Հելաման 7–10

Տիրոջ մարգարեն

Նախագահ Ռասսել Մ. Նելսոն

Հակասական ձայներով լցված աշխարհում որտե՞ղ կարող ենք ուղղորդում և ճշմարտություն գտնել։ Եղանակներից մեկը, որով Տերը ձգտում է ուղղորդել և օգնել մեզ մեր մահկանացու կյանքում, մարգարե կանչելն է։ Այս դասը կօգնի ձեզ հասկանալ մարգարեների կարևոր դերը Երկնային Հոր ծրագրում:

Սիրեք նրանց, ում ուսուցանում եք: Աշխատեք սեր ցուցաբերել ձեր ուսանողների հանդեպ։ Անկեղծորեն հետաքրքրվեք նրանց կյանքով, ուշադիր լսեք նրանց հարցերն ու մեկնաբանությունները, ներգրավեք նրանց դասի մեջ և տեսնելիս սիրալիր ողջունեք նրանց։ Վստահություն հայտնեք, որ ձեր ուսանողները կարող են սովորել Հիսուս Քրիստոսի ավետարանը և ապրել դրանով։

Ուսանողի նախապատրաստում․ ուսանողներին առաջարկեք ընկերոջ կամ ընտանիքի անդամի հետ քննարկել, թե ապրող մարգարեներն ինչ ազդեցություն են ունեցել իրենց կյանքում։

Հնարավոր ուսումնական վարժություններ

Աստված ինչո՞ւ է մարգարեներ կանչում

Դասը սկսելու համար՝ որպես գործնական վարժություն կարող եք ուսանողներին առաջարկել արձագանքել հետևյալ իրավիճակին։ Կարող եք հանդես գալ որպես ընկեր, որը Եկեղեցու անդամ չէ։ Մի քանի ուսանողի հնարավորություն տվեք կիսվել, թե ինչպես կարձագանքեին։ Ուսանողներին անպայման տեղեկացրեք, որ այդ սցենարին կրկին անդրադառնալու են դասի վերջում։

Պատկերացրեք, որ ձեր ընկերներից մեկը, որը Եկեղեցու անդամ չէ, անակնկալի է եկել՝ իմանալով, որ դուք հավատում եք, թե Տերը մեր օրերում մարգարեներ է կանչում։ Ձեր ընկերը զարմանում է, թե ինչու են մեր ժամանակներում մարգարեներ անհրաժեշտ։

• Ինչպե՞ս կպատասխանեիք ձեր ընկերոջը։

Մտածեք, թե ինչ վերաբերմունք ունեք Տիրոջ մարգարեների նկատմամբ և որքանով եք պատրաստակամ լսելու ու հետևելու նրանց։ Այսօր ուսումնասիրելու ընթացքում դուք հնարավորություն կունենաք կարևոր ճշմարտություններ բացահայտել մարգարեների մասին։

Ձեր օրագրի որևէ դատարկ էջում գրեք հետևյալ վերնագիրը․ Ճշմարտություններ Տիրոջ մարգարեների մասին։ Դասի ընթացքում այս վերնագրի տակ գրեք մարգարեների մասին ձեր սովորած ճշմարտությունները։

Կարող եք այս վերնագիրը նաև գրատախտակին գրել և դասի ընթացքում դրան ավելացնել ուսանողների մտքերը։

Բովանդակության մեծ մասը, որն ուսումնասիրվելու է այս շաբաթ (Հելաման 7–12) և հաջորդ շաբաթ (Հելաման 13–16), կենտրոնանալու է մարգարեների վրա։ Կարող եք ուսանողներին ցուցումներ տալ, որ օրագրում բավարար տարածք պահեն, որպեսզի հաջորդ մի քանի շաբաթների ընթացքում կարողանան լրացնել իրենց ցուցակները։

