Aлмa 26

“Бид Их Эзэнээр бахархах болно”

Танд хэн нэгэнд хэлэхийг тэсэн ядан хүлээж байсан туршлага байсан уу? Та хүмүүс юуг мэдээсэй хэмээн хүссэн бэ? Үүний нэгэн адил Аммон болон түүний ах дүүс леменчүүдэд айлдсан 14 жилийн номлолдоо баясаж, туршлагаа хуваалцахыг хүссэн. Олон мянган лемен хүнийг үнэний мэдлэгт авчрах үед тэд Бурханы хүч ба хайрыг гэрчилсэн. Энэ хичээл Их Эзэнд болон Түүний амьдралд тань өгдөг адислалуудад гүн талархал мөн хайрыг мэдрэхэд тусална.

Ариун Сүнсний зэмсэг болоход бэлтгэх. Таныг Аврагчийн үлгэр жишээг дагаж, Түүний сайн мэдээний дагуу бүх зүрх сэтгэлээрээ амьдрахыг тууштай хичээх үед Сүнс тантай хамт байх болно. Та төгс байх албагүй—зүгээр л хичээнгүйлэн чармай. Бүдрэх бүрдээ Аврагчийн Цагаатгалаар дамжуулан өршөөлийг эрэлхийл.

Суралцагчийн бэлтгэл: Суралцагчдыг Алма 26:11–16-г уншаад, “Их Эзэнээр бахархах” гэдэг нь ямар утгатайг тунгаан бодож болно.

Боломжит суралцах үйл ажиллагаа

Та юунд хүсэж тэмүүлж байна вэ?

Суралцагчид дараахыг хоёр хоёроороо эсвэл жижиг бүлгээр ярилцаж болно. Өөр нэг хувилбар болгон та нэг юм уу хоёр суралцагчийг ангийнхандаа товч хуваалцахад урьж болно.

Хэдхэн хоромд өөрт тань урам эсвэл хүсэл тэмүүлэл өгдөг, ярьж эхэлмэгц зогсооход хэцүү байдаг ямар нэг зүйлийн талаар эргэцүүлэн бод.

• Танд энэ талаар яагаад ийм хүчтэй мэдрэмж төрж байна вэ?

• Энэ тухай ярихад бусдыг юуг мэдрээсэй гэж хүсэж байна вэ? Яагаад?

Мозаягийн хөвгүүдийг леменчүүдэд айлдсан 14 жилийн номлолоосоо буцаж ирсний дараа Аммон дүү нартайгаа туршлагаасаа хуваалцсан. Алма 26:8, 16-г уншаад, Аммон юунд урамтай, хүсэл тэмүүлэлтэй байсныг олж мэд.

Алма 26:16-д Аммон Их Эзэний тухай ярихдаа алдар, баясал, магтан дуулах гэсэн үгсийг ашигласан. Алдар гэдэг нь баясах буюу “хүндэт магтаал, хүндэтгэл, талархал” өгөх гэсэн утгатай (Merriam-Webster.com, “Glory”; мөн Судруудын удирдамжаас “Алдар суу-г үзнэ үү,” scriptures.ChurchofJesusChrist.org). Та эдгээр үгийг 16-р шүлэг-т болон өнөөдөр судалж буй бусад шүлэгт тэмдэглэж болно.

Суралцагчдыг алдар гэсэн үгийн тодорхойлолтыг тэмдэглэлдээ бичихэд эсвэл Алма 26:16-ийн хажууд тэмдэглэж авахад урь. Суралцагчид ангийн бэлтгэл дээрээ үндэслэн хуваалцах нэмэлт тодорхойлолттой эсвэл бодолтой байж болно.

Дараах зүйлсийг тунгаан бодохын тулд хэдэн хором зарцуул.

• Та Тэнгэрлэг Эцэгтэй харилцах харилцааныхаа талаар ямар бодолтой байдаг вэ? Яагаад?

• Та Түүний талаар бусадтай сэтгэл догдлон эсвэл баяр баясалтай ярьдаг уу? Яагаад тийм эсвэл үгүй вэ?

Та өнөөдөр Алма 26-г судлахдаа Бурханы талаарх мэдрэмжээ хуваалцсан Аммоны жишээ Тэнгэрлэг Эцэгийг болон Есүс Христийг хайрлах хайр, талархлыг тань хэрхэн нэмэгдүүлж болохыг тунгаан бод.

