Alema 30:30–60

“O Loo I Ai Se Foafoa Silisiliese”

Na molimau mai Alema e faapea “ua faailoa mai i mea uma o loo i ai se Atua” (Alema 30:44). Ae aisea e le iloa ai pe ta’uta’u atu ai e tagata uma o loo i ai se faamaoniga e moni le Atua? Na faafitia e Korioa le i ai o le Atua seia oo ina taia o ia i le gūgū e le mana o le Atua. O lenei lesona e mafai ona fesoasoani ia te oe e iloa ai faamaoniga o loo i ai le Atua ma filifili e talitonu ia te Ia.

Uunaia ai o le suesueina [patino] ma le iloiloga. Fai atu ni fesili musuia ina ia mafai ai e tagata aoga ona iloa mea ua uma ona latou iloa ma talitonu i ai. Uunaia tagata aoga e valaaulia le Agaga Paia e fesoasoani ia i latou e faailoa mai mea e manaomia ona latou iloa ma molimau atu ai i upumoni latou te sailia.

Sauniuniga a le tagata aoga: Valaaulia tagata aoga e faitau le Alema 30:40–41 po o le Mose 6:63. Fai atu ia i latou e vaavaai mo faamaoniga o le Atua i o latou siosiomaga ma atonu e pue se ata e faaali i le vasega.

Gaoioiga e Ono Mafai Ona Aoao Ai

O le i ai o le Atua

Mafaufau e faaali atu ni nai ata e te lagona e faaalia ai le faamaoniga o le i ai o le Atua. E mafai foi ona ripoti mai e tagata aoga a latou sauniuniga mo le vasega. Mafaufau e faaaoga ni nai fesili po o fesili uma nei.

• I lau aʻoga po o le nuu, o le ā le taatele e ono foliga ai e vaaia e tagata faamaoniga o le iai o le Atua i le lalolagi o loo siomia ai i latou (mo se faataitaiga, a o vaavaai atu i le goto o le la po o fetu)?

• Aisea e te manatu ai e mafai e tagata ona vaai i mea lava nei e tasi ma faia faaiuga eseese e uiga i le Atua?

• O le a se mea e ono aafia ai le gafatia o se tasi e iloa ai le auai ai o le Atua i lona olaga?

Mafaufau pe faapefea ona faamanuiaina oe pe afai e mafai ona e vaai manino atili i le Atua ma Lona auai ai i lou olaga. A o e suesue i le asō, saili e faateleina lou gafatia e vaai ai i faamaoniga o le Atua i mea e te vaaia ma tupu ia te oe .

Ua tuuaia e Korioa ia taitai o le Ekalesia

O Korioa, o se aneti-Keriso, sa faamanuiaina tele i le faasalalauina o ana savali faa’ole’ole i le laueleele o Saraemila (tagai Alema 30:12, 17–18). Sa ia taumafai foi e aoao tagata i Seasona ma Kitiona. O iina, na tetee ai tagata talitonu i le Atua ia Korioa ma aumai o ia e vaai le faamasino sili ma Alema, le faitaulaga sili.

Faitau le Alema 30:30–36, ma vaavaai pe na faapefea ona tali atu Alema i osofaiga a Korioa e uiga i le Atua ma le Ekalesia. E mafai foi ona e matamata i le vitio “Ua Faailoa Mai i Mea Uma o Loo i ai Se Atua” mai le faailo taimi 3:22 i le 5:16, o loo maua i le ChurchofJesusChrist.org.

Atonu e te manao e valaaulia tagata aoga e faamaumau faauigaga o upu nei i a latou tusitusiga paia e fesoasoani ai ia i latou ia malamalama ma manatua mea ua latou aoaoina.

Atonu e fesoasoani le iloa o le upuleaga i le fuaiupu 30 o lona uiga o le faatauemu i le Atua pe tautala “ma le le faaaloalo po o le le migao i le Atua po o mea paia” (O le Taiala i Tusitusiga Paia, “Upuleaga, Upuleaga,” scriptures.ChurchofJesusChrist.org). O le upu ola faaloloto i nei fuaiupu e faatatau i le mauoa mai ai.

