Alema 31:1–11

“[O] Le Mana o le Afioga a le Atua”

O a ituaiga o mea e ono afua ai ona e lagona le mamao mai le Faaola? O a mea e fesoasoani ia oe e lagona ai le latalata atu ia te Ia? Ina ua uma ona faalogo e uiga ia sa Sorama “ua pauu atu i latou i sese tetele” (Alema 31:9), sa faia e Alema ni fuafuaga e faaaoga ai le mana o le afioga a le Atua e valaaulia ai i latou e toe foi atu ia Iesu Keriso. O lenei lesona e mafai ona fesoasoani ia te oe e faalagolago ai i le mana o le afioga a le Atua ia tumau faamaoni ai ia Iesu Keriso.

Fesoasoani i tagata aoao ia iloa pe faapefea ona latou faia se faatinoga amiotonu lelei. E mafai ona manuia tagata aoga mai le mauaina o ni auala eseese e mafai ona latou faaaogaina ai mataupu faavae o le talalelei i tulaga o le olaga. A uma ona latou mafaufau loloto pe talanoaina ni filifiliga eseese, valaaulia tagata aoga e faatino le filifiliga latou te lagona o le a sili ona fesoasoani ia i latou i o latou tulaga o i ai nei.

Sauniuniga a le tagata aoga: Valaaulia tagata aoga e talanoa i se tasi e uiga i le ala na fesoasoani ai le afioga a le Atua ia i latou e tumau faamaoni i le talalelei a Iesu Keriso.

Gaoioiga e Ono Mafai Ona Aoao Ai

See ese

Sa faasoa mai e Elder Dieter F. Uchtdorf o le Korama a Aposetolo e Toasefululua ni taunuuga o sailiiliga e uiga i le faigata o le savali i se laina sa’o pe a leai ni a tatou .faailoga o le ala. E ui o le toatele o tagata i le suega o sailiiliga sa manatu sa faamanuiaina i latou, ae na faaalia i taunuuga e faapea “a aunoa ma ni faailoga o le ala, tatou te se’e ese mai le ala.” (Dieter F. Uchtdorf, “Toefuataiga i Aso Taitasi,” Liahona, Nov. 2021, 77). Atonu e te manao e matamata le vitio “Toefuataiga i Aso Taitasi” mai le faailo taimi 1:40 i le 3:25, o loo maua i le ChurchofJesusChrist.org, ma mafaufau pe faapefea ona fesootai faaleagaga lenei mea i o tatou olaga.

• E faapefea ona fesootai lenei mea ia i tatou faaleagaga?

I le Alema 31–35 o le a e aoao ai e uiga i sa Sorama o e sa talitonu muamua ia Iesu Keriso ae na see ese mai lo latou faatuatua. Ae e te lei amataina lau suesuega i le Alema 31, manatunatu pe na faapefea ona tuputupu ae lou faatuatua ia Iesu Keriso.

E mafai ona e faaali atu le fesili lenei mo tagata aoga e tali ai i a latou api talaaga mo suesuega mo o latou lava manatunatuga patino. Aua nei fai atu i tagata aoga e faasoa mai a latou tali i lenei fesili.

• Afai e te tumau i lou ala o loo i ai nei, pe o le a e agai atu ea ia Keriso pe agai ese mai ia te Ia?

Sini a Alema

I le Alema 31:1–11 ua tatou aoao ai e uiga i taumafaiga a sa Sorama ma Alema e valaaulia i latou e toe foi atu i le Alii. O le ata lenei e mafai ona fesoasoani ia te oe e malamalama ai i le ala na taumafai ai Alema e toe aumai sa Sorama.

Mafaufau e tuuina atu i tagata aoga se kopi o lenei pepa e tufa atu. Ona mafai lea ona fesoasoani lenei mea i tagata aoga e saunia e faatutu a latou lava sini i se taimi mulimuli ane o le lesona.

