“Alma 34:1–17: ‘Shlyerja e Pafundme dhe e Përjetshme e Jezu Krishtit’”, Manual i Mësuesit për Librin e Mormonit (2024)
“Alma 34:1–17”, Manual i Mësuesit për Librin e Mormonit
Alma 34:1–17
Shlyerja e Pafundme dhe e Përjetshme e Jezu Krishtit
A e ke menduar ndonjëherë se si do të ishte jeta jote pa Jezu Krishtin dhe Shlyerjen e Tij? Amuleku u dha mësim zoramitëve se të gjithë njerëzit janë të ngurtësuar, të rënë dhe të humbur pa flijimin e pafundmë dhe të përjetshëm të Birit të Perëndisë. Ky mësim ka për qëllim të të ndihmojë ta kuptosh se si Jezu Krishti mund të të bekojë nëpërmjet flijimit të Tij shlyes të pafundmë dhe të përjetshëm.
Vendosni pritshmëri të larta. Kur nxënësit e dinë se ju keni pritshmëri të larta për ata si nxënës, ata përgjithësisht do të përpiqen që t’i arrijnë ato pritshmëri. Disa nxënës mund të shpërqendrohen ndonjëherë nga një bashkëmoshatar ose një pajisje elektronike. Jepni vazhdimisht ndreqje të butë dhe me dashuri kur ndodhin këto sjellje ose sjellje të tjera të çrregullta. Bërja e kësaj mund ta ndihmojë të gjithë klasën t’i kuptojë pritshmëritë tuaja dhe të ofrojë më shumë mundësi që nxënësit të kenë përvoja kuptimplota.
Përgatitja e nxënësve: Ftojini nxënësit t’i gjejnë dhe studiojnë shkrimet e shenjta që i ndihmojnë ata ta kuptojnë më mirë Shlyerjen e Jezu Krishtit. Udhëzuesi për Shkrimet e Shenjta mund të jetë një burim i dobishëm.
Veprimtari të Mundshme të të Mësuarit
Si do të ishte jeta ndryshe?
Merreni parasysh ta paraqitni pyetjen e paplotë vijuese. Ftojini nxënësit të tregojnë shembuj të mënyrës se si jeta e tyre mund të ishte ndryshe pa disa prej njerëzve ose gjërave mbi të cilat mbështeten më shumë. Për t’i ndihmuar nxënësit të mendojnë për shembuj, sillni disa sende ose figura artikujsh që i çmoni.
Si do të ishte jeta ndryshe pa …?
Mendo për disa mënyra se si mund t’i përgjigjesh kësaj pyetjeje lidhur me njerëzit ose gjërat ku ti mbështetesh. Për shembull, ti mund të mendosh rreth mënyrës se si jeta jote do të ishte ndryshe pa një person të veçantë, një pjesë të teknologjisë ose mjeteve që ti i përdor shpesh ose një veprimtari që ti e pëlqen.
Pasi nxënësit t’i tregojnë disa nga përgjigjet e tyre, merreni parasysh ta paraqitni figurën vijuese dhe ta përshtatni thënien e mëparshme që të thotë: Si do të ishte jeta ndryshe pa Jezu Krishtin dhe Shlyerjen e Tij?
Ftojini nxënësit të reflektojnë mbi mënyrën se si ata do t’i përgjigjeshin kësaj pyetjeje dhe të bëjnë një listë në ditarët e tyre të studimit të mënyrave se si jeta e tyre do të ishte ndryshe pa Jezu Krishtin dhe Shlyerjen e Tij. Ata do të kenë mundësi që t’i japin përgjigjet e tyre për këtë pyetje më vonë në mësim.
Amuleku u dëshmon zoramitëve rreth Jezu Krishtit
Mund të të kujtohet se Alma dhe Amuleku predikuan mes zoramitëve, që besonin se “nuk do të ketë Krisht” (Alma 31:16). Pasi Alma i përfundoi mesazhet e tij të shënuara tek Alma 32–33, Amuleku dha dëshminë e tij për Shpëtimtarin.
Lexo tek Alma 34:1–10, duke kërkuar atë që Amuleku tregoi rreth Jezu Krishtit dhe Shlyerjes së Tij.
Alma 34:9–10 është një fragment i zotërimit doktrinor. Merre parasysh t’i shenjosh fragmentet e zotërimit doktrinor në mënyrë të dallueshme që të mund t’i gjesh me lehtësi. Do të kesh mundësi në mësimin e ardhshëm që ta ushtrosh zbatimin e doktrinës që jepet mësim në këtë fragment, për një pyetje ose situatë.
-
Cilat fjalë ose fraza rreth Jezu Krishtit dhe Shlyerjes së Tij t’u dukën veçanërisht kuptimplota? Përse?
-
Çfarë mësove nga këto vargje rreth arsyes përse ne kemi nevojë që Jezu Krishti të shlyejë për ne?
-
Si do t’i përmblidhje mësimet e Amulekut tek Alma 34:8–10 si një pohim të vërtete?
Mund të kesh përcaktuar një të vërtetë të ngjashme me sa vijon: Pa Shlyerjen e pafundme dhe të përjetshme të Jezu Krishtit, i gjithë njerëzimi do të ishte i humbur përgjithmonë.
-
Pse të gjithë njerëzit “do të mbaroj[n]ë patjetër” ose do të humbasin përgjithmonë pa Jezu Krishtin dhe Shlyerjen e Tij?
Merreni parasysh t’u kërkoni nxënësve të mendojnë për disa nga mënyrat se si ata do të humbisnin vetë pa Jezu Krishtin dhe Shlyerjen e Tij. Një mënyrë për ta bërë këtë do të ishte t’i ftoni ata të studiojnë te 2 Nefi 9:6–12, duke kërkuar mësimet që e përshkruajnë arsyen përse kemi nevojë për një Shpëtimtar.
