« ម៉ូសាយ ២៨ ៖ ការប្រែចិត្តជឿផ្ទាល់ខ្លួន និង ការចែកចាយដំណឹងល្អ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤ )
« ម៉ូសាយ ២៨ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន
ម៉ូសាយ ២៨
ការប្រែចិត្តជឿផ្ទាល់ខ្លួន និងការចែកចាយដំណឹងល្អ
តើបទពិសោធន៍អ្វីខ្លះដែលអ្នកបានចែកចាយដំណឹងល្អរបស់ព្រះយេស៊ូវគ្រីស្ទ ? បន្ទាប់ពីការប្រែចិត្តជឿរបស់ពួកគេ ពួកបុត្រារបស់ម៉ូសាយបានចូលទៅគាល់ស្ដេចដើម្បីសូមការអនុញ្ញាតទៅផ្សាយដំណឹងល្អដល់ពួកសាសន៍លេមិន ។ ដំបូងស្ដេចម៉ូសាយបានទូលសួរព្រះអម្ចាស់ បន្ទាប់មកបានអនុញ្ញាតឲ្យពួកបុត្រារបស់ទ្រង់ទៅ ដើម្បីពួកទ្រង់អាចនាំព្រះបន្ទូលព្រះទៅកាន់ពួកសាសន៍លេមិន ( សូមមើល ម៉ូសាយ ២៨:១ ) ។ មេរៀននេះមានគោលបំណងជួយអ្នកបង្កើនបំណងប្រាថ្នារបស់អ្នកក្នុងការចែកចាយដំណឹងល្អ ។
សូមជួយសិស្សស្វែងរកភាពទាក់ទងគ្នានៅក្នុងសេចក្តីពិតនៃដំណឹងល្អ ។សិស្សមួយចំនួនអាចពិបាកមើលឃើញពីរបៀបដែលដំណឹងល្អទាក់ទងនឹងជីវិតប្រចាំថ្ងៃរបស់ពួកគេ ។ សូមស្វែងរកវិធីដើម្បីជួយពួកគេទទួលអារម្មណ៍ថា អ្វីដែលពួកគេកំពុងរៀនមានអត្ថន័យ និងមានប្រយោជន៍ចំពោះស្ថានភាពផ្ទាល់ខ្លួន សំណួរ និងតម្រូវការរបស់ពួកគេ ។
ការរៀបចំសិស្ស ៖ សូមពិចារណាអញ្ជើញសិស្សឲ្យនិយាយជាមួយបុគ្គលម្នាក់ដែលពួកគេជឿថា បានប្រែចិត្តជឿយ៉ាងជ្រាលជ្រៅចំពោះដំណឹងល្អរបស់ព្រះយេស៊ូវគ្រីស្ទ ។ តើអ្វីបានជួយបុគ្គលនោះឲ្យស្ថិតនៅលើផ្លូវនៃការប្រែចិត្តជឿរបស់គាត់ ? អ្នកក៏អាចនឹងពិចារណាអញ្ជើញសិស្សឲ្យវាយតម្លៃពីបំណងប្រាថ្នារបស់ពួកគេក្នុងការចែកចាយដំណឹងល្អផងដែរ ។
សកម្មភាពរៀនសូត្រដែលអាចមាន
ការចែកចាយ និងការប្រែចិត្តជឿ
សូមពិចារណាយក ឬបង្ហាញរូបភាពនៃអ្វីដែលអ្នកស្រឡាញ់ខ្លាំងរហូតដល់អ្នករីករាយនឹងចែកចាយវាជាមួយអ្នកដទៃ ។ សូមចែកចាយវត្ថុនេះជាមួយសិស្សមុននឹងសួរសំណួរបន្ទាប់ ។
-
តើមានអ្វីខ្លះដែលអ្នកស្រឡាញ់ខ្លាំងរហូតដល់អ្នកចង់ចែកចាយវាជាមួយអ្នកដទៃ ?
អែលឌើរ ដាវីឌ អេ បែដណា ក្នុងកូរ៉ុមនៃពួកសាវកដប់ពីរនាក់បានបង្រៀនថា វាមិនមែនជារឿងចម្លែកទេសម្រាប់យើងក្នុងការចែកចាយអ្វីដែលមានន័យសម្រាប់យើង ។ សូមមើលវីដេអូ « Good Things to Share » ( ២:២១ ) ដែលមាននៅលើ ChurchofJesusChrist.orgឬអានសេចក្តីថ្លែងការណ៍ខាងក្រោម ។
Good Things to Share
Sharing what matters most is not unusual at all. What good things will you share?
