Alma 5:33–62

“Ang Maayo nga Magbalantay Nagtawag Kaninyo”

Human gidasig ang mga miyembro sa Simbahan sa Zarahemla sa pagpamalandong pag-ayo sa ilang kahimtang uban sa Langitnong Amahan ug ni Jesukristo (tan-awa sa Alma 5:1–32), si Alma midapit kanila sa pagduol ngadto kang Kristo gamit ang malumo nga paghulagway sama sa Iyang “bukton sa kaluoy gitunol” (Alma 5:33), “paghinulsol, ug Ako modawat kaninyo” (Alma 5:33), ug “ang maayo nga magbalantay nagtawag kaninyo” (Alma 5:38). Kini nga leksiyon makatabang kanimo sa imong mga paningkamot sa pagduol ngadto kang Jesukristo ug sa pagdawat sa mga panalangin nga Iyang gitanyag kanimo.

Pagatutoki ang mga tahas [roles] ni Jesukristo.Tabangi ang mga estudyante nga makaila ug mahigugma sa Manluluwas pinaagi sa pag-ila kon giunsa Niya pagtuman ang Iyang mga tahas [roles] isip ilang Manluluwas ug Manunubos. Dasiga sila sa pagpamalandong kon giunsa pagpakita ni Jesukristo ang Iyang gugma ug pag-amuma alang kanila sa personal.

Pagpangandam sa estudyante: Dapita ang mga estudyante sa pagtuon sa Alma 5:33–34 ug sa pagtambong sa klase nga andam sa pagpakigbahin sa unsay ilang nakat-onan mahitungod sa Manluluwas gikan niini nga mga bersikulo.

Mga Posibleng Kalihokan sa Pagkat-on

Paghinulsol ug Ako modawat kaninyo

Ikonsiderar ang pagpakita og duha ka hulagway nga mahimong makapainteres sa mga estudyante ug dapita ang klase sa paghisgot kon ngano nga ang mosunod nga panultihon mahimong tinuod.

Ang usa ka karaan nga panultihon nag-ingon, “Ang usa ka hulagway mahimong adunay daghang gipasabot.”

Karon ipakita ang mosunod nga mga hulagway ug dapita ang mga estudyante sa pagpapakigbahin kon unsay gipasabot niini.

Mahimo nimong mahinumdoman nga ang Alma 5 naglangkob sa mga pagtulun-an ni Alma ngadto sa mga miyembro sa Simbahan sa Zarahemla, ang uban kanila kinsa nahimong mapahitas-on ug nahulog ngadto sa sala (tan-awa sa Alma 4:8–12). Human mangutana niining mga katawhan og sunodsunod nga mga pangutana aron sa pagtabang kanila sa pagsukod sa ilang espirituhanong pag-uswag, si Alma mitudlo og importante nga mga kamatuoran mahitungod sa Manluluwas.

Basaha ang Alma 5:33–34, mangita sa unsay gusto ni Alma nga masabtan sa iyang katawhan mahitungod ni Jesukristo.

Kini mahimo nga usa ka maayong kahigayonan sa pagdapit sa mga estudyante sa pagpakigbahin sa ilang nakat-onan sa ilang pagpangandam sa estudyante.

• Unsa nga mga pulong o mga hugpong sa mga pulong gikan niini nga mga bersikulo ang labing makahuluganon diha kanimo? Ngano man?

• Unsa nga mga pagkaparehas ang imong nakita tali niini nga mga bersikulo ug sa mga hulagway sa Manluluwas nga imong gitan-aw?

• Sa unsang paagi ang pagsabot sa mga baroganan niini nga mga bersikulo makapausab sa panglantaw sa usa ka tawo kang Jesukristo?

Kon makabenepisyo ang mga estudyante gikan sa mas lawom nga pagtuon sa pagdapit sa Manluluwas sa pagduol ngadto Kaniya, ikonsiderar ang pagdapit kanila sa pagtuon sa pipila o sa tanang mosunod nga mga kasulatan, tingali uban sa usa ka kapares o diha sa gagmay nga grupo: Mateo 11:28–30; 2 Nephi 26:33; 3 Nephi 9:14; ug Ether 12:27. Mahimo usab nga idugang sa mga estudyante kini nga mga tudling isip mga cross-reference sa Alma 5:33–34 diha sa ilang mga kasulatan. Kon mahuman na sa mga estudyante ang pagtuon niining dugang nga mga tudling, pagdapit og mga boluntaryo sa pagpakigbahin og dugang nga mga panabot nga ilang naangkon mahitungod ni Jesukristo gikan niini nga mga bersikulo.

