Alema 30:1–29

O Aoaoga a Korioa e Taitai Ese ai le Toatele mai le Faaola

Na sau i totonu o sa Nifae se tagata amioleaga e igoa ia Korioa. Sa ia talai atu e faasaga i valoaga e uiga ia Iesu Keriso ma taitai ese atu ai loto o tagata e toatele mai le Atua. I o tatou aso e tele leo o loo saili e taitai ese i tatou mai ia Iesu Keriso. O lenei lesona e mafai ona fesoasoani ia te oe e iloa ai ma teena aoaoga e mafai ona taitai ese ai oe mai ia Iesu Keriso.

Sauniaina o oe lava e avea ma se meafaigaluega a le Agaga Paia. O le Agaga Paia o le faiaoga moni ma o le punavai moni o le liua mo oe ma au tagata aoga. Valaaulia le Agaga e aoao ma faaliliu mai e ala i le ola ai i se auala e faatumauina ai Lana mafutaga i lou olaga. A o e faia, e mafai ona e maua Lana taitaiga ma fesoasoani i tagata aoga e valaaulia o Ia i o latou aafiaga faaleaoaoga.

Sauniuniga a le tagata aoga: E mafai e tagata aoga ona talanoa ma se tagata o le aiga po o se taitai o le Ekalesia e uiga i auala e iloa ai aoaoga sese.

Gaoioiga e Ono Mafai Ona Aoao Ai

O le taufaasese a Satani

Amata le lesona i le talanoaina o se maka-feke po o se isi ituaiga o mailei ua mamanuina e faasese ma maileia ai. Atonu e te manao e faaali le vitio “Faamaoni i le Faatuatua” mai le faailo taimi 0:00 i le 2:30, o loo maua i le, ChurchofJesusChrist.org.

O se maka-feke o se maunu fee. O maunu fee ua mamanuina ia foliga tutusa ma se meaai moni lea o le a musu ai se fee e faamamulu pe a mau ai. Pe a tupu lenei mea, e mafai e le faifaiva ona faigofie ona ato le fee i luga o lona vaa.

Sa faaaoga e Peresitene Thomas S. Monson (1927–2018) le faataitaiga o se maata’i fee e aoao atu ai le auala e galue ai Satani.

O aso nei o loo siomia ai i tatou e maata’i fee a le tiapolo ia o loo faatautau ifo i o tatou luma ma taumafai ai e faatosina i tatou ina ia maileia ai. O le taimi lava e pipiimau i ai, o maata’i fee faapea e matuai faigata lava—ma o nisi taimi e toetoe lava a le mafaia—ona faamamulu. Ina ia puipuia, e tatau ona tatou iloaina po o a ia mea ona aua lea ne’i o tatou faalotolotolua i la tatou faaiuga e aloese mai ai. (Thomas S. Monson, “Faamaoni i le Faatuatua,” Liahona, Me 2006, 18)

• O le a sou lagona mautinoa i lou tomai e iloa ai aoaoga sese a Satani lea e mafai ona “faatosina” ma “mailei” ai oe?

Aloese ai mai mea e tosina ese ai i tatou mai le Faaola

Ina ua mavae se taua tele i le va o sa Nifae ma sa Lamana, na i ai le filemu i luga o le laueleele. Pe tusa ma le lua tausaga mulimuli ane, na amata ai ona talai atu se tagata e igoa ia Korioa i tagata i Saraemila. Sa ta’u atu e Satani ia Korioa o mea na te tautala atu ai (tagai Alema 30:53). A o e suesue i le asō, maitau le ala na faaaoga ai e Korioa ana upu ma aoaoga sese o se maka-feke e maileia ai tagata.

Faitau le Alema 30:6, 12, ma vaavaai mo upu ma fasifuaitau o loo faamatala ai le savali ma le misiona a Korioa.

• O le a sou manatu i le uiga o ia o se “Aneti-Keriso”? (Alema 30:6).

O le upu aneti-Keriso e faatatau i “soo se tasi po o soo se mea e faaseseina le fuafuaga moni o le talalelei o le faaolataga ma e tetee faaaliali pe faalilolilo ia Keriso” (O le Taiala i Tusitusiga Paia, “Anetikeriso,” scriptures.ChurchofJesusChrist.org). O se upumoni e tasi e mafai ona tatou aoao mai le tala ia Korioa e faapea, e faaaoga e Satani aoaoga sese e toso ese ai i tatou mai ia Iesu Keriso.