Մարգարե Նեփին

Նեփին աղոթում է իր պարտեզի աշտարակի վրա, նկարը՝ Ջերի Թոմսոնի

Այսօր սովորելու եք Նեփիի՝ Հելամանի որդու մասին։ Հյուսիսային երկրում նեփիացիների կողմից մերժվելուց հետո Նեփին վերադարձավ իր տուն՝ Զարահեմլա։ Մարդիկ այնտեղ նույնպես շատ ամբարիշտ էին։ Վշտանալով նրանց ամբարշտությունից՝ Նեփին բարձրացավ իր պարտեզի աշտարակի վրա և աղերսեց Աստծուն (տես Հելաման 7.1–11)։

Կարդացեք Հելաման 7.12–22 հատվածները և փնտրեք, թե ինչ ասաց Նեփին, երբ հասկացավ, որ մարդիկ հավաքվել են իր աղերսները լսելու։

• Հիմնվելով այս հատվածներում Նեփիի խոսքերի վրա՝ ի՞նչ ճշմարտություն կարող եք բացահայտել Տիրոջ մարգարեների մասին։

Ճշմարտություններից մեկը, որ գուցե բացահայտել եք, այն է, որ Աստծո մարգարեները մարդկանց հրավիրում են ապաշխարելու։ Այս ճշմարտությունը գրեք սուրբ գրությունների ուսումնասիրության ձեր օրագրի ցուցակում։

• Ի՞նչ է ուսուցանում այս ճշմարտությունն այն մասին, որ Աստված կանչեց մարգարեներին ապաշխարության կոչ անելու համար։

Շատ մարդիկ զայրացան Նեփիի ուղերձից։ Նեփին զարմանահրաշ ձևով պատմեց մարդկանց, թե իր քարոզելու ընթացքում ինչ իրադարձություններ տեղի ունեցան՝ դրանով օգնելով նրանց հասկանալ, որ ինքը ճշմարտությունն է ասում։

Կարող եք որևէ ուսանողի առաջարկել կարդալ Հելաման 8.25–28, 9.1–36 հատվածների ստորև ներկայացվող ամփոփ տարբերակը։ Կարելի է մեկ այլ ուսանողի առաջարկել, որ այդ հատվածները բարձրաձայն կարդա դասարանի առաջ և սեփական բառերով ամփոփ շարադրի այս պատմությունը։ Որպես այլընտրանք կարող եք ցուցադրել «Գլխավոր դատավորի սպանությունը» տեսանյութի 1:25–4:01 հատվածը, որը հասանելի է ChurchofJesusChrist.org կայքում։

Նեփին նախ հայտնեց մարդկանց, որ իրենց գլխավոր դատավորը՝ Սեզորամը, սպանվել է (տես Հելաման 8.27–28)։ Մարդիկ մտածեցին, որ «Նեփին, հավանաբար, ինչ-որ մեկի հետ համաձայնության է եկել՝ դատավորին սպանելու համար» (Հելաման 9.16)։ Հետո Նեփին ասաց մարդկանց, որ պետք է գտնել Սեանթումին՝ Սեզորամի եղբորը ու մի քանի հարց տալ նրան։ Նեփին ճշգրտորեն ասաց մարդկանց, թե ինչպես էր պատասխանելու Սեանթումը (տե՛ս Հելաման 9:26–36)։ Դա ստիպեց Սեանթումին խոստովանել, որ ինքն է մարդասպանը, և որ Նեփին անմեղ է (տես Հելաման 9.37)։

Կարդացեք Հելաման 9.37–41 հատվածները և փնտրեք, թե այս իրադարձություններին ականատես լինելուց հետո մարդիկ ինչպես արձագանքեցին։

• Ի՞նչ ճշմարտություն եք սովորում Նեփիի փորձառությունից, որը կարող եք ավելացնել ձեր ցուցակին։

Ճշմարտություններից մեկը, որ գուցե բացահայտել եք, այն է, որ մարգարեների խոսքերը իրականանալու են։

• Ըստ ձեզ՝ ինչո՞ւ է կարևոր իմանալ այս ճշմարտությունը մարգարեների մասին։

• Մարգարեների խոսքերի իրականացման ի՞նչ այլ օրինակներ կան։

Կարող եք կիսվել անձնական օրինակով, որը ցույց է տալիս, թե մարգարեների խոսքերն ինչպես են իրականացել ձեր կյանքում։ Օրինակ՝ գուցե խոստացված օրհնություն է եկել մարգարեի խորհրդին հետևելու արդյունքում։

