Alma 56

2,000 Kabataang Mandirigma

Maaari tayong matuto ng magagandang aral mula sa tapat na halimbawa ng mga kabataan sa Simbahan ng Panginoon. Noong panahon ng matinding digmaan, pinamunuan ni Helaman ang 2,000 magigiting na kabataang lalaki sa pagtatagumpay na nagligtas ng maraming buhay. Ang lesson na ito ay naglalayong tulungan kang maunawaan na kapag buong tapang kang nanampalataya kay Jesucristo, pagpapalain ka ng Panginoon ng Kanyang kapangyarihan.

Kilalanin na ang iyong mga estudyante ay may banal na potensyal. Alalahanin na bawat estudyante ay anak ng Diyos. Kapag alam ng mga estudyante na naniniwala ka sa kakayahan nilang maging higit na katulad ni Jesucristo, madaragdagan ang kumpiyansa nila sa kanilang potensyal. Kilalanin kapag nagsisikap ang mga estudyante na maging mas masunurin, pakitunguhan ang iba nang may kabaitan, at kumilos nang may pananampalataya.

Paghahanda ng estudyante: Maaari mong anyayahan ang mga estudyante na mag-isip ng halimbawa ng isang kabataan o grupo ng mga kabataan na nagpakita ng malaking pananampalataya sa Panginoon sa kabila ng mahihirap na hamon.

Mga Posibleng Aktibidad sa Pag-aaral

Pagkakaroon ng tapang

Maaari mong isulat sa pisara ang mga sumusunod na gawain na maaaring nakakatakot o mahirap. Maaari kang magdagdag o magbago ng mga gawain para maging mas nauugnay sa iyong mga estudyante. Kabilang sa mga karagdagang halimbawa ng mga gawain ang sumusunod: ibahagi ang iyong patotoo, ibahagi ang ebanghelyo sa isang kaibigan, at magsisi.

Isipin kung ano ang madarama mo, at kung bakit, kung ipapagawa sa iyo ang mga sumusunod:

• Magmisyon nang full-time

• Sundin ang mga kautusan kahit hindi popular ang mga ito

• Magsalita sa simbahan o magturo ng isang lesson

Sabihin sa ilang estudyante na pumili ng isa sa mga gawain at ibahagi kung ano ang madarama nila at kung bakit.

• Anong mga pag-aalinlangan ang maaaring matukso kang madama sa mga sitwasyong ito?

Upang maihanda ang mga estudyante na maunawaan ang kahalagahan ng pag-aaralan nila, sabihin sa kanila na maingat na gawin ang mga sumusunod:

Sa iyong study journal, sumulat ng isang bagay na maaaring nais ng Panginoon na gawin mo ngayon o sa lalong madaling panahon na maaaring nakakatakot o mahirap para sa iyo. Maaari mo ring isulat ang anumang pagdududa o alalahanin mo. (Babalikan mo ang entry na ito sa huling bahagi ng lesson.)

Pag-isipang mabuti kung ano ang kailangan mong malaman o maunawaan para harapin ang gawaing ito nang may kumpiyansa. Sa iyong pag-aaral, hingin ang patnubay ng Panginoon para matulungan kang mahanap at maunawaan ang mga katotohanan na tutulong sa iyo.

Ang sulat ni Helaman kay Moroni

Ang Alma 56–58 ay isang liham na isinulat ni Helaman kay Kapitan Moroni sa panahon ng digmaan. Sumulat si Helaman tungkol sa isang grupo ng mga kabataang lalaki mula sa mga Anti-Nephi-Lehi na kilala bilang 2,000 kabataang mandirigma. Ang mga kabataang lalaking ito na pinamunuan ni Helaman ay sumama sa isang hukbong pinamumunuan ni Antipus at naghandang ipagtanggol ang kanilang lupain at mga pamilya laban sa mga Lamanita (tingnan sa Alma 56:9–12).

