Ալմա 4

Հպարտության գայթակղության քարը

Ալմա Կրտսերը քարոզում է Գիդեոնում

Հպարտությունը համեստության բացակայությունն է և ստիպում է մարդկանց իրենց վեր դասել կամ հակադրվել ուրիշներին կամ Աստծուն (տես «Հպարտություն» Սուրբ գրքերի ուղեցույցում, scriptures.ChurchofJesusChrist.org)։ Մտածեք հպարտության մասին, որն այսօր տեսնում եք աշխարհում, և այն բացասական ազդեցությունների մասին, որ այն ունի ձեզ վրա և ձեզ շրջապատող մարդկանց վրա։ Ալմայի ժամանակաշրջանում Փրկչի Եկեղեցու որոշ անդամների հպարտությունն ու հակառակությունը հանգեցրին նրան, որ Եկեղեցին թերացավ իր առաջընթացի մեջ։ Արդյունքում Ալման որոշեց հրաժարվել գլխավոր դատավորի պաշտոնից, որպեսզի նվիրվի Աստծո խոսքը քարոզելու գործին։ Այս դասը կօգնի ձեզ Աստծո խոսքն օգտագործել հպարտությունը և հակառակությունը հաղթահարելու համար։

Օգնեք ուսանողներին բացահայտել ավետարանի վարդապետությունն ու սկզբունքները։ Վարդապետությունն ու սկզբունքները պետք է հստակ և հակիրճ ներկայացված լինեն։ Դրանք կարող են ուսանողներին ուսուցանել սուրբ գրությունների կարևորությունը և այն, թե ինչպես կիրառել սուրբ գրությունների պատմություններն ու ուսմունքներն իրենց ամենօրյա կյանքում։ Վարդապետության և սկզբունքների ըմբռնումը կարող է մղել ուսանողներին սովորել և կիրառել ավետարանի ուսմունքները։

Ուսանողի նախապատրաստում․ ուսանողներին առաջարկեք պատրաստվել՝ կիսվելու համեստության մասին որևէ սուրբ գրությամբ կամ Եկեղեցու ղեկավարի խոսքով։

Հնարավոր ուսումնական վարժություններ

Գայթակղության քարը

Դասարանի մուտքի հատակին փակցրեք թուղթ, որի վրա գրված է «գայթակղության քար»։ Հարցրեք, թե դասարան մտնելիս քանի ուսանող է պատահաբար քայլել դրա վրայով՝ նախքան այն նկատելը։ Ցանկության դեպքում ուսանողները կարող են կիսվել նաև փորձառություններով, երբ նրանք սայթաքել կամ գայթակղվել են։

Հիշեք, թե երբ եք սայթաքել կամ գայթակղվել։ Հիշո՞ւմ եք, թե ինչի պատճառով եք սայթաքել։ Կյանքում մենք երբեմն սայթաքում ենք այնպիսի բաների վրայով, որոնք կարելի է «գայթակղության քարեր» անվանել։ Դա ճիշտ է նաև հոգևոր առումով։

Ստորև առաջարկվող նկարի վարժությունը կարելի է դասարանով գրատախտակին կատարել։ Կամ ուսանողները կարող են այն անհատապես կատարել։

խորանարդների նկար

Մի քանի խորանարդ նկարեք և պիտակավորեք դրանք այնպիսիբաներով, որոնք կարող են ստիպել երիտասարդներին հոգևորապես սայթաքել Օրինակ՝ ոմանք գուցե դժվարանան ականջ դնել մարգարեին կամ հնազանդվել Իմաստության խոսքին։

Մտածեք այդ բաների պատճառով գայթակղվելու հետևանքների մասին։ Խորհեք, թե ինչու է անհրաժեշտ Աստծո օգնությունը այս գայթակղության քարերը նկատելու, դրանցից խուսափելու և դրանք հաղթահարելու համար։

Ալմայի ժողովուրդը վերջերս մեծ կորուստներ էր ունեցել լամանացիների հետ պատերազմում։ Իրենց չարչարանքների շնորհիվ նրանք «զարթնեցվեցին ի հիշողություն իրենց պարտականությունների», և շատ մարդիկ մկրտվեցին (տես Ալմա 4.1–5)։ Սակայն նրանց խաղաղությունը երկար չտևեց, քանի որ նրանք սկսեցին հոգևորապես սայթաքել։

