Helamani 8

Profetët Dëshmojnë për Jezu Krishtin

Jezu Krishti

Në një botë ku kaq shumë zëra që na tërheqin në kaq shumë drejtime, Perëndia na ka dhënë profetë për të na ankoruar tek Ai. Kur Nefi u mor në pyetje nga nefitët e ligj rreth arsyes përse kishte folur aq ashpër për ta, ai dëshmoi me guxim për Shpëtimtarin. Ky mësim mund të të ndihmojë të kuptosh se profetët dëshmojnë për Jezu Krishtin dhe kjo mund të të ndihmojë ta ndiesh të vërtetën e dëshmive të tyre.

Theksojeni se si profetët dëshmojnë për Jezu Krishtin. Përgjegjësia kryesore e profetëve është të dëshmojnë për Jezu Krishtin (shihni tek Udhëzuesi për Shkrimet e Shenjta, “Profet”, scriptures.ChurchofJesusChrist.org). Vini në dukje fragmente të shkrimeve të shenjta dhe mësime të tjera profetike që japin dëshmi për cilësitë hyjnore, jetën dhe misionin e Shpëtimtarit. Nxitini nxënësit të marrin parasysh se si dëshmitë profetike ndikojnë në kuptueshmërinë dhe vlerësimin e tyre për Jezu Krishtin.

Përgatitja e nxënësve: Merreni parasysh t’i ftoni nxënësit të kërkojnë një ose më shumë shembuj të profetëve dhe apostujve që dëshmojnë për Jezu Krishtin në një konferencë të përgjithshme të kohëve të fundit.

Veprimtari të Mundshme të të Mësuarit

Dëshmia e një dëshmitari

Merreni parasysh të sillni një frutë të thatë me lëvozhgën e saj, p.sh. një kikirik, arrë ose frutë tjetër të thatë. Fshijeni në dorën tuaj ose në një qese. Thuajuni nxënësve se keni diçka që nuk është parë kurrë nga sytë e njerëzve ose prekur nga duart e njerëzve (fruta e thatë brenda lëvozhgës). Ftojeni një nxënës të vijë dhe ta shohë. Më pas vëreni nxënësin t’i thotë klasës nëse ju po thoni të vërtetën. Pyetini nxënësit nëse ju besojnë dhe përse ju besojnë ose jo. Pasi ta diskutoni si klasë nëse nxënësit ju besojnë, tregojuani atyre frutën e thatë.

Shumica e njerëzve nuk e kanë parë Jezu Krishtin, por shumë vetë besojnë ende tek Ai.

• Cilat janë disa arsye përse njerëzit besojnë te Jezu Krishti?

• Çfarë roli luajnë profetët për të të ndihmuar të besosh te Shpëtimtari?

Dëshmia e profetëve të lashtë

Shërbesa e profetit Nefi u diskutua në mësimin rreth kapitujve te Helamani 7–10. Ky mësim do t’i ndihmojë nxënësit të përqendrohen te mësimet e Nefit te Helamani 8 rreth përgjegjësisë së profetëve për të dëshmuar për Jezu Krishtin. Për t’i ndihmuar nxënësit ta shqyrtojnë kontekstin për mësimet e Nefit te Helamani 8, merreni parasysh ta përmblidhni informacionin vijues.

Mund të të kujtohet se profeti Nefi u profetizoi nefitëve të ligj se do të shkatërroheshin po të mos pendoheshin (shih te Helamani 7:22–29). Shumë nga nefitët u zemëruan me Nefin që foli kundër ligësisë së tyre (shih te Helamani 8:1–7). Nefi i qortoi këta njerëz dhe u tha se po mohonin jo vetëm fjalët e tij, por fjalët e profetëve të kaluar, duke përfshirë Moisiun, që kishte dëshmuar për Jezu Krishtin (shih te Helamani 8:10–13).

Lexo te Helamani 8:13–23, duke kërkuar atë që tha Nefi rreth Moisiut dhe profetëve të tjerë të kaluar. Nëse dëshiron, mund t’i shenjosh emrat e profetëve që përcaktoi Nefi.

• Çfarë kishin të përbashkët të gjithë këta profetë?

Një e vërtetë që mund të mësojmë nga këto vargje është se profetët dëshmojnë për Jezu Krishtin.

Plaku Nil L. Andersen, i Kuorumit të Dymbëdhjetë Apostujve, pohoi:

Plaku Nil L. Andersen

“Roli më i rëndësishëm i profetit të Zotit është të na mësojë për Shpëtimtarin dhe të na udhëheqë drejt Tij. …

Një profet nuk qëndron ndërmjet jush dhe Shpëtimtarit. Përkundrazi, ai qëndron përkrah jush dhe ju tregon rrugën drejt Shpëtimtarit. Përgjegjësia më e madhe dhe dhurata më e çmuar e një profeti për ne është dëshmia e tij e sigurt, dituria e tij e patundur se Jezusi është Krishti.” (Nil L. Andersen, “Profeti i Perëndisë”, Ensign ose Liahona, maj 2018, f. 25, 27)

• Si mendon, përse dhurata më e madhe e një profeti për ne është dëshmia e tij për Jezu Krishtin?

