Alma 24

“Ne do t’i Varrosim Thellë në Tokë”

anti‑nefi‑lehitët duke groposur shpatat e tyre

Ndonjëherë ne e gjejmë veten duke iu dorëzuar të njëjtit mëkat dhe duke zhvilluar një zakon të keq ose madje një varësi. Mposhtja e këtyre mëkateve mund të jetë shumë e vështirë. Shumë prej anti-nefi-lehive kishin zhvilluar praktika mëkatare para kthimit të tyre në besim te Zoti. Kur përjetuan faljen e Shpëtimtarit, ata u frymëzuan që ta shmangnin rikthimin në ato mëkate. Ky mësim mund të të ndihmojë t’i mposhtësh mëkatin dhe zakonet e këqija me ndihmën e Shpëtimtarit.

Ndihmojini nxënësit të kërkojnë kthimin në besim. Kthimi në besim është më shumë sesa një ndryshim i sjelljes; është një ndryshim i zemrës i shkaktuar nga Fryma e Shenjtë. Ndërsa nxënësit mësojnë dhe ndërmarrin veprim të efektshëm e të drejtë, nxitini ata t’i luten Atit Qiellor për udhërrëfimin e Tij nëpërmjet Shpirtit.

Përgatitja e nxënësve: Ftojini nxënësit të lexojnë tek Alma 24:7–16 dhe të vijnë të përgatitur për të treguar atë që mësojnë nga anti-nefi-lehitët rreth Shpëtimtarit, pendimit dhe faljes.

Veprimtari të Mundshme të të Mësuarit

Mposhtja e mëkatit me ndihmën e Shpëtimtarit

Kijeni parasysh se ky mësim është hartuar për t’u dhënë pas mësimit për kapitullin tek Alma 23.

Lexoje skenarin vijues:

Nertila ka pasur probleme me një mëkat të caktuar prej vitesh. Ndërsa u bë më e kthyer në besim te Zoti, ajo bëri përpjekje të mëdha për t’u penduar dhe kthyer te Shpëtimtari për forcë për ta mposhtur problemin e saj. Ajo e ndjeu faljen dhe dashurinë e Zotit. Megjithatë, në çaste dobësie, ajo ndonjëherë bie përsëri pre e atij mëkati.

• Si mund të ndihet Nertila në këtë situatë?

Kur nxënësit kanë mundësi për ta vlerësuar veten, kjo mund t’i ndihmojë ata të ndihen më të përfshirë në mësim dhe plot dëshirë për të mësuar për atë që nuk e dinë ende. Ftesa ndaj nxënësve që të reflektojnë në heshtje për sa vijon është një mënyrë se si mund t’i ndihmoni nxënësit ta bëjnë këtë.

Përsiat se sa mirë e ndien se mund ta ndihmosh Nertilën dhe çfarë mund të të nevojitet ende të dish dhe kuptosh për ta ndihmuar atë më mirë. Gjithashtu, mendo për probleme që ti e ndien se Zoti mund të të ndihmojë t’i kapërcesh. Ndërsa studion, kërko të vërtetat që, kur zbatohen, mund ta ftojnë Shpëtimtarin të të ndihmojë ty dhe Nertilën që ta mposhtni mëkatin.

Populli i anti-nefi-lehitëve

Populli i anti-nefi-lehitëve ishin lamanitë që më parë i kishin përdorur shpatat e tyre për të vrarë të tjerët. Megjithatë, pasi “u kthyen në besim te Zoti”, ata i “ulën armët e rebelimit të tyre” (Alma 23:6–7).

Lexo tek Alma 24:1–4 për të parë se si reaguan disa prej lamanitëve të tjerë.

• Po të ishe një prej anti-nefi-lehive, çfarë mendimesh dhe ndjenjash mund kishe pasur në këtë kohë? Përse?

Amoni dhe vëllezërit e tij mbajtën një këshill me mbretin Lamoni dhe vëllanë e tij, mbretin e popullit që kishte marrë emrin anti-nefi-lehitë (shih tek Alma 24:5). Më pas, mbreti i foli popullit të tij.