O le fuafuaga a Alema e aoao atu sa Sorama

Tusi Lesona a le Faiaoga o le Tusi a Mamona (2024)—“Alema 31:1–11: ‘O Le Mana o le Afioga a le Atua’”

© 2023 by Intellectual Reserve, Inc. Ua taofia aiā tatau uma.

Faitau le Alema 31:1–4, 8–11, ma vaavaai pe na faapefea ma pe aisea na amata ai ona see ese sa Sorama. Faamaumau mea e te maua i le vaega o “Faafitauli”.

Mafaufau e faaaoga fesili e pei o fesili nei e fesoasoani ai i tagata aoga ia malamalama i le see ese o sa Sorama ma pe na faapefea ona aafia ai i latou. Fesoasoani i tagata aoga ia iloa mea e tutusa ai i o tatou aso. Mo se faataitaiga, afai e le tausia e tagata poloaiga, auai i le lotu, auai i sauniga e pei o le faamanatuga, ma tatalo, o le a latou see ese mai le Alii.

• O a ni auala na see ese ai sa Sorama? O a ni faafitauli na mafua mai lenei mea?

• O a ni faatinoga talitutusa e mafai ona mafua ai ona see ese tagata i aso nei?

Faitau le Alema 31:34, vaavaai mo le sini ma faamoemoega a Alema mo sa Sorama. Mafaufau e tusi le mea lenei i le vaega o “Sini”.

• Mafaufau i le sini a Alema ma ona lagona na e faitau i ai i le Alema 31:1–2, o le a sou manatu i le mea na faaosofia ai Alema? Aisea e ono tupu ai lea mea?

Faitau le Alema 31:5–7, 11, maka upu po o fasifuaitau o loo faamatala ai le fuafuaga a Alema e faataunuu ai lana sini. Atonu e te manao e maitau i le fuaiupu 5 e faapea o le upu mana e sau mai le upu Latina virtus, o lona uiga o le malosi po o le mana (tagai Gospel Topics, “Virtue”), ma le upu faataitaia i le faatatauga lenei o lona uiga o le suesue po o le faataitai.

Ina ia saunia tagata aoga e faatumu le vaega o le “Auala e ausia ai le sini” o le pepa e tufa atu, atonu e te manao e fai atu nisi o fesili nei.

• O le a sou manatu i le uiga o le “faataitaia le mana o le afioga a le Atua”? O fea e mafai ona tatou maua ai le afioga a le Atua? (Mafaufau e faitau ma fefaasinoai le Mataupu Faavae ma Feagaiga 18:2–4, 34–36; 68:4.)

• O le a se upumoni e mafai ona tatou aoao mai le sini a Alema ma fuafua e faataunuuina?

O se tasi o upumoni atonu na e faailoaina mai e faapea, o le afioga a le Atua e i ai le mana e taitai atu ai tagata ia Iesu Keriso.

• O le a se mea ua e iloa e uiga i le Atua lea e mamana pe malosi ai Lana upu ia te oe? Aisea e te manatu ai e sili atu ona mamana “nai lo le pelu, po o se isi lava mea”? (Alema 31:5).

• E mafai faapefea e le afioga a le Atua ona fesoasoani ia i tatou e faasoa atu le talalelei, faasa’o manatu sese, pe taitai atu ai isi ia Iesu Keriso?

• Na faapefea ona aafia lou olaga i le afioga a le Atua?

I le faaaogaina o mea ua e aoaoina mai ia Alema ma ou malamalamaaga mai fesili na muamua atu, faatumu le vaega o le “Auala e ausia ai le sini”.

O le afioga a le Atua i lo’u olaga

Mafaufau pe faapefea ona fesootai mea o loo e aoaoina mai ia Alema ma sa Sorama i lou olaga.

O fesili nei ua faamoemoe e fesoasoani ai i tagata aoga e faafesootai lenei tala i o latou lava olaga. Mafaufau e fai atu ni fesili talitutusa po o nisi e mafai ona e mafaufauina.

• O a nisi o mea e mafua ai ona see ese le autalavou mai ia Iesu Keriso?

