Almà 53

Mitandrina ireo fanekempihavanantsika

Isika rehetra dia miatrika fitsapana eto amin’ity fiainana ity izay mety haka fanahy antsika handika ireo fanekempihavanantsika tamin’ Andriamanitra . Ny vahoakan’i Amôna dia nanome antsika ohatra mahery vaika amin’ny fitandremana fanekempihavanana na dia amin’ny fotoana iatrehana toe-javatra sarotra aza. Ny tanjon’ity lesona ity dia ny hanampy amin’ny fampitomboana ny fahavononanao hitandrina ireo fanekempihavananao amin’ Andriamanitra.

Ampianaro ho mpitandrina fanekempihavanana ny mpianatra. Ny fanaovana sy fitandremana fanekempihavanana dia fomba iray ahafahantsika maneho ny fanoloran-tenantsika ho tonga tahaka an’i Jesoa Kristy. Ampio ny mpianatra hahafantatra ny hery, famindram-po ary fitaomana avy amin’ Andriamanitra azon’izy ireo raisina amin’ny alalan’ny fanaovana sy fitandremana fanekempihavanana amin’ny Ray any An-danitra.

Fanomanana ny mpianatra: Asao ny mpianatra hijery ny teny hoe fanekempihavanana ao amin’ny Torolalana ho an’ny Soratra Masina ary ho vonona hizara ny antony maha-zava-dehibe ny fitandremana ny fanekempihavanantsika amin’ Andriamanitra.

Ireo asa azo atao ao anatin’ny fianarana

Ny lalan’ny fanekempihavanana

Hevero ny hampiseho ity sary manaraka ity na hanao sarin-javatra anankiray mitovitovy aminy eny amin’ny solaitrabe. Aleo misafidy ny hanome tahadikan’ilay sary ny mpianatra toy izay hanasa azy ireo hanao sarin’ilay lalana ao amin’ny diary fandalinan’izy ireo.

Ao amin’ny diary fandalinanao, manaova sarina lalana toy ilay iray eo amin’ity sary manaraka ity mba hanehoana ny fiainantsika sy ireo fanekempihavanana tena ilaina mila ataontsika mba hiverenana amin’ny Ray any An-danitra. Mba tsy hanaovana ireo sary boribory, dia azonao atao ny manoratra ireo fanekempihavanana izay asehon’ny sary tsirairay. Ohatra, mba tsy hanaovana ilay sary fahefatra (manisa miakatra avy any ambany), dia azonao soratana manaraka ny lalana ny hoe “fanafiana masin’ny tempoly”.

Manaova marika (na manaova sary maneho ny tenanao) manondro ny hoe aiza amin’ny lalan’ny fanekempihavananao manokana no misy anao amin’izao fotoana izao.

Tia anao ny Ray any An-danitra sy i Jesoa Kristy ary Izy ireo dia hanampy anao amin’ireo ezaka ataonao hijanonana eo amin’ny lalan’ny fanekempihavanana, izay mitondra miverina any amin’Izy ireo. Makà fotoana hahatsiarovana ireo fanekempihavanana efa nataonao tamin’Izy Ireo sy ireo fomba iezahanao mitandrina ireny fanekempihavanana ireny. (Raha toa ka hanampy ny famerenana mijery ireo fanekempihavanana ataontsika amin’ny batisa sy havaozina amin’ny alalan’ny fanasan’ny Tompo, dia vakio ny Môzià 18:8–10 sy ny Môrônia 4:3.)