Hunahunaa ang imong mga kasamtangang tinguha sa pagdawat sa pagdapit ni Jesukristo sa paghinulsol ug pagduol ngadto Kaniya ug kon nag-atubang ka ba og mga babag nga makapalisod nga mahimong Iyang sumusunod. Samtang magpadayon ka sa pagtuon, pangitaa ang mga pagtulun-an nga makatabang nimo sa imong mga paningkamot sa pagbuntog niadto nga mga babag ug pagsunod ni Jesukristo.

Pagpatalinghog ngadto sa tingog sa Maayo nga Magbalantay

Human sa pagtudlo mahitungod sa pagdapit sa Manluluwas sa paghinulsol ug pagduol ngadto Kaniya, si Alma mipakigbahin og dugang nga mga pagtulun-an mahitungod ni Jesukristo aron sa pagdani sa iyang mga katawhan sa pagsunod sa Manluluwas.

Basaha ang Alma 5:37–39 ug pangitaa ang mensahe ni Alma ngadto sa iyang katawhan.

Ikonsiderar ang pagdapit sa mga estudyante sa paghisgot sa mosunod nga mga pangutana kauban ang usa ka pares.

• Unsa sa imong hunahuna ang gusto ni Alma nga mahibaloan ug mabati sa iyang katawhan mahitungod ni Jesukristo (ang Maayong Magbalantay) gikan niini nga analohiya?

• Unsa sa imong hunahuna ang gusto ni Alma nga mahibaloan ug mabati sa iyang katawhan mahitungod sa ilang mga kaugalingon (ang karnero) gikan niini nga analohiya?

Usa ka kamatuoran nga atong makat-onan gikan niini nga mga bersikulo mao nga kinahanglan natong mopatalinghog ngadto sa tingog sa Maayo nga Magbalantay aron mahimong Iyang karnero.

Si Presidente Russell M. Nelson mipapakigbahin sa mosunod nga kahulogan sa pulong nga mopatalinghog:

Kini nagpasabot “sa pagpaminaw uban sa tumong sa pagsunod.” Sa pagpatalinghog nagpasabot sa “pagpaminaw Kaniya”—sa pagpaminaw unsay isulti sa Manluluwas ug dayon sa pagpatalinghog sa Iyang tambag. (Russell M. Nelson, “Paminaw Kaniya,” Liahona, Mayo 2020, 89)

• Unsa ang imong nahibaloan mahitungod sa Manluluwas nga nakapahimo nimo nga gusto nga mopatalinghog Kaniya ug maihap uban sa Iyang mga karnero?

Si Elder Gary E. Stevenson sa Korum sa Napulog Duha ka Apostoles mipakigbahin sa pipila ka mga panalangin nga gitanyag sa Manluluwas kanato kon kita motugot Kaniya nga mahimong atong Maayo nga Magbalantay. Basaha ang mosunod nga pamahayag o tan-awa ang bidyo nga “Mga Kasingkasing nga Nabugkos,” anaa sa https://www.churchofjesuschrist.org/study/general-conference/2021/04/15stevenson?lang=ceb ChurchofJesusChrist.org, gikan sa time code 13:56 hangtod sa 14:51.

Samtang molantaw kita pinaagi sa panglantaw sa ebanghelyo, kita makaila nga kita usab gibantayan sa usa ka manggiluy-on nga tig-amuma, nga naghalad sa Iyang Kaugalingon uban sa kamabination ug maamumahon nga espiritu. Ang Maayong Magbalantay nakaila sa matag usa kanato pinaagi sa ngalan ug adunay personal nga interes kanato. Ang Ginoong Jesukristo Mismo miingon, “Ako mao ang maayong magbalantay sa mga karnero. Nakaila ako sa akong mga karnero. … Ug ako andam sa pagpakamatay alang sa akong mga karnero” [Juan 10:14, 15].

