Alma 7:14–27

“Sa Dalan nga Padulong sa Gingharian sa Dios”

Ang mga propeta sa kasagaran nagpasabot sa “higpit ug pig-ot nga dalan” (2 Nephi 31:19), nga ang “dalan sa pakigsaad,” o “sa dalan nga padulong sa gingharian sa Dios” (Alma 7:19). Si Alma nasayod nga ang katawhan sa Gideon anaa niini nga dalan ug mitudlo kanila unsaon pagpadayon niini ug mahimong mas mahisama sa Dios. Kini nga leksiyon gituyo aron sa pagtabang kanimo sa imong mga paningkamot sa pag-angkon og Kristohanong mga hiyas samtang imong gisunod ang dalan nga pabalik ngadto sa Dios.

Pagpalambo og pagbati sa gugma ug pagtahod.Dasiga ang mga estudyante sa pagpadayag og gugma nga sama kang Kristo ug pagdawat sa matag sakop sa klase. Ang pagbuhat sa ingon makapahumok sa mga kasingkasing sa mga sakop sa klase kinsa naglisod.

Pagpangandam sa estudyante: Dapita ang mga estudyante sa paghunahuna mahitungod sa Kristohanong mga hiyas nga gusto nilang mapalambo sa mas hingpit nga paagi ug sa pagtambong nga andam sa pagpakigbahin kon ngano.

Mga Posibleng Kalihokan sa Pagkat-on

Usa ka dalan nga sundon

Ikonsiderar ang pagpakita sa mosunod nga hulagway (o sa usa nga susama) samtang mangutana sa mosunod nga pangutana.

• Unsa ang mga bentaha sa adunay usa ka dalan nga subayon?

Ikonsiderar ang pagtan-aw sa “Inadlaw nga Pagpahiuli” gikan sa time code 1:40 hangtod sa 3:25 aron makita si Elder Dieter F. Uchtdorf sa Korum sa Napulog Duha ka Apostoles nga mipasabot kon unsay mahitabo sa mga tawo nga nagbiyahe nga walay dalan o kasaligan nga mga timaan. Kini nga bidyo anaa sa https://www.churchofjesuschrist.org/study/general-conference/2021/10/41uchtdorf?lang=ceb ChurchofJesusChrist.org.

Human managna ngadto sa mga katawhan sa Gideon mahitungod sa kinabuhi ug Pag-ula ni Jesukristo, si Alma mipakigbahin og mga pulong nga makapadasig kanila.

Basaha ang Alma 7:19–20 aron makita unsa ang gisulti ni Alma mahitungod sa Dios, sa Iyang dalan, ug sa mga katawhan sa Gideon.

Ikonsiderar ang pagmarka sa hugpong sa mga pulong nga “sa dalan nga padulong sa gingharian sa Dios” sa bersikulo 19. Karon ikaw makakat-on og dugang mahitungod niini nga dalan.

• Sa imong hunahuna unsaon nimo pagkahibalo kon ikaw anaa sa dalan nga padulong sa gingharian sa Dios?

Ikonsiderar ang pagdrowing sa mosunod nga hulagway diha sa pisara ug sulati kini og “sa dalan nga padulong sa gingharian sa Dios.” Dapita ang mga estudyante sa pagdrowing og susama nga butang diha sa ilang mga journal.

Pagdrowing og hulagway nga susama sa mosunod ug sulati kini og “Sa dalan nga padulong sa gingharian sa Dios.”

Ang dalan nga padulong sa gingharian sa Dios kasagaran nagpasabot nga ang higpit ug pig-ot nga dalan o ang dalan sa pakigsaad. Anaa kita niini nga dalan kon kita nagsunod sa ehemplo ug mga pagtulun-an ni Jesukristo. Ang pagpadayon niini nga dalan modala kanato padulong sa kinabuhing dayon (tan-awa sa 2 Nephi 31:19–20).

Samtang magtuon ka, pamalandongi kon nakita ba nimo ang imong kaugalingon sa dalan nga padulong sa gingharian sa Dios. Pangita og mga pagtulun-an nga makatabang nimo nga mas masabtan kini nga dalan ug ang mga panalangin nga gitanyag sa Ginoo kanimo samtang imong gisunod kini.