Nëse e ndieni se do të kontribuonte në frymën e klasës, merreni parasysh ta ftoni një nxënës t’i lexojë me respekt vargjet vijuese sikur ai ose ajo të ishte udhëheqësi i anti‑nefi‑lehitëve. Ftojini nxënësit të përfytyrojnë sikur e dëgjojnë këtë fjalim si një prej anti‑nefi‑lehitëve dhe të përsiatin për mendimet dhe ndjenjat që ata mund të kenë pasur.

Lexoje fjalimin e mbretit tek Alma 24:7–16. Kërkoji dhe merre parasysh t’i shenjosh fjalët ose frazat që përshkruajnë sa vijon:

1. Atë që Perëndia kishte bërë për këta njerëz

2. Atë që njerëzit kishin bërë për t’u penduar

3. Atë që mbreti i këshilloi të bënin për t’i braktisur mëkatet e tyre

Kujtojuni nxënësve përgatitjen e tyre për mësim. Diskutojini fjalët dhe frazat që nxënësit i shenjuan në veprimtarinë e mëparshme. Kërkojuni nxënësve të shpjegojnë se çfarë kuptimi kanë fjalët dhe frazat dhe ftojeni klasën të punojë së bashku për t’i kuptuar më mirë ato. Merreni parasysh të vini në dukje frazat që duken të rëndësishme dhe t’i diskutoni edhe ato.

• Çfarë mendimesh dhe ndjenjash mund të kishe pasur po të ishe atje duke e dëgjuar këtë fjalim? Përse?

• Cilat fjalë ose fraza do të të kishin dhënë shtysë që të përpiqeshe fort të mos i riktheheshe kurrë mëkateve të tua?

Groposja e armëve të tyre të luftës

anti‑nefi‑lehitët duke groposur shpatat e tyre

Lexo tek Alma 24:17–19 dhe shenjo se si njerëzit u përgjigjën pas këtij fjalimi dhe përse.

• Si mendon se përvoja e anti‑nefi‑lehitëve mund të lidhet me ne?

Një e vërtetë që mund të përcaktojmë nga ky rrëfim është se dashuria dhe përkushtimi ynë ndaj Jezu Krishtit mund të na ndihmojnë t’i braktisim mëkatet tona.

Gjej një çast për të përsiatur se përse ky parim është i vërtetë.

• Kur përpiqesh ta braktisësh mëkatin, përse mund të të ndihmojë të kujtosh dashurinë e Atit Qiellor dhe Jezu Krishtit dhe atë që Ata kanë bërë për ne? (Mund të jetë e dobishme të përsiatësh fraza si “ai na … ka falur” [Alma 24:10], “Perëndia i madh pati mëshirë për ne” [Alma 24:14] dhe “ai i do shpirtrat tanë” [Alma 24:14].)

• Si i ndihmoi këta njerëz groposja e shpatave të tyre “thellë në tokë” (Alma 24:17) që t’i braktisnin mëkatet e tyre?

Vër re frazat vijuese te vargu 18 (theksi i shtuar):

• “Ata më mirë do të hiqnin dorë nga jeta e tyre, sesa të derdhnin gjakun e vëllezërve të tyre.”

• “Më mirë do t’i jepnin një vëllai, sesa të merrnin prej tij.”

• “Më mirë do të punonin rëndë me duart e tyre, sesa të kalonin ditët në përtaci.”

Në thelb, anti‑nefi‑lehitët nuk groposën vetëm armët e tyre të luftës; ata gjithashtu i zëvendësuan mëkatet e tyre të mëparshme me veprime pozitive.

• Si mund të na ndihmojë bërja e kësaj gjëje ta braktisim mëkatin?

• Cilat janë disa mënyra se si mund ta bëjmë këtë sot?

Për të parë një shembull, shih materialin filmik “Fuqia e Librit të Mormonit në Kthimin në Besim” nga kodi kohor 6:11 deri në 8:12, në dispozicion në ChurchofJesusChrist.org.