Shembuj të profetëve që dëshmojnë për Jezu Krishtin

Shpenzo kohë për të studiuar disa nga dëshmitë e profetëve për Jezu Krishtin. Ndërsa i studion dëshmitë e tyre, Fryma e Shenjtë mund të dëshmojë për vërtetësinë e fjalëve të tyre në zemrën dhe mendjen tënde.

Ftojini nxënësit të plotësojnë njërën ose të dyja veprimtaritë vijuese, ose mund t’i lejoni ata të zgjedhin se cilën veprimtari do të donin të plotësonin. Përndryshe, mund t’i vendosni nxënësit në grupe dhe t’i caktoni secilit grup njërën nga mundësitë për ta plotësuar. Anëtarë nga secili grup mund të tregojnë më pas se çfarë u bëri përshtypje në dëshmitë që studiuan.

Mundësia A: Profetët e lashtë dëshmuan për Jezu Krishtin

Merreni parasysh ta paraqitni nëpër dhomë emrin e secilit prej profetëve vijues që përmendet te Helamani 8:13–23, vargjet shoqëruese vijuese dhe një figurë të secilit profet (nëse është e mundur). Pasi nxënësit t’i kenë studiuar disa dëshmi, ata mund ta mbajnë shënim çdo ndjenjë ose mbresë që patën ndërsa studiuan dhe t’ia tregojnë ato ndjenja ose mbresa një shoku të klasës.

Lexo të paktën tri nga dëshmitë vijuese nga profetët e përmendur nga Nefi. Bëj një listë të asaj që po mëson nga këto dëshmi rreth Jezu Krishtit.

• Moisiu: Eksodi 15:2; Ligji i Përtërirë 18:15 (shih edhe tek 3 Nefi 20:23–24)

• Abrahami: Abraham 3:22–24; Shtojca e Përkthimit prej Joseph Smith-it, Zanafilla 15:12

• Isaia: Isaia 7:14; 9:6; 53:3–5

• Jeremia: Jeremia 33:14–16; 50:34

• Lehi: 1 Nefi 1:14–15; 2 Nefi 2:6–8

• Nefi, biri i Lehit: 1 Nefi 19:9–11; 2 Nefi 25:19, 23–26

Shqyrtoje listën që shkrove. Merre parasysh ta mbash shënim çdo ide, ndjenjë ose mbresë që pate rreth Shpëtimtarit ndërsa studiove. Shkruaj disa fjali që shpjegojnë se si jeta jote mund të ishte ndryshe nëse profetët nuk do të na i kishin dhënë mësim këto gjëra rreth Jezu Krishtit.

Mundësia B: Profetët e ditëve të mëvonshme dëshmojnë për Jezu Krishtin

Për t’i ndihmuar nxënësit ta plotësojnë këtë mundësi, merreni parasysh t’u ofroni burime, të tilla si disa kopje të botimeve të revistës Liahona për konferencën e përgjithshme.

Merreni parasysh t’u jepni disa nga dëshmitë e profetëve, të përmendura në pjesën “Komente dhe Informacion për Rrethanat” sipas nevojës.

Gjej dy ose më shumë shembuj të profetëve ose apostujve të ditëve të mëvonshme që dëshmojnë për Jezu Krishtin. Ata mund të jenë nga një konferencë e përgjithshme e kohëve të fundit ose nga historia e Kishës. Merre parasysh të përdorësh faqen ChurchofJesusChrist.org ose programin Gospel Library [Biblioteka e Ungjillit] për kërkimin tënd. Mund edhe ta lexosh dokumentin “Krishti i Gjallë: Dëshmia e Apostujve” në ChurchofJesusChrist.org.

Kur nxënësit ta plotësojnë veprimtarinë e tyre, ftojini t’i tregojnë shembujt që gjetën të profetëve që dëshmojnë për Jezu Krishtin. Sigurohuni t’u jepni shumë nxënësve mundësi për të folur. Mund të jetë e dobishme të bëni pyetje si “Cilat nga dëshmitë e profetëve ju kanë lënë mbresa?” ose “Si mendoni, përse është e rëndësishme që kaq shumë profetë kanë dëshmuar për Jezu Krishtin?”

Nëse koha e lejon, mund të jetë gjithashtu e dobishme për nxënësit t’i japin dëshmitë e veta për Jezu Krishtin.

Komente dhe Informacion për Rrethanat

Helamani 8:19–20. Kush ishin Zenosi, Zenoku dhe Eziasi dhe ku mund të lexoj rreth tyre?

Zenosi, Zenoku dhe Eziasi ishin profetë që përmenden në Librin e Mormonit. Mësimet dhe dëshmitë e tyre do të kenë ardhur nga fletët prej tunxhi, të cilat nuk i kemi tani. Profetët e Librit të Mormonit kanë shënuar që secili prej tyre dëshmoi për Jezu Krishtin (shihni te 1 Nefi 19:10; Alma 33:15–16; 34:7; Helamani 8:19–20). Profeti Jakob e atribuoi Zenosin si autorin e shëmbëlltyrës së pemës së ullirit (shihni te Jakobi [LiM] 5:1–77).