Կարդացեք Ալմա 4.6–8 հատվածները և փնտրեք, թե Եկեղեցու ղեկավարներն ինչու էին անհանգստացած։

Ուսանողներին առաջարկեք կիսվել իրենց գտածով և օգնեք նրանց տեսնել, որ հպարտությունը կարող է հոգևոր առումով գայթակղության քար լինել։

• Ըստ ձեզ՝ Եկեղեցու ղեկավարներն ինչո՞ւ էին «դառնորեն վշտացած» (Ալմա 4.7) մարդկանց աճող հպարտությունից։

Նախագահ Էզրա Թաֆտ Բենսոնն (1899–1994) ուսուցանել է.

Նախագահ Էզրա Թաֆտ Բենսոն

Հպարտությունը գայթակղության մեծ քար է Սիոնի համար։ Կրկնում եմ։ հպարտությունը գայթակղության մեծ քար է Սիոնի համար (Էզրա Թաֆտ Բենսոն, «Զգուշացեք հպարտությունից», Ensign, մայիս 1989թ․, 7)։

Մի մեծ խորանարդ պատկերեք, որը ներկայացնում է հպարտության գայթակղության քարը։ Խորանարդի վրա գրեք հետևյալ հարցերի պատասխանները․

• Ըստ ձեզ՝ հպարտությունն ինչպե՞ս կարող է ստիպել մարդուն հոգևոր առումով սայթաքել։

• Հպարտությունն ի՞նչ եղանակներով է հետ պահում մեզ Փրկչին ավելի նմանվելուց։

Ալմա 4 գլխի ուսումնասիրությունը շարունակելու ընթացքում մտածեք, թե հպարտությունն ինչպես կարող է գայթակղության քար լինել ձեզ համար, և ինչ կարող եք անել այն հաղթահարելու համար։

Կարդացեք Ալմա 4.8–12 հատվածները և փնտրեք, թե որոնք են հպարտության հետևանքները Եկեղեցում։ Նկատի ունեցեք, որ գժտություն նշանակում է զայրացած կամ դառը տարաձայնություն կամ հակառակություն։ Նենգամտությունը չարիք գործելու ցանկությունն է կամ թշնամությունը։

Ուսանողներին առաջարկեք գրատախտակին թվարկել հպարտության հետևանքները Եկեղեցում։ Այս ցանկն օգտագործվելու է ավելի ուշ՝ դասի ընթացքում։ Եթե բավարար գրենական պիտույքներ ունեք, միանգամից մի քանի ուսանողի հրավիրեք գրատախտակի մոտ։ Ապա ուսանողներին առաջարկեք պատասխանել հետևյալ հարցերին.

• Որո՞նք էին հպարտության հետևանքները Եկեղեցում։

• Ինչո՞ւ են այդ գործողություններն անհարիր Փրկչի Եկեղեցու անդամներին։

• Դրանք ի՞նչ ազդեցություն ունեցան Եկեղեցուն չպատկանող մարդկանց վրա։

Խուսափեք հպարտությունից և հակառակությունից

Նախագահ Էզրա Թաֆտ Բենսոնն ուսուցանել է.

Նախագահ Էզրա Թաֆտ Բենսոն

Հպարտության հակաթույնը համեստությունն է, հեզությունը, հնազանդությունը [տես Ալմա 7.23]: (Էզրա Թավտ Բենսոն, «Զգուշացեք հպարտությունից», Ensign, մայիս 1989թ․, 6)

Կարդացեք Ալմա 4.13–14 և փնտրեք, թե ինչ արեցին Եկեղեցու որոշ անդամներ՝ հպարտությունից խուսափելու և հավատարիմ մնալու համար։ Նկատի ունեցեք, որ խոնարհություն բառը հատված 13-ում վերաբերում է ավելի համեստ ու հեզ դառնալուն։

Ուսանողներին առաջարկեք գրատախտակին գրել Եկեղեցու անդամների համեստ արարքները։

• Հատված 13–14-ի ո՞ր գործողություններն ու մոտեցումներն են հիշեցնում ձեզ Հիսուս Քրիստոսի մասին։

