Ալմա 1.1–18

Քահանանենգության չարիքները

Նեորը քարոզում է

Մենք ապրում ենք մի աշխարհում, որտեղ մարդիկ իրենց անձն ու գաղափարները գովազդում են անձնական գովասանքի և օգուտի համար։ Այս կեղծ գործելակերպերին հավատալու արդյունքում շատ մարդիկ մեղանչում և մերժում են իրենց Փրկչին՝ Հիսուս Քրիստոսին։ Այդպես եղավ նաև նեփիացիների հետ։ Նեոր անունով մի մարդ կեղծ վարդապետություն էր ուսուցանում, որի հետևանքով նրա ժամանակների և գալիք տարիների մարդիկ մերժում էին իրենց Փրկչին։ Այս դասը կօգնի ձեզ ճանաչել և մերժել այն կեղծ ուսմունքները, որոնք կարող են հեռացնել ձեզ Հիսուս Քրիստոսից։

Կենտրոնացեք Հիսուս Քրիստոսի վրա։ Ուսանողների ուշադրությունը կենտրոնացրեք Փրկչի և Նրա ավետարանի, այլ ոչ թե ձեր անձի վրա։ Յոթանասունի Քվորումից երեց Փոլ Վ. Ջոնսոնը դիտարկել է․ «Եթե ձեր ուսուցիչները զերծ են քահանանենգությունից, ուսանողները կսիրեն նրանց, բայց կախված չեն լինի նրանցից։ Նրանք կսիրեն ձեզ և շնորհակալ կլինեն ձեզ ձեր ուսուցանածի համար, բայց նրանք կդառնան դեպի Տերը (Փոլ Վ. Ջոնսոն, «Քահանանենգության վտանգները», Կրոնի ուսուցիչ 9, համար 3 [2008]՝ 11)։

Ուսանողի նախապատրաստում․ ուսանողները կարող են ուսումնասիրել «Աստծո խոսքը կարող է օգնել ինձ ճանաչել և մերժել կեղծ վարդապետությունը» հատվածը « Հունիսի 3-9-ը։ Մոսիա 29–Ալմա 4․ «Նրանք հաստատուն էին և անխախտ » համառոտ շարադրանքում՝ Եկ, հետևիր ինձ․ անհատների և ընտանիքների համար, Մորմոնի Գիրք 2024-ում։

Հնարավոր ուսումնական վարժություններ

Կեղծ ուսմունքներ

Ուսանողներին հանձնարարեք անհատականորեն կատարել ստորև ներկայացվող ինքնագնահատման վարժությունը։ Ցուցադրեք կամ բարձրաձայն կարդացեք պնդումները և ուսանողներին խնդրեք մտածել իրենց պատասխանների մասին։

• 1-5 սանդղակով (որտեղ 1-ը նշանակում է բոլորովին համաձայն չեմ, իսկ 5-ը՝ միանգամայն համաձայն եմ) գնահատեք, թե որքանո՞վ եք համաձայն կամ համաձայն չեք հետևյալ պնդումների հետ։ Ինչո՞ւ։

Ամեն օր ինձ ներկայացվող տեղեկատվության մեծ մասը ճիշտ է (օրինակ՝ սոցիալական ցանցերում, գովազդներում, հասարակության առաջնորդներից կամ ազդեցիկ մարդկանցից)։

Իմ ստացած տեղեկությունն ազդում է Հիսուս Քրիստոսի հանդեպ իմ ունեցած հավատքի վրա։

Աստված ինձ օգնություն է տվել, որպեսզի տարբերեմ ճիշտը կեղծիքից։

Մենք ապրում ենք բազմաթիվ կեղծ ուղերձներով աշխարհում, որոնք կարող են թուլացնել մեր հավատքն առ Հիսուս Քրիստոսը։ Ալմա 1 գլուխն ուսումնասիրելիս փնտրեք Հոգու ուղղորդումը, որպեսզի այն օգնի ձեզ ճանաչել ձեզ շրջապատող աշխարհի կեղծ ուսմունքները, որոնք կարող են հեռացնել ձեզ Հիսուս Քրիստոսից։

Մահից առաջ Մոսիա թագավորը կառավարման մի նոր ձև հաստատեց։ Թագավորներ ունենալու փոխարեն մարդիկ ընտրեցին դատավորներ՝ օրենքները կիրառելու համար։ Ալմա Կրտսերն ընտրվեց որպես առաջին գլխավոր դատավոր կամ կառավարիչ (տես Ալմա 2.16)։ Նա նաև քահանայապետն էր ու Եկեղեցու ղեկավարը (տես Մոսիա 29)։ Կառավարության փոխվելու պահից մարդիկ սկսեցին հետևել ժամանակին։