O aoaoga aneti-Keriso a Korioa e tetee ia Keriso

Faitau le Alema 30:12–18, vaavaai mo aoaoga sese a Korioa. Mafaufau e maka ia aoaoga a Korioa i se auala iloga (mo se faataitaiga, i se lanu po o se faatusa tulaga ese) pe tusi foi i lau api talaaga mo suesuega.

• O a nisi o aoaoga sese a Korioa?

Fuafua e valaaulia tagata aoga e lisi aoaoga a Korioa i luga o le laupapa. Ia faailoa a latou galuega i le sailia o tali. Afai e manaomia, e mafai ona e taulai atu i mea nei:

• “e leai se tagata e mafai ona ia iloa se mea o le a oo mai” (verse 13)

• “o valoaga … o ni uputuu valea a o outou tamā” (fuaiupu 14)

• “e le mafai ona outou iloa e uiga i ni mea tou te le vaai atu i ai” (fuaiupu 15)

• “o lea e le mafai ona outou iloa o le a i ai se Keriso” (fuaiupu 15)

• “o se fua lea o se mafaufau valea” (fuaiupu 16)

• “e le mafai ona faia o se togiola mo agasala a tagata” (fuaiupu 17)

• “e lelei a tagata taitoatasi ia i le olaga lenei e tusa ma le pulea e le tagata o ia lava” (fuaiupu 17)

• “o soo se mea sa fai e le tagata e le o se solitulafono” (fuaiupu 17)

• “a oti le tagata, o lona iuga lena” (fuaiupu 18)

I le ta’ua ai o aoaoga a Korioa o loo lisiina i luga o le laupapa, e mafai e tagata aoga ona tali fesili nei i ni paga po o ni vaega toalaiti. E mafai ona atofa atu i vaega eseese o tagata aoga ni aoaoga sese eseese e suesue, ona mafai lea ona latou faasoa atu a latou tali i isi.

• E mafai faapefea ona e toe faaupuina aoaoga a Korioa e faaaoga ai le gagana e sili ona taatele i o tatou aso?

• I le faaaogaina o se fua mai le 1 e oo i le 10 (o le 10 e sili ona malosi), o le a le malosi o lou vaaia o aoaoga a Korioa ua faalauiloaina i aso nei?

• O le a le mea e uiga i nei aoaoga o le a taitai ese ai tagata mai ia Iesu Keriso? Aisea e matautia ai nei manatu?

Saili le taitaiga a le Agaga ma mafaufau i le aafiaga o aoaoga a Korioa i lou lava olaga. Mafaufau i auala e mafai ai e soo se tasi o nei aoaoga sese ona aafia ai oe lava ia.

Na saunoa Elder D. Todd Christofferson o le Korama a Aposetolo e Toasefululua e uiga ia Korioa ma ana aoaoga. Atonu e te manao e matamata le vitio “O Le Meaalofa Paia o le Salamo” mai le faailo taimi 2:08 i le 2:40, o loo maua i le ChurchofJesusChrist.org.

[O tagata e pei o] Korioa … ua faafitia le i ai moni o Keriso ma soo se mea e ta’ua o se agasala. O la latou aoaoga faavae e faapea o tulaga faatauaina, tulaga faatonuina, e oo lava i upumoni e feāiāa’i uma. O lea, pe o le a lava le mea e lagona e se tasi e sa’o mo ia e le mafai ona faamasinoina e isi e sese po o se agasala.

A aunoa ma se iloiloga totoa, o ia filosofia ua foliga mai e faatosina ona latou te tuu mai ia i tatou se faatagaga e faananau ai i soo se tuinanau po o se manaoga e aunoa ma se popole mo taunuuga. (D. Todd Christofferson, “O Le Meaalofa Paia o le Salamo,” Liahona, Nov. 2011, 38)

• O le a sou manatu e mafai faapefea e nei aoaoga ona taitai atu ai tagata e faia le agasala? (Tagai i le fuaiupu 18.)

Faitau le Alema 30:19–21, ma vaavaai pe na faapefea ona tali atu tagata o Seasona ma Kitiona i aoaoga a Korioa.

Aisea e te manatu ai o la latou tali sa “sili atu [ona poto]” (Alema 30:20) nai lo le [tali atu] a le nuu o Saraemila? (tagai Alema 30:18).