Լրացուցիչ ճշմարտություններ մարգարեների մասին

Արդեն բացահայտած ճշմարտություններից բացի՝ Նեփին և մարդկանց հետ նրա հաղորդակցումը շատ այլ ճշմարտություններ են ներկայացնում Տիրոջ մարգարեի դերի և նպատակի մասին։ Սուրբ գրությունների հետևյալ հատվածներն ուսումնասիրելիս շարունակեք զարգացնել ճշմարտությունների բացահայտման հմտությունը։ Ձեր բացահայտած ճշմարտությունները ավելացրեք ձեր ցուցակում։

Կարող եք ցուցադրել հետևյալ հղումները և ուսանողներին հանձնարարել զույգերով կամ փոքր խմբերով քննարկել յուրաքանչյուր հատվածը։ Ուսանողներին կարող եք հանձնարարել նաև սուրբ գրությունների տարբեր հատվածներ ուսումնասիրել և ուսուցանել դրանք միմյանց։

• Հելաման 7.29․ Նեփիի հայտարարությունն՝ ուղղված այն մարդկանց, որոնք հավաքվել էին՝ լսելով նրա քարոզը

• Հելաման 8.1–4․ դատավորների արձագանքը Նեփիի խոսքերին

• Հելաման 8.22–23․ Նեփիի պատասխանն այն մարդկանց, որոնք անարգում էին իրեն ու իր խոսքը

• Հելաման 10.5–7․ Տիրոջ զրույցը Նեփիի հետ, երբ նա ավարտեց մարդկանց ուսուցանելը

• Ի՞նչ ճշմարտություններ բացահայտեցիք մարգարեների մասին այս հատվածներում։

Ուսանողների պատասխաններն ավելացրեք գրատախտակին գրված ցանկին։ Հնարավոր է՝ նրանք բացահայտած լինեն նմանատիպ ճշմարտություններ։

• Մարգարեի ուղերձն իր սեփական ուղերձը չէ։ Այն գալիս է Տիրոջից (Հելաման 7.29)

• Մարգարեները չեն ընդունվում ամբարիշտների կողմից (Հելաման 8.1–4)

• Մարգարեները վկայում են Հիսուս Քրիստոսի մասին (Հելաման 8.22–23)

• Տերն Իր մարգարեին կնքման զորություն է տալիս (Հելաման 10.5–7)

Հաջորդ դասերի ընթացքում ուսանողները հնարավորություն կունենան ավելի մանրամասն ուսումնասիրելու այս ճշմարտություններից յուրաքանչյուրը։ Թվարկված առաջին երկու ճշմարտություններն ավելի խորությամբ ուսումնասիրվելու են Հելաման 13–16 գլուխներում։ Թվարկված երրորդ և չորրորդ ճշմարտություններն ավելի խորությամբ ուսումնասիրվելու են այս շաբաթվա հետագա դասերի ընթացքում։

Ապրող մարգարեների կարևորությունը

Ցուցադրեք ստորև բերված ցուցումները և բավարար ժամանակ տվեք ուսանողներին՝ պատասխան պատրաստել դասի սկզբում ներկայացված սցենարի համար։

Պատասխանները պատրաստելիս ուսանողներին օգնելու համար օգտակար կլինի, եթե նրանց խնդրեք նշել պատանիների ամենատարածված դժվարություններից մի քանիսը, որոնց նրանք բախվում են այսօր։ Նրանց պատասխանները կարելի է գրել գրատախտակին՝ մարգարեների մասին բացահայտած ճշմարտությունների կողքին։ Ուսանողները կարող են կիսվել, թե այսօր իրենց բացահայտած ճշմարտություններից մի քանիսն ինչպես կարող են օգնել այն դժվարությունների ժամանակ, որոնց մասին մտածում են։

Վերհիշեք դասի սկզբում ներկայացված սցենարը ձեր ընկերոջ մասին, որը զարմանում էր, թե մեր ժամանակներում ինչու են մարգարեներ անհրաժեշտ։