… Nakakaplag ako og malungtarong kalinaw sa pagkahibalo nga “ang Ginoo mao ang akong magbalantay”” [Salmo 23:1] ug nga ang matag usa kanato nailhan Niya ug anaa sa Iyang mabination nga pagbantay. Kon kita moatubang sa mga pagsulay ug mga kalisod sa kinabuhi, sakit ug mga kadaot, ang Ginoo—atong Magbalantay, atong Tig-amuma—moamuma kanato uban sa gugma ug kamabination. Siya moalim sa atong mga kasingkasing ug mopahiuli sa atong mga kalag. (Gary E. Stevenson, “Mga Kasingkasing nga Nabugkos,” Liahona, Mayo 2021, 23)

• Unsa ang mipatigbabaw nimo kon nganong gustohon natong mosunod sa Maayo nga Magbalantay, si Jesukristo?

Mga paagi nga makapatalinghog ka ngadto sa tingog sa Maayo nga Magbalantay

Si Alma misugyot og pipila ka mga paagi nga ang katawhan sa Zarahemla makapatalinghog ngadto sa tingog sa Maayo nga Magbalantay. Basaha ang Alma 5:40–41, 50–51, 57 ug pangitaa unsa ang gitambag ni Alma.

Samtang ang mga estudyante motubag sa mosunod nga mga pangutana, mahimo nimong ilista ang ilang mga tubag diha sa pisara o dapita ang mga estudyante sa pagduol ug pagsulat sa ilang mga tubag.

• Unsa ang imong nakat-onan gikan niini nga mga bersikulo mahitungod sa mga paagi nga kamo makapatalinghog ngadto sa tingog sa Maayo nga Magbalantay?

• Unsa ang pipila ka mga paagi nga kita mo “biya … gikan sa mga dautan” ug “dili mohikap sa ilang mahugaw nga mga butang”? (bersikulo 57).

Ikonsiderar ang pagdapit og pipila ka mga boluntaryo sa pagpakigbahin og mga kasinatian nga ilang nasinati sa ilang mga kinabuhi sa dihang sila mihukom sa pagpatalinghog ngadto sa tingog sa Maayo nga Magbalantay ug unsa nga mga panalangin ang ilang namatikdan sa pagbuhat sa ingon. Mahimo usab nimong ikonsiderar ang pagpakigbahin og kasinatian gikan sa imong kaugalingon nga kinabuhi.

• Pipila sa mga rason nga gusto nako nga mosunod kang Jesukristo mao

• Usa ka paagi nga ako mopatalinghog ngadto sa Iyang tingog mao

Komentaryo ug Background nga Impormasyon

Sa unsang paagi kita makabenepisyo sa pagpaminaw sa tingog ni Jesukristo?

Si Presidente Russell M. Nelson mihatag sa mosunod nga mga panabot mahitungod sa pagpaminaw ngadto sa tingog ni Jesukristo:

Ang atong Amahan nakahibalo nga kon kita gilibotan sa walay kasegurohan ug sa kahadlok, ang labing makatabang nato mao ang pagpaminaw sa Iyang Anak.

Tungod kay kon kita magtinguha nga maminaw—tinuod nga pagpaminaw—sa Iyang Anak, kita giyahan nga makahibalo unsay buhaton sa bisan unsa nga sirkumstansiya.

… Ang Dios mihatag nato og sundanan alang sa kalamposan,ug hingpit nga kalipay niini nga kinabuhi. Kita kinahanglan nga maminaw sa mga pulong sa Ginoo, mopatalinghog niini, ug mamati unsay Iyang gisulti kanato!

Isip mga disipulo ni Jesukristo, ang atong mga paningkamot sa pagpaminaw Kaniya kinahanglan nga mas gitinguha nato. Kinahanglan og tininuod ug makanunayon nga paningkamot sa pagpuno sa atong inadlaw nga kinabuhi sa Iyang mga pulong, sa Iyang mga pagtulun-an, sa Iyang mga kamatuoran. (Russell M. Nelson, “Paminaw Kaniya,” Liahona, Mayo 2020, 89)

Alma 5:57. Giunsa pagtan-aw sa Manluluwas ang mahugaw nga mga butang sa atong mga kinabuhi?

