Almà 8

Mihaino sy mankatò ny Ray any An-danitra

I Almà sy i Amioleka

Mety ho sarotra ny mankatò ny Ray any An-danitra, saingy mitondra mankany amin’ilay fahasambarana lehibe indrindra izany. Rehefa nampihatra finoana i Almà sy i Amioleka ary nanaraka ny toromarik’ Andriamanitra, dia nitahy azy ireo sy ireo nanodidina azy ireo Andriamanitra. Ity lesona ity dia afaka manampy anao handre sy hankatò ny Ray any An-danitra eo amin’ny fiainanao.

Ampio hahatsapa ny mpianatra fa manan-danja ny fandraisan’izy ireo anjara. Ny fihainoana dia mitaky ny mpampianatra mba mifantoka bebe kokoa amin’ny filan’ny mpianatra fa tsy izay manaraka ao amin’ny drafitry ny lesona. Mivonòna hamela izay zavatra nomaninao rehefa bitsihan’ny Fanahy ary henoy ny hevitry ny mpianatra. Ampahafantaro azy ireo amin’ny alalan’ny teninao sy fihetsikao fa mazoto hihaino azy ireo ianao.

Fanomanana ny mpianatra: Asao hivavaka ny mpianatra ary hanontany ny Ray any An-danitra ny zavatra tiany hataon’izy ireo mba hanarahana Azy feno kokoa.

Ireo sahanasa fianarana azo atao

Manaraka ny Ray any An-danitra

Raha toa ka manan-danja kokoa amin’ny mpianatra izany noho ny ohatra eo ambany, dia atombohy amin’ny alalan’ny fanasana ny mpianatra hizara zava-tsarotra mety hangatahin’ny Tompo hataon’izy ireo.

Eritrereto ny mety ho fahatsapana anananao raha angatahin’ny Ray any An-danitra hanao ity manaraka ity ianao sy ny antony mety hahatsapanao toy izany:

• Mizara ny filazantsara amin’ny olona iray izay efa nandà ny fanasanao tany aloha.

• Maka namana sy manampy olona iray ao amin’ny sekoly misy anao izay tsy tian’ny olona na ailikilika.

  Manasà mpianatra vitsivitsy hizara ny mety ho fahatsapany sy ny anton’izany.

• Inona avy no didy hafa na bitsika mety homen’ny Ray any An-danitra antsika ka mety ho sarotra ekena sy ankatoavina? Nahoana no mety ho tena sarotra ireny toe-java-misy ireny?

Ao amin’ny toko hohalalininao anio Andriamanitra dia nanome toromarika an’i Almà hiatrika toe-javatra mitovitovy amin’ilay rafi-tantara voalohany eo ambony, ary i Amioleka dia niatrika toe-javatra mitovitovy amin’ilay faharoa. Makà fotoana hisaintsainana raha misy didy na bitsika avy amin’ Andriamanitra ka sarotra aminao ny mankatò azy. Rehefa mandalina ianao, dia tadiavo ny fomba nandresen’i Almà sy i Amioleka ny fanamby natrehin’izy ireo sy nanarahan’izy ireo ny didin’ Andriamanitra. Mikatsaha fanampian’ny Ray any An-danitra mba hahalalana ny fomba ahafahanao mihaino sy manaraka Azy tsara kokoa.

Mety hanampy ny mpianatra ny fiarahan’izy ireo miasa amina mpiara-mianatra iray hamaky sy hizara ny tantaran’i Almà sy i Amioleka araka ny ilazana izany eo ambanina lohateny misaraka eo ambany. Na asao hamaky ny tantaran’i Almà ny antsasaky ny mpianatra ary ny antsasany hamaky ny tantaran’i Amioleka. Avy eo dia azon’ny mpianatra atao ny miara-miasa amina mpiara-mianatra iray izay namaky ilay tantara hafa ary hifanazava ny zavatra novakin’izy ireo. Asehoy ireo fanontaniana miaraka amin’izany mba hahafahan’ny mpianatra mijery azy ireo rehefa mamaky.