ការចែកចាយជាមួយអ្នកដទៃនូវអ្វីដែលមានអត្ថន័យបំផុតសម្រាប់យើង ឬបានជួយយើង គឺមិនធម្មតាទាល់តែសោះ ។
គំរូដូចគ្នានេះបង្ហាញឲ្យឃើញជាពិសេសនៅក្នុងបញ្ហាដែលមានសារៈសំខាន់ និងលទ្ធផលខាងវិញ្ញាណដ៏អស្ចារ្យ ។ …
ការអញ្ជើញដែលយើងផ្តល់ជូនដល់អ្នកដើម្បីរៀន និងសាកល្បងសាររបស់យើង កើតឡើងចេញពីឥទ្ធិពលវិជ្ជមានដែលដំណឹងល្អរបស់ព្រះយេស៊ូវគ្រីស្ទមាននៅក្នុងជីវិតរបស់យើង ។ ពេលខ្លះយើងអាចនឹងឆ្គង ឬរហ័សពេក ឬថែមទាំងតែមិនឈប់ឈរក្នុងការព្យាយាមរបស់យើង ។ បំណងប្រាថ្នាដ៏សាមញ្ញរបស់យើងគឺចង់ចែកចាយជាមួយអ្នកនូវសេចក្តីពិតដែលមានតម្លៃបំផុតសម្រាប់យើង ។ ( ដាវីឌ អេ បែដណា « Come and See » Liahona ខែ វិច្ឆិកា ឆ្នាំ ២០១៤ ទំព័រ ១០៩, ១១០ )
សូមវាយតម្លៃថា តើសេចក្តីថ្លែងការណ៍ខាងក្រោមនេះពិតសម្រាប់អ្នកនៅលើរង្វាស់ពី ១ ដល់ ៥ ( ដែល ១ មិនពិតសម្រាប់អ្នក និង ៥ គឺពិតខ្លាំងសម្រាប់អ្នក ) ៖
សូមពិចារណាបង្ហាញសេចក្តីថ្លែងការណ៍ខាងក្រោមសម្រាប់សិស្ស នៅពេលពួកគេសញ្ជឹងគិត និងពិចារណាអំពីជីវិតរបស់ពួកគេ ។
-
សេចក្តីពិតអំពីព្រះអង្គសង្គ្រោះព្រះយេស៊ូវគ្រីស្ទ និងដំណឹងល្អរបស់ទ្រង់មានតម្លៃខ្លាំងណាស់សម្រាប់ខ្ញុំ ។
-
ខ្ញុំមានបំណងចង់ចែកចាយដំណឹងល្អរបស់ទ្រង់ជាមួយអ្នកដទៃ ។
នៅពេលអ្នកសិក្សាពីព្រះជន្ម និងគំរូរបស់ពួកបុត្រារបស់ម៉ូសាយ នោះសូមសញ្ជឹងគិតពីបំណងប្រាថ្នារបស់អ្នកក្នុងការចែកចាយដំណឹងល្អរបស់ព្រះអង្គសង្គ្រោះ ។ សូមស្វែងរកវិវរណៈ ដើម្បីដឹងពីជំហានបន្ទាប់ដែលព្រះអម្ចាស់អាចសព្វព្រះទ័យឲ្យអ្នកធ្វើ ដើម្បីឲ្យដំណឹងល្អកាន់តែមានន័យសម្រាប់អ្នក និងបំណងប្រាថ្នារបស់អ្នកក្នុងការចែកចាយដំណឹងល្អកើនឡើង ។
ពួកបុត្រារបស់ម៉ូសាយ
សូមចាំថា បន្ទាប់ពីការប្រែចិត្តជឿរបស់ពួកទ្រង់ នោះពួកបុត្រារបស់ស្ដេចម៉ូសាយបានផ្សាយដំណឹងល្អនៅក្នុងទឹកដីរបស់ពួកទ្រង់ ដោយស្វែងរកការប៉ះប៉ូវកំហុសរបស់ពួកទ្រង់ ( សូមមើល ម៉ូសាយ ២៧:៣២–៣៧ ) ។
សូមអាន ម៉ូសាយ ២៨:១–៥ ដោយរកមើលអ្វីដែលពួកបុត្រារបស់ម៉ូសាយមានព្រះទ័យចង់បាន និងមូលហេតុ ។ ( អ្នកអាចចង់គូសចំណាំអ្វីដែលអ្នករកឃើញនៅក្នុងព្រះគម្ពីររបស់អ្នក ) ។
-
តើពាក្យ ឬឃ្លាណាខ្លះនៅក្នុងខគម្ពីរទាំងនេះដែលអ្នកចាប់អារម្មណ៍ ? តើពួកបុត្រារបស់ម៉ូសាយមានហេតុផលអ្វីខ្លះសម្រាប់ការចែកចាយដំណឹងល្អជាមួយនឹងពួកសាសន៍លេមិន ?