Դատավորների իշխանության առաջին տարում Նեոր անունով մի ամբարիշտ մարդ սկսեց ազդեցություն գործել նեփիացիների վրա։ Տասներկու Առաքյալների Քվորումից երեց Դ. Թոդ Քրիստոֆերսոնն ուսուցանել է, թե ինչու է Նեորի պատմությունն ընդգրկված Մորմոնի Գրքում։

Երեց Դ. Թոդ Քրիստոֆերսոն

Մորմոնի Գրքում կա մի պատմություն Նեոր անունով մարդու մասին: Հեշտ է հասկանալ, թե Մորմոնը, կրճատելով Նեփիացիների գրվածքների հազար տարիները, ինչու է կարևորել այս մարդու և նրա վարդապետության երկարատև ազդեցության մասին պատմությունը: Մորմոնը փորձում էր նախազգուշացնել մեզ, իմանալով, որ այդ փիլիսոփայությունը կրկին ջրի երես կգա մեր օրերում: (Դ. Թոդ Քրիստոֆերսոն, «Ապաշխարության աստվածային պարգևը», Լիահոնա, նոյեմբեր 2011թ․, 38)։

Կարդացեք Ալմա 1.2–6 հատվածները և փնտրեք, թե Նեորն ինչ էր ուսուցանում մարդկանց։ Կազմեք Նեորի ուսմունքների ցուցակը։ Դրանք անվանեք «Ճշմարիտ», «Կեղծ» կամ «Խառը»։

Ուսանողներին ներգրավելու համար կարող եք հանձնարարել նրանց՝ գրատախտակին թվարկել և անվանել Նեորի ուսմունքները։ Մի քանի ուսանողի առաջարկեք կիսվել իրենց մտքերով:

Հնարավոր է՝ նկատել եք, որ Նեորն իր կեղծ ուսմունքները խառնում էր ճշմարիտ խոսքերին։ Դա մի մարտավարություն է, որն օգտագործում է նաև սատանան։ Երբ Նեորին համեմատում ենք սատանայի հետ, իմանում ենք, որ սատանան միախառնում է սուտն ու ճշմարտությունը, որպեսզի մոլորեցնի մարդկանց և հեռացնի նրանց Հիսուս Քրիստոսից։

• Ի՞նչ վկայություն եք տեսնում այսօր դրա վերաբերյալ:

Տասներկու Առաքյալների Քվորումից երեց Դեյլ Գ. Ռենլանդը ներկայացրել է, թե Նեորի կեղծ գաղափարներն այսօր ինչպես են ազդում որոշ մարդկանց վրա․

Երեց Դեյլ Գ. Ռենլանդ

[Կեղծ ուսմունքը, որը մեզ հետ է պահում ապաշխարելուց], ստիպում է մտածել, որ մեր մեղքերը կարևոր չեն, քանի որ Աստված սիրում է մեզ՝ անկախ մեր արարքներից։ Գայթակղություն կա՝ հավատալու այն բանին, ինչ խաբեբա Նեորն ուսուցանում էր Զարահեմլայի ժողովրդին. «Որ ողջ մարդկությունը կփրկվի վերջին օրը, և որ նրանք չպետք է վախենան կամ դողան, … և վերջում բոլոր մարդիկ պետք է հավերժական կյանք ունենան»։ [Ալմա 1.4] Բայց այս հրապուրիչ գաղափարը կեղծ է: Աստված իսկապես սիրում է մեզ: Սակայն այն, ինչ մենք անում ենք, նշանակություն ունի Նրա և մեզ համար: Նա հստակ հրահանգներ է տվել այն մասին, թե մենք ինչպես պետք է վարվենք: Մենք կոչում ենք դրանք պատվիրաններ: Նրա հավանությունը և մեր հավերժական կյանքը կախված է մեր վարքագծից, ներառյալ՝ խոնարհաբար իսկական ապաշխարություն որոնելու մեր պատրաստակամությունից: (Դեյլ Գ. Ռենլանդ, «Ապաշխարություն՝ ուրախալի ընտրություն», Լիահոնա, նոյեմբեր 2016թ․, 123)։

