“Alma 34:17–41: ‘Kjo Jetë Është Koha për Njerëzit që të Përgatiten të Takohen me Perëndinë’”, Manual i Mësuesit për Librin e Mormonit (2024)
“Alma 34:17–41”, Manual i Mësuesit për Librin e Mormonit
Alma 34:17–41
Kjo Jetë Është Koha për Njerëzit që të Përgatiten të Takohen me Perëndinë
A e ke pyetur ndonjëherë veten se si do të jetë të takohesh me Atin Qiellor pas kësaj jete? Amuleku u kujtoi zoramitëve se “kjo jetë është koha … që të përgatiten të takohen me Perëndinë” (Alma 34:32) dhe iu lut atyre të mos e shtynin ditën e pendimit të tyre. Ky mësim ka për qëllim të të ndihmojë në përpjekjet e tua që të përgatitesh të takohesh me Perëndinë.
Ndihmojini nxënësit të shohin se si parimet e ungjillit i drejtojnë ata te Jezu Krishti. Kur jepni mësim doktrinën dhe parimet e ungjillit, lidhini këto të vërteta me Atin Qiellor dhe Jezu Krishtin. Jepni shembuj të mënyrës se si të jetuarit e parimeve të ungjillit mund t’i ndihmojë nxënësit të kenë të drejtën ta përdorin fuqinë, mëshirën dhe hirin e Shpëtimtarit. Nxitini ata të veprojnë me besim dhe të zgjedhin t’i jetojnë këto të vërteta.
Përgatitja e nxënësve: Ftojini nxënësit të lexojnë tek Alma 34:32 dhe të mendojnë për mënyrat se si ata mund ta ndjekin këshillën në varg. Ata mund t’i shkruajnë disa nga mënyrat se si po përgatiten për t’u kthyer në praninë e Perëndisë dhe ndryshimet që mund të bëjnë që do t’i ndihmonin të jenë të përgatitur më mirë.
Veprimtari të Mundshme të të Mësuarit
Rëndësia e përgatitjes
Mendo për diçka për të cilën të është dashur të përgatitesh në jetën tënde, si një provim, një recital ose një ngjarje sportive.
Merreni parasysh t’i ftoni nxënësit t’i diskutojnë pyetjet vijuese me një partner ose një grup të vogël.
-
Cilat ishin disa strategji që ti i përdore për të të ndihmuar të jesh i përgatitur?
-
Cilat ishin disa gjëra që e bënë ose mund ta bëjnë përgatitjen të vështirë?
Kujtohu se Alma dhe Amuleku i predikuan një grupi zoramitësh që ishin dëbuar nga sinagogat e tyre për shkak të varfërisë së tyre. Këta zoramitë nuk kishin besuar më parë te Jezu Krishti (shih tek Alma 31:16), ndaj Alma dhe Amuleku i këshilluan ata të bënin vend në zemrat e tyre që të rritej një dëshmi për Shpëtimtarin (shih tek Alma 32:27–28; 34:4–6). Ndërsa u jepte mësim këtyre njerëzve, Amuleku tregoi diçka për të cilën duhet të përgatitemi të gjithë.
Lexo tek Alma 34:32, duke kërkuar atë që Amuleku dha mësim.
Nëse dëshironi, mund ta shkruani thënien vijuese të theksuar me të zezë në tabelë. Nxitini nxënësit t’i shenjojnë fjalët e kësaj të vërtete te vargu 32.
Nga mësimet e Amulekut, ne mësojmë se kjo jetë është koha që ne të përgatitemi për t’u takuar me Perëndinë.
-
Cilat janë disa qëndrime dhe sjellje që ti do t’i prisje nga dikush që po përgatitet për t’u takuar me Perëndinë?
Jepuni nxënësve kohë ta vlerësojnë veten duke i marrë parasysh idetë vijuese. Nuk është qëllimi që nxënësit t’i tregojnë mendimet e tyre.
Gjeje një çast për të përsiatur për ndjenjat e tua rreth kthimit në praninë e Perëndisë. Merre parasysh nëse po përpiqesh të kthehesh denjësisht në praninë e Tij dhe çfarë mund të të shpërqendrojë nga ai synim. Ndërsa vazhdon të studiosh, mendo për mënyrat se si mund t’i zbatosh mësimet tek Alma 34 për të të ndihmuar të përgatitesh më mirë për t’u takuar me Perëndinë.
Mënyrat se si ne mund të përgatitemi për t’u takuar me Perëndinë
Shumë nga mësimet e Amulekut tek Alma 34 na ndihmojnë të kuptojmë se si mund të përgatitemi tani për t’u takuar me Perëndinë.
Ftojini nxënësit t’i studiojnë vargjet vijuese, duke kërkuar mësimet që mund të na ndihmojnë të përgatitemi për t’u takuar me Perëndinë. Ndajini nxënësit në grupe të vogla dhe caktojini secilit grup vargje të caktuara për t’i studiuar së bashku. Për shembull, një grup mund të studiojë vargjet 17–27, një tjetër mund të studiojë 28–34 dhe një tjetër mund të studiojë 37–41.
Diskutoni me nxënësit se çfarë mësuan ndërsa i studiuan këto vargje. Pyetjet vijuese mund të përdoren si pjesë e këtij diskutimi.
-
Çfarë dha mësim Amuleku në këto vargje që mund të të ndihmojnë të përgatitesh për t’u takuar me Perëndinë?
