“Alema 31:12–38: O La Tatou Tapuaiga i le Tama Faalelagi ma Iesu Keriso,” Tusi Lesona a le Faiaoga o le Tusi a Mamona (2024)
“Alema 31:12–38,” Tusi Lesona a le Faiaoga o le Tusi a Mamona
Alema 31:12–38
O La Tatou Tapuaiga i le Tama Faalelagi ma Iesu Keriso
O le tapuai atu i le Tama Faalelagi ma Iesu Keriso ua faamoemoe e faalatalata atili atu ai i tatou ia i Laua. Ae faapefea pe a galo iā i tatou le māfuaaga moni mo le tapuai? O sa Sorama, o e sa auai i le Ekalesia moni a le Atua, sa amata ona talitonu i aoaoga sese. O a latou ituaiga o tapuaiga piopio na tosoesea o latou loto mai le Atua ma taitai atu ai i latou e faamasino ma le amioletonu ma agaleaga atu i isi. O lenei lesona e mafai ona fesoasoani ia te oe e faaleleia ai lou sootaga ma le Tama Faalelagi ma Iesu Keriso a o e iloiloina pe faapefea e le faamaualuga ma le lotomaualalo ona aafia ai lou sootaga ma i Laua faapea ma isi.
Faatusatusaina ma le faaeseeseina. I tusitusiga paia, o se aoaoga faavae po o se mataupu faavae e masani ona faamanino pe a faatusatusa pe faaeseese ma se isi mea. O le maitauina o mea e tutusa ma mea e eseese ai i le va o aoaoga, tagata, po o mea e tutupu e mafai ona aumaia ai upumoni o le talalelei i se taulaiga e sili atu le manino. Taumafai e faamamafa atu faataitaiga pe a faaaofia ai e tusitala musuia ia faatusatusaga faapena.
Sauniuniga a le tagata aoga: I sauniuniga e suesue le Alema 31, valaaulia tagata aoga e tatalo, ma taulai atu i manaoga o isi.
Gaoioiga e Ono Mafai Ona Aoao Ai
Iloiloina o aafiaga o la tatou tapuaiga
Ina ia fesoasoani i tagata aoga e mafaufau e uiga i le tapuai o se auala e faaali atu ai le alofa ma le tuuto i le Atua, mafaufau e faaali atu ata nei po o isi e te filifilia. Valaaulia tagata aoga e mafaufau loloto pe na faapefea e le tapuai atu ai i nei auala ona aafia ai la latou sootaga ma le Atua.
E mafai ona talosagaina tagata aoga e mafaufau loloto i fesili nei ma tusi so o se manatu ia latou api talaaga mo suesuega e uiga i le faaleleia atili o a latou sootaga taitoatasi ma le Atua e ala i le tapuai. Aua le valaauliaina tagata aoga e faasoa mai a latou tali.
-
E faafia ona e lagona o loo e taumafai ma le faamaoni e faaali atu lou alofa i le Atua e ala i le tapuai?
-
O ā ni auala, pe afai e iai, e te manatu ua tau lē faamaoni ai lau tapuaiga pe taula’i atu ai i mea sesē?
Ua tapuai sa Sorama i le Rameutoma
Ina ua iloa e Alema ma ona uso ua faapiopio e sa Sorama ala o le Alii, sa latou malaga atu i Anetionuma. O iina na latou maua ai sa Sorama o tapuai i se ala latou te lei vaai lava i ai (tagai Alema 31:12).
Mafaufau e faaali atu le ata lenei ma valaaulia tagata aoga e faamatala mai mea sa faia e tagata. E mafai e tagata aoga ona faitau le Alema 31:21 e iloa ai le igoa o le tulaga lea sa latou tatalo ai.
Fesoasoani i tagata aoga e atiina ae le tomai o le faatusatusaina ma le faaeseeseina. E mafai ona vaevaeina tagata aoga i ni vaega ma valaaulia e faia ni faatusatusaga i le va o tatalo a sa Sorama ma le tatalo na faia e Alema. E mafai ona e fatuina se siata i luga o le laupapa e pei o lea ma valaaulia tagata aoga e tusi mea latou te maua i le gasologa o le lesona atoa. Fesoasoani ia i latou e faia faatusatusaga i le va (1) o le taulaiga o tatalo, (2) mea na fai atu ai, ma le (3) aisea.
|
O le tatalo a sa Sorama |
O le tatalo a Alema |
|---|---|
Faitau le Alema 31:13–23, ma faatumu le koluma agavale o le siata i mea e tulaga ese ia te oe e uiga i le ala na tapuai ai sa Sorama. E mafai foi ona outou matamata i le vitio “Ua Talai Atu e Alema ma Ona Uso le Afioga a le Atua i sa Sorama” mai le faailo taimi 0:22 i le 3:58, o loo maua i le ChurchofJesusChrist.org.