Ինչպես ճանաչել կեղծ ուսմունքները

Երբեմն կարող է դժվար լինել ճանաչել կեղծ ուսմունքները, ինչպիսիք էին, օրինակ, Նեորի ուսմունքները։ Բարեբախտաբար դուք կարող եք ճանաչել դրանք։ Մորմոնն ուսուցանում էր, որ եթե ուղերձը կամ ուսմունքը համոզում է մեզ «չարիք գործել, չհավատալ Քրիստոսին ու մերժել Նրան, չծառայել Աստծուն», իմացեք, որ դա կեղծ է և դևից է գալիս (Մորոնի 7.17)։

• Նեորի ուսմունքներից որո՞նք կարող են համոզել մարդուն, որ նա Փրկչի կարիքը չունի։

  Ստորև ներկայացվող հարցը կարող է օգնել ուսանողներին ճանաչել կեղծ ուսմունքները։ Ուսանողներին խրախուսեք կիսվել իրենց մտքերով:

• Այսօր ուրիշ ի՞նչ կեղծ ուսմունքներ կան, որոնք մարդկանց հեռացնում են Հիսուս Քրիստոսից։

Հետևյալ հարցերը նախատեսված են ինքնավերլուծության համար, դրանք դասարանային քննարկման համար չեն։

Մտածեք այն ուղերձների մասին, որոնք պարբերաբար լսում կամ կարդում եք։ Ինչպե՞ս են դրանք ազդում ձեզ վրա։ Դրանց մեջ կա՞ն այնպիսիք, որոնք բացասաբար են ազդում Հիսուս Քրիստոսի հանդեպ ձեր ունեցած հավատքի վրա։

Եթե մեդիայի կեղծ ուղերձների սպառող եք, որոնք բացասաբար են ազդում Հիսուս Քրիստոսի հանդեպ ձեր հավատքի վրա, անջատեք կամ ձեր կյանքից հեռացրեք այդ ուղերձների աղբյուրը։ Փոխարինեք դրանք այնպիսի ուղերձներով, որոնք ամրապնդում են ձեր հավատքն առ Հիսուս Քրիստոսը։ Օրինակ՝ Երիտասարդներին զորացնելու համար և Լիահոնա ամսագրերը, որոնք հասանելի են այստեղ՝ ChurchofJesusChrist.org, ունեն հավատքն ամրապնդող բովանդակություն։

Օգտակար կլինի նշել, որ Նեորի ուսմունքները զգալի ազդեցություն են ունեցել չարի վրա։ Ալմայի Գրքում մարդկանց տարբեր խմբեր Նեորի ուսմունքների պատճառով մերժեցին Փրկչին։ Եթե կարծում եք, որ ուսանողների համար օգտակար կլինի այդ մասին խորությամբ իմանալ, «Օժանդակ ուսումնական վարժություններ» բաժնում ուսումնասիրեք «Նեորի ուսմունքների ազդեցությունը» բաժինը։

Քահանանենգություն

Կարող եք քննարկել Գեդեոնի հավատարմությունը, երբ նա պաշտպանում էր Քրիստոսին։ Կարող եք ընդգծել Ալմա 1.7 հատվածը։ Կարող եք մատնանշել նաև Ալմա 1.8 հատվածը և ուսանողներին հիշեցնել Գեդեոնի հավատարիմ արարքների մասին Մոսիա 22.3–9 հատվածում։

Մի օր Նեորը հանդիպեց Եկեղեցու մի տարեց ղեկավարի՝ Գեդեոն անունով։ Երբ Նեորը փորձում էր հեռացնել մարդկանց Եկեղեցուց, Գեդեոնն «ընդդիմացավ [Նեորին]՝ խրատելով նրան Աստծո խոսքերով» (Ալմա 1.7)։ Նեորը բարկացավ Գեդեոնի վրա և սպանեց նրան։ Հետո Նեորը բերվեց Ալմայի առաջ և օրենքի համաձայն մահվան դատապարտվեց (տես Ալմա 1.9–15)։

Կարդացեք Ալմա 1.12 հատվածը և փնտրեք, թե ինչպես էր Ալման նկարագրում Նեորի ուսմունքները։

Կարող եք ուսանողներին օգնել օգտվել ծանոթագրություններից։ Ուսանողները կարող են կիսվել քահանանենգության մասին սովորելու բազմաթիվ ձևերով։ Եթե ոչ ոք չնշի, ուսանողներին ուղղորդեք ուսումնասիրել ծանոթագրություն 12ա-ն։

Կարդացեք Ալմա 1.16 և 2 Նեփի 26.29 հատվածները և փնտրեք քահանանենգության նկարագրությունը։

• Ըստ ձեզ՝ Նեորի քարոզն ինչո՞վ է քահանանենգության օրինակ:

• Ըստ ձեզ՝ ինչո՞ւ են որոշ կեղծ գաղափարներ տարածում գտնում։

• Ըստ ձեզ՝ քահանանենգությունն ինչո՞ւ է այդքան վտանգավոր։

Մերժեք կեղծ ուսմունքները

Ինչպես Գեդեոնը, մենք ևս կարող ենք օգտագործել Աստծո խոսքը, որպեսզի այն օգնի մեզ մերժել կեղծ ուսմունքները (տես Ալմա 1.7, 9)։ Ընտրեք Նեորի կեղծ ուսմունքներից մեկը կամ մի քանիսը կամ մեր օրերում ձեր լսած կեղծ ուսմունքներից մի քանիսը։ Հետո գտեք մի սուրբ գրություն, որն ուղղում է կեղծիքը։ Օրինակ՝ Ալմա 1.3 հատվածի Նեորի ուսմունքները կարող եք հակադրել Մատթեոս 23.11 հատվածի Փրկչի ուսմունքին։

Ահա սուրբ գրությունների մի քանի օրինակ, որոնք ուսանողները կարող են օգտագործել․ Մատթեոս 7.15–23, 2 Նեփի 26.29–31, Մոսիա 18.24–26, Հելաման 12.25–26 և Վարդապետություն և Ուխտեր 1.31–32։

1. Կիսվեք ձեր ընտրած կեղծ ուսմունք(ներ)ով և այն սուրբ գրություն(ներ)ով, որոնք ըստ ձեզ ուղղում են դրանք։

2. Կիսվեք, թե Ալմա 1 գլխից ինչ սովորեցիք կեղծ ուսմունքները ճանաչելու և մերժելու մասին։

Բացատրական և պատմական տեղեկություններ

Ի՞նչը կարող է օգնել ինձ ճանաչել կեղծ ուսմունքները։

Առաջին Նախագահությունից նախագահ Հենրի Բ. Այրինգն ուսուցանել է.

Նախագահ Հենրի Բ. Այրինգ

Սուրբ Հոգու ընկերակցությունը լավն ավելի գրավիչ է դարձնում, իսկ գայթակղությունը՝ պակաս գերող: Միայն դա պետք է որ բավարար լինի, որպեսզի մենք վճռական տրամադրվենք և արժանավոր դառնանք, որ Հոգին միշտ մեզ հետ լինի:

Ճիշտ այնպես, ինչպես Սուրբ Հոգին զորացնում է մեզ չարի դեմ, Նա նաև մեզ ուժ է տալիս՝ տարբերելու ճշմարտությունը կեղծիքից: Ճշմարտությունը, որն ամենամեծ նշանակությունն ունի, վավերացվում է միայն Աստծուց տրված հայտնությամբ: Մեր մարդկային դատողությունը և մեր ֆիզիկական զգայարանների օգտագործումը բավարար չի լինի: Մենք ապրում ենք այնպիսի ժամանակներում, երբ նույնիսկ ամենաիմաստունների համար դժվար կլինի տարբերել ճշմարտությունը խելացի խաբեությունից: (Հենրի Բ. Այրինգ, «Սուրբ Հոգին որպես ձեր ուղեկից», Լիահոնա, նոյեմբեր 2015թ․, 104)։

Տասներկու Առաքյալների Քվորումից երեց Ուլիսես Սոարեսն ուսուցանել է.

Երեց Ուլիսես Սոարես

Մենք չենք կարող մեզ թույլ տալ շփոթվել հանրաճանաչ ուղերձներով, որոնք հեշտ են ընդունվում աշխարհում և հակասում են Հիսուս Քրիստոսի ավետարանի վարդապետությանն ու սկզբունքներին։ Աշխարհիկ այդ ուղերձներից շատերը ներկայացնում են ոչինչ ավելի, քան մեր հասարակության մեղքերն արդարացնելու փորձ։ Մենք պետք է հիշենք, որ ի վերջո, բոլորը կկանգնեն Քրիստոսի առաջ՝ իրենց գործերի համար դատվելու՝ լինեն դրանք բարի, թե չար (3 Նեփի 27.14)։ Այդ աշխարհիկ ուղերձներին հանդիպելիս, մեզանից մեծ խիզախություն ու մեր Երկնային Հոր ծրագրի մասին ամուր գիտելիք կպահանջվի՝ ճիշտը ընտրելու համար։ (Ուլիսես Սոարես, «Այո, մենք կարող ենք և հաղթելո՛ւ ենք», Լիահոնա, մայիս 2015թ․, 75)։