Tulungan ang mga estudyante na maunawaan ang nangyari sa Alma 56:30–44. Kabilang sa ilang paraan na magagawa mo ito ang mga sumusunod:

1. Isulat sa pisara ang sumusunod na matching activity, o bigyan ang mga estudyante ng kopya ng handout. Ang mga sagot sa matching activity ay 1-a, 2-c, 3-d, 4-b.

2. Sabihin sa tatlong estudyante sa harap ng silid na magsuot ng name tag na naglalarawan sa bawat isa sa kanila bilang isa sa tatlong hukbo (Ang 2,000 Kabataang Mandirigma, Hukbo ni Antipus, Hukbo ng mga Lamanita). Maaaring isadula ng mga estudyante sa harapan ng silid ang mga pagkilos ng mga hukbo habang binabasa ng mga estudyante ang mga talata.

Ang Sitwasyong Naranasan ng 2,000 Kabataang Mandirigma

Manwal ng Aklat ni Mormon para sa Seminary Teacher (2024)—“Alma 56: 2,000 Kabataang Mandirigma”

Upang malaman ang tungkol sa nakakatakot at mahirap na sitwasyon na naranasan ng mga anak ni Helaman, basahin ang mga sumusunod na talata at itugma ang mga ito sa mga tamang buod na pahayag.

1.___Alma 56:30–33	a. Iniutos ni Antipus kay Helaman at sa kanyang 2,000 mandirigma na dumaan sa Antipara para mapalabas ng lunsod ang mga Lamanita.
2.___Alma 56:34–38	b. Pagkaraan ng tatlong araw, hindi na makita ng 2,000 mandirigma ang mga Lamanita na tumutugis sa kanila. Hindi nila alam kung naabutan ng hukbo ni Antipus ang mga Lamanita o kung sinusubukan ng mga Lamanita na mahuli sila sa bitag. Tinanong ni Helaman ang kanyang mga batang kawal kung handa silang makidigma.
3.___Alma 56:39–42	c. Nang nilisan ng mga Lamanita ang lunsod upang salakayin ang 2,000 mandirigma, sinundan ng hukbo ni Antipus ang mga Lamanita.
4.___Alma 56:43–44	d. Sa halip na lumaban kay Antipus, binilisan ng mga Lamanita ang pagtugis, at umasa silang mapapatay nila ang hukbo ni Helaman bago pa makasalakay si Antipus mula sa likod.

© 2023 by Intellectual Reserve, Inc. All rights reserved.

Pagpapasiya kung lalaban

Kunwari ay kasama ka ng mga kabataang mandirigma at tinanong ka kung handa kang makidigma. Paano ka tutugon? Ano ang makakaimpluwensya sa desisyon mo?

Basahin ang Alma 56:45–48, at alamin ang ipinasiyang gawin ng mga kabataang lalaking ito at kung bakit.

Sabihin sa mga estudyante na ibahagi ang nalaman nila. Kung hindi sila magkukusang ibahagi ang mga sagot sa mga sumusunod na tanong, maaari mo itong itanong sa kanila.

• Ayon sa talata 46, ano ang alam ng mga kabataang lalaking ito?

  Maaari mong hikayatin ang mga estudyante na salungguhitan ang sagot sa tanong na ito sa kanilang mga banal na kasulatan.

• Sino ang nagturo sa kanila ng katotohanang ito? (Tingnan sa Alma 56:47–48.)

• Paano maaaring nagbigay sa kanila ang katotohanang ito ng tapang na makidigma?

Isipin kung ano kaya ang maaaring nadama ng Diyos nang lubos na nagtiwala sa Kanya ang mga kabataang lalaking ito habang nasa isang nakatatakot at mahirap na sitwasyon.

Pinrotektahan sa digmaan

Basahin ang Alma 56:49–56, at alamin ang nangyari nang buong tapang na “hindi [nag-alinlangan]” ang mga kabataang mandirigma (Alma 56:47), o sa madaling salita, nanampalataya sila sa Diyos.

• Ano ang natutuhan mo mula sa mga talatang ito?

Isa sa mga alituntuning matututuhan natin mula sa mga kabataang mandirigma ay kapag buong tapang tayong kumilos nang may pananampalataya, tatanggap tayo ng lakas mula sa Diyos.