Tao anatin’ny valandresaka ho an’ny mpanao gazety voalohany nataon’ny Filoha Russell M. Nelson tamin’ny maha-mpaminany vao nantsoina azy, dia nampianatra toy izao izy:

Ankehitriny dia izao no lazaiko amin’ny mpikamban’ny Fiangonana tsirairay, mijanòna eo amin’ny lalan’ny fanekempihavanana. Ny fanoloranao tena mba hanaraka ny Mpamonjy amin’ny alalan’ny fanaovana fanekempihavanana Aminy ary avy eo mitandrina ireo fanekempihavanana ireo dia hanokatra ny varavarana hahazoana ireo fitahiana ara-panahy rehetra sy ireo tombontsoa natokana ho an’ny lehilahy sy ny vehivavy ary ny ankizy na aiza na aiza. (Russell M. Nelson, “Eo am-pandrosoantsika miaraka,” Ensign, apr. 2018, 7)

• Inona aminao no dikan’ny hoe “mijanona eo amin’ny lalan’ny fanekempihavanana”?

• Inona avy no fitahiana homen’ny Ray any An-danitra sy i Jesoa Kristy ireo izay mijanona eo amin’ny lalan’ny fanekempihavanana?

Azonao atao ny manoratra zavatra toy ny hoe “fiainana mandrakizay,” “tonga tahaka an’ Andriamanitra,” “fianakaviana mandrakizay,” sy ny sisa eo amin’ny fiafaran’ny sarin’ilay lalana nataonao.

Amina ambaratonga 1 hatramin’ny 5 (ka ny 1 dia tsy misy fahavononana ary 5 dia fahavononana hentitra), saintsaino ny valinteninao amin’ireto fanontaniana manaraka ireto:

• Manao ahoana ny fahavononanao hitandrina ireo fanekempihavanana efa nataonao tamin’ Andriamanitra? Nahoana?

• Manao ahoana ny fahavononanao hanao ireo fanekempihavanana Aminy izay mbola eo anoloanao? Nahoana?

Rehefa mandalina ianao anio dia mikatsaha fanampiana avy amin’ny Ray any An-danitra mba hahatakatra sy haniry tsara kokoa ny hanao sy hitandrina fanekempihavanana Aminy.

Ny vahoakan’i Amôna

Mampisehoa sarin’ny vahoakan’i Amôna mandevina ny fiadian’izy ireo.

Ao amin’ny Almà 24, ny vondrona Lamanita nibebaka iray fantatra amin’ny hoe vahoakan’i Amôna, dia nanao fanekena tokana tamin’ Andriamanitra mba hiarovana azy ireo tsy hianjera indray amin’ny fahotan’izy ireo tany aloha rehefa avy nodiovin’ny Mpamonjy.

Vakio ny Almà 53:10–12 mba hamerenana mijery ny fanekempihavanan’izy ireo (na fianianana).

• Araka ny andininy 11, vonona ny hanao inona izy ireo mba hitandremana ny fanekempihavanan’izy ireo?

Tatỳ aoriana, rehefa nanafika ny Nefita ny tafika Lamanita mahery vaika iray, dia voatery niditra tamina ady mahatsiravina ny Kapiteny Môrônia sy ny tafiny. Vakio ny Almà 53:13 sy ity teny manaraka nambaran’ny Loholona Richard G. Scott (1928–2015) tao amin’ny Kôlejin’ny Apôstôly Roambinifolo ity, hitadiavana ny fanapahan-kevitra sarotra natrehin’ny vahoakan’i Amôna.

Tao anatin’ny fotoana lehibe teo amin’ny fiainany ara-panahy ny vahoakan’i Amôna. Nahatoky tamin’ny fanekempihavanany ny tsy handray fitaovam-piadiana intsony izy ireo hatramin’izay. Kanefa izy ireo dia nahatakatra fa ny raim-pianakaviana dia tompon’andraikitra amin’ny fiarovana ny fianakaviany. Izany zavatra nilaina izany dia lehibe loatra tamin’izy ireo ka mendrika ny handinihana ny tokony handravana ny fanekempihavanany. (Richard G. Scott, “Herin’ny tena manokana avy amin’ny Sorompanavotan’i Jesoa Kristy,” Liahona, nôv. 2013, 82)

Jereo ny sarin’ny lalan’ny fanekempihavanana nataonao. Eo anelanelan’ny toerana misy anao eo amin’ilay lalana amin’izao fotoana izao sy ny fanekempihavanana amin’ny hoavy izay anasan’ny Mpamonjy anao ny fanaovana azy, milazà toe-javatra izay mety haka fanahy ny tanora handika ireo fanekempihavanana efa nataon’izy ireo sy manelingelina azy ireo tsy hifantoka amin’ny fanaovana fanekempihavanana any amin’ny hoavy, ao anatin’izany ny fanekempihavanan’ny tempoly.