-
Si mund të na ndihmojë zbatimi i këtyre mësimeve të bëhemi më të përgatitur për t’u kthyer denjësisht në praninë e Perëndisë?
-
Çfarë mësove rreth karakterit dhe dëshirave të Atit Qiellor dhe Jezu Krishtit nga vargjet që studiove?
Shembujt e përgjigjeve që nxënësit mund të japin për pyetjen e mëparshme përfshijnë se Perëndia është i arritshëm, pavarësisht se ku mund të jemi, apo për çfarë do të donim ta pyesnim (shih te vargjet 17–27). Ata mund të vënë gjithashtu në dukje se sa shpejt Shpëtimtari do të na bekojë kur ne pendohemi (shih vargun 31).
Mos e shty pendimin tënd
Referoju thënies së Amulekut te vargu 33: “Mos e shtyni ditën e pendimit tuaj deri në fund”. Merre parasysh ta shenjosh këtë frazë në shkrimet e tua të shenjta.
-
Përse mund të jetë tunduese për disa njerëz që ta shtyjnë pendimin?
Lexo tek Alma 34:33–35, duke kërkuar arsyet përse Amuleku na nxiti që të mos e shtyjmë pendimin tonë.
Mund të jetë e dobishme të ftoni nxënës që t’i përcaktojnë pyetjet ose shqetësimet që dikush mund të ketë pasi i lexon këto vargje. Merreni parasysh që t’i renditni përgjigjet e nxënësve në tabelë. Ndërsa nxënësit i studiojnë burimet vijuese, ata mund t’i përcaktojnë mësimet që ndihmojnë të zgjidhen ato pyetje ose shqetësime.
Na është mësuar se pendimi mund të ndodhë në botën e shpirtrave (shih te Doktrina e Besëlidhje 138:31, 33, 58). Por profetët e shkrimeve të shenjta dhe të ditëve të mëvonshme e kanë theksuar se sa e rëndësishme është që ne të pendohemi në vdekshmëri. Plaku Melvin J. Ballard [1873–1939], i Kuorumit të Dymbëdhjetë Apostujve, dha këtë udhërrëfim:
“Është shumë më e lehtë të mposhtësh [mëkatin] dhe t’i shërbesh Zotit kur si mishi dhe shpirti janë të bashkuar në një. Kjo është koha kur njerëzit janë më të përpunueshëm dhe të prekshëm. … Kjo jetë është koha për t’u penduar.” (Melvin J. Ballard: Crusader for Righteousness (1966), f. 212–213; cituar te Dallin H. Ouks, “Të Pastruar nëpërmjet Pendimit”, Ensign ose Liahona, maj 2019, f. 94)
-
Çfarë të ndihmojnë të kuptosh vargjet 33–35 dhe kjo thënie rreth arsyes përse ne nuk duhet ta shtyjmë pendimin tonë?
Pendimi është një pjesë thelbësore e përgatitjes për t’u kthyer në praninë e Perëndisë. Kujtohu që Zoti ua jep me dashuri mëshirën atyre që përpiqen të pendohen, edhe kur ata e kanë të vështirë t’i mposhtin mëkate të caktuara.
Plaku Nil L. Andersen, i Kuorumit të Dymbëdhjetë Apostujve, dha mësim:
“Nganjëherë [gjatë] pendimi[t] tonë, në përpjekjen e përditshme që të bëhemi më të ngjashëm me Krishtin, e gjejmë veten duke u përpjekur rishtas me të njëjtat pengesa. … Mos e humbni kurajën. Nëse po përpiqeni e po punoni për t’u penduar, jeni në procesin e pendimit.” (Nil L. Andersen, “Pendohuni … Që të Mund t’Ju Shëroj”, Ensign ose Liahona, nëntor 2009, f. 41)
Përpara se të bëni pyetjet vijuese, ftojini nxënësit të përfytyrojnë sikur kanë një shok që po e shmang pendimin për arsye të ndryshme, të tilla si sikleti ose mungesa e dëshirës për të ndryshuar.
Mund të jetë e dobishme për nxënësit t’i organizojnë mendimet e tyre duke iu përgjigjur pyetjeve në ditarët e tyre të studimit përpara se t’i diskutojnë këto pyetje si klasë.
-
Çfarë mund të tregosh nga mësimet e Amulekut tek Alma 34:30–38 që mund ta ndihmojnë dikë që tundohet të presë kohë më vonë në jetë për t’u penduar dhe ndryshuar?
-
Përse mendon se pendimi ia vlen, pavarësisht nga arsyet që ky person mund të ketë për të mos e bërë atë?
-
Çfarë di ti rreth Atit Qiellor dhe Jezu Krishtit që mund ta nxitë këtë person të pendohet shpejt dhe shpesh?
Dëshmoni për të vërtetat që i keni diskutuar sot dhe për ndihmën që Shpëtimtari mund t’u japë nxënësve ndërsa përpiqen të jenë më të përgatitur për t’u takuar me Perëndinë.
Reflekto mbi atë që ke mësuar ose ndier sot rreth përgatitjes për t’u takuar me Perëndinë dhe për të mos e shtyrë pendimin. Mendo për veprimet që dëshiron të ndërmarrësh për shkak të asaj që ke studiuar sot. Shënoji mendimet dhe mbresat e tua në ditarin tënd të studimit.