“Sa dalan nga padulong sa gingharian sa Dios”

Gihulagway ni Alma ang mga lihok nga atong mahimo nga modala kanato balik ngadto sa presensiya sa Dios.

Basaha ang Alma 7:14–16, ug dayon irekord kini nga mga lihok diha sa agianan o tapad sa agianan sa imong drowing.

• Unsa ang natabang niini nga mga bersikulo diha kanimo nga makasabot mahitungod sa unsay gipasabot nga maanaa sa dalan nga padulong sa Dios?

Ikonsiderar ang pagtugot sa pipila ka mga estudyante sa pagsulat sa ilang mga tubag sa miaging pangutana diha sa pisara. Mahimong dapiton dayon niini nga mga estudyante ang uban nga mahimong moduol ug linginan ang tubag diha sa pisara nga daw importante kaayo kanila. Ang estudyante nga milingin sa tubag mahimong hangyoon sa pagpasabot kon nganong gibati nila nga importante kini nga lihok nga makatabang kanato nga makabalik sa presensiya sa Dios.

Usa ka kamatuoran nga atong makat-onan gikan niini nga mga bersikulo mao nga samtang kita maghinulsol, mohimo og mga pakigsaad uban sa Dios, ug modawat sa mga ordinansa sa ebanghelyo ni Jesukristo, kita nagsunod sa dalan nga padulong sa gingharian sa Dios.

• Sa unsang paagi kini nga mga lihok nagtabang kanato nga maandam sa pagbalik ngadto sa presensiya sa Dios?

• Unsa nga mga panalangin ang atong masinati niining kinabuhia pinaagi sa pagsunod sa dalan sa Dios?

Ikonsiderar ang pagdapit sa mga estudyante sa pagpakigbahin sa mga panalangin nga ilang nasinati sa ilang kinabuhi pinaagi sa pagsunod sa dalan sa Dios. Mahimo usab nimong ipakigbahin ang mga ehemplo gikan sa imong personal nga kinabuhi.

Pagpalambo og Kristohanong mga hiyas samtang naglakaw sa Iyang dalan

Si Elder Dale G. Renlund sa Korum sa Napulog Duha ka Apostoles mipasabot nga usa ka panalangin sa pagsunod sa dalan sa pakigsaad sa Dios mao nga kini “moggiya kanato nga mahimong sama Kaniya” (“Magpili Kamo Niining Adlawa,” Liahona, Nob. 2018, 104).

Ikonsiderar ang pagpakita niini nga mga hulagway sa Manluluwas (o uban nga imong gipili) samtang mangutana sa mga estudyante sa mosunod nga mga pangutana. Mahimo nimong ipakigbahin ang mga hiyas ni Jesukristo nga imong hilabihang gidayeg sa dili pa mangutana sa mga pangutana.

• Unsa nga mga hiyas ang imong gidayeg pag-ayo mahitungod ni Jesukristo? Ngano man?

• Sa unsa nga mga paagi gusto nimo nga mas mahisama sa Manluluwas? Unsay makapalisod niini? Unsaon kaha nato sa pagbuntog niini nga mga kalisdanan uban ang tabang sa Ginoo?

• Kanus-a nimo gibati ang labing dakong tinguha nga mahisama Kaniya? Unsa ang panghitabo sa imong kinabuhi nga nakapahimo kanimo nga ingon niana?

Si Alma miila sa pipila ka Kristohanong mga hiyas nga kinahanglan natong paningkamotan nga maangkon samtang kita naglakaw sa dalan nga padulong sa gingharian sa Dios.

Basaha ang Alma 7:22–25 ug pangitaa ang Kristohanong mga hiyas ug kinaiya nga imong makita nga gipahayag o gihulagway. Ikonsiderar ang pagmarka niini diha sa imong mga kasulatan. Mahimo usab nimong ikonsiderar ang paglista niini nga mga hiyas ug kinaiya diha sa agianan o sa duol sa agianan sa imong drowing.

Ang mosunod nga kalihokan gituyo aron pagtabang sa mga estudyante nga makat-on og dugang mahitungod sa Kristohanong mga hiyas nga gihisgotan sa Alma 7:22–25 ug paghimo og plano sa pagpalambo sa usa o labaw pa niini nga mga hiyas. Mahimong mapuslanon alang kanimo ang pagkompleto niini nga kalihokan sa dili pa ang klase aron mas maandam ka sa pagtabang sa mga estudyante samtang sila magbuhat. Seguroha ang paghatag sa mga estudyante og igong panahon sa pagkompleto niini nga kalihokan.