Manasà mpianatra manolo-tena hilaza toe-javatra na hanao sarina sakana noeritreretin’izy ireo eo amin’ilay lalana eny amin’ny solaitrabe.

Rehefa manohy mandalina ianao, dia saintsaino ny fomba ahafahan’ny Mpamonjy manampy anao hiroso na aiza na aiza toerana misy anao, na inona na inona fanamby atrehinao amin’izao fotoana izao.

Ny torohevitr’i Helamàna mpaminany

Vakio ny Almà 53:14–15; 56:7–8, hitadiavana ny torohevitr’i Helamàna mpaminany tamin’ny vahoakan’i Amôna. (Ny Almà 56 dia taratasy nosoratan’i Helamàna ho an’ny Kapiteny Môrônia nanazava ny zava-nisy.)

• Ahoana no mety hamintinanao ny zavatra nianaranao momba ireo fanekempihavanana amin’ Andriamanitra?

Mety nianaranao ny fahamarinana toy ny hoe rehefa misafidy ny hitandrina ireo fanekempihavanantsika amin’ny Ray any An-danitra sy i Jesoa Kristy isika, dia hanampy antsika sy hanamafy antsika Izy ireo ary raha misafidy ny handika ireo fanekempihavanantsika amin’Izy Ireo isika, dia ho very fitahiana nokasaina ho antsika isika.

Ny Loholona Scott dia nanazava ny fomba nitahian’ Andriamanitra ny vahoakan’i Amôna noho ny nitandreman’izy ireo ny fanekempihavanan’izy ireo.

Ny fanoloran-tenan’izy ireo feno fanetren-tena sy nandritra ny androm-piainany ny tsy hamerina intsony ny fahotany dia niaro bebe kokoa ny fianakaviany raha ampitahaina amin’izay zavatra hafa mety ho azon’izy ireo natao tany amin’ny toeram-piadiana. Tsy nanakana azy ireo handray fitahiana ny fanoavan’izy ireo. Nampatanjaka azy ireo sy nitahy azy ireo ary nitahy taranaka maro nifandimby taty aoriana izany. (Richard G. Scott, “Herin’ny Tena Manokana avy amin’ny Sorompanavotan’i Jesoa Kristy,” Liahona, nôv. 2013, 83)

Hevero ny hanasa ny mpianatra hikaon-doha tsiroaroa na anatina vondrona kely amin’ny valin’ireto fanontaniana manaraka ireto. Avy eo dia asao ny vondrona tsirairay hanoratra valinteny iray eny amin’ny solaitrabe eo akaikin’ilay lalan’ny fanekem-pihavanana.

• Inona avy no fomba sasantsasany mety hanatanjahan’ny Tompo sy hitahiany anao rehefa miezaka manao sy mitandrina ireo fanekempihavananao ianao?

• Ahoana no ahafahan’ny fitandremana ny fanekempihavananao manamafy ny fifandraisanao amin’ny Tompo?

Zatovolahy roa arivo no niditra tamina fanekempihavanana iray

Ny vahoakan’i Amôna izay nanao ny fanekempihavanana dia nankatò ny torohevitr’i Helamàna tsy handray fiadiana. Fomba iray nitahian’ny Tompo azy ireo ny safidin’ny zanakalahin’izy ireo hanao sy hitandrina fanekempihavanana azy ireo manokana. Ao amin’ireo toko manaraka dia ianarantsika fa Andriamanitra dia nampiasa ireo zatovolahy nitandrina fanekempihavanana ireo tamin’ny fomba mahagaga mba hiaro ny fianakavian’izy ireo sy ny Nefita.