I pafundmë dhe i përjetshëm
Merre parasysh t’i shenjosh fjalët “i pafundmë dhe i përjetshëm” në fund të vargut 10 dhe ta kopjosh diagramin vijues në ditarin tënd të studimit:
Merreni parasysh ta vizatoni këtë diagram në tabelë që nxënësit ta kopjojnë.
-
Çfarë mendon se do të thotë që Shlyerja e Jezu Krishtit është e pafundme dhe e përjetshme?
Presidenti Rasëll M. Nelson tregoi pikëpamjet vijuese:
“Shlyerja e Tij është e pafundme – pa mbarim. Ishte gjithashtu e pafundme në atë që i gjithë njerëzimi do të shpëtohej nga një vdekje pa mbarim. Ajo ishte e pafundme në kuptimin e vuajtjes së Tij të pamasë. … Ishte e pafundme në shtrirje – duhej të bëhej njëherësh për të gjithë. Dhe mëshira e Shlyerjes shtrihet jo vetëm te një numër i pafundmë njerëzish, por gjithashtu te një numër i pafundmë botësh të krijuara prej Tij. Ishte e pafundme përtej çfarëdo shkalle njerëzore matjeje apo kuptimi njerëzor.” (Russell M. Nelson, “The Atonement”, Ensign, nëntor 1996, f. 35)
-
Çfarë të ndihmoi kjo thënie të mësosh ose ndiesh rreth Jezu Krishtit dhe flijimit të Tij shlyes?
Si lidhet kjo me ty?
Si pjesë e shpjegimit vijues, mund të ishte e dobishme ta tregoni thënien nga Plaku Majkëll Xhon U. Teh, i Të Shtatëdhjetëve, që gjendet te pjesa “Komente dhe Informacion për Rrethanat”.
Ndërkohë që Shpëtimtari mund të bekojë një numër të pafundmë njerëzish nëpërmjet Shlyerjes së Tij, Ai mund të të bekojë edhe ty vetë. Merre parasysh ta përditësosh diagramin në ditarin tënd të studimit që të duket si në vijim:
Veprimtaria vijuese mund t’i ndihmojë nxënësit ta kuptojnë më mirë se si Shpëtimtari mund t’i bekojë ata vetë për shkak të Shlyerjes së Tij. Paraqitini ose shtypini burimet vijuese dhe jepuni nxënësve kohë që t’i studiojnë vetë ose në grupe. Ftojini nxënësit t’i përcaktojnë fjalët ose frazat nga këto burime që e përshkruajnë se si Jezu Krishti mund t’i bekojë ata vetë nëpërmjet Shlyerjes së Tij.
Përveç shkrimeve të shenjta dhe thënieve në listë, nxënësit mund të gjejnë shkrime të shenjta ose thënie të tjera nga udhëheqësit e Kishës.
Presidenti Ted R. Kelister, ish‑President i Përgjithshëm i Shkollës të së Dielës, dha mësim:
“Me raste, kam takuar shenjtorë të mirë që kanë pasur vështirësi për ta falur veten, të cilët në mënyrë të pafajshme, por të gabuar, kanë vendosur kufizime në fuqitë shëlbuese të Shpëtimtarit. Padashur, ata e kanë kthyer një Shlyerje të pafundme në një Shlyerje të fundme, që në njëfarë mënyre nuk e prek mëkatin ose dobësinë e tyre të veçantë. Por ajo është një Shlyerje e pafundme sepse përfshin dhe përmban çdo mëkat e dobësi, si dhe çdo keqtrajtim apo dhembje të shkaktuar nga të tjerët.” (Ted R. Kelister, “Shlyerja e Jezu Krishtit”, Ensign ose Liahona, maj 2019, f. 85–86)
Diskutojeni me nxënësit atë që ata mësuan dhe ndien nga studimet e tyre. Ftojini ata t’i tregojnë fjalët ose frazat e veçanta që gjetën, që e përshkruajnë mënyrën se si Jezu Krishti mund t’i bekojë ata vetë nëpërmjet Shlyerjes së Tij. Për shembull, nxënësit mund të vënë në dukje fraza si “ai do t’u sjellë shpëtim të gjithë atyre që do të besojnë në emrin e tij” (Alma 34:15); “Perëndi[a] … përgatit një udhë për udhëdaljen nga … vdekja dhe ferri” (2 Nefi 9:10) ose “Unë, Zoti nuk i kujtoj më ato [mëkatet për të cilat jeni penduar]” (Doktrina e Besëlidhje 58:42).
Pas këtij diskutimi, drejtojini nxënësit te lista që krijuan në ditarët e tyre të studimit rreth mënyrës se si do të ishte jeta e tyre pa Jezu Krishtin dhe Shlyerjen e Tij. Nxënësit mund t’i përditësojnë listat e tyre në bazë të asaj që kanë mësuar. Ftojini nxënësit t’ia tregojnë listat e tyre një partneri ose të gjithë klasës. Kërkojuni nxënësve të tregojnë diçka që ata e shtuan në listën e tyre për shkak të asaj që mësuan sot. Ata gjithashtu mund të tregojnë diçka që e kishin përfshirë tashmë në listën e tyre, që ka më shumë domethënie për ta për shkak të asaj që kanë mësuar, më pas të shpjegojnë arsyen.
Dëshmoni për të vërtetat që keni diskutuar. Nxitini nxënësit të veprojnë sipas çdo nxitjeje që kanë marrë gjatë mësimit.