Ikonsiderar ang pagpakita sa mosunod nga mga instruksiyon.

Mainampoong mopili og usa ka hiyas nga gihisgotan sa Alma 7:22–25 nga imong gibati nga ang Langitnong Amahan gusto nga imong palamboon, ug dayon kompletoha ang mosunod nga kalihokan. Irekord ang imong mga panabot sa ubos sa imong litrato o bisan asa sa imong journal sa pagtuon.

1. Pagkat-on og dugang mahitungod niini nga hiyas. Ikonsiderar ang paggamit sa mga kapanguhaan sa kasulatan sama sa Giya ngadto sa mga Kasulatan, aron sa pagtabang niini. Isulat ang unsay imong nakat-onan.

2. Ilista ang mga hagit sa pagpalambo sa hiyas nga imong gipili ug ngano sa imong hunahuna ang Dios nagtugot kanimo nga makasinati niadto nga mga hagit.

3. Paglista og duha ngadto sa tulo ka lain-laing mga paagi nga ang imong kinabuhi mahimong mas maayo human maangkon kini nga hiyas.

4. Pag-ila og ehemplo gikan sa kinabuhi sa Manluluwas diin Iyang gipakita kini nga hiyas. Sa laing paagi, paglista og ehemplo gikan sa kinabuhi sa usa ka tawo nga imong nailhan diin ilang gipakita kini nga Kristohanon nga.

5. Pag-ila og usa o daghang mga lihok nga imong mahimo nga makadapit og tabang sa Dios samtang ikaw maningkamot sa pagpalambo niini nga hiyas. Paghimo og plano kon unsaon pagpatuman niana nga lihok sa imong kinabuhi. Usa ka paagi nga mahimo nimong paningkamotan nga ipatuman kini nga lihok mao ang pagpakig-istorya sa Langitnong Amahan sa imong inadlaw nga pag-ampo mahitungod sa imong pag-uswag ug paghangyo sa Iyang tabang kon asa ka nagkulang.

Ikonsiderar ang pagbutang sa mga estudyante sa gagmay nga mga grupo. Ang matag tawo diha sa grupo mahimomg mopasabot sa daklit unsay ilang nakat-onan ug gibati mahitungod sa hiyas nga ilang gipili ug nganong gusto nila kini nga mapalambo. Sa laing paagi, mahimo nilang ipakigbahin ang hiyas nga ilang gipili ug ang ehemplo gikan sa kinabuhi sa Manluluwas o usa ka ehemplo gikan sa kinabuhi sa usa ka tawo nga ilang nailhan. Dasiga ang mga estudyante sa paglihok sa ilang mga plano. Ipamatuod nga ang Langitnong Amahan ug si Jesukristo motabang kanila sa ilang mga paningkamot.

Komentaryo ug Background nga Impormasyon

Ngano nga ang dalan padulong sa gingharian sa Dios nagpasabot usab nga ang “dalan sa pakigsaad”?

Si Elder D. Todd Christofferson sa Korum sa Napulog Duha ka Apostoles mipasabot:

Unsa ang dalan sa pakigsaad? Mao kana ang bugtong dalan nga modala kanato ngadto sa celestial nga gingharian sa Dios. Kita mosulod niana nga dalan diha sa ganghaan sa bunyag ug dayon “mopadayon sa unahan uban ang pagkamakanunayon kang Kristo, magbaton sa usa ka hingpit nga kahayag sa paglaom, ug usa ka gugma sa Dios ug sa tanan nga mga tawo [ang duha ka dagkong mga sugo] … hangtod sa kataposan” [2 Nephi 31:20]. Sa pagpadayon diha sa dalan sa pakigsaad (nga, agig dugang, magpadayon latas sa mortalidad), kita makadawat sa tanang mga ordinansa ug mga pakigsaad kalabot sa kaluwasan ug kahimayaan. (D. Todd Christofferson, “Nganong Mahinungdanon ang Dalan sa Pakigsaad,” Liahona, Mayo 2021, 116)

Unsaon nako pagpalambo ang mga hiyas nga sama kang Kristo?