Mahalagang malaman na bagama’t pinangalagaan ng Diyos ang buong hukbo ni Helaman, maaaring hindi Niya laging mapangangalagaan sa pisikal ang matatapat. Ngunit lagi Niya silang pagpapalain sa mga paraang alam Niya na makikinabang ang kanilang mga kaluluwa (tingnan sa Alma 60:12–13).

• Ano ang itinuturo sa iyo ng salaysay na ito tungkol sa Diyos at sa Kanyang lakas?

Sabihin sa mga estudyante na piliin at gawin ang isa sa mga sumusunod na aktibidad upang matulungan silang ihalintulad ang salaysay tungkol sa hukbo ni Helaman sa kanilang sarili at sa kanilang kalagayan. Maaaring makatulong na ipakita ang mga opsiyon para matingnan ito ng mga estudyante kapag pumili sila at ginawa ang mga ito. Ipaalam sa mga estudyante na magkakaroon sila ng pagkakataong ibahagi ang nalaman nila sa kanilang mga kaklase.

Opsiyon A. Mga sitwasyon sa tunay na buhay

Tumukoy ng isang sitwasyon kung saan maaaring kailanganin ng mga kabataan ngayon na piliing buong tapang na kumilos nang may pananampalataya na katulad ng ginawa ng matatapat na batang kawal ni Helaman. Maglista ng ilang pag-aalinlangan na maaaring mayroon ang mga kabataan sa sitwasyong iyon. Pagkatapos ay maglista ng isa o dalawang paraan na maipapakita ng mga kabataan ang pananampalataya sa Diyos sa kabila ng pagkakaroon ng pag-aalinlangan. Magbahagi ng mga paraan na mapagpapala sila ng Ama sa Langit ng lakas kapag kumilos sila nang may pananampalataya.

Opsiyon B. Tinuruan sila ng kanilang mga ina

Magsulat ng tungkol sa iyong ina o isa pang babae sa iyong buhay na, tulad ng mga ina ng mga kabataang mandirigma, ay nagturo sa iyo na manampalataya sa Diyos at kay Jesucristo. Maglaan ng ilang sandali na isulat ang itinuro niya sa iyo kapwa sa salita at sa pamamagitan ng halimbawa at kung paano ka niya naimpluwensyahan. Maaari mong isama ang mga paraan na natularan mo ang kanyang halimbawa na manampalataya sa Panginoon at madama ang Kanyang lakas.

Sabihin sa mga estudyante na ibahagi ang natutuhan nila sa klase. Maaaring makatulong na anyayahan muna silang magbahagi sa isang kaklase na pumili ng ibang opsiyon na hindi nila pinili.

Mag-isip ng isang bagay na maaaring nais ng Panginoon na gawin mo ngayon o sa lalong madaling panahon na maaaring nakakatakot o mahirap para sa iyo. Maaari mo ring alalahanin ang anumang pag-aalinlangan o alalahanin mo. Sa iyong study journal, isulat ang nalalaman mo tungkol sa Diyos at ang natutuhan mo tungkol sa Kanya mula sa salaysay tungkol sa mga kabataang mandirigma na maaaring makatulong sa iyo sa sitwasyong ito. Maaari mong isama ang mga paraan na nahihikayat kang magpakita ng pananampalataya sa Kanya at kung paano Ka Niya mapapalakas.

Komentaryo at Impormasyon ng Konteksto

Paano ako magkakaroon ng tapang ngayon?

