Alma 47–48

Amalickiah ug Lehonti

Nakadungog ka na ba og usa ka tawo nga miingon nga, “Kausa lang dili ra makasakit,” “Gamay ra kaayo na,” o “Dili man kaayo na ngil-ad”? Kon kita mohukom sa pagtugyan ngadto sa mga pagtental ni Satanas bisan og ginagmay ra, kita mohatag kaniya og gahom ibabaw kanato. Sa Alma 47, atong nahibaloan ang mahitungod sa usa ka tawo nga ginganlan og Lehonti kinsa mitugyan lang og gamay ngadto sa iyang kaaway ug nakakaplag sa iyang kaugalingon sa makuyaw kaayo ug gani makamatay nga mga kahimtang. Kini nga leksiyon makatabang nimo sa pagbatok sa mga pagsulay ni Satanas sa pag-angkon og gahom ibabaw kanimo.

Tabangi ang mga estudyante nga mahimong aktibo sa proseso sa pagkat-on. Samtang magtudlo ka, pangita og mga paagi aron matabangan ang mga estudyante nga mahimong aktibo sa proseso sa pagkat-on. Pananglitan, pagpangutana og mga pangutana nga nagkinahanglan og rason ang tubag nga makadasig sa mahunahunaon nga mga tubag, ug paghimo og mga kalihokan nga makadasig sa pag-apil, sama sa pagdrowing o pagsulat.

Pagpangandam sa estudyante: Dapita ang mga estudyante sa pagbasa sa 2 Nephi 28:7–8, 21–22 ug sa paghunahuna og mga ehemplo kon giunsa paggamit ni Satanas kini nga mga taktika sa atong panahon.

Mga Posibleng Kalihokan sa Pagkat-on

Mga Paon

Sa dili pa ipakigbahin ang mosunod nga pagpasabot, ikonsiderar ang pagpakita og hulagway sa bingwit sa pagpangisda nga adunay paon ug hangyoa ang mga estudyante sa pagpakigbahin unsay ilang nahibaloan mahitungod sa katuyoan sa paon sa pagpangisda.

Ang fishing lure usa ka matang sa paon nga gigamit sa pagdakop og isda. Ang paon makakuha sa atensiyon sa isda ug makadani sa isda sa pagsulay sa pagpaak niini. Unya inig makaw-itan na ang isda, m adakpan na kini.

• Unsa ang pipila sa mga paon nga gigamit ni Satanas sa pagdani kanato sa pagpakasala?

  Mahimong ilhon sa mga estudyante ang mga paagi nga si Satanas mosulay sa paghimo sa iyang mga tentasyon nga daw madanihon, sama sa paghatag og temporaryo nga kalipay o pagkasikat o paghimo kanato nga mobati nga walay kakuyaw sa pagpakasala.

• Ngano nga gusto nimo nga pakigbatokan kini nga mga paon?

• Unsay makapalisod sa pagbatok sa tentasyon?

Mahimong imong mahinumdoman nga si Amalickiah ug usa ka grupo sa mga Nephite nga mibiya mitinguha sa pagpukan sa kagawasan sa mga Nephite ug sa paglaglag sa simbahan sa Dios (tan-awa sa Alma 46:10). Human mapugngan ni Moroni ug sa ubang mga Nephite, si Amalickiah miikyas ngadto sa mga Lamanite ug misulay sa pagkutaw kanila sa pagkasuko batok sa mga Nephite (tan-awa sa Alma 46:29–33; 47:1).

Karon makakat-on ka mahitungod sa dugang nga mga pagsulay ni Amalickiah nga makaangkon og gahom. Daghan sa iyang mga taktika ang susama sa mga taktika nga gigamit ni Satanas batok kanato karon. Samtang magtuon ka, pangitaa ang mga kamatuoran nga makatabang nimo sa paglikay sa mga paon nga gigamit ni Satanas sa iyang mga pagsulay sa pagdaot kanimo.

Si Amalickiah nagtinguha nga mahimong hari sa mga Lamanite

Mahimong makatabang ang pagpadangop sa mga estudyante ngadto sa mga lakang sa pagpahisama sa mga kasulatan nga ilang nakat-onan diha sa “Alma 43, 48–50” nga leksiyon. Mahimong magpraktis ang mga estudyante sa paggamit niini nga mga lakang samtang magtuon sila niini nga asoy.

