Alma 5–7

Kinatibuk-ang Pagpasabot

Gipangutana ni Alma ang mga miyembro sa Simbahan sa Zarahemla og sunodsunod nga mga pangutana nga nagdasig kanila sa pagpamalandong sa gitutokan sa ilang mga kasingkasing ug sa ilang kahimtang atubangan sa Dios. Siya midapit kanila sa pagduol ngadto kang Kristo gamit ang malumo nga paghulagway sama sa “[Iyang] bukton sa kaluoy gitunol” (Alma 5:33), “paghinulsol, ug Ako modawat kaninyo” (Alma 5:33), ug “ang maayo nga magbalantay nagtawag kaninyo” (Alma 5:38). Siya mitudlo nga ang Manluluwas andam nga miantos sa tanan nga mga butang alang kanato “nga siya mahimo nga masayod sumala sa unod unsaon pagtabang ang iyang mga katawhan sumala sa ilang mga kahuyang” (Alma 7:12). Mitudlo usab siya unsaon sa pagpadayon sa “dalan nga padulong sa gingharian sa Dios” (Alma 7:19).

Pangandam sa Pagtudlo

Ang mosunod nga impormasyon naghatag sa mga magtutudlo og mga ideya kon unsa ang kinahanglan nga andamon daan alang sa matag leksiyon.

Alma 5:1–32

Katuyoan sa leksiyon: Kini nga leksiyon gituyo aron matabangan ang mga estudyante sa pagsukod sa ilang espirituhanong pag-uswag ug paglig-on sa ilang pagkakabig ngadto ni Jesukristo.

• Pagpangandam sa estudyante: Dapita ang mga estudyante sa pagbasa sa daklit sa Alma 5 ug markahan ang tanang marka sa pangutana [question mark] diha sa kapitulo. Mahimo usab nga pangutan-on sa mga estudyante ang ilang mga kaugalingon sa pipila ka mga pangutana nga gipangutana ni Alma sa iyang katawhan niini nga kapitulo.

• Bidyo: “Mobalik ug Modawat” (16:10; tan-awa gikan sa time code 8:14 hangtod sa 8:58)

• Sugyot sa pagtudlo pinaagi sa videoconference: Ang nag-unang katuyoan niini nga leksiyon mao ang pagtugot sa mga estudyante sa pagbasa ug pagpamalandong sa daghang mga pangutana bahin sa Alma 5. Usa ka paagi sa pagbuhat niini mao ang paghatag og panahon sa mga estudyante atol sa klase sa pagpalong sa ilang mga mikropono ug mga kamera, pagtuon, pagpamalandong, ug pagsulat sa ilang mga tubag sa mga pangutana diha sa ilang mga journal sa pagtuon. Makatabang ang pagpahibalo kanila kon aduna nalang silay duha ka minuto nga nahabilin niini nga oras ug unya kon aduna nalang silay nahabilin nga 30 segundos.

Alma 5:33–62

Katuyoan sa leksiyon: Kini nga leksiyon makatabang sa mga estudyante sa ilang mga paningkamot nga moduol ngadto kang Jesukristo ug modawat sa mga panalangin nga Iyang gitanyag kanila.

• Pagpangandam sa estudyante: Dapita ang mga estudyante sa pagtuon sa Alma 5:33–34 ug sa pagtambong sa klase nga andam sa pagpakigbahin sa unsay ilang nakat-onan mahitungod sa Manluluwas gikan niini nga mga bersikulo.

• Mga Hulagway: Pipila ka mga hulagway nga makapainteres sa mga estudyante nga tan-awon; pipila ka mga hulagway ni Jesukristo nga ang Iyang mga bukton gituy-od

• Bidyo: “Mga Kasingkasing nga Nabugkos” (15:10; tan-awa gikan sa time code 13:56 hangtod sa 14:51)

Alma 7:1–13

Katuyoan sa leksiyon: Kini nga leksiyon makatabang sa mga estudyante nga mosalig ug mobati og mas dakong gugma alang sa ilang Manluluwas.

