Alma 7:1–13

Nga Siya Mahimo nga Makatabang sa Iyang mga Katawhan

Ang buhat ug himaya sa Dios mao ang “pagpahinabo sa pagka-imortal ug sa kinabuhi nga dayon sa tawo” (Moises 1:39). Aron matuman kini, Iyang gipadala ang Iyang Anak, si Jesukristo, sa pag-antos alang sa atong mga sala ug pagbuntog sa kamatayon pinaagi sa Iyang Pagkabanhaw. Ang Manluluwas andam nga miantos sa tanan nga mga butang alang kanato “nga siya mahimo nga masayod sumala sa unod unsaon pagtabang ang iyang mga katawhan sumala sa ilang mga kahuyang” (Alma 7:12). Kini nga leksiyon makatabang kanimo nga mosalig ug mobati og mas dakong gugma alang sa imong Manluluwas.

Tabangi ang mga estudyante nga makaila sa impluwensiya sa Espiritu Santo.Ang Espiritu Santo sa kasagaran makigsulti pinaagi sa mga pagbati sa gugma, kalipay, ug kalinaw (tan-awa sa Galatians 5:22–23). Siya usab nagpamatuod kang Jesukristo (tan-awa sa Juan 15:26). Pangita og natural nga mga kahigayonan sa pagtabang sa mga estudyante nga makasabot sa relasyon tali sa ilang mga pagbati ug sa impluwensiya sa Espiritu Santo. Hinumdomi nga dili tanang estudyante mobati sa impluwensiya sa Espiritu Santo sa samang paagi.

Pagpangandam sa estudyante: Ikonsiderar ang pagdapit sa mga estudyante sa pagtuon sa Alma 7:11–13 ug sa pagpangita dinhi niini nga mga bersikulo kon alang sa unsa ang giantos ni Jesukristo pinaagi sa Iyang Pag-ula ug nganong miantos Siya niini nga mga butang.

Mga Posibleng Kalihokan sa Pagkat-on

Ang labing importante nga mga butang

Mahimo nimong himoon ang mosunod nga lista ug mga ranggo nga magkauban isip usa ka klase, o mahimo nimong pabuhaton ang mga estudyante og lista uban sa usa ka pares o sa gamay nga grupo ug itandi ang lain-laing mga tubag.

Paghimo og lista sa imong giisip nga pipila sa labing importante nga mga panghitabo sa kasaysayan sa kalibotan, ug dayon i-sunod kini sa pagkahan-ay gikan sa labing importante ngadto sa dili kaayo importante.

• Unsay nakapahimo sa usa ka panghitabo nga mahinungdanon o importante?

• Ngano kaha nga ang pagsunod kanila sa pagkahan-ay sa kamahinungdanon medyo lisod buhaton?

Samtang si Alma namulong ngadto sa katawhan sa yuta sa Gideon, siya nanagna nga bisan og “kaninyo adunay daghan nga mga butang nga moabot; … adunay usa ka butang nga labaw ka mahinungdanon” kay sa bisan unsa pa (Alma 7:7).

Basaha ang Alma 7:7, mangita niining labing importante nga panghitabo. Ikonsiderar ang pagmarka sa imong makit-an.

• Ngano kaha nga ang pag-anhi sa Manluluwas mao man ang labing importante nga panghitabo sa tanang panahon?

Ikonsiderar ang pagdapit sa mga estudyante sa pagrekord sa ilang mga hunahuna mahitungod sa mosunod diha sa ilang mga journal sa pagtuon.

Human mamulong si Alma ngadto sa katawhan sa Zarahemla ug mipahimutang sa Simbahan diha sa kahusay niana nga bahin sa yuta (tan-awa sa Alma 6), siya mibiyahe ngadto sa yuta sa Gideon. Ang Alma 7 naglangkob sa importante nga mga pagtulun-an gikan ni Alma ngadto sa katawhan ni Gideon mahitungod ni Jesukristo ug sa Iyang Pag-ula. Sa dili pa ka magsugod sa pagtuon, paggahin og panahon sa paghunahuna kon sa unsang paagi ang Pag-ula ni Jesukristo may kalabotan sa imong kinabuhi. Unsa nga mga kahimtang ang imong giatubang karon diin imong gikinahanglan ang tabang nga gihatag sa Langitnong Amahan ug sa Manluluwas?