Basaha ang Alma 47:1–8, ug pangitaa kon unsa ang mga plano ni Amalickiah samtang siya miadto taliwala sa mga Lamanite.

• Unsa ang gibuhat ni Amalickiah aron makaangkon og impluwensiya ug gahom taliwala sa mga Lamanite?

• Sa unsang paagi nga ang mga tumong ni Amalickiah susama sa kang Satanas? (tan-awa sa 2 Nephi 26:22).

• Sa unsang paagi ang mga tumong sa Langitnong Amahan alang kanimo lahi kay sa kang Satanas? (tan-awa sa Moises 1:39). Ngano nga importante kini nga hinumdoman?

Ang grupo sa mga Lamanite kinsa midumili sa pagpakig-away batok sa mga Nephite gipangulohan sa usa ka tawo nga ginganlan og Lehonti.

Basaha ang Alma 47:9–12, mangita kon unsay gusto ni Amalickiah nga buhaton ni Lehonti.

Ikonsiderar ang pagdrowing sa mosunod nga dayagram diha sa pisara aron sa pagtabang sa mga estudyante nga mahanduraw ang sitwasyon nga gihulagway niini nga mga bersikulo.

Human mabasa ang bersikulo 11, mahimo ka nga mangutana, “Ngano kaha nga dili man maalamon nga molugsong sa bungtod aron makigkita kang Amalickiah?” Mahimong mobasa dayon ang mga estudyante sa bersikulo 12 ug mangita kon unsay gibuhat ni Amalickiah nga lahi sa ikaupat nga higayon nga siya misulay sa pagdani ni Lehonti sa pagpakigkita kaniya.

Sa paghulagway sa nagkalainlaing paagi ni Amalickiah, mahimo kang magbutang og mga pana [arrow] sa dayagram diha sa pisara aron mapakita nga si Amalickiah nagpaduol sa tumoy sa bungtod, ingon man usab sa iyang hangyo nga si Lehonti manaog og gamay.

• Unsa ang pipila ka mga rason nga si Lehonti tingali nakahunahuna sa pagdawat sa kataposang pagdapit ni Amalickiah diha sa bersikulo 12?

• Unsa kaha ang imong isulti kang Lehonti kon ikaw anaa pa sa iyang kasundalohan ug siya nangayo kanimo og tambag kon makigkita ba kang Amalickiah? Ngano man?

Basaha ang Alma 47:13–19, mangita kon giunsa pagtubag ni Lehonti ang dugang nga mga paningkamot gikan ni Amalickiah ug unsay nahitabo isip resulta.

• Sa unsang mga paagi nga ang mga taktika ni Amalickiah susama sa mga taktika nga gigamit ni Satanas sa paglaglag kanato? (Kon gikinahanglan, tan-awa sa 2 Nephi 28:7–8, 21–22.)

Agig tubag sa miaging pangutana, mahimong hisgotan sa mga estudyante nga si Satanas mapaningkamoton, malinglahon, malipoton, ug walay kaluoy. Sama ni Amalickiah, si Satanas mahimong magtinguha sa pagdani kanato nga anam-anam nga ipaubos ang atong mga sumbanan ug ibutang ang atong mga kaugalingon sa mga kahimtang nga makapahimo kanato nga huyang sa iyang mga pag-atake. Ikonsiderar ang pagdapit sa mga estudyante sa pagmarka sa hugpong sa mga pulong nga “molugsong” bisan asa kini makita sa Alma 47:10–13. Unsa ang kamatuoran nga imong nakat-onan gikan niini nga asoy mahitungod sa kapeligro sa pagpadaog sa mga pagtental ni Satanas, bisan og sa ginagmay lang?

Ang imong pagpakig-away batok kang Satanas

Usa ka kamatuoran nga atong makat-onan gikan niini nga asoy mao nga kon kita magpadala sa mga pagtental ni Satanas bisan sa ginagmay lang, kita mohatag kaniya og mas dakong impluwensiya aron sa pagpahisalaag kanato.