Ku mund t’i gjej disa nga dëshmitë e profetëve të ditëve të mëvonshme?

“Living Apostles Testify of Jesus Christ” [“Apostujt e Gjallë Dëshmojnë për Jezu Krishtin”] (2:16): Një përmbledhje e dëshmive të profetëve bashkëkohorë për Jezu Krishtin (në dispozicion në ChurchofJesusChrist.org)

Çfarë mund të mësoj rreth Jezu Krishtit nga profetët në Librin e Mormonit?

Presidenti Rasëll M. Nelson dha mësim:

Presidenti Rasëll M. Nelson

“Kur e lexoni Librin e Mormonit, përqendrohuni te figura kryesore në libër – nga kapitulli i tij i parë deri tek i fundit – Zoti Jezu Krisht, Biri i Perëndisë së Gjallë. …

… [Nefi] e përfytyroi Shëlbuesin e botës, shërbesën e Tij tokësore dhe Kryqëzimin e Tij. …

Profetë të tjerë të mëdhenj të Librit të Mormonit – në mënyrën dhe në kohën e tyre – dëshmuan për hyjninë e Zotit Jezu Krisht. Ndër ta ishin vëllai i Jaredit, Zenoku, Neumi dhe Zenosi. Dëshmitë për Jezu Krishtin që i paraprinë lindjes së Tij në Bethlehem u shënuan gjithashtu nga mbreti Beniamin, Abinadi, Alma Plaku, Alma i Riu, Amuleku, bijtë e Mosias, kapiten Moroni, vëllezërit Nefi dhe Lehi dhe Samuel lamaniti. Siç rezulton nga një vijimësi e pafundme e proklamatave profetike – nga dëshmitë e ‘të gjithë profetë[ve të] shenjtë’ [Jakobi [LiM] 4:4] ‘shumë mijëra vjet para ardhjes së tij’ [Helamani 8:18] – Libri i Mormonit bën deklaratën solemne se Jezusi është Krishti, Shpëtimtari dhe Shëlbuesi ynë.” (Russell M. Nelson, “A Testimony of the Book of Mormon”, Ensign, nëntor 1999, f. 69)

Veprimtari Plotësuese të të Mësuarit

Mbrojtja e mësimeve të Jezu Krishtit dhe profetëve të Tij

Kur Nefi u mor në pyetje nga nefitët e ligj, disa filluan ta mbronin atë (shihni te Helamani 8:7–8). Nxënësit mund të përcaktojnë shembuj të njerëzve që ata i njohin, që ishin të guximshëm dhe të patrembur në dhënien e dëshmive të tyre për Jezu Krishtin dhe profetët e Tij. Ata mund të përfytyrojnë edhe situata me të cilat mund të përballen, në të cilat do t’ju duhej ta mbronin profetin, Kishën dhe Shpëtimtarin.

Veprimtari me referencë‑kryq për mundësinë A

Aftësia e lidhjes së shkrimeve të shenjta së bashku mund t’i ndihmojë nxënësit të lidhin ide të rëndësishme. Merreni parasysh t’i ftoni nxënësit të gjejnë një shembull të një profeti që dëshmon për Jezu Krishtin në secilin prej katër librave brenda veprave tona standarde. Mund t’ua tregoni më pas se si t’i lidhin fragmentet së bashku (për shembull, duke i shkruar referencat e shkrimeve të shenjta në anë ose duke përdorur funksionin e hallkës lidhëse në programin Gospel Library [Biblioteka e Ungjillit]). Nxënësit mund të kthehen te fragmenti i parë që gjetën dhe ta lidhin atë me fragmentin e dytë që gjetën. Më pas mund të kthehen te fragmenti i dytë dhe ta lidhin atë me fragmentin e tretë e kështu me radhë.

Pasi nxënësit t’i kenë lidhur të gjithë fragmentet së bashku, ftojini ata të përzgjedhin një temë ose titull që mund ta shkruajnë në shkrimet e tyre të shenjta për këto referenca‑kryq (për shembull “roli i një profeti” ose “profetët dëshmojnë për Krishtin”).

Profetë të tjerë që dëshmuan për Jezu Krishtin

Mund të jetë e dobishme për nxënësit të gjejnë profetë të tjerë në shkrimet e shenjta që kanë dëshmuar për Jezu Krishtin, krahas profetëve të përmendur nga Nefi te Helamani 8. Ka shumë shembuj kudo në veprat standarde, duke përfshirë Adamin (shihni te Moisiu 6:51–52, 57), Enokun (shihni te Moisiu 7:47), Noeun (shihni te Moisiu 8:23–24), mbretin Beniamin (shihni te Mosia 3:5–11, 17), Abinadin (shihni te Mosia 15:5–9), Alma të Riun (shihni te Alma 7:7–13), Pjetrin (shihni te Veprat e Apostujve 4:8–12) dhe Palin (shihni te Veprat e Apostujve 26:22–23). Ju mund t’ua tregoni këto referenca të shkrimeve të shenjta nxënësve ose t’i ftoni të gjejnë shembujt e tyre në shkrimet e shenjta.