• E mafai faapefea e le faalagolago i le afioga a le Atua ona taofia ai lo tatou see ese mai ia Iesu Keriso pe fesoasoani ai foi ia i tatou e toe foi atu ia te Ia?

E ono mafai ona e mafaufau e valaaulia tagata aoga e faasoa mai ma lisi i luga o le laupapa ia mau na taitai atu ai i latou i le Alii. E mafai foi ona latou maua mau o loo talanoaina ai nisi o mafuaaga o le see ese mai le Alii.

Mafaufau i lou sootaga ma Iesu Keriso. O i ai se mea o mafua ai ona e see ese mai ia te Ia? E te manao i se sootaga malosi atu ma Ia? Ia faatu ma le agaga tatalo se sini patino e fesoasoani ia te oe e faamalosia ai lou sootaga ma Ia. O lenei sini e mafai ona fesootai pe faaopoopoina i au sini o Tamaiti ma le Autalavou.

Mafaufau e tuu atu i tagata aoga se isi pepa e tufa atu e faaaoga e tusi ai la latou lava sini. Pe a manaomia, talanoaina ni auala eseese e mafai ai e tagata aoga ona faalagolago i le mana o le afioga a le Atua. Mo se faataitaiga, o le suesue i tusitusiga paia i aso taitasi, saili mo tali po o le taitaiga i tusitusiga paia, auai i le seminare, po o isi manatu. O fautuaga nei e mafai ona fesoasoani i tagata aoga e faapatino ai auala latou te faatumuina ai le siata mo la latou lava sini.

Tusi lau oe lava sini i le vaega o le “Sini”.

E mafai foi ona e tusia so o se faafitauli i lau sini i le vaega o “Faafitauli”.

I le “Auala e ausia ai le vaega o sini” tusi ai i lalo le auala e mafai ona e faalagolago ai i le mana o le afioga a le Atua. Ia faaaofia ai le auala o le a fesoasoani ai lenei mea ia te oe e ausia ai lau sini.

Atonu e mafai ona fesoasoani fesili nei.

Atonu e lagona e nisi tagata aoga le toafimalie e faasoa mai a latou sini. E mafai ona e faaaogaina fesili nei e fesoasoani ai ia i latou e faasoa ma faafoe se talanoaga.

• Aisea ua avea ai lenei sini ma mea e te lagona e te manaomia i lou olaga? O le a faapefea e le ausiaina [o lea sini] ona aafia ai lau sootaga ma Iesu Keriso?

• O a ni faatinoga patino e mafai ona e faia e fesoasoani ai ia te oe e faalagolago i le mana i le afioga a le Atua? E mafai faapefea ona fesoasoani lenei mea ia te oe e ausia ai lau sini?

• O a mau po o faamatalaga mai taitai o le Ekalesia e mafai ona faaosofia ai oe e galue i lenei sini?

Mafaufau e faaiu i le valaaulia o tagata aoga e faasoa mai o latou aafiaga i le suesueina o le Alema 31:1–11 ma so o se manatu po o ni uunaiga patino. Faasoa atu le molimau i le mama o le afioga a le Atua ma le taua o le faia o na mea lea o le a faalatalata atili atu ai i tatou ia Iesu Keriso.

Manatu ma Talaaga o Faamatalaga

E mafai faapefea e taumafaiga faigofie ma faifai pea ona fesoasoani ia te au e tumau malosi ai i le talalelei?

O vitio nei o loo faapupula mai ai le taua o le faia o na mea laiti ina ia tumau ai le malosi faaleagaga:

O le a faapefea ona ou manuia mai le faalagolago i le afioga a le Atua?