Zotimi i popullit të anti-nefi-lehitëve

Lexo tek Alma 24:20–27 për të parë se si anti‑nefi‑lehitët e jetuan zotimin e tyre për ta braktisur mëkatin. Ndërsa lexon, përfytyro sikur je atje. Përsiat pamjet, tingujt dhe ndjenjat që mund të kesh përjetuar ndërsa u përkule në lutje, duke e ditur se nuk kishe asgjë me se ta mbroje veten dhe se ishe plotësisht në duart e Zotit.

• Çfarë të bën përshtypje për zotimin e tyre?

Plaku Dejll G. Renland, i Kuorumit të Dymbëdhjetë Apostujve, përshkroi se si sakrificat e anti-nefi-lehive mund të lidhen me ne sot.

Plaku Dejll G. Renland

“Varrosini plotësisht armët tuaja të rebelimit pa doreza mbi dhe. Për shkak të Shlyerjes së Jezu Krishtit, bërja e besëlidhjeve me një qëllim të vërtetë për t’i nderuar me besnikëri ato, do ta bekojë jetën tuaj përgjithmonë. Ju do të bëheni më shumë si Shpëtimtari ndërsa do ta kujtoni gjithmonë Atë, do ta ndiqni Atë dhe do ta adhuroni Atë. Unë dëshmoj se Ai është themeli i patundur. Ai është i besueshëm dhe premtimet e Tij janë të sigurta.” (Dejll G. Renland, “Zotim i Patundur ndaj Jezu Krishtit”, Ensign ose Liahona, nëntor 2019, f. 25)

Plaku Renland dha gjithashtu një shembull të fuqishëm të zotimit të shenjtorëve në Kongo. Merreni parasysh t’ua paraqitni nxënësve materialin filmik “Zotim të Patundur ndaj Jezu Krishtit” nga kodi kohor 0:00 deri në 1:39, në dispozicion në ChurchofJesusChrist.org.

Si ta braktisësh mëkatin

Merreni parasysh t’i ftoni nxënësit të bëjnë veprimtarinë vijuese në grupe të vogla, në mënyrë që të mund ta zbatojnë në një situatë nga jeta reale atë që kanë mësuar.

Kujtoje skenarin me Nertilën në fillim të mësimit. Shpjegoje se si do t’ia rekomandoje që t’i zbatonte parimet që studiove sot. Përfshi sa vijon:

• mënyrat se si ajo mund ta kujtojë dashurinë e Zotit për të

• veprimet e caktuara që ajo mund të ndërmarrë për të shmangur rënien përsëri pre të mëkateve të saj të mëparshme

Ftojini disa nxënës t’i japin idetë e tyre. Ndërsa nxënësit e dëgjojnë njëri-tjetrin, ftojini të përsiatin se si zbatimi i këtyre planeve mund t’i ndihmojë ata t’i mposhtin mëkatet e tyre.

Braktisja e mëkateve të tua

Në ditarin tënd të studimit, shkruaj se si mund ta zbatosh atë që mësove sot në jetën tënde. Shkruaji hapat që mund të ndërmarrësh për të kujtuar dashurinë e Zotit. Përfshiji hapat praktikë për ta braktisur mëkatin dhe për t’u ruajtur nga rikthimi tek ai.

Ndërsa përpiqesh fort ta zbatosh planin tënd, beso se Shpëtimtari të do dhe do të të ndihmojë teksa përpiqesh fort t’i shmangësh rrethanat që mund të të çojnë në mëkat.

Dëshmoni për dashurinë e Zotit për çdo nxënës dhe se Ai do t’i ndihmojë ata kur përpiqen fort të jenë më shumë si Ai, megjithëse ndonjëherë ata nuk ia dalin mbanë në përpjekjet e tyre.

Komente dhe Informacion për Rrethanat

Përse duhet të ruhemi nga rikthimi në mëkat?

Plaku Riçard G. Skot (1928–2015), i Kuorumit të Dymbëdhjetë Apostujve, dha mësim:

Plaku Riçard G. Skot

“Zgjedhjet [tona] të kaluara [mund të na] ekspoz[ojnë] … ndaj një dëshire trupore e cila mund të bëhej sërish një pikë cenueshmërie që Satani do të përpiqej ta shfrytëzonte.