• Pagpangandam sa estudyante: Ikonsiderar ang pagdapit sa mga estudyante sa pagtuon sa Alma 7:11–13 ug sa pagpangita dinhi niini nga mga bersikulo kon alang sa unsa ang giantos ni Jesukristo pinaagi sa Iyang Pag-ula ug nganong miantos Siya niini nga mga butang.

• Sulod [Content] nga ipakita: Ang tsart mahitungod sa pag-antos sa Manluluwas, nga gipakita o gikopya diha sa pisara aron ang mga estudyante makakopya niini diha sa ilang mga journal

• Bidyo: “Nalig-on pinaagi sa Pag-ula ni Jesukristo” (15:54; tan-awa gikan sa time code 3:13 hangtod sa 4:01)

• Sugyot sa pagtudlo pinaagi sa videoconference: Ikonsiderar ang paggamit og digital whiteboard o usa ka gipakigbahin nga dokumento aron tugotan ang mga estudyante nga dungan sulatan ang tsart.

Doktrinal nga Kahanas: Alma 7:11–13

Katuyoan sa leksiyon: Kini nga leksiyon makatabang sa mga estudyante sa pagsag-ulo sa pakisayran sa doktrinal nga kahanas ug sa mahinungdanon nga hugpong sa mga pulong sa kasulatan sa Alma 7:11–13, mapasabot ang doktrina nga gitudlo niini nga tudling, ug magamit ang mga baroganan sa pag-angkon og espirituhanong kahibalo sa tinuod nga mga sitwasyon sa kinabuhi.

• Pagpangandam sa estudyante: Ikonsiderar ang pagdapit sa mga estudyante nga mainampoong mamalandong kon unsay ilang mabuhat aron makadawat sa tabang ug kalig-on nga gihatag ni Jesukristo pinaagi sa Iyang Pag-ula.

• Sugyot sa pagtudlo pinaagi sa videoconference: Aron matabangan ang mga estudyante nga makasag-ulo sa pakisayran sa kasulatan ug sa mahinungdanon nga hugpong sa mga pulong sa kasulatan, ikonsiderar ang pagdapit kanila sa pag-type diha sa chat kutob sa ilang mahimo gikan sa panumduman. Dayon i-rebyo ang pakisayran ug hugpong sa mga pulong sa pipila ka mga higayon, ug dapita ang mga estudyante sa pag-type sa pakisayran ug sa hugpong sa mga pulong pag-usab ngadto sa chat aron makita kon unsa pa gayod ang ilang nahinumdoman. Ipadayon kini hangtod ang kadaghanan sa mga estudyante eksaktong makasulti sa pakisayran ug sa hugpong sa mga pulong gikan sa panumduman.

Alma 7:14–27

Katuyoan sa leksiyon: Kini nga leksiyon gituyo aron pagtabang sa mga estudyante sa ilang mga paningkamot sa pag-angkon og Kristohanong mga hiyas samtang sila nagsunod sa dalan nga nagpadulong balik ngadto sa Dios.

• Pagpangandam sa estudyante: Dapita ang mga estudyante sa paghunahuna mahitungod sa Kristohanong mga hiyas nga gusto nilang mapalambo sa mas hingpit nga paagi ug sa pagtambong nga andam sa pagpakigbahin kon ngano.

• Sulod [Content] nga ipakita: Mga instruksiyon alang sa kalihokan sa Kristohanong mga hiyas sa kataposan sa leksiyon

• Mga Hulagway: Usa ka dalan; usa ka representasyon sa dalan nga padulong sa gingharian sa Dios; lain-laing mga hulagway ni Jesukristo

• Bidyo: “Inadlaw nga Pagpahiuli” (13:43; tan-awa gikan sa 1:40 hangtod sa 3:25)

• Sugyot sa pagtudlo pinaagi sa videoconference: Ikonsiderar ang paggamit sa whiteboard feature sa imong videoconferencing software. Ibutang ang hulagway sa dalan diha niini, ug dapita ang mga estudyante sa pagsulat og mga lihok, mga hiyas, ug mga kinaiya palibot sa hulagway atol sa leksiyon, ingon sa gisugo.