Sa aoao mai Peresitene Ezra Taft Benson (1899–1994):

O loo i ai se mana i [le Tusi a Mamona] lea e amata ona tafe mai i o outou olaga i le taimi lava e amata ai ona e suesue ma le faamaoni i le tusi. O le a e maua le mana sili atu e tetee atu ai i faaosoosoga. O le a e maua le mana e aloese ai mai mea tau faasese. O le a e maua le mana e tumau ai i le ala sa’o ma le vaapiapi. (Ezra Taft Benson, “The Book of Mormon—Keystone of Our Religion,” Ensign, Nov. 1986, 7)

Na faamalamalama mai e Elder Michael John U. Teh o le Fitugafulu:

O le suesueina i aso taitasi o tusitusiga paia … o le a fesoasoani ia i tatou e fausia ai le malosiaga faaleagaga ma le malamalama, aveesea le ufimata o taufaaseseega a le tiapolo, ma iloa ai mailei ua ia faataatitiaina e pu’e ai tatou. (Michael John U. Teh, “O Le Mana o le Afioga a le Atua,” Liahona, Mat. 2013, 53)

Sa aoao mai Peresitene Boyd K.Packer (1924–2015) o le Korama a Aposetolo e Toasefululua:

O mataupu autu moni, ua malamalama i ai, e suia ai uiga ma amioga. O le suesueina o mataupu autu o le talalelei o le a vave ona faaleleia ai le amio nai lo se suesuega o le amio lea o le a faaleleia ai le amio. (Boyd K. Packer, “Aua le Fefe,” Liahona, Me 2004, 79)

Sa faasoa mai e Peresitene M. Russell Ballard se tala mamana e uiga i le mana o le afioga a le Atua i le olaga o se alii talavou sa tauivi ma lana molimau.

Gaoioiga Faaopoopo e Aoao Ai

Faaaofiaina o ala o faasalalauga

Mafaufau e faaaofia nisi o filifiliga o ala o faasalalauga o loo tuuina atu i le vaega o “Manatu ma Talaagaa o Faamatalaga”. O se tasi o auala e faia ai lenei mea o le faaali atu lea o se tasi o nei vitio ma valaaulia tagata aoga e talanoaina pe mafai faapefea e nisi o na aoaoga ona fesoasoani ia i latou e tumau malolosi ai i le talalelei a Iesu Keriso. I se isi itu, e mafai ona e faaaogaina se tasi o vitio e fesoasoani ai i tagata aoga ia malamalama i le taua o le gauai atu i mea na sese ai sa Sorama. E mafai e tagata aoga ona talanoaina pe faapefea ona latou vaaia nei mea i o latou lava olaga ma ni vaifofo talafeagai ia aua nei faatalale iai.

Faaaogaina o le Sau, Mulimuli Mai ia te Au

O le gaoioiga lenei e mai le Sau, Mulimuli Mai ia te Au—mo Tagata Taitoatasi ma Aiga. E mafai ona e faaaogaina i lenei lesona.

Alema 31:5–6: Ona o Iesu Keriso, e mafai ai e so o se tasi ona suia.

Maitau le vaega o tagata na ave e Alema faatasi ma ia e aoao atu le talalelei i sa Sorama (tagai Alema 31:6). O le a se mea ua e iloa e uiga i olaga o nei tagata taitoatasi? (tagai Mosaea 27:8–37; 28:4; Alema 10:1–6; 11:21–25; 15:3–12). O a ni savali atonu o i ai iina mo oe i mea na tutupu ia i latou?

Faaaogaina o tusitusiga paia e faapupula ai le mana o le afioga a le Atua

Ina ia fesoasoani i tagata aoga ia malamalama i le mana o le afioga a le Atua, mafaufau e valaaulia i latou e mafaufau i se aoaoga faavae patino po o se mau e mafai ona fesoasoani i se tagata sa Sorama na see ese. E mafai e tagata aoga ona toe iloilo ia faafitauli o sa Sorama o loo taua i le Alema 31:8–11 ona vaai faalemafaufau lea o le a latou o i se misiona faatasi ma Alema. Valaaulia i latou e mafaufau po o le a le mea o le a latou faasoa atu. E mafai ona e uunaia tagata aoga e faaaoga fuaitau o le atamai i aoaoga faavae.