Ipinahayag ni Pangulong Thomas S. Monson (1927–2018):

Maraming uri ng katapangan. Ito ang isinulat ng Kristiyanong awtor na si Charles Swindoll: “Ang katapangan ay hindi lamang nakikita sa digmaan … o sa matapang na paghuli ng magnanakaw sa inyong tahanan. Ang tunay na pagsubok ng katapangan ay di napapansin. Ito ay mga pagsubok sa kalooban, tulad ng pananatiling tapat kahit walang nakatingin, … tulad ng paninindigan kapag hindi ka pinaniniwalaan.” Idaragdag ko na kabilang din sa katapangan ng kalooban ang paggawa ng tama kahit natatakot tayo, pagtatanggol sa ating paniniwala kahit kutyain tayo, at pananatiling tapat sa ating mga paniniwala kahit pa mawala ang ating mga kaibigan o katayuan sa lipunan. Siya na tapat na naninindigan sa tama ay malamang na ayawan at di tanggapin ng karamihan. (Thomas S. Monson, “Ikaw ay Magpakalakas at Magpakatapang na Mabuti,” Liahona, Mayo 2014, 67)

Ano ang ginagampanan ng ating patotoo kay Jesucristo sa pagtulong sa atin na magkaroon ng tapang?

Ipinaliwanag ni Pangulong Henry B. Eyring ng Unang Panguluhan:

Sinabi ng Panginoon sa Kanyang mga lider ng Panunumbalik, at sinasabi Niya sa atin, na kapag tumayo tayo nang may pananampalataya sa Kanyang bato, mababawasan ang pag-aalinlangan at takot; ang hangaring gumawa ng mabuti ay madaragdagan. Sa pagtanggap natin sa paanyaya ni Pangulong Monson na itanim sa ating puso ang patotoo kay Jesucristo, nagkakaroon tayo ng kapangyarihan, ng pagnanais, at ng tapang na iligtas ang iba nang hindi iniisip ang sarili nating mga pangangailangan. (Henry B. Eyring, “Huwag Matakot na Gumawa ng Mabuti,” Liahona, Nob. 2017, 101)

Paano kung sinisikap kong maging tapat at hindi ko madama na darating ang kaligtasan?

Ipinayo ni Elder Alvin F. Meredith III ng Pitumpu:

Sa harap ng paghihirap o pagsubok, maaari kayong maging katulad ko at umasa na masasagip kayo kaagad. … Kapag kailangan nating maghintay, huwag mag-alala dahil laging nakamasid ang Tagapagligtas, tinitiyak na hindi natin kakailanganing magtiis nang higit sa ating makakaya. Sa mga naghihintay … , na marahil ay nasa gitna pa rin ng pagdurusa, huwag mawalan ng pag-asa. Ang pagsagip ay laging dumarating sa matatapat, sa buhay mang ito o sa mga kawalang-hanggan. (Alvin F. Meredith III, “Tumingin sa Paroroonan,” Liahona, Nob. 2021, 115–16)

Mga Karagdagang Aktibidad sa Pag-aaral

Ang responsibilidad ng mga magulang sa pagtuturo sa mga anak

Binanggit ni Helaman ang responsibilidad ng mga ina sa pagpapalakas ng pananampalataya ng hukbo ni Helaman (tingnan sa Alma 56:47–48). Sa pagiging sensitibo sa madarama ng mga estudyante sa iba’t ibang sitwasyon ng pamilya, sabihin sa kanila na pag-isipan ang mga sumusunod na tanong: Ano ang responsibilidad ng mga miyembro ng pamilya at ng iba pa sa pagpapalakas ng iyong pananampalataya? Ano ang magagawa mo para mapalakas ang pananampalataya ng iyong pamilya at mga kaibigan? Sabihin sa mga estudyante na sumulat ng maikling sulat ng pasasalamat sa isang taong nagturo sa kanila ng ebanghelyo.

Pagtuturo ng maraming lesson sa isang araw

Kung gusto mong ituro ang tungkol sa mga kabataang mandirigma sa isang lesson, maaari mong anyayahan ang mga estudyante na pag-isipan kung anong mga katangian ang gusto nilang taglayin sa kanilang buhay. Pagkatapos ay sabihin sa kanila na alamin ang mga katangian ng mga kabataang mandirigma sa Alma 53:16–21, Alma 56:45–48; 57:19–21; 26–27. Pagkatapos ay maaari silang mabilisang magdrowing ng pagsasalarawan ng kanilang sarili at magsulat ng mga katangian nila na kapareho sa mga kabataang mandirigma at katangian na gusto nilang taglayin upang mas lubos na masunod ang Panginoon.