Ձեր ընկերոջը պատասխան գրեք, որը կբացատրի, թե ինչու է կարևոր, որ Տերը մեր ժամանակներում մարգարեներ կանչի։ Ձեր պատասխանը պետք է առնվազն մեկ պարբերություն լինի։

Հետևյալ հարցերը կարող են օգնել ձեզ գրել ձեր պատասխանը․

• Ձեր բացահայտած ճշմարտություններից մեկը կամ մի քանիսն ինչպե՞ս կարող են օգնել այն դժվարություններում, որոնց մենք բախվում ենք։

• Ո՞ր փորձառություններն են օգնել ձեզ ճանաչել երկրի վրա ապրող մարգարեներ ունենալու օրհնությունը։

Ուսանողներին առաջարկեք որևէ դասընկերոջ հետ կիսվել իրենց պատասխաններով։ Կարելի է նաև դասի սկզբում դասարանի առաջ իրավիճակը դերախաղով ներկայացրած նույն կամավորներին հրավիրել դասարանի առաջ՝ մեկ այլ դերախաղով ներկայացնելու իրավիճակը։

Վկայեք քննարկված ճշմարտությունների մասին և խրախուսեք ուսանողներին գործել դասի ընթացքում իրենց ունեցած հոգևոր տպավորություններով։

Բացատրական և պատմական տեղեկություններ

Ի՞նչ տեղի կունենա, եթե համաձայն չլինեք մարգարեի ասածի հետ

Նախագահ Հարոլդ Բ. Լին (1899–1973) ուսուցանել է.

Նախագահ Հարոլդ Բ. Լի

Ձեզ կարող է դուր չգալ այն, ինչը ներկայացվում է Եկեղեցու իշխանավորի կողմից: Դա կարող է հակասել ձեր քաղաքական հայացքներին։ Դա կարող է հակասել ձեր հասարակական տեսակետներին: Դա կարող է խանգարել ձեր հասարակական կյանքի որոշ բնագավառներին։ … Ձեր և մեր անվտանգությունը կախված է նրանից, թե արդյոք մենք հետևում ենք Տիրոջ կողմից Իր Եկեղեցում նշանակված նախագահողներին, թե ոչ։ … Եկեք ուշադիր հետևենք Եկեղեցու նախագահին (Լի, Հարոլդ Բ․, Համաժողովի զեկույց, հոկտեմբեր 1970 թ․, 152–53:)

Առաջին Նախագահությունից նախագահ Հենրի Բ. Այրինգն ուսուցանել է.

Նախագահ Հենրի Բ. Այրինգ

Երբեմն այնպիսի խորհուրդ կստանանք, որը չենք կարողանա հասկանալ, կամ որը նույնիսկ մանրակրկիտ աղոթելուց և մտածելուց հետո կթվա, թե մեզ չի վերաբերում։ Մի անտեսեք խորհուրդը, այլ ամուր պահեք այն: Եթե որևէ մեկը, ում դուք վստահում եք, ձեզ տա մի բան, որ տեսքից միան ավազի է նման՝ խոստանալով, որ այն պարունակում է ոսկի, դուք կարող եք խելամտորեն պահել այն ձեր ձեռքում որոշ ժամանակ՝ թեթև թափահարելով այն: Ամեն անգամ, երբ ես դա կիրառել եմ մարգարեի խորհուրդների համար, որոշ ժամանակ անց ոսկու փաթիլները սկսել են երևալ, և ես երախտապարտ եմ եղել (Հենրի Բ. Այրինգ, «Անվտանգություն գտնենք խորհրդի մեջ», Ensign, մայիս 1997 թ․, 26)

Ինչո՞ւ են մարգարեները քարոզում ճշմարտություններ, որոնք երբեմն ընդունված չեն;

Նախագահ Ռասսել Մ. Նելսոնն ուսուցանել է․

Նախագահ Ռասսել Մ. Նելսոն

Երբեմն մեզ մեղադրում են ոչ հոգատար լինելու մեջ, երբ սելեստիալ արքայությունում վեհացման համար Հոր պահանջներն ենք ուսուցանում։ Բայց մենք շատ ավելի անհոգատար չէինք լինի արդյո՞ք, եթե չասեինք ճշմարտությունը՝ չուսուցանելով այն, ինչ Աստված է բացահայտել մեզ:

Հենց այս պատճառով է, որ մենք իսկապես խորապես հոգ ենք տանում Աստծո բոլոր զավակների համար, որ մենք հռչակում ենք Նրա ճշմարտությունը: Մենք միշտ չէ, որ կարող ենք ասել մարդկանց այն, ինչ նրանք կամենում են լսել: Մարգարեները հազվադեպ են ժողովրդականություն վայելում: Բայց մենք միշտ պետք է ուսուցանենք ճշմարտությունը: (Ռասսել Մ․ Նելսոն, «Աստծո սերը և օրենքները» [Բրիգամ Յանգ համալսարանի հոգևոր հավաք, 17-ը սեպտեմբերի, 2019 թ․], speeches.byu.edu)

Օժանդակ ուսումնական վարժություններ

Մարգարեին հետևելու տասնչորս դրույթները

Ցուցադրեք նախագահ Էզրա Թաֆտ Բենսոնի (1899–1994) ներկայացրած «Մարգարեին հետևելու տասնչորս դրույթները» տեսանյութը, որով կօգնեք ուսանողներին ավելի շատ ճշմարտություններ հասկանալ մարգարեների մասին։ Ուսանողները կարող են քննարկել, թե ինչու է կարևոր իմանալ և հիշել դասի ընթացքում իրենց բացահայտած և նախագահ Բենսոնի ներկայացրած սկզբունքները։ Ո՞ր սկզբունքները կարող են դժվար լինել մարդկանց համար։ Որո՞նք կարող են հատկապես կարևոր լինել երիտասարդների կողմից հիշվելու համար։ Ինչո՞ւ։

Հելաման 7.17–19 Մարգարեները հորդորում են մարդկանց ապաշխարել

Ուսանողներին առաջարկեք կարդալ Հելաման 7.16 հատվածը և փնտրել, թե ինչն է իրենց համար առավել կարևոր Նեփիի խոսքերում, երբ նա նկարագրում է սատանայի ցանկությունը մարդկանց նկատմամբ։ Ուսանողները կարող են իրենց օրագրում երկու սյունակ կազմել, հետո կարդալ Հելաման 7.17–22, 26–28 հատվածները։ Մի սյունակում նրանք կարող են թվարկել մարդկանց մեղքերը։ Մյուս սյունակում՝ այն հետևանքները, որոնք կլինեն, եթե մարդիկ չապաշխարեն։

Հետևյալ հարցերը կարող են օգնել ձեզ քննարկել ուսանողների գտածը․ Ի՞նչ է ուսուցանում սա մարգարեի կողմից տրված ապաշխարության հրավերի կարևորությունը հասկանալու մասին։ Սրա ընկալումը ինչպե՞ս կարող է օգնել ձեզ ավելի մոտենալ Երկնային Հորը և Հիսուս Քրիստոսին։

Մարգարեի խոսքերն իրականանալու են

Եթե ուսանողներն օգուտ կքաղեն ավելի շատ ժամանակ հատկացնելուց, որպեսզի հասկանան և զգան մարգարեների խոսքերի իրականացման վերաբերյալ ճշմարտությունը, կարող եք առաջարկել նրանց կարդալ այդ մասին վկայող սուրբ գրությունները, օրինակ՝ Եսայիա 7.14, Վարդապետություն և Ուխտեր 1.37 և Վարդապետություն և Ուխտեր 87.1–3։ Կարող եք քննարկել հետևյալ հարցերը․ Մեր օրերի ի՞նչ օրինակներ է ներկայացնում այս ճշմարտությունը։ Այս ճշմարտությունն իմանալը և դրան հավատալը ինչպե՞ս կարող է ազդել մարգարեի հանդեպ ձեր վերաբերմունքի վրա։ Դա ինչպե՞ս կարող է փոխել Երկնային Հոր և Հիսուս Քրիստոսի հետ ձեր հարաբերությունը։