• O le a le mea na tuuaia ai e Korioa ia taitai o le Ekalesia? (Tagai i le Alema 30:31.)

O le molimau a Alema i le Atua

Ina ua fesili atu Alema ia Korioa pe talitonu o ia i le Atua, na fai mai Korioa e leai (tagai Alema 30:37–38).

Faitau le Alema 30:39–44, ma vaavaai pe na faapefea ona tali atu Alema ia Korioa. E mafai foi ona e matamata i le vitio “Ua Faailoa Mai i Mea Uma o Loo i Ai Se Atua” mai le faailo taimi 5:23 i le 7:13, o loo maua i le ChurchofJesusChrist.org.

• O le a se mea e tumatila ia te oe mai le tali a Alema?

• O a upumoni e uiga i le Atua e mafai ona e faailoa mai i le Alema 30:41, 44?

Mafaufau e valaaulia tagata aoga e fefaasinoai nei fuaiupu ma le Mose 6:63. Tuu atu i tagata aoga e faasoa mai soo se upumoni latou te lagona o loo aoaoina i nei fuaiupu. E mafai ona latou faailoa mai upumoni e pei o le faataitaiga lenei.

O se upumoni e tasi e mafai ona tatou aoaoina e faapea, o mea uma lava e molimau e uiga i le Atua.

O le gaoioiga lenei e mafai ona fesoasoani i tagata aoga ia iloa le faamaoniga o le Atua i o latou olaga. Vaavaai mo auala e faaaofia ai tagata aoga uma i le vasega. Mafaufau e fai se lisi o tali a tagata aoga mo laasaga 1 ma le 2 i luga o le laupapa. E mafai foi e tagata aoga ona tusi se mea mo laasaga 3 ma le 4 i a latou api talaaga ona volenitia lea e faasoa mai. Atonu e le iloa e nisi o tagata aoga aafiaga na latou oo i ai seiloga ua latou faalogo o faasoa mai e isi.

1. Fai se lisi o mea na fai mai Alema o loo maua ai faamaoniga o le i ai o le Atua.

2. Faaopoopo soo se faamaoniga faaopoopo e mafai ona e mafaufau i ai.

3. Vaavaai mo mea o i lau lisi na fesoasoani ia te oe e vaai patino ai i faamaoniga o le Atua. E mafai ona e tusia i lalo ni faamatalaga auiliili mai ou aafiaga.

4. E mafai foi ona e filifilia se aitema se tasi pe sili atu i lau lisi ma faasoa mai pe mafai faapefea e nei mea ona fesoasoani ia te oe e faateleina lou gafatiaga e vaai ai i faamaoniga o le Atua.

O le faamatalaga lenei e mafai ona fesoasoani ai i tagata aoga o e atonu o loo tauivi e iloa aafiaga ma le Atua. Mafaufau e faasoa atu ma valaaulia tagata aoga e faasoa mai mea ua latou aoaoina. Fesoasoani i tagata aoga e aloese mai le lagonaina o le lotovaivai ma valaaulia i latou e mulimuli i le valaaulia a Peresitene Nelson.

Sa tuuina mai e Peresitene Russell M. Nelson le fautuaga lenei e uiga i le iloaina o loo i ai le Atua.

Ia malamalama o le leai o ni aafiaga ma le Atua, e mafai ai e se tasi ona masalosalo i le i ai moni o le Atua. O lea la, tuu oe lava ia i se tulaga e amata ai ona maua aafiaga faatasi ma Ia. Faalotomaualalo oe lava ia. Tatalo ia i ai mata e vaaia ai le aao o le Atua i lou olaga ma i le lalolagi o siomia oe. Ōle atu ia te Ia e ta’u atu ia te oe pe o loo i ai moni lava o Ia iina—pe afai Na te silafia oe. Ōle atu ia te Ia po o a ni Ona lagona e uiga ia te oe. Ona e faalogo lea. (Russell M. Nelson, “Sau, Mulimuli Mai ia te Au,” Liahona, Me 2019, 90)

Nai lo le faatinoina o le faatuatua ina ia maua se aafiaga ma le Atua, sa manao Korioa ia Alema e faatalitonu o ia i le mana o le Atua ma luiina pea lava pea Alema e faaali atu ia te ia se faailoga (tagai Alema 30:43, 45, 48).