Samtang magtuon ka karon, pangitaa ang mga pagtulun-an mahitungod ni Jesukristo ug sa Iyang Pag-ula nga makatabang kanimo nga mas makasabot unsay Iyang nabuhat alang kanimo ug sa unsang paagi Siya makatabang kanimo.

Si Alma nagtudlo mahitungod sa Pag-ula sa Manluluwas

Ikonsiderar ang pagdapit sa mga estudyante sa pagkopya sa mosunod nga tsart diha sa ilang mga journal sa pagtuon. Sa laing paagi, mahimo nimo kining ipakita o kopyahon diha sa pisara aron dungan kini nga suwatan isip usa ka klase.

Unsa ang giantos sa Manluluwas alang kanako	Ngano nga ang Manluluwas nag-antos alang kanako

Ang Alma 7:11–13 usa ka tudling sa doktrinal nga kahanas. Ikonsiderar ang pagmarka sa mga tudling sa doktrinal nga kahanas sa lahi nga paagi aron mas dali ra nimo kining makit-an. Mahatagan ka og kahigayonan sa sunod nga leksiyon sa pagpraktis sa paggamit sa doktrina nga gitudlo niini nga tudling ngadto sa usa ka pangutana o sitwasyon.

Basaha ang Alma 7:11–13, mangita sa mga pagtulun-an ni Alma mahitungod kon unsa ang giantos o gidala ni Jesukristo diha sa Iyang Kaugalingon alang kanimo isip kabahin sa Iyang Pag-ula. Irekord kini sa unang kolum sa imong tsart. Mahimong makatabang ang pagkahibalo nga ang pulong nga kahuyang nagpasabot sa mga kahuyang ug mga pagkaluya nga atong nasinati sa mortalidad.

Kon imong pilion nga gamiton ang tsart diha sa pisara, ikonsiderar ang pagdapit sa mga estudyante sa pagrekord sa unsay ilang napalgan gikan niini nga mga bersikulo diha niini. Dayon dapita sila sa pagbasa sa mosunod nga mga tudling sa kasulatan ug sa pagrekord og dugang nga mga detalye nga ilang nakat-onan mahitungod sa pag-antos sa Manluluwas.

Basaha ang 2 Nephi 9:21; Mosiah 3:5–8; ug Doktrina ug mga Pakigsaad 19:16–19. Kini nga mga tudling naglakip sa ubang mga detalye mahitungod sa pag-antos sa Manluluwas. Idugang ang bisan unsang mga pulong o mga hugpong sa mga pulong nga imong nakita nga importante sa unang kolum diha sa imong tsart. Ikonsiderar ang pagdugang og cross-reference o link gikan niini nga mga tudling ngadto sa Alma 7:11–13.

• Unsa nga mga hunahuna o mga pagbati ang anaa kanimo samtang ikaw nakakat-on mahitungod sa pag-antos sa Manluluwas?

• Ngano kaha nga importante nga masabtan kon unsay giantos sa Manluluwas ug gidala diha sa Iyang Kaugalingon isip kabahin sa Iyang maulaong sakripisyo?

Ngano nga si Jesukristo miantos niini nga mga butang

Basaha pag-usab ang Alma 7:11–13, niining higayona mangita kon nganong ang Manluluwas miantos alang kanimo. Pagatutoki ang mga pulong nga nagsugod sa “nga siya” o “ang iyang” samtang nagbasa ka. Sa ikaduhang kolum sa imong tsart, isulat ang imong napalgan. Mahimong makatabang nga mahibal-an nga ang pulong nga pagtabang nagpasabot og paghatag og kahupayan o abag.

• Unsa ang imong nakat-onan kon nganong si Jesukristo nag-antos niini nga mga butang alang kanimo?

  Mahimong irekord sa mga estudyante ang ilang mga tubag sa miaging pangutana sa tsart diha sa pisara.

• Unsaon nimo pagpamubo sa unsa ang imong natun-an sa Alma 7:11–13 ngadto sa usa ka pamahayag sa kamatuoran?