“Ийм агуу адислалууд”

Дараах судрын хэсгүүдийг (болон хичээлийн бусад хэсгийг) ангиараа, жижиг бүлгээр эсвэл хоёр хоёроороо уншихын аль нь суралцагчдад хамгийн ашиг тустайг тодорхойл. Суралцагчдад агуулга, хам сэдвийг ойлгож, дүн шинжилгээ хийхэд нь туслахын тулд өгөгдсөн эсвэл таны бодож олсон бусад асуултыг ашигла.

Алма 26:1–4, 8, 16-г уншаад, Аммон Бурханы тухай мөн түүний ах дүүс, леменчүүдийн төлөө хийсэн зүйлийн талаар юу гэж ярьсныг олж мэд.

• Аммоныг Бурханы тухай ярихад юу таны сэтгэлийг хөндсөн бэ?

• Хэн нэгэнд Их Эзэнээр бахархах бурханлаг нөлөө үзүүлж чадах ямар үнэнийг та олж мэдсэн бэ?

Суралцагчдаас самбарт олж мэдсэн үнэнүүдээ бичихийг хүс. Эсвэл суралцагчид эдгээр үнэнийг наадаг цаасан дээр бичиж, самбар дээр байршуулахаасаа өмнө чанга уншиж болно. Жишээлбэл: Бурхан агуу адислалуудыг өгдөг (1–3-р шүлэг); Бурхан Өөрийн агуу ажлыг гүйцэлдүүлж, бусдыг адислахын тулд биднээр дамжуулан ажиллана (3-р шүлэг); Их Эзэний хүч чадалд бид бүх зүйлийг хийж чадна (12-р шүлэг); мөн Бурхан хүмүүний үрсэд хүчирхэг, нигүүлсэнгүй, тэсвэртэй байдаг (16-р шүлэг).

Аммоныг номлогч байхдаа Бурханыг магтан дуулахад хүргэсэн зарим туршлагыг эргэцүүлэн бодох нь тустай байж болно. Дараах зургууд танд юу болсныг эргэн санахад тусална.

Дараа нь та Аммоныг номлогч байхдаа Бурханыг магтан дуулахад хүргэсэн туршлагыг сануулахын тулд дараах зургуудыг үзүүлж болно. Алма 17–21 дээр цэдэглэсэн зарим үйл явдлыг ахин товчхон ярихад урьж болно.

Хэдийгээр бидний туршлага Аммоныхаас ялгаатай ч Бурханыг магтан дуулах төстэй шалтгаан байж болно.

Суралцагчдад Бурханыг магтан дуулах ямар шалтгаан байж болох талаар бодоход нь туслахын тулд та дараах асуултуудыг үзүүлж болно. Суралцагчдад судлах тэмдэглэл дэх асуултуудынхаа нэгд нь хариулах цаг гаргаад, дараа нь хариултаа ангийнхандаа хуваалцахад бэлэн болсон суралцагчдыг урь.

• Та хэрхэн бусдыг адислах “Бурханы мутар дахь [зэмсэг]” (Алма 26:3) байсан эсвэл байж болохоо бод. Эдгээр туршлага таныг хэрхэн Бурханыг магтан дуулахад хүргэж болох вэ?

• Танд Бурханыг магтан дуулах өөр ямар шалтгаан байгаа вэ?

• Бурханы өөрийнх нь төлөө хийсэн зүйлд бахархах нь хэн нэгний амьдралд ямар өөрчлөлт авчрах вэ?

“Баясах агуу шалтгаан”

Аммон номлогч байсан цаг үеэ болон Бурхантай харилцсанаа дурсахдаа Бурхан хэн гэдэгт, амьдралд нь ямар их боломж олгосонд бахархан, баяссан.

Суралцагчдад дараах судлах үйл ажиллагааг хийхэд цаас өгөөрэй. Харин үйл ажиллагааны эхний хэсгийг ангиараа хийж болно. Суралцагчид өөр өөр бүлгийг судалж, олж мэдсэн зүйлээ самбар дээр бичиж болно. Суралцагчдад Их Эзэнээр бахархахад туслахын тулд цэгтэй асуулт юм уу бодсон бусад асуултаа ашигла.

Нэг цаасыг гурав нугал эсвэл судлах тэмдэглэлийнхээ хуудсан дээр гурван багана зур. Багана бүрийн дээд талыг дараах бүлгийн хүмүүсийн аль нэгээр гарчигла.