Uunaia ni tagata aoga e tali mai i le fesili lenei. E mafai e tagata aoga ona tusi a latou tali i luga o le laupapa po o luga o se fasi pepa lea e pasi faataamilo i le vasega. O le talanoaga e mafai ona aofia ai le auala e mafai ai e faatinoga amiotonu patino ma le aveesea o faatosinaga leaga ona fesoasoani ia i latou ia “sili atu ai [ona popoto].” Mo se faataitaiga, e mafai e tagata aoga ona vaai i ala o faasalalauga faaagafesootai, musika, ma vitio latou te faaaogaina e le aunoa ma aveesea so o se mea e mafai ona faavaivaia ai lo latou faatuatua ia Iesu Keriso ma faatausuai ai i le Agaga Paia.

• E mafai faapefea ona tatou “sili atu [ona popoto]” ma teena savali aneti-Keriso?

• E mafai faapefea e lou malamalama ma le sootaga ma le Faaola ona aafia ai le tele o le faatosinaga o nei aoaoga aneti-Keriso ia te oe?

E mafai ona e valaaulia tagata aoga e faasoa mai se molimau po o se upumoni e faavavau e uiga ia Iesu Keriso. E mafai foi ona e fai atu ia i latou e faasoa mai ni mau po o ni aoaoga a le Faaola o loo faafetaiaia ai manatu sese o Korioa. O faataitaiga e aofia ai le Iakopo 7:11–12; Alema 32:21; Mamona 7:3, 5–7.

Manatunatu i mea ua e aoaoina ma lagonaina mai au suesuega. Saili le taitaiga a le Agaga Paia e fesoasoani ia te oe e taulai atu ai ia Iesu Keriso ma teena aoaoga ia o le a taitai ese ai oe mai ia te Ia.

Manatu ma Talaaga o Faamatalaga

Aisea e taua ai le taliaina o fautuaga mai perofeta ma aposetolo o aso nei?

Na saunoa Peresitene Henry B. Eyring:

Sa finau Korioa, e pei ona finau pepelo alii ma tamaitai mai le amataga o taimi, e faapea o le talia o fautuaga mai auauna a le Atua o le lafoaia lea o aia tatau o le tutoatasi na tuuina mai e le Atua. Ae e sese le finauga, aua o loo faauigasese ai le mea moni. A tatou teenaina le fautuaga lea e mai le Atua, tatou te le filifili la ina ia tatou tutoatasi i aafiaga o loo i fafo atu. Tatou te filifilia se isi [foi] aafiaga. Tatou te teena le puipuiga a se Tama oi le Lagi e atoatoa ona alofa, mamana atoatoa, e silafia mea uma, o lona faamoemoega atoa, e pei o Lona Alo Pele, ia tuuina mai ia i tatou le ola e faavavau, e tuuina mai ia i tatou mea uma ua ia te Ia, ma toe avatu i tatou i aiga i aao o Lona alofa. I le teenaina ai o Lana fautuaga, tatou te filifili ai le faatosinaga a se isi mana, o lona faamoemoega o le aumaia lea o le faanoanoa ma o lona faamoemoega o le inoino. (Henry B. Eyring, “Finding Safety in Counsel,” Ensign, Me 1997, 25)

E mafai faapefea e aoaoga pepelo ona aafia ai o tatou olaga?

Na saunoa mai Peresitene Russell M. Nelson:

Ao tatou taulai atu ma le maelega i le Faaola ma mulimuli i Lana mamanu o le taulai atu i le olioli, e tatau ona tatou aloese mai mea e mafai ona faalavelave i lo tatou olioli. Manatua Korioa, le aneti-Keriso? Sa faia e Korioa le tele o faamatalaga pepelo e uiga i le Faaola, na alu atu Korioa i lea nofoaga ma lea nofoaga seia oo ina aumai o ia i luma o le faitaulaga sili o le na fesiligia o ia: “Aisea ua e fealuai ai e faapiopio ala o le Alii? Aisea ua e aoao atu ai i lenei nuu o le a leai se Keriso, e taofi ai lo latou oliolisaga?” [Alema 30:22].

Soo se mea e tetee ia Keriso po o Lana aoaoga faavae o le a taofia i lo tatou olioli. E aofia i lena filosofia a tagata, lea e tele i luga o le initoneti ma poloka, lea e tutusa lava ma mea na faia e Korioa.

Afai tatou te vaai atu i le lalolagi ma mulimuli i ona mamanu mo le fiafia, tatou te le iloaina lava le olioli. (Russell M. Nelson, “Olioli ma le Ola ai Faaleagaga,” Liahona, Nov. 2016, 83-84)

E mafai faapefea ona tatou iloa le upumoni ma mulimuli i le Faaola?