Ny zavatra niainan’i Almà

Vakio ny Almà 8:8–18, hitadiavana ny zavatra nangatahin’ Andriamanitra hataon’i Almà sy ny antony mety ho nahasarotra izany taminy. Miezaha maka sary an-tsaina ilay zava-nitranga rehefa mamaky azy ireo ianao. Azonao atao ny mijery ilay horonan-tsary hoe “Nafahana tamin’ny alalan’ny herin’ Andriamanitra i Almà sy Amioleka” manomboka eo amin’ny mari-potoana 0:36 hatramin’ny 2:22, hita ao amin’ny ChurchofJesusChrist.org, ary araho ao amin’ny soratra masinao izany.

• Inona avy no andian-teny ao amin’ny andininy 14 manondro ny fahatsapan’i Almà rehefa nandray io didy io izy?

• Inona no andian-teny ao amin’ny andininy 18 milazalaza ny fotoana lanin’i Almà nankatoavana izany?

• Nahoana araka ny eritreritrao no nankatò haingana be i Almà na dia teo am-pahatsapana alahelo aza?

Ny zavatra niainan’i Amioleka

Vakio ny Almà 8:19–21; 10:4–11 mba hahitana ny zavatra nitranga manaraka. (Mety hanampy raha fantatra fa i Amioleka dia nitantara ny zavatra niainany ao amin’ny Almà 10:4–11.) Miezaha maka sary an-tsaina ilay zava-nitranga rehefa mamaky azy ireo ianao. Azonao atao ny manohy mijery ilay horonantsary hoe “Nafahana tamin’ny alalan’ny herin’ Andriamanitra i Almà sy Amioleka” manomboka eo amin’ny mari-potoana 2:22 hatramin’ny 4:03, hita ao amin’ny ChurchofJesusChrist.org.

• Inona no ianarantsika momba an’i Amioleka ao amin’ny Almà 10:4–6? Nahoana no mety ho nahasarotra taminy ny fankatoavana an’ Andriamanitra ireny antony ireny?

• Nahoana araka ny eritreritrao no nanohy nanatona an’i Amioleka ny Ray any An-danitra na dia tsy nankatò aza izy tany amin’ny lasa?

Vakio ny Almà 8:26–32 mba hahitana ny fomba nitahiana an’i Almà sy i Amioleka noho ny zavatra nataon’izy ireo.

• Inona avy no fitsipika nianaranao avy amin’ny tantaran’i Almà sy i Amioleka?

Mihainoa rehefa mizara ny mpianatra. Soraty eo amin’ny solaitrabe izay mety ho fitsipika rehetra. Anontanio ny antony maha zava-dehibe ny fahatakarana ireo fitsipika ireo. Ampiasao ny tenin’ny mpianatra mba hanoratana eny amin’ny solaitrabe ny fitsipika mitovitovy amin’ilay anankiray etsy ambany.

Iray amin’ireo fitsipika mety ho hitanao ny hoe rehefa mihaino sy mankatò ny Ray any An-danitra isika, dia mitahy antsika sy ny hafa Izy. Misy fomba isan-karazany ahafahantsika mandre ny tenin’ Andriamanitra. Ohatra, i Almà sy i Amioleka dia samy nandre ny tenin’ Andriamanitra avy tamin’ny anjely iray.

Mety hanampy raha ifanakalozana hevitra amin’ny mpianatra ireo fomba samihafa ahafahantsika mandre ny tenin’ Andriamanitra. Azonao atao ny manasa ny mpianatra hamerina hijery ny hoe “Fanambarana” ao amin’ny Torolalana ho an’ny Soratra Masina.

Mihaino Azy

Ny sahanasa etsy ambany dia natao hanampiana ny mpianatra handresy ireo sakana mety hatrehin’izy ireo amin’ny fihainoana sy fankatoavana an’ Andriamanitra. Mety ho tsara kokoa izany raha atao fifanakalozan-kevitra miaraka amin’ny iray kilasy na anatina vondrona kely. Azon’ny mpianatra atao ny mizara hevitra sy manao lisitra izany eny amin’ny solaitrabe. Amporisiho hametraka fanontaniana sy hifanampy amin’ny fitadiavana valiny ny mpianatra. Ao anatin’io sahanasa io dia azonao atao ny mandroso na mampiasa ny hevitra eo ambany.