Ո՞րն է Եկեղեցու դիրքորոշումը մահապատժի վերաբերյալ:

Այն հարցի վերաբերյալ, թե արդյոք և ինչ հանգամանքներում պետությունը պետք է կիրառի մահապատիժը, Հիսուս Քրիստոսի Վերջին Օրերի Սրբերի Եկեղեցին բացառապես ուղղորդվում է քաղաքացիական իրավունքի սահմանած գործընթացներով: Մենք ո՛չ կողմ ենք, ո՛չ էլ դեմ ենք մահապատժին: (Տես https://newsroom.churchofjesuschrist.org/article/capital-punishment-in-utah։)

Օժանդակ ուսումնական վարժություններ

Կեղծ պնդումներ՝ միախառնված ճշմարտության հետ

Կեղծ ուսուցիչների համար սովորական բան է իրենց կեղծ ուսմունքներին ճշմարիտ պնդումներ ավելացնելը։ Օրինակ՝ «բոլոր մարդիկ պետք է հավերժական կյանք ունենան» կեղծ ուսմունքը Նեորն ուսուցանում էր «Տերն է ստեղծել բոլոր մարդկանց» (Ալմա 1.4) ճշմարտության հետ։ Ուսանողները կարող են ճշմարտության հետ միախառնված այլ ընդհանուր կեղծ ուսմունքներ գտնել։ Կարող եք կիսվել Առաջին Նախագահությունից նախագահ Դալլին Հ․ Օուքսի հետևյալ խոսքերով․ «Սատանան մեծ խաբեբա է, ստերի հայրը (տես Հովհաննես 8.44)։ Դա այն պատճառով չէ, որ սատանան միայն ստեր է ասում: Նրա ամենաարդյունավետ ստերը կիսաճշմարտություններն են կամ ճշմարտությամբ ուղեկցվող ստերը» (Դալլին Հ. Օուքս, «Կարդալ Եկեղեցու պատմությունը» [ուղերձ Եկեղեցու կրթական համակարգի կրոնի ուսուցիչներին, 16-ը օգոստոսի, 1985թ․], 3)։

Նեորի ուսմունքները հակադրեք Եկեղեցու անդամների գործողություններին

Ուսանողները կարող են Նեորի ուսմունքները և գործողությունները (տես Ալմա 1.2–6) հակադրել Եկեղեցու հավատարիմ անդամների գործողություններին (տես Ալմա 119–20, 25–30)։ Ուսանողներին առաջարկեք կիսվել Եկեղեցու հավատարիմ անդամների՝ մեր օրերի օրինակներով։ Կարող եք ընդգծել նաև սուրբ գրությունների ուսումնասիրության՝ համեմատելու և հակադրելու հմտությունը։

Նեորի ուսմունքների ազդեցությունը

Այս գաղափարը կարող է օգնել ուսանողներին տեսնել, թե Նեորի ուսմունքներն ինչ ազդեցություն են ունեցել Մորմոնի Գրքի շատ պատմություններում։ Ուսանողները կարող են կարդալ հետևյալ պատմություններից մեկը կամ մի քանիսը՝ ուսումնասիրելով Նեորի ուսմունքների բացասական ազդեցությունը․ Ալմա 2.1–4, 14.8–18, 15.15, 21.2–12, 24.20–30։ Ուսանողները կարող են դա անել փոքր խմբերով, որոնցից յուրաքանչյուրը պետք է զեկուցի ընտրված հատվածների մասին։

Մոսիա 29

Որպեսզի օգնեք ուսանողներին պատկերացում ունենալ Մոսիա 29 գլխի մասին, կարող եք ամփոփ ներկայացնել 1–25 հատվածները։ Հետո կարող եք ուսանողներին հանձնարարել կարդալ Մոսիա 29.26–27, 30–34, 37–39 հատվածները և փնտրել, թե ինչ պատասխանատվություն ուներ ժողովուրդը Մոսիա թագավորի առաջարկած կառավարությունում։ Ուսանողները կարող են քննարկել ժողովրդի ձայնով որոշումներ կայացնելու օգուտները, ինչպես նաև այն հետևանքները, որոնք կգան, եթե ժողովուրդն ընտրի անօրինությունը։ Կարող եք քննարկել հետևյալ ճշմարտություններից մեկը կամ երկուսն էլ․ եթե ժողովրդի ձայնն ընտրի անօրինությունը, Աստծո դատաստանները կթափվեն նրա գլխին (հատված 27)։ Յուրաքանչյուր անձ պարտավոր է աջակցել արդար սկզբունքներին, օրենքներին և ղեկավարներին։