សូមពិចារណាអញ្ជើញសិស្សពីរបីនាក់ឲ្យចែកចាយអ្វីដែលពួកគេបានរកឃើញ ។
-
ហេតុអ្វីការណ៍ទាំងនេះអាចជាហេតុផលជំរុញទឹកចិត្តដើម្បីចែកចាយដំណឹងល្អ ?
-
តើសេចក្តីពិតអ្វីខ្លះដែលអ្នកបានរៀនពីខគម្ពីរទាំងនេះ ?
សិស្សអាចចែកចាយគោលការណ៍នៃសេចក្តីពិតជាច្រើន ។ ប្រសិនបើសិស្សមិនលើកឡើងអំពីគោលការណ៍ច្បាស់លាស់ខាងក្រោមទេ សូមពិចារណាសួរសំណួរខាងក្រោមនេះ ៖ តើបំណងប្រាថ្នាចែកចាយដំណឹងល្អរបស់យើងទាក់ទងនឹងការប្រែចិត្តជឿផ្ទាល់ខ្លួនរបស់យើងដូចម្តេច ? ហេតុអ្វី ?
សេចក្តីពិតមួយដែលយើងរៀនពីខគម្ពីរទាំងនេះគឺថា នៅពេលការប្រែចិត្តជឿរបស់យើងចំពោះព្រះអម្ចាស់កាន់តែស៊ីជម្រៅ នោះបំណងប្រាថ្នារបស់យើងក្នុងការចែកចាយដំណឹងល្អកើនឡើង ។
ប្រធាន ដាល្លិន អេក អូក ក្នុងគណៈប្រធានទីមួយបានបញ្ជាក់សេចក្តីពិតនេះ នៅពេលលោកបង្រៀនដូចដូចតទៅ ៖
ភាពខ្លាំងនៃបំណងប្រាថ្នារបស់យើងក្នុងការចែកចាយដំណឹងល្អគឺជាសូចនាករដ៏អស្ចារ្យមួយនៃទំហំប្រែចិត្តជឿផ្ទាល់ខ្លួនរបស់យើង ( ដាល្លិន អេក អូក « Sharing the Gospel » Ensign ខែ វិច្ឆិកា ឆ្នាំ ២០០១ ទំព័រ ៧ ) ។
-
តើពួកបុត្រារបស់ម៉ូសាយមានបទពិសោធន៍អ្វីខ្លះ ដែលបានជួយពួកទ្រង់ប្រែចិត្តជឿលើព្រះយេស៊ូវគ្រីស្ទ និងដំណឹងល្អរបស់ទ្រង់ ? ( សូមមើល ម៉ូសាយ ២៧:៣៤–៣៦; ២៨:៤ ) ។
សូមពិចារណាបង្ហាញសំណួរខាងក្រោមសម្រាប់សិស្សដើម្បីសញ្ជឹងគិត ឬឆ្លើយនៅក្នុងសៀវភៅកំណត់ហេតុការសិក្សារបស់ពួកគេមុននឹងឆ្លើយតប ។
-
តើបទពិសោធន៍អ្វីខ្លះដែលបានជួយអ្នក ឬអស់អ្នកដែលអ្នកស្គាល់ កាន់តែប្រែចិត្តជឿលើព្រះយេស៊ូវគ្រីស្ទ និងដំណឹងល្អរបស់ទ្រង់ ?