Vakio ny Almà 53:16–22. Asio marika ny toetra sy famaritana ireo zatovolahy ireo ka hanampy azy ireo hitandrina fanekempihavanana. (Mety hanampy ny fahafantarana fa ny teny hoe fahononan-tena dia afaka manondro ny hoe tony, matotra, na mieritreritra.)

• Inona avy no toetra tsikaritrao tamin’ireo zatovolahy ireo ka hanampy ny zatovo ankehitriny hitandrina ny fanekempihavanan’izy ireo?

• Ahoana, araka ny eritreritrao, no mety ho niantraikan’ny toetra hentitra nananan’ny ray aman-drenin’izy ireo mahakasika ny fitandremana fanekempihavanana tamin’ireo zatovolahy ireo?

• Iza no fantatrao hoe ohatra lehibe aminao amin’ny fitandremana fanekempihavanana?

Ny lalan’ny fanekempihavananao

Raketo ao amin’ny diary fandalinanao ny zavatra nianaranao na tsapanao androany ka mety hampitombo ny fahavononanao hijanona eo amin’ilay lalana miverina mankany amin’ny Ray any An-danitra sy i Jesoa Kristy. Mety ho azonao ampidirina ny fakam-panahy na fanelingelenana rehetra atrehinao eo amin’ny lalan’ny fanekempihavananao sy ny mety hanampian’ny fahavononanao sy ny fahatokianao ny Tompo anao handresy azy ireny.

Hevero ny hijoro ho vavolombelona momba ny fomba nitahian’ Andriamanitra anao noho ny nanaovanao sy nitandremanao fanekempihavanana Taminy.

Fanamarihana sy fampahalalana voarakitra

Inona no afaka manampy ahy hitandrina ny fanekempihavanako rehefa sarotra izany?

Nampianatra toy izao ny Rahavavy Linda K. Burton, izay Filohan’ny Fikambanana Ifanampiana Maneran-tany teo aloha:

Ankoatra ireo antony hafa rehetra mahatonga antsika ho tokony hazoto bebe kokoa eo amin’ny fitandremana ny fanekempihavanantsika dia ity antony iray ity no mavesa-danja kokoa noho ny hafa rehetra—fitiavana. …

Nahoana ny Mpamonjy no vonona ny hitandrina ny fanekempihavanana nataony niaraka tamin’ny Rainy ary nanatanteraka ny asa masina nanirahana Azy mba hanonitra ny fahotan’izao tontolo izao? Noho ny fitiavany ny Rainy sy ny fitiavany antsika izany. …

… Ny fitandremana ny fanekempihavanana dia fomba iray hanehoana ny fitiavantsika noho ilay Sorompanavotana tsy takatry ny saina sy tsy manam-piafarana izay nataon’ilay Mpamonjy sy Mpanavotra antsika sy ilay fitiavana lavorary avy amin’ny Raintsika any an-danitra. (Linda K. Burton, “Ny Hery sy Fifaliana ary Fitiavana avy amin’ny Fitandremana ny Fanekempihavana,” Liahona, nôv. 2013, 114)

Ny Filoha M. Russell Ballard ao amin’ny Kôlejin’ny Apôstôly Roambinifolo nizara toy izao:

Indraindray isika dia alaim-panahy hamela ny fiainantsika mba hotantanan’ny zavatra izay metimety amintsika toy izay hotantanan’ny fanekempihavanana. Tsy mora hatrany ny miaina ireo fitsipiky ny filazantsara sy miaro ny fahamarinana ary mijoro ho vavolombelona momba ny Famerenana amin’ny laoniny. … Saingy tsy misy hery ara-panahy avy amin’ny fiainana araka izay mahamora ny fanaovan-javatra. Tonga ny hery rehefa mitandrina ny fanekempihavanantsika isika. (M. Russell Ballard, “Like a Flame Unquenchable,” Ensign, mey 1999, 86)

Nanazava toy izao ny Loholona D. Todd Christofferson ao amin’ny Kôlejin’ny Apôstôly Roambinifolo:

The Power of Covenants

In times of distress, let your covenants be paramount and let your obedience be exact.