Satani do të përpiqet ta përdorë kujtesën tonë për çfarëdo faji të mëparshëm që të na rikthejë nën ndikimin e tij. Ne duhet të jemi gjithmonë syçelët për t’i shmangur ndjelljet e tij.” (Riçard G. Skot, “Fuqia Vetjake nëpërmjet Shlyerjes së Jezu Krishtit”, Ensign ose Liahona, nëntor 2013, f. 82–83)

Plaku Nil L. Andersen, i Kuorumit të Dymbëdhjetë Apostujve, shpjegoi:

Plaku Nil L. Andersen

“Të braktisim një mëkat do të thotë se nuk do ta përsëritim kurrë atë – nuk do t’i rikthehemi kurrë atij – as me veprime, as me fjalë, madje as në mendjen tonë. Braktisje do të thotë se mëkati i takon plotësisht të kaluarës sonë. Të braktisësh një mëkat do të thotë më shumë sesa thjesht të ndiesh brejtjen e ndërgjegjes dhe trishtimin që na ka sjellë ne dhe të tjerëve që i kemi lënduar; do të thotë të jemi të sigurt se nuk e vendosim veten tonë në të njëjtën pozitë që e solli mëkatin më parë. Do të thotë të shoqëroheni me miq dhe familjarë të besuar që do të na ndihmojnë të ecim përpara. Për disa, mund të nënkuptojë ndryshimin e miqve, mbase ndryshimin e punësimit ose të asaj që bëjmë me kohën tonë. Mund të nënkuptojë që të jemi shumë të hapur dhe të ndershëm me shokët e besuar ndërsa vazhdojmë përpara. Ne nuk duam të kthehemi më kurrë në mëkatet e të kaluarës sonë.” (Neil L. Andersen, The Divine Gift of Forgiveness [2019], f. 207–208)

Veprimtari Plotësuese të të Mësuarit

Skenarë

Merreni parasysh t’i përdorni skenarët vijues nëse nxënësit do të përfitonin nga ushtrimi i vënies në zbatim duke përdorur skenarët me më shumë hollësi.

• Ina e shkel vazhdimisht Fjalën e Urtësisë.

• Greta zihet vazhdimisht me motrat dhe vëllezërit e saj.

• Berti kalon kohë në telefonin e tij në vend që të marrë pjesë në mësimet e kishës, studimin familjar dhe mundësitë e shërbimit.

• Laura sheh pornografi kur ndihet e vetmuar ose e mërzitur.

Shmangia e rrethanave që shtyjnë në mëkat

Merreni parasysh të përdorni veprimtarinë vijuese në një vend të përshtatshëm në mësim. Ftojini nxënësit të përfytyrojnë një kopsht të mbushur me barëra të këqija dhe më pas ta përfytyrojnë atë kopsht pasi i janë hequr barërat e këqija. Më pas, ftojini nxënësit t’u përgjigjen pyetjeve vijuese:

• Çfarë duhet bërë për t’u siguruar që ky kopsht të mbetet pa barëra të këqija?

• Si lidhet kjo me atë që ne duhet të bëjmë pasi na është falur mëkati?

Alma 24:20–27. Ndërsa i mbajmë besëlidhjet tona, ne mund t’i ndihmojmë të tjerët të bëhen të kthyer në besim

Ftojini nxënësit të lexojnë tek Alma 24:20–27, duke kërkuar atë që ndodhi ndërsa lamanitët i sulmuan anti-nefi-lehitët. Ndihmojini nxënësit të përcaktojnë dhe diskutojnë parimin vijues: Ndërsa i zbatojmë besëlidhjet tona, ne mund t’i ndihmojmë të tjerët të bëhen të kthyer në besim.

Merreni parasysh të bëni pyetje si “Cilat janë disa mundësi që keni për të dhënë një shembull për të tjerët duke i mbajtur besëlidhjet tuaja?” ose “Si mund t’i ndihmojë mbajtja e besëlidhjeve tuaja në këto situata të tjerët të bëhen të kthyer në besim?”