-
តើអ្នកស្រឡាញ់អ្វីខ្លះអំពីព្រះយេស៊ូវគ្រីស្ទ និងដំណឹងល្អរបស់ទ្រង់ ដែលអ្នកចង់ចែកចាយជាមួយអ្នកដទៃ ? ( ឧទាហរណ៍ ៖ អ្នកប្រហែលធ្លាប់មានបទពិសោធន៍ដ៏មានន័យជាមួយនឹងការអភ័យទោសរបស់ព្រះអង្គសង្គ្រោះ សេចក្តីស្រឡាញ់របស់ព្រះ ការអធិស្ឋានជាដើម )
សូម្បីតែនៅពេលយើងប្រែចិត្តជឿចំពោះព្រះអម្ចាស់ក៏ដោយ ក៏វាអាចមានហេតុផលដែលការចែកចាយដំណឹងល្អនៅតែពិបាកដែរ ។
-
ប្រសិនបើអ្នកជាបុត្រាម្នាក់របស់ម៉ូសាយ តើអ្នកអាចមានកង្វល់អ្វីខ្លះអំពីការផ្សាយដំណឹងល្អដល់ពួកសាសន៍លេមិន ?
ក្នុងនាមជាបិតារបស់ពួកទ្រង់ និងជាស្ដេច នោះម៉ូសាយមានហេតុផលជាច្រើនសម្រាប់ការព្រួយព្រះទ័យអំពីការបញ្ជូនពួកបុត្រារបស់ទ្រង់ទៅផ្សាយដំណឹងល្អដល់ពួកសាសន៍លេមិន ។ ស្ដេចម៉ូសាយមិនគ្រាន់តែខ្លាចអំពីសុវត្ថិភាពរបស់ពួកបុត្រាទ្រង់ប៉ុណ្ណោះទេ ទ្រង់ថែមទាំងខ្លាចថា ប្រសិនបើពួកបុត្រារបស់ទ្រង់ចាកចេញទៅ នោះទ្រង់នឹងគ្មានអ្នកស្នងរាជ្យជាស្ដេចបន្ទាប់របស់សាសន៍នីហ្វៃឡើយ ។
សូមអាន ម៉ូសាយ ២៨:៦–៨ ដោយរកមើលមូលហេតុដែលម៉ូសាយអនុញ្ញាតឲ្យពួកបុត្រារបស់ទ្រង់ទៅបំពេញបេសកកម្មដ៏គ្រោះថ្នាក់បែបនេះ ។
-
តើពរជ័យអ្វីខ្លះដែលព្រះអម្ចាស់បានសន្យានឹងម៉ូសាយ ?
ជំហានបន្ទាប់របស់អ្នក
សូមចំណាយពេលបន្តិច ដើម្បីធ្វើបញ្ជីអំពីកង្វល់ដែលអ្នក ឬអ្នកផ្សេងទៀតអាចមានអំពីការចែកចាយដំណឹងល្អ ។
សូមសរសេរចម្លើយរបស់សិស្សនៅលើក្ដារខៀន ។ សូមសម្រេចចិត្តថា តើវាល្អបំផុតក្នុងការជ្រើសរើសកង្វល់មួយសម្រាប់ថ្នាក់ទាំងមូលដើម្បីផ្តោតលើរួមគ្នា ឬដើម្បីឲ្យសិស្សធ្វើការរៀងៗខ្លួន ឬជាក្រុមតូចៗ ។
សូមជ្រើសរើសកង្វល់មួយក្នុងចំណោមកង្វល់ទាំងនេះ ហើយអធិស្ឋានសូមការណែនាំ នៅពេលអ្នកស្វែងរកបទគម្ពីរ ហើយសញ្ជឹងគិតពីរបៀបដើម្បីយកឈ្នះលើកង្វល់នេះ ។ ឧទាហរណ៍ ៖ ប្រសិនបើអ្នកមានកង្វល់មួយក្នុងចំណោមកង្វល់ខាងក្រោមនេះ អ្នកអាចសញ្ជឹងគិតពីសំណួរ ហើយសិក្សាបទគម្ពីរដែលបានមានបន្ទាប់ពីសេចក្ដីថ្លែងការណ៍ ។
សូមពិចារណាដាក់បង្ហាញសេចក្តីថ្លែងការណ៍ខាងក្រោម ឬសរសេរវានៅលើក្ដារខៀន ។