• Аммон ба түүний ахан дүүс (Алма 26:17–22)

• Леменчүүд (Алма 26:23–24, 31–34)

• Бурханы бүх хүүхэд (Алма 26:35–37)

Бүлэг тус бүрийн судрын хэсгүүдийг уншиж, Бурхан өөрсдийнх нь төлөө юу хийснийг баганад бич.

• Бурхан эдгээр бүлэг хүний төлөө юу хийсэн нь таны сэтгэлд үлдсэн бэ? Энэ нь яагаад хүмүүсийг Түүгээр бахархахад хүргэдэг вэ?

Суралцагчдад дараах үйл ажиллагааны хувь хүний хэсгийг дуусгах хангалттай цаг өг. Суралцагчдыг ажиллаж байхдаа тунгаан бодож, залбирч байхыг урамшуулан дэмж.

Гурав нугалсан цаасыг эргүүл эсвэл судлах тэмдэглэлдээ гурван шинэ багана үүсгэ. Багана бүрд дараах гарчгийн нэгийг өг.

• Намайг Бурхан хэрхэн адисалсан нь

• Хайртай хүмүүсийг минь Бурхан хэрхэн адисалсан нь

• Бурханы талаар миний мэддэг, мэдэрдэг зүйл

Та Тэнгэрлэг Эцэгт хандан залбирч, оюун санаанд тань бодол, дурсамж авчрахыг Түүнээс хүсэж болно. Бурхан таныг болон бусдыг хэрхэн адисалсныг санаж, Түүнийг гэсэн мэдрэмжээ эргэцүүлэн бодоход Ариун Сүнс танд Бурханы хайрыг мэдрэхэд тусална.

Хариултуудаа багана бүрд тэмдэглэж, Бурхан яагаад таныг Өөрөөр нь бахархахад хүргэдэг болохыг тайлбарла.

Суралцагчдад мэдэрсэн мэдрэмжийнхээ үнэнийг болон ач холбогдлыг ойлгоход нь туслахын тулд дараах асуултуудыг ашигла. Хуваалцах хүсэлтэй суралцагчдыг Их Эзэнээр бахархах болсон шалтгаанаа эргэцүүлэн бодох үед мэдэрсэн зүйлээ сайн дураараа хуваалцахад урамшуулан дэмж.

• Энэ үйл ажиллагаа танд Бурханд агуу баяр баяслыг мэдрэхэд эсвэл Түүнийг хайрлах хайр, талархлыг нэмэгдүүлэхэд тань хэрхэн тусалсан бэ?

• Хэрвээ та Их Эзэнийг илүү олон удаа санаж, бахархах цаг гаргавал Түүнтэй харилцах харилцаа тань хэрхэн өөрчлөгдөх байсан гэж бодож байна вэ?

Суралцагчдыг дараах урилгын дагуу үйлдэхэд урамшуулан дэмж.

Та өнөөдөр сурч мэдсэн, мэдэрсэн зүйлийнхээ талаар эргэцүүлэн бодох үедээ Бурханыг санаж, Түүгээр бахархахад цаг зарцуулах зорилт тавьж болно. Мөн та Аммон шиг өөр нэгэнтэй санал бодлоо хуваалцахыг хүсэж магадгүй юм. Та Тэнгэрлэг Эцэг, Есүс Христ хоёрын талаар юу мэдэрснээ бусад хүнд мөн мэдрэхэд нь хэрхэн тусалж болох талаар хуваалцах боломжийг олж мэд.

Тайлбар ба нөхцөл байдлын талаарх мэдээлэл

Сүнслэг мэдрэмжээ эргэцүүлэн бодох замаар Бурханы талаар би юу мэдэж авч болох вэ?

Арван хоёр төлөөлөгчийн чуулгын ахлагч Нийл Л.Андэрсэн ийн заасан.

Амьдралынхаа тухай бод. Олон жилийн турш би дэлхий даяарх мянга мянган хожмын үеийн гэгээнтний гүн гүнзгий сүнслэг туршлагыг сонссон ба тэдгээр нь Бурхан бидний хүн нэг бүрийг мэддэг, хайрладаг бөгөөд бидэнд Өөрийгөө илчлэхийг чин сэтгэлээсээ хүсдэг гэдгийг эргэж буцалтгүй баталсан юм. Эдгээр туршлага бидний амьдралын чухал мөчид эсвэл эхэндээ ердийн нэгэн тохиолдол мэт ирж болох боловч Бурханы хайрыг онцгой хүчтэй сүнслэг байдлаар баталдаг юм. (Нийл Л.Андэрсэн, “Амьдралыг тодорхойлогч сүнслэг дурсамжууд,” 2020 оны 4-р сарын Ерөнхий чуулган, 18)

Би Бурханаар хэрхэн өдөр бүр бахархах вэ?

