Doktrinal nga Kahanas: Alma 7:11–13

“Ug Siya Magpadayon, Mag-antos sa mga Sakit ug mga Kasakit ug mga Pagtintal sa Matag Matang”

Sa imong pagtuon sa Alma 7:1–13, imong nakat-onan ang pipila sa giantos sa Manluluwas isip kabahin sa Iyang Pag-ula aron “siya mahimo nga masayod sumala sa unod unsaon pagtabang ang iyang katawhan” (Alma 7:12). Kini nga leksiyon makatabang nimo sa pagsag-ulo sa pakisayran sa doktrinal nga kahanas ug sa mahinungdanon nga hugpong sa mga pulong sa kasulatan sa Alma 7:11–13, mapasabot ang doktrina nga gitudlo niini nga tudling, ug magamit ang mga baroganan sa pag-angkon og espirituhanong kahibalo sa tinuod nga mga sitwasyon sa kinabuhi.

Tabangi ang mga tigkat-on nga moangkon og responsibilidad alang sa ilang kaugalingon nga pagkat-on.Ang pagkat-on sa ebanghelyo nga naggiya ngadto sa pagkakabig nagkinahanglan sa mga tigkat-on nga mogamit og hugot nga pagtuo ug dakong paningkamot. Tabangi ang mga estudyante nga makasabot nga ang ilang kasinatian sa seminary nagdepende pag-ayo kanila. Dasiga ang mga estudyante sa pag-angkon og responsibilidad alang sa ilang kaugalingong pagkat-on, hatagi sila og mga kahigayonan sa pagbuhat sa ingon, ug pagpahayag og pagsalig nga sila magmalamposon.

Pagpangandam sa estudyante: Ikonsiderar ang pagdapit sa mga estudyante nga mainampoong mamalandong kon unsay ilang mabuhat aron makadawat sa tabang ug kalig-on nga gihatag ni Jesukristo pinaagi sa Iyang Pag-ula.

Mga Posibleng Kalihokan sa Pagkat-on

Kini nga leksiyon sa tudling sa doktrinal nga kahanas gidesinyo nga itudlo human sa leksiyon sa “Alma 7:1–13,” nga mao ang pangkonteksto nga leksiyon alang sa tudling sa doktrinal nga kahanas sa Alma 7:11–13. Kon gikinahanglang ibalhin kini nga leksiyon sa tudling sa doktrinal nga kahanas sa laing semana, seguroha nga itudlo usab ang tukma nga pangkonteksto nga leksiyon nianang semanaha.

Isag-ulo ug ipasabot

Ang mahinungdanon nga hugpong sa mga pulong sa kasulatan sa Alma 7:11–13 mao ang “Ug siya magpadayon, mag-antos sa mga sakit ug mga kasakit ug mga pagtintal sa matag matang.” Ikonsiderar ang pagmarka niini nga hugpong sa mga pulong diha sa imong mga kasulatan kon wala pa nimo kini mabuhat.

Aron matabangan ang mga estudyante sa pagsag-ulo sa pakisayran ug sa mahinungdanon nga hugpong sa mga pulong sa kasulatan, ikonsiderar ang pagdapit kanila sa pagbalik-balik niini og sulti kauban sa usa ka pares hangtod nga ang duha dali ra nga makasubli pagsulti niini gikan sa panumdoman.

Ang mosunod nga materyal mahimong magamit dayon aron paghatag sa mga estudyante og kahigayonan sa pagpasabot sa doktrina niini nga tudling.

Sa miaging leksiyon, imong nakat-onan gikan sa Alma 7:11–13 nga si Jesukristo miantos aron sa pagluwas kanimo gikan sa sala ug kamatayon ug aron sa pagtabang kanimo sa paglabang sa mga hagit sa mortalidad.

Ibutang ta nga ang usa ka higala nag-text kanimo bahin sa usa ka lisod nga butang nga ilang giagian. Sa imong hunahuna ang mensahe sa Alma 7:11–13 makatabang sa imong higala apan nabalaka ka nga dili nila kini basahon kon imo lang ipadala kanila ang pakisayran sa kasulatan.

• Unsaon nimo pagpamubo ang Alma 7:11–13 sa paagi nga makatabang sa imong higala sa paglatas sa ilang kalisdanan?

Ikonsiderar ang paghatag og panahon sa mga estudyante sa pagsulat sa ilang mga tubag sa miaging pangutana. Kon mahuman na sila, pagdapit og pipila ka mga boluntaryo sa pagpakigbahin sa unsay ilang nasulat. Mahimo usab nga magpakigbahin ang mga estudyante sa ilang mga tubag ngadto sa kapares o diha sa gagmay nga mga grupo.

Pagbansay sa paggamit

Pangutan-a ang mga estudyante kon makahinumdom ba sila sa tulo ka baroganan sa pag-angkon og espirituhanong kahibalo. Kon dili sila makahimo, dapita sila sa pagsunod sa mga instruksiyon sa sunod nga parapo.

Pangitaa ang mga baroganan sa pag-angkon og espirituhanong kahibalo diha sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas (2022). Isulat kini nga mga baroganan isip mga ulohan diha sa imong journal sa pagtuon, pagbilin og luna tali sa matag usa aron imong matubag ang mga pangutana mahitungod niini unya sa leksiyon.

Ikonsiderar kon sa unsang paagi ang mga baroganan sa pag-angkon og espirituhanong kahibalo ug ang doktrina nga gitudlo sa Alma 7:11–13 makatabang sa mosunod nga senaryo.

Ikonsiderar ang pagpakita sa mosunod nga senaryo aron makakita ang mga estudyante niini sa tibuok nahibilin sa leksiyon. Kon gikinahanglan, ikonsiderar ang pagpahiangay sa senaryo aron maapil ang mga sitwasyon nga labing makahuluganon sa imong mga estudyante.