ខ្ញុំមិនប្រាកដថា ខ្ញុំបានប្រែចិត្តជឿគ្រប់គ្រាន់ដើម្បីចែកចាយដំណឹងល្អនោះទេ ។តើគំរូនៃពួកបុត្រារបស់ម៉ូសាយអាចជួយអ្នកយ៉ាងដូចម្ដេច ? ( សូមមើល ម៉ូសាយ ២៨:១–៥ ) ។ នៅពេលអ្នកអានខគម្ពីរមួយចំនួនខាងក្រោមនេះ សូមរកមើលវិធីដែលអ្នកអាចប្រែចិត្តជឿកាន់តែខ្លាំង ៖ កិច្ចការ ៣:១៩; យ៉ាកុប ៥:២០; អេណុស ១:២–៥; ម៉ូសាយ ៣:១៩; ៥:២; ២៧:២៥; អាលម៉ា ៥:១២–១៤; ២២:១៥–១៨; ៥៣:១០; ហេលេមិន ១៥:៧; នីហ្វៃទី៣ ៩:២០ ។
ខ្ញុំខ្លាចគេបដិសេធ ។សូមរំឭកឡើងវិញនៅក្នុង ម៉ូសាយ ២៨:២–៤ អំពីមូលហេតុដែលពួកបុត្រារបស់ម៉ូសាយសព្វព្រះទ័យចង់ចែកចាយដំណឹងល្អ ទោះជាមនុស្សជាច្រើនគិតថា ពួកសាសន៍លេមិនទំនងជាមិនទទួលយកដំណឹងល្អក៏ដោយ ។ តើហេតុផលទាំងនេះអាចជួយអ្នកយ៉ាងដូចម្តេច ? តើការគិតអំពីអ្វីដែលព្រះអង្គសង្គ្រោះបានធ្វើចំពោះអ្នក ( និងអាចធ្វើសម្រាប់អ្នកដទៃ ) អាចជួយអ្នកយកឈ្នះលើការភ័យខ្លាចរបស់អ្នកដោយរបៀបណា ?
ខ្ញុំមិនធ្វើជាគំរូល្អបំផុតនៃការរស់នៅតាមដំណឹងល្អនោះទេ ។មុនការប្រែចិត្តជឿរបស់ពួកទ្រង់ នោះពួកបុត្រារបស់ម៉ូសាយបានផ្សាយជំទាស់នឹងដំណឹងល្អ ( សូមមើល ម៉ូសាយ ២៧:៨–១០ ) ប៉ុន្តែបន្ទាប់ពីពួកទ្រង់ប្រែចិត្ត នោះពួកទ្រង់បានក្លាយជាអ្នកផ្សព្វផ្សាយសាសនាដ៏ជោគជ័យបំផុតនៅក្នុងព្រះគម្ពីរមរមន ( សូមមើល អាលម៉ា ១៧:៤ ) ។ តើគំរូរបស់ពួកទ្រង់ជំរុញអ្នកឲ្យធ្វើអ្វី ? តើមានគំរូអ្វីផ្សេងទៀតនៅក្នុងបទគម្ពីរដែលអ្នកអាចគិតដល់ ដែលអាចមានប្រយោជន៍ ?
សូមអញ្ជើញសិស្សមួយចំនួនឲ្យចែកចាយអ្វីដែលពួកគេបានរកឃើញ និងរបៀបដែលគំរូនោះអាចជួយលើការព្រួយបារម្ភទាំងនោះ ។
សូមពិចារណាបង្ហាញប្រយោគខាងក្រោមដល់សិស្ស នៅពេលពួកគេសញ្ជឹងគិត និងឆ្លើយតបនៅក្នុងសៀវភៅកំណត់ហេតុការសិក្សារបស់ពួកគេ ។
-
« រឿងសំខាន់បំផុតមួយដែលខ្ញុំបានរៀនពីពួកបុត្រារបស់ម៉ូសាយគឺ … »
-
« រឿងមួយដែលខ្ញុំទទួលអារម្មណ៍ថា ព្រះអម្ចាស់នឹងឲ្យខ្ញុំធ្វើដើម្បីធ្វើតាមគំរូនៃពួកបុត្រារបស់ម៉ូសាយគឺ … »
-
« ដើម្បីចាត់វិធានការឲ្យមានប្រសិទ្ធភាពលើរឿងនេះ ខ្ញុំអាច … »
សូមអញ្ជើញសិស្សមួយចំនួនឲ្យចែកចាយ ។ វាអាចមានប្រយោជន៍ក្នុងការបញ្ចប់ដោយចែកចាយទីបន្ទាល់ អារម្មណ៍ និងចំណាប់អារម្មណ៍របស់អ្នក ឬដោយការអញ្ជើញសិស្សម្នាក់ ឬពីរនាក់ឲ្យធ្វើដូច្នេះផងដែរ ។