Gikan sa Alma 7:11–13, tingali naila nimo ang kamatuoran nga sama niini: si Jesukristo nag-antos aron sa pagluwas kanako gikan sa sala ug kamatayon ug aron sa pagtabang kanako latas sa mga hagit sa mortalidad.

Ikonsiderar ang pagsulat niini nga kamatuoran diha sa pisara.

Si Presidente Dallin H. Oaks sa Unang Kapangulohan mipakigbahin sa pipila ka mga hagit sa mortalidad nga ang Manluluwas makatabang kanato. Basaha ang mosunod nga pamahayag o tan-awa ang bidyo nga “Nalig-on pinaagi sa Pag-ula ni Jesukristo,” anaa sa https://www.churchofjesuschrist.org/study/general-conference/2015/10/strengthened-by-the-atonement-of-jesus-christ?lang=ceb ChurchofJesusChrist.org, gikan sa time code 3:13 hangtod sa 4:01.

Ang atong Manluluwas nakasinati ug nag-antos sa tanang hagit sa kinabuhi “sumala sa unod” sa ingon Siya nasayod “sumala sa unod” unsaon “pagtabang [nga nangahulugan og paghatag og kahupayan o abag] ang iyang mga katawhan sumala sa ilang mga kahuyang.” Busa Siya nasayod sa atong mga panlimbasog, mga kasubo, mga pagtintal, ug sa atong pag-antos, kay Siya andam nga misinati niining tanan isip mahinungdanong bahin sa Iyang Pag-ula. Ug tungod niini, ang Iyang Pag-ula nakahatag Kaniya og gahom sa pagtabang kanato—sa paghatag nato sa kalig-on aron makalahutay niining tanan. (Dallin H. Oaks, “Nalig-on pinaagi sa Pag-ula ni Jesukristo,” Liahona, Nob. 2015, 61–62)

• Unsa ang matabang niini nga pamahayag kanimo nga imong masabtan o mabati bahin sa Manluluwas?

Pagkonektar [relate] niini sa imong kinabuhi

Tabangi ang mga estudyante sa pagkonektar sa ilang nakat-onan niini nga leksiyon ngadto sa ilang kinabuhi. Usa ka paagi sa pagbuhat niini tingali mao ang paghatag kanila og panahon sa pagpamalandong ug pagkompleto sa mosunod nga sila ra.

Pamalandongi sa makadiyot kon unsa ang giantos sa Manluluwas alang kanimo sa personal. Sama pananglit, unsa nga piho nga mga kasakit, mga tintasyon, mga kahuyang, o pag-antos ang imong gisinati o imong nasinati? Ikonsiderar ang pagsulat sa imong mga hunahuna ubos sa imong tsart.

Sunod, mainampuong mamalandong kon sa unsang paagi ang Manluluwas milig-on o makapalig-on kanimo sa matag usa niini nga mga kalisdanan. Hangyoa ang Langitnong Amahan sa pagdasig kanimo samtang imong isulat ang imong mga hunahuna ug mga pagbati.

Ikonsiderar ang pagdapit og mga boluntaryo sa pagpakigbahin sa pipila ka mga panabot nga ilang narekord. Ang mosunod nga mga pangutana mahimo usab nga gamiton sa paggiya og usa ka panaghisgotan sa klase. Sa dili pa ipangutana ang unang pangutana, ikonsiderar ang pagpakigbahin og personal nga ehemplo gikan sa imong kinabuhi. Kon hangyoon ang mga estudyante sa pagpakigbahin, pahinumdomi sila nga dili ipakigbahin ang mga kasinatian nga tingale personal ra kaayo o sagrado.

• Kanus-a nimo gibati ang kalig-on nga gihatag ni Jesukristo pinaagi sa Iyang Pag-ula?

• Unsa ang imong nakat-onan o gibati mahitungod ni Jesukristo sa imong pagtuon karon nga gusto nimong hinumdoman?

Pagpamatuod sa mga kamatuoran nga inyong nahisgotan karon.

Komentaryo ug Background nga Impormasyon

Unsa ang gibati sa Ginoo mahitungod sa mga sala o mga kahuyang nga akong gipakigbisogan sa pagbuntog?

