« អាលម៉ា ១៥ ៖ ព្រះចេស្តានៃការព្យាបាលរបស់ព្រះយេស៊ូវគ្រីស្ទ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤ )
« អាលម៉ា ១៥ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន
អាលម៉ា ១៥
ព្រះចេស្តានៃការព្យាបាលរបស់ព្រះយេស៊ូវគ្រីស្ទ
ការឈោងទៅជួយអ្នកដែលរងទុក្ខគឺជាការផ្តោតលើការបម្រើក្នុងព្រះជន្មរមែងស្លាប់របស់ព្រះយេស៊ូវគ្រីស្ទ ។ អាលម៉ា និង អាមូលេក មានការផ្តោតដូចគ្នា បន្ទាប់ពីត្រូវបានរំដោះចេញពីគុកដោយអព្ភូតហេតុដោយព្រះហស្តរបស់ព្រះ ។ មេរៀននេះអាចជួយអ្នកឲ្យទទួលបានព្រះចេស្តានៃការព្យាបាលដែលមានតាមរយៈព្រះយេស៊ូវគ្រីស្ទ ។
អញ្ជើញឲ្យរៀនសូត្រដោយឧស្សាហ៍ព្យាយាម ។ សូមជួយសិស្សឲ្យយល់ថា ការរៀនសូត្រពីដំណឹងល្អមិនមែនមានន័យថា ជាបទពិសោធន៍អកម្មនោះទេ ។ វាទាមទារការវែកញែក ការសិក្សា ការអធិស្ឋាន និងសកម្មភាពដោយប្រុងប្រយ័ត្ន ។ អ្នកអាចជួយសិស្សរបស់អ្នកដោយបង្កើតបទពិសោធន៍ដែលនឹងលើកទឹកចិត្តពួកគេឲ្យចូលរួមក្នុងការពិភាក្សា ចែកចាយបទពិសោធន៍របស់ពួកគេ និងសួរសំណួរ ។
ការរៀបចំសិស្ស ៖ សូមអញ្ជើញសិស្សឲ្យអានគំនិតសម្រាប់ការសិក្សាព្រះគម្ពីរជាគ្រួសារក្រោម អាលម៉ា ១៥:១–១២ នៅក្នុងការសិក្សាគម្រោងមេរៀន « ថ្ងៃទី ២៤-៣០ ខែ មិថុនា ។ អាលម៉ា ១៣–១៦ ៖ ‹ ចូលទៅក្នុងសេចក្តីសម្រាករបស់ព្រះអម្ចាស់ › » នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរមរមន ឆ្នាំ ២០២៤ ។
សកម្មភាពរៀនសូត្រដែលអាចមាន
ជំងឺផ្លូវកាយ និងខាងវិញ្ញាណ
ខាងក្រោមនេះមានគោលបំណងជួយរៀបចំសិស្សឲ្យស្គាល់រោគសញ្ញា ឬផលប៉ះពាល់នៃអំពើបាប ។ ប្រសិនបើចាំបាច់ អ្នកអាចជ្រើសរើសលក្ខខណ្ឌវេជ្ជសាស្រ្តដែលសិស្សស្គាល់ច្រើនជាងលក្ខខណ្ឌដែលមាននៅក្នុងបញ្ជី ។
សូមពិនិត្យមើលបញ្ជីលក្ខខណ្ឌវេជ្ជសាស្ត្រខាងក្រោម ។ សូមសញ្ជឹងគិតអំពីរោគសញ្ញារបស់ជំងឺ ក៏ដូចជាការព្យាបាលណាដែលប្រើដើម្បីមើល ឬព្យាបាលជំងឺទាំងនេះ ។
-
ជំងឺបេះដូង
-
ជំងឺមហារីក
-
បាក់ឆ្អឹង
-
តើនឹងមានអ្វីកើតឡើងប្រសិនបើនរណាម្នាក់បានព្យាបាលតែរោគសញ្ញានៃលក្ខខណ្ឌទាំងនេះដោយមិនស្វែងយល់ពីបញ្ហាដែលនាំឲ្យកើតជំងឺទាំងនេះ ?