Hunahunaa kon giunsa nimo pagkakita niini nga kamatuoran nga gipakita sa imong kinabuhi o sa mga kinabuhi sa uban. Ang mosunod nga kalihokan makatabang kanimo sa pag-ila sa pipila ka mga paagi nga si Satanas tingali mosulay sa paghimo kanimo nga huyang sa iyang mga tentasyon ug sa mga paagi nga ang Manluluwas makatabang sa pagpanalipod kanimo batok niadto nga mga tentasyon.

Ikonsiderar ang pagbuhat niini nga kalihokan diha sa pisara isip usa ka klase. Sa laing paagi, mahimo nimong ipakita ang mga instruksiyon alang sa kalihokan ug ibutang ang mga estudyante sa gagmay nga mga grupo aron magtinabangay sa pagbuhat niini. Mahimo dayon nga ang matag grupo mopakigbahin sa ilang hulagway ngadto sa klase.

Aron maandam ang mga estudyante alang niini nga kalihokan, mahimo nimong gamiton ang mga pamahayag sa bidyo ni Sister Elaine S. Dalton ug ni Presidente Henry B. Eyring diha sa seksiyon sa “Komentaryo ug Background nga Impormasyon”.

• Lakang 1: Pagdrowing og usa ka tin-edyer nga nagbarog sa ibabaw sa bungtod. Sa ubos sa bungtod, ilista ang mga pagtental o mga taktika nga gigamit ni Satanas sa pagsulay sa “[pagpalugsong]” kanato og gamay aron siya makaangkon og gahom ibabaw kanato. Siguroha nga magbilin og luna tali sa tin-edyer ug sa mga tentasyon nga imong gilista aron ikaw aduna pay luna alang sa lakang 2.

• Lakang 2: Sa ibabaw sa bungtod, ilista ang pipila ka mga kapanguhaan o mga pagtulun-an nga gihatag sa Ginoo kanato nga makapanalipod kanato batok sa mga tentasyon ni Satanas. (Alang sa pipila ka mga ehemplo, ikonsiderar ang pagtuon sa pipila sa mosunod nga mga bersikulo: 1 Nephi 15:24; Helaman 5:12; Doktrina ug mga Pakigsaad 10:5; 11:12–13; 20:22; 87:8.)

Paghimo og plano

Hunahunaa kon sa unsang paagi ang mga kamatuoran nga imong gitun-an karon magamit sa imong kinabuhi. Ikonsiderar ang pagrekord sa imong mga tubag sa mosunod nga mga pangutana:

Ipakita ang mosunod nga mga pangutana ug hatagi ang mga estudyante og panahon sa pagrekord sa ilang mga tubag diha sa ilang mga journal sa pagtuon.

• Kanus-a ka nakasukol sa mga tentasyon ni Satanas pinaagi sa paggamit sa mga himan nga gihatag sa Ginoo kanimo?

• Sa unsa nga paagi ka maningkamot aron mas magtinguha og tabang sa Dios sa pagsukol sa mga tentasyon ni Satanas?

Pagdapit og mga boluntaryo sa pagpakigbahin sa ilang mga tubag sa unang pangutana. Hisgoti nga dili sila kinahanglan nga mopakigbahin sa bisan unsa nga personal kaayo o sagrado.

Dasiga ang mga estudyante sa pagbatok sa mga tentasyon ni Satanas pinaagi sa pagbuhat sa mga hunahuna ug mga impresyon nga ilang gilista diha sa ilang mga journal. Pagpamatuod sa gahom sa Manluluwas sa pagtabang kanila.

Komentaryo ug Background nga Impormasyon

Unsa ang mga pananglitan sa mga tentasyon nga gigamit ni Satanas sa pagsulay sa pag-angkon og gahom ibabaw kanato?

Tan-awa ang “Usa ka Pagbalik sa Pagkahiyasnon” gikan sa time code 4:28 hangtod sa 6:30 aron makita ang mga ehemplo nga gipakigbahin ni Sister Elaine S. Dalton, kanhi Kinatibuk-ang Presidente sa Young Women.

Tan-awa ang “Pagtinguha kang Kristo sa Matag Hunahuna” gikan sa time code 8:18 hangtod sa 9:42 aron makita ang ehemplo nga gisulti ni Elder Ulisses Soares sa Korum sa Napulog Duha ka Apostoles.