Miteraka Kristiana matanjaka ny fanekempihavanana amin’ Andriamanitra. Mamporisika ny tsirairay aho mba hahafeno fepetra sy handray ny ôrdônansin’ny fisoronana rehetra azonareo atao ary avy eo dia hihazona am-pahatokiana ireo fampanantenana nataonareo tamin’ny alalan’ny fanekempihavanana. Amin’ny androm-pahoriana, aoka ho laharam-pahamehana ireo fanekempihavananao ary aoka ho marina ny fankatoavanao. Avy eo dia afaka mangataka amin’ny finoana, tsy mihanahana, araka izay zavatra ilainao ianao, dia hamaly Andriamanitra. Hanohana anao Izy rehefa miasa sy mitandrina ianao. Amin’ny fotoanany sy fombany manokana, hamelatra ny tanany aminao izy ka hiteny hoe: “Ity Aho”. (D. Todd Christofferson, “The Power of Covenants,” Liahona, mey 2009, 22)

Jereo ilay horonantsary hoe “Standing in Holy Places (Mijoro amina toerana masina)” (5:36), hitadiavana ny zavatra nanampy ilay zatovovavy hitandrina ny fanekempihavanany sy haniry fanekempihavanan’ny tempoly amin’ny hoavy.

Standing in Holy Places

A young woman reflects on the blessings of walking the covenant path as she makes her journey to the temple.

Sahanasa fianarana fanampiny

Almà 53:9. “Fifandirana … teo amin’izy ireo”

Soraty eny amin’ny solaitrabe ireto manaraka ireto: Kôlejin’ny fisoronana, Kilasin’ny zatovovavy, Paroasy na sampana, ary Fianakaviana. Avy eo dia anontanio ny zavatra mety hampizara ireo vondrona ireo sy ny toe-javatra mampidi-doza mety haterak’izany.

Asao hamaky ny Almà 53:8–9 ny mpianatra. Ampio izy ireo hitady fitsipika toy ity manaraka ity: Raha tonga mizarazara ny mpikamban’ny Fiangonan’ny Tompo, dia mametraka ny tenantsika amina toe-javatra mampidi-doza isika. Amporisiho ny mpianatra hizara ny zavatra azon’izy ireo atao mba hisorohana ny fizarazarana ao amin’ny kilasy, kôlejy, ary fianakaviana misy azy ireo manokana.

Mitandrina ny fanekempihavanana nataontsika tamin’ny batisa

Any am-piandohan’ny lesona, hevero ny hanasa ny mpianatra hamaky ny Môzià 18:8–10; Môrônia 4:3; 5:2. Ifanakalozy hevitra ary ataovy lisitra eny amin’ny solaitrabe ireo fampanantenana manokana ataontsika amin’ Andriamanitra rehefa atao batisa isika ary avy eo havaozintsika rehefa mandray ny fanasan’ny Tompo isika.

Rehefa avy eo dia asao ny mpianatra hifantina iray amin’ireo fampanantenana ireo sy hieritreritra sakana roa mety hatrehin’ny tanora iray eo amin’ny faritra misy anao rehefa miezaka mitandrina izany fampanantenana izany izy. Asao hijery ny lesona ny mpianatra mba hitadiavana ny mety hanampian’ny ohatry ny vahoakan’i Amôna ny zatovo iray ao anatin’ny iray amin’ireo toe-javatra ireo.