• Այդ մոտեցումների զարգացումը և այդ գործողությունների ձեռնարկումը ինչպե՞ս կարող են օգնել մեզ ավելի նմանվել Նրան։

• Տեսե՞լ եք, թե ուրիշներն ինչպես են ապրում Քրիստոսանման այդ մոտեցումներով կամ գործողություններով, և ինչպե՞ս է դա ազդել ձեզ վրա։

Ուսանողներին ժամանակ հատկացրեք, որպեսզի լուռ խորհեն իրենց կյանքում առկա հնարավոր հպարտության կամ հակառակության մասին, և ինչպես կարող են հետևել Փրկչի օրինակին։

Ալման որոշեց, որ պետք է իր ժամանակը ծախսի մարդկանց հոգևորապես օգնելու վրա։ Նա դատավորի աթոռը հանձնեց Նեփիային՝ պահպանելով քահանայապետի պաշտոնը (տես Ալմա 4.15–18)։

Կարդացեք Ալմա 4.19 հատվածը և փնտրեք, թե ինչ գիտեր Ալման, որը կարող էր «տապալել» հպարտությունը և հակառակությունը մարդկանց շրջանում։ Կարող եք դիտել նաև «Ալման քարոզում է Աստծո խոսքը» տեսանյութի 0:36-1:59 հատվածը, որը հասանելի է այստեղ՝ ChurchofJesusChrist.org։

• Ինչպե՞ս էր Ալման գործում Հիսուս Քրիստոսի նման:

• Մենք ի՞նչ կարող ենք սովորել Ալմայի օրինակից։

Ալմա 4.19 հատվածի ճշմարտություններից մեկն այն է, որ Աստծո խոսքը և անկեղծ վկայություն լսելը կարող է օգնել մեզ հաղթահարել հպարտությունն ու հակառակությունը։

Փնտրեք, թե հետևյալ խոսքերում ինչ է ուսուցանել նախագահ Էզրա Թաֆտ Բենսոնն Աստծո խոսքի մասին։

Նախագահ Էզրա Թաֆտ Բենսոն

Աստծո խոսքը, ինչպես որ առկա է սուրբ գրքերում, ապրող մարգարեների խոսքերում և անձնական հայտնությունում, զորություն ունի ամրացնելու Սրբերին և զինելու նրանց Հոգով, որպեսզի նրանք կարողանան դիմադրել չարին, ամուր կառչեն բարուց և ուրախություն գտնեն այս կյանքում (Էզրա Թավտ Բենսոն, «Խոսքի զորությունը», Ensign, մայիս 1986թ․, 80)։

• Աստծո խոսքը և անկեղծ վկայություն տալը ինչպե՞ս կարող են օգնել տապալել հպարտությունը և հակառակությունը։

Ուսանողներին առաջարկեք ընտրել գրատախտակին ավելի վաղ թվարկած հպարտության հետևանքներից երկուսը կամ երեքը և նրանց տվեք ժամանակ՝ փոքր խմբերով ուսումնասիրելու, թե ինչպես կարելի է հաղթահարել այդ խնդիրները։

Ուսանողները կարող են Թեմաների ուղեցույցում կամ Սուրբ գրքերի ուղեցույցում որոնել թեմաներ, օրինակ՝ «Համեստություն» թեման։ Կարող եք օգնելու համար նրանց նաև ցույց տալ, թե տեղեկություն գտնելու համար ինչպես որոնում կատարել Gospel Library հավելվածում։

Խմբերին առաջարկեք կիսվել, թե ինչ սովորեցին դասարանով՝ ներառելով այն եղանակները, որոնցով կարող ենք Փրկչի նման վերաբերվել ուրիշներին։ Որպես այլընտրանք ուսումնասիրությունից հետո նրանք կարող են մի համառոտ խոսք գրել, որում կանդրադառնան հպարտության և հակառակության հետ կապված խնդիրներին։

Ուսանողներին խրախուսեք գործել ըստ իրենց ստացած տպավորությունների այն մասին, թե ինչպես կարող են կիրառել այս դասի ընթացքում սովորածը:

• Թվարկեք երկու կամ երեք խնդիր, որոնք հպարտության և հակառակության արդյունք են։

• Թվարկեք սուրբ գրություններ և ժամանակակից մարգարեների ուսմունքներ, որոնք, ձեր կարծիքով, կարող են օգնել այդ խնդիրների լուծման հարցում։