Hoy i Amioleka: “Nantsoina imbetsaka aho ary tsy te hihaino” (Almà 10:6). Efa nisy fotoana tsy nihainoan’i Almà an’ Andriamanitra ihany koa tany aloha teo amin’ny fiainany (jereo ny Môzià 27:8).

Alaivo sary an-tsaina hoe misy olona iray fantatrao manana olana amin’ny fihainoana sy fankatoavana an’ Andriamanitra. Makà minitra vitsy hiaraha-mandinika ny zavatra mety ho afaka mandrisika izany olona izany hatoky ny Tompo. Ireto manaraka ireto no mety ho hita ao anatin’izany:

• Ny ohatra momba ny fankatoavana nasehon’i Almà sy Amioleka

• Ohatra momba ny fankatoavan’ny Mpamonjy ny Ray

• Tantara hafa ao amin’ny soratra masina izay nihainoan’ny olona iray sy nankatoavany an’ Andriamanitra

• Fitahiana niainanao rehefa niezaka nankatò an’ Andriamanitra ianao

Hevero ny hijery ilay horonan-tsary hoe “Ny Finoana dia tsy avy amin’ny kisendrasendra fa avy amin’ny safidy” manomboka amin’ny mari-potoana 1:40 hatramin’ny 4:25, hita ao amin’ny ChurchofJesusChrist.org. Ao amin’io horonan-tsary io, ny Loholona Neil L. Andersen ao amin’ny Kôlejin’ny Apôstôly Roambinifolo dia milazalaza mombana zatovolahy iray izay nanao zavatra tamim-pahatokiana sy tamim-pankatoavana tamina bitsika iray azony nandritra ny fotoana nampiahiahy azy.

Manasà mpianatra maromaro hizara ny eritreritr’izy ireo. Hevero ny hizara ihany koa ireo eritreritrao.

Makà fotoana hiraketana izay rehetra fahatsapana mety ho azonao tamin’ny Ray any An-danitra. Eritrereto ny zavatra azonao atao mba hanaovana zavatra araka ireo fahatsapana ireo. Mety ho hita ao anatin’izany ny fanoloran-tena hankatò didy manokana na bitsika sy ny dingana rehetra tokony hataonao. Raha sarotra ny mankatò ireo didy ireo, dia hevero ny hivavaka mba hanampian’ny Ray any An-danitra anao.

Asao hizara ny zavatra tian’izy ireo hotsaroana avy amin’ny ohatra nasehon’i Almà sy i Amioleka ny mpianatra.

Zarao amin’ny mpianatrao ny fijoroana ho vavolombelona anananao fa hanampy azy ireo ny Ray any An-danitra rehefa miezaka mihaino sy mankatò Azy izy ireo.

Fanazavana sy fampahalalana avy amin’ny zava-miseho

Inona avy no sasantsasany amin’ireo fitahiana izay vokatry ny fankatoavantsika an’ Andriamanitra?

Nilaza ny Filoha George Q. Cannon (1827–1901) hoe:

Filoha George Q. Cannon

Ny fankatoavana ny Filazantsara dia mitondra [ny olona] amina fifandraisana tena akaiky sy manokana amin’ny Tompo. Izany dia mametraka fifandraisana akaiky eo amin’ny olona ety an-tany sy ilay Mpahary Lehibe any an-danitra. Izany dia mitondra ao an-tsain’ny olombelona ny fahatsapana fahatokisana ny Tsitoha sy ny fahavononany hihaino sy hamaly ny fitalahoan’ireo izay matoky Azy. Amin’ny fotoan’ny fitsapana sy fahasahiranana dia tena sarobidy tokoa izany fahatokisana izany. Mety ho tonga amin’ny olona tsirairay na amin’ny vahoaka ny olana, ny loza dia mety hanambana ary ny fanantenan’ny olombelona rehetra dia toa noravana, kanefa, rehefa nisitraka ny tombontsoa izay entin’ny fankatoavana ny Filazantsara ny olona, dia manana toerana azo antoka hijoroana; eo ambony vatolampy izay tsy azo hozongozonina ny tongotr’izy ireo. (Gospel Truth: Discourses and Writings of George Q. Cannon, sel. Jerreld L. Newquist [1987], 116)

Inona no azontsika ianarana amin’i Amioleka?