Sukad nga nagdiborsyo ang mga ginikanan ni Pedro pipila ka tuig na ang nakalabay, gibati niya nga mas misamot kalisod ang iyang kinabuhi. Siya naglisod sa eskwelahan, ug pipila sa iyang mga higala ingon og dili na siya iapil sama kaniadto. Si Pedro usab sagad mihunong na sa pagsimba, pagbasa sa iyang mga kasulatan, ug pag-ampo sa Dios. Usa ka adlaw, gisugilon ni Pedro ang iyang mga kalisod ngadto sa usa sa iyang mga higala. Siya miingon, “Gusto ko nga moarang-arang ang mga butang, apan wala ko kahibalo kon asa moduol. Gibati nako nga nag-inusara ko ug natanggong sa akong kahimtang.”

Hunahunaa nga ikaw ang higala nga gipakig-istoryahan ni Pedro ug nga siya usab nangayo kanimo og tambag kon unsaon pagsulbad ang iyang lisod nga sitwasyon. Gamita ang mga pagtulun-an sa Alma 7:11–13 ug ang mga baroganan sa pag-angkon og espirituhanong kahibalo sa pagtabang kang Pedro sa iyang hagit.

Adunay daghang mga paagi nga makompleto sa mga estudyante kini nga kalihokan sa pagbansay sa paggamit. Usa ka paagi mao ang pagtuon sa Alma 7:11–13 ug mga parapo 5–8, 11–12 sa seksiyon sa “Pag-angkon og Espirituhanong Kahibalo” sa Mahinungdanon nga Dokumento sa Doktrinal nga Kahanas, mangita sa mga pagtulun-an nga mahimong makatabang kang Pedro. Mahimo dayon nga mopakigbahin ang mga estudyante og mga panabot diha sa klase, sa managpares, o sa gagmay nga mga grupo.

Ang mosunod nga mga pangutana ug mga kapanguhaan mahimong makatabang sa ilang mga panaghisgotan. Dili nimo kinahanglan nga gamiton ang tanang mga kapanguhaan ug mga pangutana; kini mga ehemplo sa mga butang nga mahimong ikonsiderar sa mga estudyante samtang magbuhat sila niini nga senaryo.

Lihokon inubanan sa hugot nga pagtuo

Basaha ang mga parapo 5–7 sa seksiyon sa “Pag-angkon og Espirituhanong Kahibalo” sa Mahinungdanon nga Dokumento sa Doktrinal nga Kahanas. Ikonsiderar ang pagmarka sa unsay imong nakita nga makatabang.

• Unsa ang imong matudlo kang Pedro mahitungod ni Jesukristo ug sa Iyang Pag-ula nga mahimong makatabang ni Pedro sa paglihok nga may hugot nga pagtuo?

• Unsa ang mahimo ni Pedro aron makadawat sa tabang nga ikahatag ni Jesukristo?

Susihon ang mga konsepto ug mga pangutana inubanan sa mahangtorong panglantaw

Basaha ang parapo 8 sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas. Ikonsiderar ang pagmarka sa unsay imong nakita nga makatabang

• Unsa sa imong hunahuna ang gusto sa Langitnong Amahan nga hunahunaon ni Pedro kabahin sa iyang sitwasyon?

• Ngano sa imong hunahuna nga makatabang ni Pedro nga makita ang iyang sitwasyon nga adunay mahangtorong panglantaw?

Tinguhaa ang dugang nga panabot pinaagi sa balaanong gitudlo nga mga tinubdan

• Unsa nga mga matang sa balaanong gitudlo nga mga tinubdan ang mahimo nimong itudlo ni Pedro nga makahatag kaniya sa tabang nga iyang gikinahanglan?

Usa ka importante nga balaanong gitudlo nga tinubdan nga makatabang niini nga sitwasyon mao ang Alma 7:11–13. Basaha pag-usab kini nga mga bersikulo, mangita sa mga pagtulun-an nga makatabang ni Pedro.

• Unsa ang gusto nimo nga masabtan ug mabati ni Pedro gikan niini nga mga bersikulo?

• Makahunahuna ka ba og uban pang mga tudling sa kasulatan nga nagtudlo unsa ang gusto sa Langitnong Amahan nga mahibaloan ni Pedro?

Kon mahuman na ang mga estudyante, ikonsiderar ang pagdapit kanila sa paghunahuna sa ilang kaugalingong mga sitwasyon diin gikinahanglan nila ang tabang sa Manluluwas. Mahimo nimo silang hangyoon sa paghunahuna kon sa unsang paagi ang mga baroganan sa pag-angkon og espirituhanong kahibalo ug ang doktrina nga gitudlo sa Alma 7:11–13 makatabang nila nga magamit ang tabang sa Manluluwas sa ilang mga kinabuhi. Mahimong irekord sa mga estudyante kini nga mga hunahuna diha sa ilang mga journal sa pagtuon.

Rebyo sa doktrinal nga kahanas

Ang mosunod nga kalihokan sa pagrebyo kinahanglan nga gamiton sa usa ka leksiyon nga itudlo dayon human niini.

Ikonsiderar ang pagdapit sa mga estudyante sa pagsubli og sulti sa pakisayran ug sa mahinungdanon nga hugpong sa mga pulong sa kasulatan sa “Alma 7:11–13: ‘Ug siya magpadayon, mag-antos sa mga sakit ug mga kasakit ug mga pagtintal sa matag matang’” nga magbalik-balik kauban sa usa ka pares hangtod ang duha dali na nga makasulti niini gikan sa panumdoman.