នៅពេលណែនាំកថាខណ្ឌខាងក្រោមនេះ និងសំណួរដែលអាចកើតមាន សូមកុំស្វែងរក ឬអនុញ្ញាតឲ្យសិស្សលាតត្រដាងពីអំពើបាបផ្ទាល់ខ្លួនឡើយ ។
ដូចជាជំងឺផ្លូវកាយដែរ អំពើបាប—ឬជំងឺខាងវិញ្ញាណ—ក៏មានរោគសញ្ញាដែរ ។ សូមសញ្ជឹងគិតអំពីអ្វីដែលអាចជារោគសញ្ញានៃអំពើបាប ហើយចំណាយពេលបន្តិចដើម្បីគិតអំពីស្ថានភាពនៃសុខភាពខាងវិញ្ញាណរបស់អ្នក ។ សំណួរខាងក្រោមនេះអាចជួយអ្នកធ្វើរឿងនេះបាន ៖
-
យោងតាមអត្ថបទប្រធានបទនៃដំណឹងល្អ « អំពើបាប » (topics.ChurchofJesusChrist.org) តើអំពើបាបមានផលប៉ះពាល់អ្វីខ្លះ ?
-
តើអំពើបាបអាចប៉ះពាល់ដល់អារម្មណ៍របស់យើងចំពោះខ្លួនយើង និងមានឥទ្ធិពលលើទំនាក់ទំនងរបស់យើងជាមួយអ្នកដទៃយ៉ាងដូចម្ដេច ?
នៅពេលអ្នកសិក្សា សូមស្តាប់ព្រះវិញ្ញាណបរិសុទ្ធដើម្បីបង្រៀនអ្នកអំពីរបៀបដែលអ្នកអាចទទួលបានអានុភាពព្យាបាលរបស់ព្រះយេស៊ូវគ្រីស្ទបានកាន់តែប្រសើរ ដើម្បីកែលម្អសុខុមាលភាពខាងវិញ្ញាណរបស់អ្នក ។
ស្ថានភាពរបស់ស៊ីអែសរ៉ុម
បន្ទាប់ពីត្រូវបានរំដោះដោយអព្ភូតហេតុពីគុកនៅអាំម៉ូណៃហា ដោយព្រះហស្តនៃព្រះ អាលម៉ា និង អាមូលេកបានធ្វើដំណើរទៅក្រុងសៃដុម ( សូមមើល អាលម៉ា ១៥:១–២ ) ។ កាលនៅក្រុងសៃដុម ពួកលោកបានធ្វើការងារបម្រើដល់អ្នកដែលត្រូវគេបណ្ដេញចេញពីក្រុងអាំម៉ូណៃហា ដោយសារតែជឿសារលិខិតរបស់ពួកលោកអំពីព្រះយេស៊ូវគ្រីស្ទ ។ មនុស្សម្នាក់ដែលពួកគេបានធ្វើការងារបម្រើនោះគឺ ស៊ីអែសរ៉ុម ។
សូមពិចារណាចែកចាយសំណៅចែកខាងក្រោមសម្រាប់សិស្ស ។ ពួកគេអាចធ្វើការរួមគ្នាជាក្រុមតូចៗ ដោយប្រើ អាលម៉ា ១៥:៤–១២ ដើម្បីរកមើលរោគសញ្ញារបស់ ស៊ីអែសរ៉ុម និងកំណត់វេជ្ជបញ្ជាដែលអាចព្យាបាលគាត់បាន ។
ជំងឺខាងវិញ្ញាណ
សូមអានបទគម្ពីរដែលបានរាយនៅក្រោម « រោគសញ្ញា » ។ ខាងក្រោមនេះ សូមរាយពាក្យ ឬឃ្លាណាមួយដែលពិពណ៌នាអំពីស្ថានភាពរបស់ ស៊ីអែសរ៉ុម ។
-
តើអ្នកអាចពិពណ៌នាអំពីស្ថានភាពរបស់ ស៊ីអែសរ៉ុម រួមទាំងសុខុមាលភាពខាងវិញ្ញាណរបស់គាត់ដោយរបៀបណា ?
-
តើអ្នកចាំអ្វីខ្លះអំពី ស៊ីអែសរ៉ុម ដែលនឹងធ្វើឲ្យគាត់មានអារម្មណ៍បែបនេះ ?