Tan-awa ang “Mga Hiyas nga Sama Kang Kristo—ang Gahum nga Mobayaw Kanato” gikan sa time code 12:08 hangtod sa 16:19 aron makita si Elder Dieter F. Uchtdorf sa Korum sa Napulog Duha ka Apostoles nga mitubag niini nga pangutana.

Si Elder Lynn G. Robbins sa Seventy mipasabot:

Kay ang hiyas nga sama kang Kristo mga gasa gikan sa Dios ug dili mapalambo kon wala ang Iyang tabang, sa pamilya ug sa personal nga mga pag-ampo, pag-ampo alang niadto nga mga gasa. (Lynn G. Robbins, “Unsa nga Matang sa mga Lalaki ug mga Babaye Kamo Mahisama?,” Liahona, Mayo 2011, 105)

Si Elder L. Whitney Clayton sa Seventy midugang niini nga mga panabot:

Ang mga hiyas ni Kristo maangkon diha sa “proseso sa panahon” [Moises 7:21] pinaagi sa tinuyo nga pag-uswag subay sa dalan sa pakigsaad. Ang Kristohanon nga hiyas modayan-dayan sa mga kinabuhi niadtong kinsa naningkamot sa pagpakabuhi uban sa kamaayo. Kini mopuno sa mga panimalay sa kahayag sa ebanghelyo, bisan pa ang salog gama sa lapok o marmol. Bisan kon ikaw lang ang tawo sa inyong panimalay nga nagsunod sa pahimangno sa “pagpangita niini nga mga butang,” [Mga Artikulo sa Hugot nga Pagtuo 1:13], ikaw nakatampo sa espirituhanong mga kagamitan sa panimalay sa inyong pamilya. (L. Whitney Clayton, “Ang Labing Nindot nga mga Panimalay,” Liahona, Mayo 2020, 107-108)

Dugang nga mga Kalihokan sa Pagkat-on

Paghinulsol, mga ordinansa, ug ang dalan sa pakigsaad

Human maila ang gipabaga nga pagkasulat nga kamatuoran, ikonsiderar ang paghatag sa mga estudyante og kahigayonan sa pagpasabot sa kamahinungdanon sa paghinulsol, mga ordinansa, ug mga pakigsaad. Mahimong i-drama-drama sa mga estudyante ang pagpasabot ngadto sa usa ka tawo nga dili miyembro sa Simbahan unsay gipasabot sa paghinulsol, unsa ang mga ordinansa sa ebanghelyo ni Kristo, ug nganong importante kaayo kini.

Mahimong tan-awon sa mga estudyante ang mga entry sa Giya ngadto sa mga Kasulatan ubos sa “Hinulsol, Paghinulsol” ug “Mga Ordinansa” kon nagkinahanglan sila og tabang.

Pagtandi sa Alma 7 ngadto sa 2 Nephi 31

Kon makabenepisyo ang mga estudyante gikan sa pagtuon og dugang mahitungod sa dalan padulong sa gingharian sa Dios, ikonsiderar ang mosunod nga kalihokan.

Dapita ang mga estudyante sa paghimo og tsart nga susama sa mosunod:

2 Nephi 31:13–21 mga paghulagway sa dalan ug unsaon pagpabilin niini	2 Nephi 31:13–21 mga paghulagway sa dalan ug unsaon pagpabilin niini

Dapita ang mga estudyante sa pagtinabangay nga magpares. Ang usa ka partner mahimong magtuon sa Alma 7 ug ang lain magtuon sa 2 Nephi 31. Ang matag usa nila mahimo nga mosulat sa angay nga bahin sa ilang mga tsart. Kon mahuman na sila, mahimo nilang ipakigbahin ang ilang bahin sa tsart samtang ang laing kauban morekord sa unsay gipakigbahin sa ilang kapares. Human sa igong panahon, dapita ang mga estudyante sa pagpakigbahin sa klase sa unsay ilang nakat-onan mahitungod sa Manluluwas ug sa Iyang dalan samtang gihimo nila kini nga kalihokan. Dapita sila sa pagtino og usa ka butang nga ilang mahimo aron makapadayon o magpabilin niining higpit ug pig-ot nga dalan.