есүс Христийн цагаатгагч ач ивээл та нарын гэм нүглийг болон гэм нүглийн хар толбыг авч, уруу таталтууд хүчгүй болж, Христээр дамжин та Түүн шиг мөн Эцэг шигээ ариун болох болно гэдгийг би гэрчилж байна. (D. Todd Christofferson, “Born Again,” Liahona, May 2008, 78)

Бурхан хайр энэрлээр дүүрэн атал бид яагаад наманчилж, өөрчлөгдөх шаардлагатай байдаг вэ?

Арван хоёр төлөөлөгчийн чуулгын ахлагч Жэффри Р.Холланд ийн заасан.

“Байгаагаараа л хүрээд ир” хэмээн хайрт Эцэг минь биднийг дууддаг бөгөөд “Байгаагаараа харин үлдэж болохгүй” гэж нэмж хэлдэг. Бид инээмсэглэн, Бурхан биднийг боддогоос маань илүү болгохоор шийдсэн гэдгийг санадаг. (Жэффри Р.Холланд, “Дуулсан ба дуулаагүй дуунууд,” 2017 оны 4-р сарын Ерөнхий чуулган, 36)

Нэмэлт суралцах үйл ажиллагаа

Наманчлалд, мөн өөрчлөлтөд цаг хугацаа ба олон удаагийн хүчин чармайлт шаардагдана.

Суралцагчдад Аврагчтай адил болохын тулд наманчилж, өөрчлөгдөх нь үйл явдал биш, үйл явц гэдгийг ойлгоход туслахын тулд анхны оролдлогоор төгс хийх боломжгүй ямар нэг зүйлийг хийхэд урь. Дараа нь тэднийг ажлаа олон удаа сайжруулж хийхэд урь. Жишээлбэл: Тэднээс өөрсдийн байшинг хурдан зурахыг хүсээд, дараа нь зураг дээрээ нэг зүйл нэмэхийг эсвэл яг адилхан болгохын тулд нэг зүйл өөрчлөхийг хүс. Суралцагчдаас энэ үйл явцыг хэр олон удаа давтаж чадахыг мөн зургийг сайжруулах боломжтой хэвээр байх эсэхийг асуу. Арван хоёр төлөөлөгчийн чуулгын ахлагч Д.Тодд Кристоффэрсоны дараах мэдэгдлийг хуваалцаад, суралцагчдаас энэ нь Мозая 27:24–26-д хэлсэн Алмагийн өөрчлөлттэй хэрхэн холбогдохыг асуу.

Бид ямар нэг том асуудлыг шийдэхийн тулд үүнийг олон хэсэг болгон, өдөр бүр нэг бага хэсэг дээр ажиллах хэрэгтэй. …

Шинэ бөгөөд эрүүл саруул дадал хэвшлийг зан байдалдаа төлөвшүүлэх эсвэл муу зуршил буюу донтолтыг даван туулах нь ихэнхдээ олон өдөр, сар, бүр олон жил үргэлжилж болох, өдөр тутмын, өөрөөр хэлбэл, өнөөдрөөс маргааш, маргаашаас нөгөөдөр тасралтгүй үргэлжлэх хүчин чармайлт байх нь олонтоо тохиолддог. … Өдөр бүр хэрэг болдог тусламжийнхаа төлөө бид Бурханд хандаж чаддаг тул үүнийг хийж чадна” (“Recognizing God’s Hand in Our Daily Blessings,” Ensign, Jan. 2012, 20–21).

Өргөст хэмх ба даршилсан өргөст хэмх

Аврагчтай адил болоход шаардлагатай өөрчлөлтийг ойлгоход суралцагчдад туслахын тулд тэднийг Арван хоёр төлөөлөгчийн чуулгын ахлагч Дэвид А.Бэднарын хэлсэн “Ye Must Be Born Again (Та дахин төрөх ёстой)” үгийн “Өргөст хэмх ба даршилсан өргөст хэмх” хэсгийг уншихад урь (Liahona, May 2007, 19).   Энэ санааг байгаль дээр өөрчлөгддөг зүйлсийн талаар хуваалцахын оронд хичээлийг эхлүүлэхэд ашиглаж болох юм.