សូមពិចារណាអញ្ជើញសិស្សម្នាក់ឲ្យចែកចាយរឿងខ្លះអំពីអតីតកាលរបស់ ស៊ីអែសរ៉ុម ។ ខគម្ពីរខាងក្រោមអាចមានប្រយោជន៍ ៖ អាលម៉ា ១០:៣១; ១១:២១–២២; ១២:១, ៧–៨ ។ អ្នកក៏អាចពិចារណាចែកចាយ សេចក្តីថ្លែងការណ៍របស់ប្រធាន អ៊ែសរ៉ា ថាហ្វ ប៊ែនសឹន នៅក្នុងផ្នែក « វិចារណកថា និងព័ត៌មានសាច់រឿង » ។
ជំងឺផ្លូវកាយមិនតែងតែជាប់ពាក់ព័ន្ធនឹងអំពើបាបជានិច្ចនោះទេ ( សូមមើល យ៉ូហាន ៩:២–៣ ) ។ សូមកត់ចំណាំអារម្មណ៍របស់ ស៊ីអែសរ៉ុម អំពីកំហុសនៅក្នុង អាលម៉ា ១៤:៦ ។ ខណៈដែលការមានកំហុសធ្វើឲ្យមិនសប្បាយចិត្ត នោះវាមានគោលបំណងមួយ ។ អែលឌើរ ដាវីឌ អេ បែដណា ក្នុងកូរ៉ុមនៃពួកសាវកដប់ពីរនាក់បានពន្យល់ពីគោលបំណងដែលអារម្មណ៍ទាំងនេះអាចមាន ។ សូមមើលវីដេអូ « We Believe in Being Chaste » ចាប់ពីនាទីទី ១៣:១៥ ដល់នាទីទី ១៣:៤៩ ដែលមាននៅ ChurchofJesusChrist.org ឬអានអត្ថបទខាងក្រោម ។
យើងទាំងអស់គ្នាធ្លាប់មានការឈឺចាប់ដែលទាក់ទងទៅនឹងការរងរបួសខាងផ្លូវកាយ ។ ពេលយើងឈឺចាប់ ជាធម្មតាយើងស្វែងរកការធូរស្បើយ ហើយមានអំណរគុណសម្រាប់ថ្នាំសង្កូវ និងការព្យាបាល ដែលបន្ថយការឈឺចាប់របស់យើង ។ សូមពិចារណាពីអំពើបាបថា ជារបួសខាងវិញ្ញាណ ដែលបណ្ដាលឲ្យមានកំហុស ឬដូចដែលបានពិពណ៌នាដោយអាលម៉ាទៅកាន់កូនប្រុសរបស់លោក កូរីអានតុនថា « ការសោកស្ដាយនៅក្នុងស្មារតី » ( អាលម៉ា ៤២:១៨ ) ។ កំហុសចំពោះវិញ្ញាណយើងស្រដៀងគ្នានឹងការឈឺចាប់ក្នុងរូបកាយយើងដែរ—វាជាការព្រមានពីគ្រោះថ្នាក់ និងជាការការពារពីការខូចបង់បន្ថែមទៀត ។ ( ដាវីឌ អេ បែដណា « We Believe in Being Chaste » Liahona ខែ ឧសភា ឆ្នាំ ២០១៣ ទំព័រ ៤៤ )
-
យោងតាមអែលឌើរ បែដណា តើអ្វីជាគោលបំណងមួយនៃការប្រព្រឹត្តិកំហុស ?
-
តើការណ៍នេះអាចផ្លាស់ប្តូរទស្សនៈ ឬទស្សនវិស័យរបស់យើងចំពោះអារម្មណ៍មានកំហុសបន្ទាប់ពីធ្វើខុសដោយរបៀបណា ?
-
តើអ្នកគិតថារោគសញ្ញារបស់ ស៊ីអែសរ៉ុម មានលក្ខណៈដូចជា « ការព្រមានអំពីគ្រោះថ្នាក់ និងការការពារពីការខូចខាតបន្ថែម » តាមវិធីណាខ្លះ ?
ការព្យាបាលតាមរយៈព្រះចេស្តានៃព្រះយេស៊ូវគ្រីស្ទ
សូមអានដោយប្រុងប្រយ័ត្នអំពីការព្យាបាលរបស់ ស៊ីអែសរ៉ុម នៅក្នុង អាលម៉ា ១៥:៤–១២ ។ អ្នកប្រហែលជាចង់មើលវីដេអូ « Zeezrom Is Healed and Baptized » ( ២:៤២ ) ដែលមាននៅ ChurchofJesusChrist.org ។ នៅពេលអ្នកអាន សូមយកចិត្តទុកដាក់ចំពោះព័ត៌មានលម្អិតដែលរួមចំណែកដល់ការព្យាបាលរបស់ស៊ីអែសរ៉ុម ។ សូមពិចារណាសរសេរកំណត់ចំណាំនៃព័ត៌មានលម្អិតទាំងនេះនៅក្រោមផ្នែក « វេជ្ជបញ្ជា » នៃកំណត់ចំណាំរបស់វេជ្ជបណ្ឌិតរបស់អ្នក ។
-
តើគោលការណ៍ ឬសេចក្តីពិតអ្វីខ្លះដែលយើងអាចរៀនពីការព្យាបាលរបស់ ស៊ីអែសរ៉ុម ?
