Seminare
Alema 30–31: Vaaiga Aoao

“Alema 30–31: Vaaiga Aoao,” Tusi Lesona a le Faiaoga o le Tusi a Mamona (2024)

“Alema 30–31,” Tusi Lesona a le Faiaoga o le Tusi a Mamona

Alema 30–31

Vaaiga Aoao

Na sau i totonu o sa Nifae se tagata amioleaga e igoa ia Kori’oa. Sa ia talai atu e faasaga i valoaga e uiga ia Iesu Keriso ma taitai ese atu ai loto o tagata e toatele mai le Atua. Sa aveina atu o ia i luma o Alema, ma sa molimau atu Alema e faapea “ua faailoa mai i mea uma o loo i ai se Atua” (Alema 30:44). Na faafitia e Korioa le i ai o le Atua seia oo ina taia o ia i le mana o le Atua. O le taimi lea, o sa Sorama, o e sa auai i le Ekalesia moni a le Atua, sa amata ona talitonu i aoaoga sese. O a latou ituaiga o tapuaiga piopio na aveesea ai o latou loto mai le Atua ma taitai atu ai i latou ia agaleaga i isi. Ina ua uma ona faalogo e uiga ia sa Sorama “ua pauu atu i latou i sese tetele” (Alema 31:9), sa faia e Alema ni fuafuaga e faaaoga ai le mana o le afioga a le Atua e valaaulia ai i latou e toe foi atu ia Iesu Keriso.

Saunia e Aoao Atu

O nei faamatalaga e tuuina atu ai i faiaoga ni manatu o mea atonu e manaomia ona muai saunia mo lesona taitasi.

Alema 30:1–29

Faamoemoega o le lesona: O lenei lesona e mafai ona fesoasoani i tagata aoga ia iloa ma teena aoaoga ia e mafai ona taitai ese ai i latou mai ia Iesu Keriso.

  • Sauniuniga a le tagata aoga: E mafai e tagata aoga ona talanoa ma se tagata o le aiga po o se taitai o le Ekalesia e uiga i auala e iloa ai aoaoga sese.

  • Vitio: “Faamaoni i le Faatuatua” (20:17; matamata mai le faailo taimi 00:00 i le 2:30); “O Le Meaalofa Paia o le Salamo” (15:22; matamata mai le faailo taimi 2:08 i le 2:40)

  • Ata: O se maka-feke

  • Fautuaga faafaiaoga faavitio: Mafaufau e faaaoga potu vaevae e mafai ai e tagata aoga ona galulue i ni paga po o ni vaega toalaiti a o latou talanoaina savali aneti-Keriso na latou fetaiai. E mafai e vaega taitasi ona filifili se sooupu e faasoa mai i le vasega mea na talanoaina e a latou vaega.

Alema 30:30–60

Faamoemoega o le lesona: O lenei lesona e mafai ona fesoasoani ai i tagata aoga ia iloa faamaoniga e faapea o loo i ai le Atua ma filifili e talitonu ia te Ia.

  • Sauniuniga a le tagata aoga: Valaaulia tagata aoga e faitau le Alema 30:40–41 po o le Mose 6:63. Fai atu ia i latou e vaavaai mo faamaoniga o le Atua i o latou siosiomaga ma atonu e pue se ata e faaali i le vasega.

  • Ata: O ata e maua ai faamaoniga o le i ai o le Atua

  • Vitio: “Ua Faailoa Mai i Mea Uma o Loo i Ai se Atua” (11:16; matamata mai le faailo taimi 3:22 i le 5:16, 5:23 i le 7:13, ma le 7:13 i le 11:16); “Sau, Mulimuli Mai ia te Au” (17:50; matamata mai le faailo taimi 14:24 i le 14:56)

  • Fautuaga faafaiaoga faavitio: Mafaufau e valaaulia tagata aoga e faaali se ata po o se mea o loo molimau mai e uiga i le Atua ma ia faamatala pe aisea na latou filifilia ai.

Alema 31:1–11

Faamoemoega o le lesona: O lenei lesona e mafai ona fesoasoani ai i tagata aoga e faalagolago i le mana o le afioga a le Atua e tumau faamaoni ai ia Iesu Keriso.

  • Sauniuniga a le tagata aoga: Valaaulia tagata aoga e talanoa i se tasi e uiga i le ala na fesoasoani ai le afioga a le Atua ia i latou e tumau faamaoni i le talalelei a Iesu Keriso.

  • Vitio: “Toefuataiga i Aso Taitasi” (13:43; matamata mai le faailo taimi 1:40 i le 3:25)

  • Pepa e tufa atu: “O Le Fuafuaga a Alema e Aoao sa Sorama”

  • Fautuaga faafaiaoga faavitio: Mo le sini a Alema e fesoasoani i sa Sorama ia toe foi atu i le Alii, ua valaaulia tagata aoga e fatu se laupapa o faaaliga: o se faatusa vaaia o le sini, o le uunaiga mo lena mea, ma faamatalaga auiliili e uiga i le faataunuuina. Mafaufau e sue faataitaiga o laupapa o faaaliga i luga o le initoneti ma faasoa atu nei mea i tagata aoga.

Alema 31:12–38

Faamoemoega o le lesona: O lenei lesona e mafai ona fesoasoani ai i tagata aoga e faaleleia lo latou sootaga ma le Tama Faalelagi ma Iesu Keriso a o latou iloiloina pe faapefea e le faamaualuga ma le lotomaualalo ona aafia ai lo latou sootaga ma i Laua faapea ma isi.

  • Sauniuniga a le tagata aoga: I sauniuniga e suesue le Alema 31, valaaulia tagata aoga e tatalo, ma taulai atu i manaoga o isi.

  • Ata: Ata o tagata aoga o loo tapuai; o se ata o le Rameutoma

  • Anotusi e faaali atu: O le siata e uiga i le tatalo, a le o le faaali atu pe kopi i luga o le laupapa

  • Vitio: “Ua Talai Atu e Alema ma Ona Uso le Afioga a le Atua i sa Sorama” (6:07; matamata mai le faailo taimi 0:22 i le 3:58 ma le 4:03 i le 5:55)

  • Fautuaga faafaiaoga faavitio: Mafaufau e faaaoga le polokalama o le laupapa paepae e faaali atu ai le siata e uiga i le tatalo. Valaaulia tagata aoga e faaopoopo i le siata i le faasologa atoa o le lesona ma ia kopi i totonu o a latou api talaaga mo suesuega.

Atamai i Aoaoga Faavae Iloiloga 14

Faamoemoega o le lesona: O lenei lesona e faamoemoe e fesoasoani ai i tagata aoga e tauloto ni nai mau faasino ma fasifuaitau autu o mau mai fuaitau mulimuli e 12 o mau o le atamai i aoaoga faavae i le Tusi a Mamona.

  • Sauniuniga a le tagata aoga: Valaaulia tagata aoga e filifili ma tauloto se fuaitau o le atamai i aoaoga faavae lea e mafai ona fesoasoani latou te lagona ai le latalata atu i le Faaola pe fesoasoani ia i latou i se manaoga o i ai nei.

  • Pepa e tufa atu: “Atamai i Aoaoga Faavae o le Tusi a Mamona: Alema–Moronae”

  • Fautuaga faafaiaoga faavitio: Mafaufau e faaali atu anotusi mai le polokalama o le Atamai i Aoaoga Faavae ma galue ai i gaoioiga o se vasega.