• O le a sou manatu i se mea e ese ai e uiga i se tasi o mulimuli i le valaaulia a Peresitene Nelson ma se tasi o loo tauanau faamalosi se faailoga?

Faitau le Alema 30:48–53, 59–60, ma vaavaai pe na faapefea ona iu ina talitonu Korioa i le mana o le Atua. E mafai foi ona e matamata i le vaega o totoe o le vitio “Ua Faailoa Mai i Mea Uma o Loo i Ai Se Atua” mai le faailo taimi 7:13 i le 11:16, o loo maua i le ChurchofJesusChrist.org.

• O le a se mea e mafai ona tatou aoao mai i le mea na tupu ia Korioa?

Maitau po o a lesona na faasino mai e Mamona i le fasifuaitau “ua faapea ona tatou vaai” i le fuaiupu 60. Mafaufau pe faapefea e le tiapolo ona faaseseina pea tagata i aso nei ma taumafai e tauanau i latou e faafitia mea ua latou iloa e moni.

Molimau atu i le i ai o le Atua ma valaaulia tagata aoga e taumafai e iloa le Atua i le lalolagi o siomia ai i latou.

Manatu ma Talaaga o Faamatalaga

E mafai faapefea ona ou iloa atili le Atua?

Sa faasoa Peresitene Henry B. Eyring o le Au Peresitene Sili le mea sa ia faia e iloa ai le Atua i lona olaga:

Ou te mafaufau lava i le fesili lenei: “Pe na ou vaaia le aao o le Atua o aapa mai e pai mai ia i maua po o le ma fanau po o le matou aiga i le asō?” A o faaauau pea ona ou faia lenei mea, sa amata ona tupu se mea. Pe a ou mafaufau i mea na tutupu i le aso, ou te vaaia faamaoniga o mea sa faia e le Atua mo se tasi o i matou ae ou te lei iloaina i taimi pisi o le aso. A o tupu lena mea, ma e tele lava taimi e tupu ai, sa ou iloaina ai o le taumafai e manatua, na mafai ai e le Atua ona faasino mai ia te au le mea sa Ia faia. (Henry B. Eyring, “E! Ia Manatua, Ia Manatua Lava,” Liahona, Nov. 2007, 67)

Na aoao mai Sister Susan Bednar:

Ou te molimau atu, a o tatou tatalo mo ni mata e vaai ai i Lana fuafuaga, o le a tatou iloaina le aofia ai o le Atua i o tatou olaga ma iloa Na te silafia i tatou. (Susan Bednar, “Have I Seen the Hand of God in My Life?” [Faigalotu a le Ofisa o Aoga a le Ekalesia mo talavou matutua, 3 Mat., 2013], )

E mafai faapefea ona ou valaaulia le Agaga Paia e fesoasoani ia te au ia iloaina le Atua i lo’u olaga?

Na aoao mai Elder Kim B. Clark o le Fitugafulu:

O le usiusitai faigofie e aumaia le Agaga i o tatou loto. Tatou te tatalo i o tatou fale i le faatuatua, suesue i tusitusiga paia, ma tausia le paia o le aso Sapati. I o tatou faletapuai, tatou te aai ma feinu i le faamanatuga ma osia ni folafolaga paia i lo tatou Tama Faalelagi i le suafa o Keriso. I o tatou malumalu paia tatou te auai atu ai i sauniga paia e fai ma sui o o tatou uso ma tuafafine o i le isi itu o le veli. I o tatou aiga ma i o tatou tofiga mai le Alii, tatou te aapa atu ai i isi, tauave a latou avega ma valaaulia i latou e o mai ia Keriso.