Ny Filoha Dieter F. Uchtdorf, fony izy nanompo tao amin’ny Fiadidiana Voalohany, dia nampianatra hoe:

Filoha Dieter F. Uchtdorf

Angamba fantatrao tao am-ponao tahaka an’i Amioleka fa ny Tompo dia “niantso [anao] imbetsaka” saingy “tsy te hihaino” ianao.

Saingy hitan’ny Tompo ao aminao ny zavatra hitany tao amin’i Amioleka—dia ilay fahafahana ho mpanompo mahery fo manana asa manan-danja hatao sy fijoroana ho vavolombelona ho zaraina. Misy asa fanompoana izay tsy misy mahavita amin’ny fomba hanaovanao azy. Nankinin’ny Tompo taminao ny fisoronany masina, izay mihazona ilay hery masina hitahiana sy hampitrakana ny hafa. Mihainoa amin’ny fonao ary araho ny bitsiky ny Fanahy. (Dieter F. Uchtdorf, “Mianàra avy amin’i Almà sy i Amioleka,” Liahona, nôv. 2016, 73)

Sahanasa fianarana fanampiny

Fahafahana misafidy ao amin’ny drafitry ny Ray any An-danitra

Nampianatra ny filazantsara tamin’ny olona tany Meleka sy Amônihà niaraka tamina vokatra mifangaro i Almà. Azon’ny mpianatra atao ny mampitaha ireo fihetsika nasetrin’ny olona ny hafatr’i Almà ao amin’ny Almà 8:3–5, 8–13 sy mifanakalo hevitra momba ny antony anomezan’ny Ray any An-danitra lanja ny fahafahana misafidy. Azon’ny kilasy atao ny manao lisitr’ireo safidy isan’andro izay manampy azy ireo hanakaiky kokoa ny Ray any An-danitra sy ireo safidy izay mampanalavitra azy ireo Aminy. Hevero ny hanasa azy ireo hampiasa ny fahafahan’izy ireo misafidy mba hanakaikezana kokoa ny Tompo?

Manasa ny hafa hanatona an’i Jesoa Kristy

I Almà sy i Amioleka dia ohatra tsara amin’ireo mpianatra izay nikiry sy naharitra tamin’ny fanasana ny hafa hanatona an’i Jesoa Kristy. Hevero ny hanasa ny kilasy hamaky ny Almà 8:10–21, 27–32, hitadiavana ny fomba nanehoan’i Almà sy i Amioleka ny faharetana sy finoan’izy ireo. Azon’ny mpianatra atao ny mizara fomba ahafahan’izy ireo manana fikirizana sy haharitra rehefa mikatsaka ny hanampy ny hafa hanatona an’i Jesoa Kristy izy ireo. Azon’izy ireo atao ny manao drafitra na hilalao an-tsehatra ny fomba ahafahan’izy ireo mamaly amim-pitiavana sy am-paharetana raha misy olona iray mandà ny fanasana avy amin’izy ireo.

Nahatsiaro ho kivy i Almà

Hevero ny hanasa ny mpianatra hieritreritra ny fomba nanampian’ny Tompo an’i Almà rehefa nahatsiaro ho kivy izy (jereo ny Almà 8:14). Mety hanampy raha jerena ny fomba namalian’ny Tompo ny ahiahin’i Almà (jereo ny andininy 15) sy ny zavatra nataon’i Almà taorian’izany (jereo ny andininy 18). Asao ny mpianatra hanoratra taratasy fohy mampahery ho an’ny olona iray fantatr’izy ireo izay mety ho mahatsiaro ho kivy.

Tsy milavo lefona ny amintsika ny Ray any An-danitra.

Hevero ny hanasa ny mpianatra handalina ny sasany amin’ireto tantara manaraka ireto, ka hitady ohatra amin’ny fanohizan’ny Tompo nanatona mba hanampy ny olona.

• Vahoakan’i Meleka (Almà 8:3–5)

• Vahoakan’i Amônihà (Almà 8:8–10, 13, 16, 18, 29)

• Almà (Almà 8:14–15, 30–32)

• Amioleka (Almà 10:4–7, 11, 30–32)

Avy eo dia azon’ny mpianatra atao ny mihevitra ny fomba nanatonan’ny Tompo na anatonany azy ireo.