Naghisgot kang Jesus isip ang Maayong Magbalantay, si Elder Dale G. Renlund sa Korum sa Napulog Duha ka Apostoles mitudlo:

Kay ang Dios migamit sa sakit isip simbolo alang sa sala sa tibuok kasulatan, resonable ang mangutana, “Unsa man ang reaksiyon ni Jesukristo sa dihang nag-atubang og simbolikanhong mga sakit—ang atong mga sala?” Total, ang Manluluwas miingon nga Siya “dili makatan-aw sa sala uban sa labing gamay nga matang sa pagtugot [Doktrina ug mga Pakigsaad 1:31]; busa unsaon Niya pagtan-aw nato, nga ingon ka dili hingpit, nga dili mobiya sa kalisang ug kasagmuyo?

Ang tubag simple ug klaro. Isip ang Maayong Magbalantay, gitan-aw ni Jesukristo ang sakit sa Iyang karnero isip usa ka kahimtang nga nagkinahanglang tambalan, atimanon, ug kaluy-on. Kini nga magbalantay, ang atong Maayong Magbalantay, nakakaplag og kalipay sa pagkakita sa nasakit Niya nga karnero nga milambo sa pagkaayo.

Gisulti nang daan sa Manluluwas nga Siya “magapasibsib sa iyang panon sama sa usa ka magbalantay sa karnero,” [Isaias 40:11], “pangitaon ko kadtong nawala, … pabalikon pag-usab kadtong ginapatlaag sa halayo, … bugkosan ko kadtong nabunggoan sa bukog, ug … palig-unon kadtong nagmasakiton” [Ezekiel 34:16]. Bisan kon ang miapostasiya nga Israel gihulagway nga nalukop sa makasasala nga “mga samad, ug mga pangos, ug bag-ong mga labod,” [Isaias 1:6], ang Manluluwas midasig, miawhag, ug misaad og kaayohan [tan-awa sa Isaias 1:18]. (Dale G. Renlund, “Ang Atong Maayong Magbalantay,” Liahona, Mayo 2017, 30)

Dugang nga mga Kalihokan sa Pagkat-on

Alma 5:45–48. “Ako nasayod sa akong kaugalingon nga sila mga tinuod”

Mahimong basahon sa mga estudyante kini nga mga bersikulo, mangita kon sa unsang paagi nadawat ni Alma ang iyang kahibalo sa kamatuoran. Mahimo nimong ipunting nga bisan og si Alma nakakita og anghel, iyang gipahinungod ang iyang kahibalo ug pagpamatuod sa kamatuoran ngadto sa pagpadayag nga iyang nadawat pinaagi sa Espiritu Santo. Ikonsiderar ang pagbasa sa mosunod nga pamahayag ni Presidente Joseph Fielding Smith (1876–1972).

“Kon ang usa ka tawo adunay pagpaila gikan sa Espiritu Santo, magbilin kini og usa ka dili matangtang nga timaan sa iyang kalag, usa ka butang nga dili dali nga mapapas. Ang Espiritu mao ang nakigsulti ngadto sa espiritu, ug moabot kini uban sa makadani nga gahom. Ang pagpakita sa usa ka anghel, o gani sa Anak sa Dios mismo, modani sa mata ug sa hunahuna, ug sa kadugayan magkaawop, apan ang madanihon nga timaan sa Espiritu Santo motuhop og maayo sa kalag ug mas lisod nga mapapas” (Joseph Fielding Smith, Answers to Gospel Questions, comp. Joseph Fielding Smith Jr. [1958], 2:151).

Ikonsiderar ang pagpangutana sama sa mosunod: Ngano nga ang pagpadayag pinaagi sa Espiritu Santo labihan ka makaimpluwensya? Ngano sa imong hunahuna nga importante alang sa matag usa kanato nga makadawat og pagpamatuod ni Jesukristo pinaagi sa pagpadayag sa Espiritu Santo? Giunsa pagpakita ni Alma ang ehemplo sa pagpatalinghog sa Maayo nga Magbalantay?

Alma 5:53–55. “Makasugakod ba kamo niini nga mga panultihon?”

Mahimo nimong ipabasa sa mga estudyante kini nga mga bersikulo ug mangita sa mga kinaiya ug mga lihok nga makapalisod sa usa ka tawo sa pagpatalinghog ngadto sa tingog sa Manluluwas. Ikonsiderar ang paglista og mga tubag diha sa pisara. Hain niini nga mga hagit ang daw lisod kaayo alang sa mga batan-on karon? Unsa ang mga ehemplo kon sa unsang paagi ang Manluluwas mitudlo kanato sa pagsanong niini nga mga hagit?