Uso e ma tuafafine, ou te iloa afai tatou te faia nei mea, o le a oo mai le Agaga Paia! O le a tatou tuputupu ae faaleagaga ma malamalama i le Agaga Paia, ma o le a avea o Ia ma a tatou soa. Afai o le a tatou vaavaai atu ia Keriso ma tatala o tatou mata ma o tatou taliga, o le a faamanuia i tatou e le Agaga Paia ia vaai atu i le Alii o Iesu Keriso o galue i o tatou olaga, faamalosia lo tatou faatuatua ia te Ia ma le faamautinoaga ma le faamaoniga. (Kim B. Clark, “O Mata e Vaai ma Taliga e Faalogo,” Liahona, Nov. 2015, 125)

Ae faapefea pe afai ou te talitonu i le Atua ae ou te le iloa ma mautinoa e moni o Ia?

Na faasoa mai Elder Jeffrey R. Holland o le Korama a Aposetolo e Toasefululua:

Na fai mai talu ai nei ma sina faalotolotolua se tamaitiiti e 14 tausaga, “Brother Holland, e le o mafai ona ou fai atu ua ou iloa e moni le Ekalesia, ae ou te talitonu e moni.” Sa ou matua opoina lena tamaitiiti. Sa ou fai atu i ai ma le lagona naunautai mai lo’u loto, o le talitonu o se upu taua, o se taga e sili atu ona taua, ma e le tatau ai ona faatoese i le “na ona talitonu.” Sa ou fai atu ia te ia o Keriso lava Ia na fetalai, “Aua e te mata’u, tau lava ina e talitonu” [Mareko 5:36] . … Sa ou faamatala i lenei tamaitiiti, o le talitonu o le laasaga muamua lava lea i le talitonuga maumaututu. … Ma sa ou ta’u atu foi ia te ia lo’u mitamita tele mo ia ona o le faamaoni o lana tauiviga. (Jeffrey R. Holland, “Le Alii e, Ua Ou Faatuatua,” Liahona, Me 2013, 94-95)

Gaoioiga Faaopoopo e Aoao Ai

Valaauliaina o le autalavou e suesue ma molimau atu e uiga i le Atua

A uma ona faailoa mai se upumoni e uiga i mea uma o loo molimau mai e uiga i le Atua (tagai Alema 30:41, 44), mafaufau e valaaulia tagata aoga e suesue nisi o mau nei, viiga, po o vaega o lauga o le konafesi aoao. E mafai ona e valaaulia tagata aoga e faamalolosia a latou molimau e ala i le suesue, faatino mea ua latou aoaoina, ma molimau atu i isi. Mafaufau e valaaulia ni nai volenitia e faasoa mai a latou savali i le vasega. E mafai foi ona e valaaulia tagata aoga e faasoa atu i le aiga.

• Alema 30:44

• Mose 6:63

• “O Le Atua Lo’u Tamā,” Viiga, nu. 184.

• “Ua Sili Oe,” Viiga, nu. 46

• Kim B. Clark, “O Mata e Vaai ma Taliga e Faalogo,” Liahona, Nov. 2015, 124–126

Fesoasoani ai i isi o e masalosalo i le i ai o le Atua

Atonu e manuia tagata aoga mai le faatinoina o se tulaga lea e mafai ai ona latou fesoasoani i se tasi latou te alolofa i ai o lē masalosalo i le i ai o le Atua. Mo se faataitaiga, e mafai ona e valaaulia tagata aoga e faatino se talanoaga ma se tagata o le aiga na faitau pe matamata i se mea na mafua ai ona latou fesiligia le i ai o le Atua. Tuu atu i tagata aoga se taimi e saunia ai a latou tali, ma valaaulia i latou e faaaofia ai se mea se tasi pe lua e molimau atu ai ia i latou i le moni o le Atua.