Na aoao mai Peresitene Russell M. Nelson:

O leo ma uunaiga a le lalolagi ua matua faatosina ma anoanoai. Ae ua tele na’ua leo e taufaasese, faatosina, ma mafai ona tosoesea i tatou mai le ala o feagaiga. Ina ia aloese mai le lotonutimomomo lē maalofia e mulimuli mai ai, ou te aioi atu ia te outou i le asō ia faafetaia’ia mailei a le lalolagi e ala i le faaavanoa o se taimi mo le Alii i lou olaga—i aso taitasi ma aso uma. (Russell M. Nelson, “Faaavanoa se Taimi mo le Alii,” Liahona, Nov. 2021, 120)

I aso a sau, o le a ono le mafai ona tatou ola faaleagaga e aunoa ma le taiala, taitaiga, faamafanafanaga, ma le uunaiga faifai pea a le Agaga Paia. (Russell M. Nelson, “Faaaliga mo le Ekalesia, Faaaliga mo o Tatou Olaga,” Liahona, Me 2018, 96)

O a nisi o savali aneti-Keriso o loo aoaoina i o tatou aso?

Na aoao mai e Sister Julie B. Beck, sa avea ma Peresitene Aoao o le Aualofa:

O Korioa o se tagata sa le talitonu ia Keriso. O se tagata e le talitonu ia Keriso, e le talitonu foi i aiga. Soo se aoaoga po o mataupu faavae e faalogo i ai mai le lalolagi e faasagatau i le aiga, e aneti-Keriso foi lea. O loo manino lava. Afai e le toe talitonu o tatou talavou i tu ma aga amiotonu a o latou tama … , a le malamalama o tatou talavou i la latou sao i le fuafuaga, e mafai ona taitaieseina i latou. (Julie B. Beck, “Aoaoina o Mataupu Faavae o le Aiga,” Liahona, Mat. 2011, 15)

Gaoioiga Faaopoopo e Aoao Ai

O le a le taulaiga a i latou o e aoao atu aoaoga faavae sese?

Ina ia fesoasoani i tagata aoga ia iloa aoaoga sese, valaaulia i latou e faitau le Alema 30:6 ona sosoo lea ma le 1 Nifae 11:34–36. Fesoasoani i tagata aoga ia malamalama o le toatele o e osofaia aoaoga faavae moni e masani ona faitioina faalauaitele perofeta. Mafaufau e fesili atu i tagata aoga i fesili e pei o le “Aisea e te manatu ai ua naunau tele nisi tagata e saili masei i perofeta o ona po nei?” po o le “Na faapefea ona fesoasoani perofeta o aso nei ia te oe e aloese ai mai le taufaasese?”

E mafai faapefea e aoaoga aneti-Keriso ona aafia ai lo tatou olioli i le talalelei?

O mea nei e mafai ona fesoasoani i tagata aoga ia malamalama ai pe faapefea e le talitonu i savali aneti-Keriso ona lē taitai atu ai i le olioli. Mafaufau e valaaulia tagata aoga e faitau le Alema 30:22. Valaaulia i latou e mafaufau po o le a le uiga o le fasifuaitau “taofi ai lo latou oliloli”. E mafai e tagata aoga ona talanoaina pe mafai faapefea e aoaoga a aneti-Keriso ona faalavelavea lo latou olioli. Ona mafai lea ona latou faasoa mai aoaoga a, pe e uiga ia Iesu Keriso lea e fesoasoani tatou te lagona ai le olioli. E mafai foi ona e mafaufau e faasoa atu le saunoaga a Peresitene Nelson i le vaega o “Manatu ma Talaaga o Faamatalaga” i lalo o le ulutala “E mafai faapefea e aoaoga sese ona aafia ai o tatou olaga?”

Fesoasoani ai i tagata aoga e faia ni fesootaiga i o tatou aso

Ina ia fesoasoani i tagata aoga ia iloa savali aneti-Keriso i aso nei, mafaufau e tuu i latou i ni paga po o ni vaega toalaiti ma atofa atu ia i latou se autu mai le Mo Le Malosi o le Autalavou (tamaitusi, 2022). Valaaulia i latou e talanoaina pe mafai faapefea e Satani ona faasalalau atu savali aneti-Keriso e uiga i a latou autu atofaina.