គោលការណ៍មួយដែលយើងរៀនពីខគម្ពីរទាំងនេះគឺថា នៅពេលយើងអនុវត្តសេចក្តីជំនឿលើព្រះយេស៊ូវគ្រីស្ទ នោះយើងអាចត្រូវបានព្យាបាល ។
-
តើភស្ដុតាងអ្វីខ្លះដែលអ្នកបានឃើញនៅក្នុងខគម្ពីរទាំងនេះអំពីស៊ីអែសរ៉ុម ដែលបានអនុវត្តសេចក្ដីជំនឿលើព្រះយេស៊ូវគ្រីស្ទ ទាំងមុន និងក្រោយពេលគាត់បានជាសះស្បើយ ?
-
តើយើងអាចអនុវត្តសេចក្តីជំនឿលើព្រះយេស៊ូវគ្រីស្ទតាមរបៀបដូចគ្នាដោយរបៀបណា ?
អែលឌើរ ដាវីឌ អេ បែដណា បានពន្យល់ពីរបៀបដែលយើងអាចអនុវត្តសេចក្តីជំនឿ ។ សូមមើលវីដេអូ « We Believe in Being Chaste » ចាប់ពីនាទីទី ១៣:១៥ ដល់នាទីទី ១៣:៤៩ ដែលមាននៅ ChurchofJesusChrist.org ឬអានអត្ថបទខាងក្រោម ។
ជាញឹកញាប់ ព្រះអង្គសង្គ្រោះត្រូវបានគេហៅថា គ្រូពេទ្យដ៏អស្ចារ្យ ហើយព្រះបរមងារនេះមានន័យជានិមិត្តរូបផង និងមានន័យត្រង់ផង ។ … ចេញមកពីដង្វាយធួននៃព្រះអង្គសង្គ្រោះមាននូវក្រមួនសម្រាប់ព្យាបាល ដែលអាចព្យាបាលរបួសខាងវិញ្ញាណយើង ហើយដកយកកំហុសចេញ ។ ប៉ុន្តែ ក្រមួននេះអាចប្រើតែតាមរយៈគោលការណ៍នៃសេចក្ដីជំនឿទៅលើព្រះអម្ចាស់ព្រះយេស៊ូវគ្រីស្ទ ការប្រែចិត្ត និងការគោរពប្រតិបត្តិដ៏ខ្ជាប់ខ្ជួនប៉ុណ្ណោះ ។ លទ្ធផលនៃការប្រែចិត្តដ៏ស្មោះត្រង់មានសេចក្ដីសុខសាន្តនៃសតិសម្បជញ្ញៈ ការលួងលោម និងការព្យាបាល និងការបន្តជាថ្មីខាងវិញ្ញាណ ។ ( ដាវីឌ អេ បែដណា « We Believe in Being Chaste » Liahona ខែ ឧសភា ឆ្នាំ ២០១៣ ទំព័រ ៤៤ )
សិស្សនឹងត្រូវមានចម្លើយច្បាស់លាស់មួយចំនួនទៅនឹងសំណួរទីមួយ ដើម្បីរៀបចំសម្រាប់សកម្មភាពមេរៀនចុងក្រោយ ។ នៅពេលអ្នកពិភាក្សាសំណួរនេះជាមួយសិស្ស អ្នកប្រហែលជាចង់រាយបញ្ជីគំនិតរបស់សិស្សនៅលើក្ដារខៀន ។ សូមជួយពួកគេបង្កើតគំនិតផ្សេងៗ ។
សំណួរពីរផ្សេងទៀតអាចត្រូវបានប្រើជាសំណួរតាមដានជាផ្នែកនៃការពិភាក្សានេះ ។
-
តើមានវិធីអ្វីខ្លះដែលយើងអាចទទួលបានព្រះចេស្តាព្យាបាលរបស់ព្រះវរបិតាសួគ៌ និងព្រះយេស៊ូវគ្រីស្ទ ?