• Նշեք, թե ձեր թվարկածներն ինչու կամ ինչպես կօգնեն ձեզ՝ ուրիշներին Փրկչի նման վերաբերվել։

Ձգտեք նկատել և ճանաչել Սուրբ Հոգու հուշումներն այն մասին, թե ինչպես կարող եք կիրառել այն, ինչ սովորեցիք այս դասի ընթացքում։ Փնտրեք հնարավորություններ՝ ըստ այդ տպավորությունների գործելու համար:

Բացատրական և պատմական տեղեկություններ

Ալմա 4.8 Ինչպե՞ս ենք մենք երբեմն ծաղրում կամ արհամարհում միմյանց։

Առաջին Նախագահությունից նախագահ Դալլին Հ. Օուքսը բացատրել է.

Նախագահ Դալլին Հ․ Օուքս

Եկեղեցում և դպրոցում շատ ուսուցիչներ վշտացած են այն բանից, թե ինչպես են որոշ դեռահասներ, ներառյալ ՎՕՍ երիտասարդները, վերաբերվում միմյանց: Միմյանց սիրելու պատվիրանը անկասկած ներառում է սեր և հարգանք՝ անկախ կրոնական, ազգային, մշակութային տարբերություններից և տնտեսական տարբեր իրավիճակներից: Մենք հորդորում ենք բոլոր երիտասարդներին խուսափել կռիվներից, վիրավորանքներ հասցնելուց կամ այնպիսի խոսքերից ու արարքներից, որոնք միտումնավոր կերպով ցավ են պատճառում ուրիշներին: Այդ ամենը ոտնահարում է միմյանց սիրելու Փրկչի պատվիրանը: (Դալլին Հ. Օուքս, «Սիրել ուրիշներին և ապրել տարբերություններով հանդերձ», Լիահոնա, նոյեմբեր 2014թ․, 27)

Դիտեք «Միավորելով իրենց սրտերը» տեսանյութի 7:03-8:15 հատվածը՝ տեսնելու ուրիշներին սիրով և հարգանքով վերաբերվելու խորհուրդը, որով կիսվում է Տասներկու Առաքյալների Քվորումից երեց Գարի Ե. Սթիվենսոնը։

Ալմա 04.10 Ինչպե՞ս պատահեց, որ «Եկեղեցին սկսեց թերանալ իր առաջընթացի մեջ» հպարտության արդյունքում։

Առաջին Նախագահությունից նախագահ Դալլին Հ. Օուքսը բացատրել է.

Նախագահ Դալլին Հ․ Օուքս

Մորմոնի Գիրքը պատմում է այն ժամանակահատվածի մասին, երբ Աստծո Եկեղեցին «սկսեց թերանալ իր առաջընթացի մեջ» (Ալմա 4.10), որովհետև «եկեղեցու ժողովուրդը սկսել էր … դնել իր սիրտը հարստությունների վրա ու աշխարհի ունայն բաների վրա» (Ալմա 4.8)։ Ով մեծ նյութական ունեցվածք ունի, գտնվում է հարստություններով և աշխարհիկ այլ բաներով հոգևորապես «ինքնաբավարարված լինելու» վտանգի տակ: (Դալլին Հ. Օուքս, «Սերմնացանի առակը», Լիահոնա, մայիս 2015թ․, 34)

Տասներկու Առաքյալների Քվորումից երեց Քվենթին Լ Քուքը ուսուցանել է.

Երեց Քվենթին Լ. Քուք

Վերականգնման ոգևորիչ վարդապետության շնորհիվ անդամներն ուրախանում են ավետարանով և ուրախություն ու բավարարվածություն են գտնում Եկեղեցում։ Մեզ լավ են վերաբերվում, երբ մենք ապրում ենք Հիսուս Քրիստոսի վերականգնված ավետարանի ուսմունքներով։ Երբ Եկեղեցու անդամները այդ ուսմունքներով չեն ապրում, դա կարող է գայթակղության քար լինել նրանց համար, ովքեր Եկեղեցուն չեն պատկանում (Ալմա 4.10)։ (Քվենթին Լ. Քուք, «Մեր Հոր ծրագիրը բավականաչափ մեծ է Նրա բոլոր զավակների համար», Լիահոնա, մայիս 2009թ․, 35)