Unsa ang akong mahinumdoman kon mobati ko og tinguha sa pag-apil sa “gagmay” nga mga sala?

Si Elder Ulisses Soares sa Korum sa Napulog Duha ka Apostoles mitudlo:

Minahal nga mga higala, kon kita mosukol sa mga gagmay nga mga tentasyon, nga kasagaran dili damhon nga moabot sa atong kinabuhi, mas sarang kita nga makalikay sa mas grabe nga mga kalapasan. (Ulisses Soares, “Pagtinguha kang Kristo sa Matag Hunahuna,” Liahona, Nob. 2020, 84)

Unsa nga tabang ang gihatag sa Ginoo sa pagbatok sa tentasyon?

Si Presidente Henry B. Eyring sa Unang Kapangulohan mitudlo:

Sa panabang sa Espiritu Santo mabantayan nato ang atong kaugalingon. Kita makaampo nga makaila ug mosalikway nga makahunahuna sa sala. Makahimo kita sa pag-ampo nga makaila sa pasidaan nga dili molitok og mga pulong nga makapasakit o motintal og lain. Ug kita makahimo, kon buot nato, nga mag-ampo alang sa pagpaubos ug sa hugot nga pagtuo nga makahinulsol.

Sigurado nga adunay pipila nga nakabati sa akong tingog nga kining mga panghunahuna mosulod ngadto sa ilang mga pangisip: “Apan ang mga pagtintal sobra kadako alang kanako. Ako nakigbatok kutob sa akong mahimo. Alang kanako, ang kasugoan lisod kaayo. Ang standard sobra kataas.”

Dili kana mao. Ang Manluluwas mao ang atong Manlalaban ngadto sa Amahan. Siya nahibalo sa atong mga kahuyang. Siya nakahibalo unsaon sa pagtabang kanila kinsa natintal. (Henry B. Eyring, “Sama sa Usa ka Gamayng Bata,” Liahona, Mayo 2006, 17)

Dugang nga mga Kalihokan sa Pagkat-on

Ang gahom sa usa

Samtang magtuon ang mga estudyante sa Alma 47–48, mahimo silang makabenepisyo gikan sa pagtandi ug pagsukwahi kang Amalickiah ngadto ni Kapitan Moroni aron mahibaloan ang gahom nga maangkon sa usa ka tawo alang sa maayo o sa daotan. Dapita sila sa pagpakigbahin kon sa unsang paagi ang matag tawo nakaimpluwensiya sa uban sa iyang palibot. Dapita sila sa pagpakigbahin og mga paagi nga ang Manluluwas, isip usa ka tawo, nakaimpluwensiya sa kalibotan alang sa kaayohan. Mahimo usab silang mopakigbahin og mga ehemplo sa mga tawo nga ilang nailhan kinsa mipakita nga ang usa ka tawo makaimpluwensiya sa daghan alang sa kaayohan. Dapita sila sa pagkonsiderar kon unsaon nila sa pagsunod niini nga mga ehemplo sa pagbuhat og maayo sa ilang kaugalingong mga kinabuhi.

Alma 48:7–20. Unsaon pag-uyog sa mga gahom sa impyerno

Mahimong magtuon ang mga estudyante sa Alma 48:7–20 ug mangita sa mga pamaagi nga si Moroni sama ni Jesukristo. Sama pananglit, iyang gipalig-onan ang huyang nga mga dapit sa iyang katawhan (tan-awa sa Alma 48:7–9), sama nga si Kristo nagpalig-on sa atong huyang nga mga dapit samtang kita moduol Kaniya diha sa hugot nga pagtuo (Ether 12:27). Dapita sila sa pagbasa sa Alma 48:17 ug sa pagkonsiderar nganong tinuod kini kang Moroni ug nganong tinuod kini sa Manluluwas. Hangyoa ang mga estudyante sa paghunahuna og mga tawo nga ilang nailhan kansang mga ngalan mahimong isal-ot diha sa Alma 48:17 agi og puli ni “Moroni.” Dapita sila sa pagpili og usa ka paagi nga makasunod sila sa ehemplo ni Jesukristo ug makadawat sa samang gahom nga nadawat ni Moroni.