-
ហេតុអ្វីអ្នកគិតថា « គ្រូពេទ្យដ៏អស្ចារ្យ » គឺជាងារដ៏ស័ក្តិសមសម្រាប់ព្រះអង្គសង្គ្រោះ ? ហេតុអ្វីអ្នកគិតថា ទ្រង់អាចព្យាបាលយើងបាន ?
ប្រសិនបើសិស្សនឹងទទួលបានអត្ថប្រយោជន៍ពីបទគម្ពីរមួយចំនួនដែលបញ្ជាក់ថា ព្រះគ្រីស្ទមានព្រះចេស្តាក្នុងការព្យាបាល សូមពិចារណាចែកចាយបទគម្ពីរមួយចំនួនដូចខាងក្រោម ៖ ទំនុកដំកើង ៣០:២; ១៤៧:៣; អេសាយ ៥៣:៥ ។
-
តើពេលណាដែលអ្នក ( ឬនរណាម្នាក់ដែលអ្នកស្គាល់ ) បានជួបប្រទះនឹងការព្យាបាលរបស់ព្រះអង្គសង្គ្រោះ ?
ទោះបីជាយើងទាំងអស់គ្នាមិនរងទុក្ខដូចស៊ីអែសរ៉ុមក៏ដោយ ក៏យើងទាំងអស់គ្នាមានបញ្ហា និងបទពិសោធន៍នៃការរងទុក្ខ ដែលព្រះអង្គសង្គ្រោះអាចជួយយើងឲ្យឆ្លងកាត់បានដែរ ។ សូមគិតអំពីផលប៉ះពាល់នៃអំពើបាប ឬកំហុសមួយចំនួនដែលក្មេងជំទង់អាចជួបប្រទះ និងរបៀបដែលពួកគេអាចត្រូវការព្រះចេស្តាព្យាបាលរបស់ព្រះអង្គសង្គ្រោះ ។
សូមពិចារណារាយបញ្ជីពីគំនិតរបស់សិស្សនៅលើក្ដារខៀន ។ ពួកគេក៏អាចធ្វើការជាគូ ឬជាក្រុមតូចៗ ដើម្បីបង្កើតគំនិត ហើយបន្ទាប់មកចែកចាយគំនិតនោះជាមួយសិស្សក្នុងថ្នាក់បានដែរ ។
សូមបង្កើតកំណត់ចំណាំរបស់វេជ្ជបណ្ឌិតផ្សេងទៀតដើម្បីជួយនរណាម្នាក់ ។ សូមអាន នីហ្វៃទី៣ ៩:១៣–១៤ ហើយប្រើអ្វីដែលអ្នកបានរៀនថ្ងៃនេះ ដើម្បីបង្កើតវេជ្ជបញ្ជា ។ អ្នកអាចធ្វើសេចក្តីយោងទៅ អាលម៉ា ១៥ ។ សូមចែកចាយពីរបៀបដែលព្រះយេស៊ូវគ្រីស្ទអាចជួយ និងអ្វីដែលទំនងជាការអនុវត្តសេចក្តីជំនឿលើទ្រង់ ។ ត្រូវប្រាកដថាបំពេញសេចក្តីថ្លែងការណ៍មិនពេញលេញខាងក្រោម ៖
-
ប្រសិនបើនរណាម្នាក់កំពុងមានអារម្មណ៍ [ រាយបញ្ជីរោគសញ្ញានៃអំពើបាប ] … នោះពួកគេត្រូវតែចងចាំ [ បញ្ជីវេជ្ជបញ្ជា ឬឱសថព្យាបាល ] …
សូមរំឭកសិស្សថា យើងទាំងអស់គ្នាត្រូវការព្រះវរបិតាសួគ៌ និងព្រះយេស៊ូវគ្រីស្ទរបស់យើង និងការព្យាបាលដែលទ្រង់ទាំងទ្វេអាចប្រទានឲ្យយើង ។ សូមថ្លែងទីបន្ទាល់ថា ការអនុវត្តសេចក្តីជំនឿ និងការជឿលើព្រះយេស៊ូវគ្រីស្ទ នឹងជួយយើងជានិច្ច ។ សូមពិចារណាអញ្ជើញសិស្សឲ្យចែកចាយអ្វីដែលពួកគេបានរៀន ឬអ្វីដែលពួកគេចាប់អារម្មណ៍ពីការសិក្សារបស់ពួកគេនៅថ្ងៃនេះ ។