Ինչո՞ւ է հպարտությունն այդքան վնասակար։

Տասներկու Առաքյալների Քվորումից երեց Գարի Ի. Սթիվենսոնը կիսվել է հետևյալով․

Երեց Գարի Ի. Սթիվենսոն

Երբ հպարտ ենք, մենք միտում ունենք փառքը մեզ վերագրելու, ոչ թե ուրիշներին կամ Տիրոջը: Հպարտությունը մրցակցական է․ այն ձգտում է ձեռք բերել ավելին և ենթադրում է, որ մենք ավելի լավն ենք, քան ուրիշները: Հպարտությունը հաճախ առաջացնում է բարկության և ատելության զգացում․ այն դրդում է ոխ պահել կամ չներել։ (Գարի Ի. Ստիվենսոն, «Հոգևոր խավարում», Լիահոնա, նոյեմբեր 2017թ․, 47)

Օժանդակ ուսումնական վարժություններ

Լավ և վատ օրինակներ

Եթե ուսանողների համար օգտակար կլինի տեսնել, թե ինչ դրական և բացասական ազդեցություն կարող են ունենալ Եկեղեցու անդամները ուրիշների վրա, կարող եք դիտել կամ կարդալ նախագահ Գորդոն Բ․ Հինքլիի (1910–2008) Ավելի մեծ բարության կարիքը» ելույթը։ Դիտեք տեսանյութի 6:31-11:54 հատվածը։

Ուսումնասիրեք՝ ինչպես հակազդել հպարտության հետևանքներին

Եթե ուսանողների համար օգտակար կլինի աշխատել մի սցենարի վրա, որում հպարտությունը կարող է մտահոգիչ լինել, ապա կարող եք կիսվել ստորև ներկայացվող սցենարով և ուսանողներին հանձնարարել մշակել սցենարի ավարտի երկու տարբերակ։ Սա կարելի է անել դասարանով։ Տարբերակներից մեկը կարող է լինել այն, որ երիտասարդ տղայի ընտրությունները հանգեցնում են նրան, որ նա հպարտության պատճառով սայթաքում է։ Մյուսը կարող է լինել այն, թե երիտասարդ տղան ինչպես է Աստծո խոսքն օգտագործում խոնարհ մնալու համար։

«Ռաուլը բացառիկ երիտասարդ է։ Դեռևս ավագ դպրոցում սովորելու ժամանակ նա հիանալի աշխատանքի է անցնում, որի համար վարձատրվում է առնվազն կրկնակի անգամ ավելի այն աշխատավարձից, որը սովորաբար ստանում են նրա հասակակիցները»։

Համեմատեք և հակադրեք

Ուսանողներին առաջարկեք կիսվել Ալմա 1.19–24 և Ալմա 1.25–31 հատվածներում նկարագրված մարդկանց խմբերի միջև նմանություններով և տարբերություններով։ Նույնը արեք Ալմա 4.1–5 և Ալմա 4.6–10 հատվածներում նկարագրված մարդկանց խմբերի համար։ Ուսանողներին առաջարկեք կիսվել այդ հատվածներում գտած Քրիստոսանման մոտեցումներով, և թե ինչպես կարող ենք այդ օրինակներին հետևել՝ Երկնային Հորը և Հիսուս Քրիստոսին ավելի նմանվելու և ավելի լավ աշակերտներ լինելու համար։

Ալմա 4․19 Անկեղծ վկայության զորությունը

Եթե ուսանողների համար օգտակար կլինի վկայության զորության մասին ավելին իմանալ, կարող եք դիտել «Մարդ՝ առանց պերճախոսության» (6:06) տեսանյութը կամ «Անկեղծ վկայություն» տեսանյութի 1:33-3:54 հատվածը։ Ուսանողներին առաջարկեք կիսվել օրինակներով, թե ուրիշների վկայությունն ինչպես է ազդել Հիսուս Քրիստոսի մասին իրենց վկայության վրա և խրախուսեք նրանց փնտրել իրենց վկայություններով ուրիշների հետ կիսվելու հնարավորություններ, որպեսզի ազդեն նրանց վրա հանուն բարու։