-
O le a se mea na e maitauina e uiga i le ala na tapuai ai sa Sorama? O le a sou manatu na faapefea ona aafia la latou sootaga ma le Atua i lenei mea?
Ua tatalo Alema mo sa Sorama
O le vaaia ai o le piopio o sa Sorama, sa tatalo ai Alema mo i latou.
Faitau le Alema 31:24–38, vaavaai mo le taulaiga, o lagona, ma manaoga o Alema i lana tatalo. Faatumu le koluma taumatau o le siata e fua i mea e te maua. E mafai ona fesoasoani lenei mea ia te oe e faatusatusa ai le tatalo a Alema ma le tatalo a sa Sorama.
E mafai ona outou matamata i le vitio “Ua Talai Atu e Alema ma Ona Uso le Afioga a le Atua i sa Sorama” mai le faailo taimi 4:03 i le 5:55, o loo maua i le ChurchofJesusChrist.org. I le vaega lenei o le vitio, o le a e faalogo ai i le tatalo a Alema a o e vaaia taumafaiga a Alema ma ana soa e aoao atu sa Sorama.
Mafaufau e valaaulia tagata aoga e faaaoga le siata e faasoa mai ai mea ua latou aoaoina e ala i le faatusatusaina o tatalo a Alema ma sa Sorama.
E mafai ona e saunia tagata aoga e aoao mai le saunoaga lenei a Peresitene Uchtdorf e ala i le fai atu o fesili e pei o le “Na faapefea ona aafia sa Sorama i le faamaualuga?” ma le “O le a se mea na ese ai uiga faaalia o Alema?”
Sa aoao mai Peresitene Dieter F. Uchtdorf, o le sa avea ma uso o le Au Peresitene Sili:
Pe a faatumulia o tatou loto i le faamaualuga, ua tatou faia se agasala matuia, aua ua tatou solia poloaiga sili e lua. Nai lo le tapuai atu i le Atua ma alofa atu i o tatou tuaoi, ua tatou faailoa le mea moni lava lo o tatou tapuai ma le alofa i ai —o le foliga lea tatou te vaaia i le faata. O le faamaualuga o le agasala sili lea o le faasausili. Mo le toatele, o se Rameutoma patino lava, o se tulaga paia lea e faamaonia mai ai le lotoleaga, faaloloto, ma le lotofefete i mea le aoga. (Dieter F. Uchtdorf, “O Le Faamaualuga ma le Perisitua,” Liahona, Nov. 2010, 56)
Faitau le Alema 32:1–5, ma vaavaai pe na faapefea ona taulimaina e sa Sorama ia tagata.
-
Na faapefea ona taulima e sa Sorama isi?
-
O a ni lagona o Alema e uiga i isi ma le taulimaina o i latou? (tagai Alema 31:1–2, 24–25, 34–35).
-
O a mataupu faavae e mafai ona tatou aoaoina e uiga i aafiaga o le faamaualuga po o le lotomaualalo?
O se tasi o mataupu faavae e mafai ona tatou aoaoina e faapea o lo tatou faamaualuga po o le lotomaualalo e aafia ai lo tatou sootaga ma le Atua ma isi.
-
O le a sou manatu e mafai faapefea e lo tatou faamaualuga po o le lotomaualalo ona aafia le ala tatou te tapuai atu ai i le Tama Faalelagi ma Iesu Keriso?
-
O le a sou manatu e faapefea e lo tatou faamaualuga po o le lotomaualalo ona aafia ai le auala tatou te taulimaina ai isi?
-
O le a se mea ua e aoao mai ia Alema e uiga i le lotomaualalo? O le a se mea na aoao atu e Iesu Keriso ia te oe e uiga i le avea ai ma se e lotomaualalo?
Filifili ni auala se lua pe tolu e mafai ona tatou faaalia ai le lotomaualalo i le ala tatou te tapuai atu ai i le Atua. Tusi mea taitasi i lau api talaaga mo suesuega.
Valaaulia tagata aoga e mafaufau loloto i mea nei. E ono mafai ona e uunaia i latou e tusi ia latou api talaaga mo suesuega pe faaopoopo se faamatalaga i a latou tusitusiga paia faatekinolosi.
Faaalu sina taimi e iloilo ai pe faapefea ona e tapuai patino i le Tama Faalelagi ma Iesu Keriso ma le ala e uunaia ai e lau tapuaiga lou sootaga ma i Laua. Ma le isi, mafaufau pe faapefea e le faamaualuga ma le lotomaualalo ona aafia ai le ala e te taulimaina ai isi. Filifili pe i ai ni suiga e te manao e fai.
Mafaufau e faasoa atu se molimau pe na faapefea e lau tapuaiga ona aafia ai le ala e te lagona ai e uiga i le Atua ma le auala e te taulimaina ai isi.