Si Elder Richard G. Scott (1928–2015) sa Korum sa Napulog Duha ka Apostoles mitudlo:

Ang nindot nga balita alang sa tanang nagtinguha nga malikay sa mga sangpotanan sa sayop nga mga pagpili kaniadto mao nga lahi ang pagtan-aw sa Ginoo sa mga kahuyang kay sa pagsupak. Samtang ang Ginoo mipasidaan nga ang wala mahinulsuli nga pagsupak magdala og silot, kon ang Ginoo maghisgot bahin sa mga kahuyang, kanunay inubanan kini sa kalooy. (Richard G. Scott, “Personal nga Kalig-on pinaagi sa Pag-ula ni Jesukristo,” Liahona, Nob. 2013, 83)

Nasayod ba gayod si Jesukristo sa akong kahimtang?

Si Elder Jeffrey R. Holland sa Korum sa Napulog Duha ka Apostoles mitudlo:

Si Kristo naglakaw sa dalan nga ang matag mortal gitawag sa paglakaw aron nga siya mahimo nga masayod kon unsaon pagtabang ug pagpalig-on kanato sa atong labing lisod nga mga panahon. Nasayod siya sa kinalawman ug labing personal nga palas-anon nga atong gidala. Nasayod siya sa labing dayag ug emosyonal nga mga sakit nga atong gidala. Siya mipaubos sa tanang pagbangotan aron nga siya makabayaw kanato ibabaw niini. Walay pagbangutan o kasub-anan o kaguol sa kinabuhi nga wala niya giantos alang kanato ug gidala diha sa iyang kaugalingong lagsik ug maloloy-ong abaga. (Jeffrey R. Holland, Christ and the New Covenant: The Messianic Message of the Book of Mormon [1997], 223–24)

Si Elder Matthew S. Holland sa Seventy mitudlo:

Kang bisan kinsa karon nga may mga kasakit nga hilabihan o lahi kaayo nga kamo mobati nga walay laing hingpit nga makasabot niini, mahimong sakto kamo. Tingali walay sakop sa pamilya, higala, o lider sa pagkapari—bisan unsa pa ka sensitibo ug ka maayo ang gibuhat sa matag usa—nga nasayod kon unsa gayod ang inyong gibati o adunay tukmang mga pulong sa pagtabang ninyo nga mamaayo. Apan hibaloi kini: adunay Usa nga makasabot sa hingpit kon unsay inyong gisinati, kinsa “mas gamhanan pa kay sa tibuok yuta” [1 Nephi 4:1], ug si kinsa “makahimo sa tanang mga butang sa sukod nga labaw pa gayod kadaghan kay sa [inyong] arang mapangayo o mahunahuna” [Mga Taga-Efeso 3:20]. Ang proseso mabutyag diha sa Iyang paagi ug sa Iyang panahon, apan si Kristo andam kanunay sa pag-ayo sa matag tipik ug aspeto sa inyong tumang kasakit. (Matthew S. Holland, “Ang Talagsaon nga Kanindot nga Gasa sa Anak,” Liahona, Nob. 2020, 47)

Dugang nga mga Kalihokan sa Pagkat-on

Ang pagtabang sa Manluluwas alang sa adunay depresyon ug sakit sa pangisip

Samtang imong hisgutan ang doktrina nga si Jesukristo nag-antus aron sa pagluwas kanato gikan sa sala ug sa kamatayon ug sa pagtabang kanato sa mga hagit sa mortalidad (tan-awa sa Alma 7:11–13). ChurchofJesusChrist.org

Alma 7:13. “Tan-awa, kini mao ang pagpamatuod nga ania kanako”

Gitapos ni Alma ang iyang mga pagtulun-an mahitungod sa Pag-ula sa Manluluwas pinaagi sa pag-ingon, “Karon tan-awa, kini mao ang pagpamatuod nga ania kanako” (Alma 7:13). Mahimong dapiton ang mga estudyante sa pagpakigbahin sa ilang personal nga mga pagpamatuod sa Manluluwas sama sa gibuhat ni Alma ngadto sa katawhan sa Gideon. Dapita sila sa paghunahuna kon unsay ilang ipakigbahin kon hangyoon sila sa pagtudlo sa mga hunahuna ug mga pagbati sa ilang mga kasingkasing kalabot sa Manluluwas. Unsa man ang “pagpamatuod nga anaa [kanila]”?