Хүүхдийн хэсгийн ерөнхий ерөнхийлөгч асан Жой Д.Жонс эгч бидэнд ийн сануулсан.

Их Эзэн “Санаа бодол болгондоо над уруу харагтун” [Сургаал ба Гэрээ 6:36] хэмээн зөвлөсөн байдаг. Мөн бид долоо хоног бүр “үргэлж түүнийг санана” [Сургаал ба Гэрээ 20:77–79] хэмээн гэрээ байгуулдаг. Бид хийдэг бүх зүйлдээ ингэж бурханлагаар төвлөрч чадах болов уу? Өдөр тутмын ердийн үйл хэргээ гүйцэтгэх нь Түүнд өөрсдийн хайрыг болон үнэнч байдлыг харуулах боломж олгодог уу? Би тийм гэдэгт мөн тэгэх ч болно гэдэгт итгэдэг.

Бид хийх зүйлсийнхээ жагсаалтад байгаа бүх зүйлийг Түүнийг алдаршуулах арга зам болгож чадна. Бид цаг хугацаанд баригдаж, ажил үүрэгтээ дарагдан мөн бохир живх солихдоо хүртэл бүх үүрэг даалгаврыг Түүнд үйлчлэх онцгой эрх бөгөөд боломж хэмээн харж чадах уу? (Жой Д.Жонс, “Түүний төлөө,” 2018 оны 10-р сарын Ерөнхий чуулган, 122)

Нэмэлт суралцах үйл ажиллагаа

Хичээлийг эхлүүлэх өөр арга

Суралцагчдаас мэддэг нэг хүнээ магтахыг хүс. Энэ хүн эсвэл түүний хийсэн зүйл яагаад магтмаар эсвэл гайхалтай байдгийг илэрхийлэхэд тэднийг урамшуулан дэмж. Дараа нь суралцагчдаас Бурханы тухай магтан дуулахад юу хэлж болохыг асуу. Түүний тухай ярих нь өөр хүний тухай ярихтай юугаараа адилхан эсвэл өөр вэ? Яагаад? Дараа нь тэднийг Алма 26:8, 16-г уншаад, Аммон хэнийг яагаад магтан дуулсныг олж мэд.

Алма 26:11–12. “Түүний хүч чадалд би бүх зүйлийг хийж чадна”

Та эдгээр шүлэг дэх Аммоны сургаалын талаар эргэцүүлэн бодоход суралцагчдад туслахыг хүсэж болно. Үүнийг хийхийн тулд та суралцагчдад Сүмийн удирдагчаас эсвэл Бурханаас илчлэлээр дамжуулан хэцүү эсвэл сүрдэм даалгавар авсан өсвөр насны хүүхдийн тухай жишээ өгч болно. Суралцагчид дараа нь Аммоны тунхаг тухайн жишээн дэх өсвөр насны хүүхдэд тодорхойгүй байдалд нь хариулахад хэрхэн тусалж болох талаар бодож болно.

Алма 26:22. Аммоны амлалт

Дараах тэнцэтгэлийг самбар дээр бич:_____________ + _____________ = _____________. Суралцагчдыг тэнцэтгэл үнэн зөв байвал хоосон зайг хүссэнээрээ бөглөхөд урь. Дараа нь тэднийг илүү төвөгтэй өөр тэнцэтгэлийг хийхэд урь: _____________ + _____________ + _____________ = _____________. Аммон Алма 26:22 дээр тэнцэтгэлээр бичиж болох амлалт өгсөн гэдгийг суралцагчдад мэдэгд. Тэднийг шүлгийг уншиж, Аммоны заасан тэнцэтгэлийг бичихэд урь. Суралцагчид “Бурханы нууцууд бол зөвхөн илчлэлтээр мэдэгддэг сүнсний үнэнүүд” болохыг мэдэх нь тустай байж болно (Судруудын удирдамж, “Бурханы нууцууд,” scriptures.ChurchofJesusChrist.org). Суралцагчдыг Аммоны амлалтаас аль адислалыг хамгийн их хүсэж байгаагаа хуваалцахад урь. Дараа нь ийм адислалуудыг хүлээн авах үйлдэл бүрийг хийх нь ямар утгатай болохыг ярилц.