Helamani 10

Zoti e Bekon Nefin

Pas profecive të tij lidhur me vrasjen e kryegjykatësit, Nefi mendoi për gjithçka që Zoti i kishte treguar, por u shkurajua gjithashtu për shkak të ligësisë së popullit. Ndërsa u kthye në shtëpi, ai pati një përvojë mbresëlënëse në të cilën Zoti e bekoi për besnikërinë e tij në bërjen e vullnetit të Tij. Ky mësim mund të të ndihmojë t’i kuptosh të vërtetat nga përvoja e Nefit që mund ta ftojnë drejtimin dhe fuqinë e Zotit në jetën tënde.

Ftojini nxënësit të jenë përgjegjës për të mësuarit e tyre. Ndonëse roli i një mësuesi është i rëndësishëm, nxënësit në fund të fundit janë përgjegjës për vetë arsimimin e tyre. Nxënësit ngrihen shpirtërisht kur e këqyrin fjalën e Perëndisë për të zbuluar për vete të vërtetat rreth Jezu Krishtit dhe ungjillit të Tij. Ndihmojini nxënësit tuaj ta shohin vlerën e reflektimit vetjak, meditimit [përsiatjes] dhe ndërveprimit në orën mësimore.

Përgatitja e nxënësve: Ftojini nxënësit të lexojnë te Helamani 10 dhe të kërkojnë atë që mund të mësojnë nga shembulli i Nefit që mund ta bekojë jetën e tyre.

Veprimtari të Mundshme të të Mësuarit

Të bërit i kualifikuar

Merreni parasysh ta filloni orën mësimore duke e ftuar një nxënës që zotëron një aftësi të veçantë, si të lidhë një kollare, t’ia shpjegojë një nxënësi tjetër se si ta bëjë atë. Pas një përpjekjeje të shpejtë, nxënësi i mësuar mund t’i tregojë më pas nxënësit tjetër se si ta vërë në punë aftësinë. Nëse zgjidhni ta bëni këtë, kaloni te pyetja e dytë që pason.

• A të kujtohet një rast kur mësove diçka nga shembulli i dikujt tjetër? Cila ishte ajo?

• Përse të mësuarit nëpërmjet shembullit mund të jetë veçanërisht i efektshëm?

Sot do të kesh mundësi të mësosh të vërteta nga shembulli i profetit Nefi. Mund të të kujtohet se Nefin e kishin akuzuar në mënyrë të rreme se ishte i përfshirë në vrasjen e kryegjykatësit nefit (shih te Helamani 9:16–20). Nëpërmjet frymëzimit, Nefi e përcaktoi vrasësin dhe e liruan (shih te Helamani 9:20–38). Ndërsa u kthye në shtëpi, Nefi pati një përvojë domethënëse me Zotin që është shënuar te Helamani 10. Tri veprimtaritë vijuese do të ndihmojnë për ta udhërrëfyer studimin tënd të kapitullit.

Merreni parasysh t’ua shpërndani nxënësve fletushkat vijuese dhe t’i ftoni t’i plotësojnë veprimtaritë.

Mund t’i ndani nxënësit në grupe të vogla për ta plotësuar njërën nga veprimtaritë e studimit. Sigurohuni që të caktoni një drejtues diskutimi për secilin grup. Pasi nxënësit të kenë pasur kohë të mjaftueshme për ta plotësuar veprimtarinë e parë të studimit, formoni grupe të reja dhe vërini të plotësojnë një veprimtari tjetër studimi. Ky proces mund të përsëritet derisa nxënësit t’i kenë punuar të tria veprimtaritë e studimit.

Një ide tjetër mund të ishte t’u jepni nxënësve kohë për t’i studiuar materialet nga njëra prej fletushkave në mënyrë individuale dhe të përgatitin një mësim të shkurtër rreth asaj që mësuan. Më pas, nxënësve mund t’u jepen mundësi për t’ia mësuar mësimin e tyre një grupi të vogël, ose disa vullnetarë mund t’ia japin mësimin e tyre klasës.

Veprimtaria e 1‑rë e Studimit: Meditimi [Përsiatja] dhe Zbulesa Vetjake

Çfarë ke mësuar rreth marrjes së zbulesës në jetën tënde? Në pjesën e parë të kapitullit te Helamani 10, ne mësojmë rreth një përvoje që pati Nefi, në të cilën ai mori zbulesë dhe fuqi nga Perëndia. Shembulli i Nefit na mëson se si mund ta rritim aftësinë tonë për të marrë dhe dalluar zbulesë nga Zoti.

Lexo te Helamani 10:1–3, duke kërkuar se çfarë bëri që Nefi të merrte zbulesë nga Zoti.

• Çfarë gjete?

Vër re fjalën duke medituar në vargjet 2 dhe 3. Nëse dëshiron, mund ta shenjosh atë fjalë në shkrimet e tua të shenjta.

Një e vërtetë që mund të mësojmë nga këto vargje është se meditimi [përsiatja] i gjërave të Zotit na përgatit për të marrë zbulesë.

• Si mund t’ia përshkruaje meditimin [përsiatjen] dikujt që nuk është i sigurt se çfarë është?

• Përse meditimi [përsiatja] mund të na ndihmojë të marrim zbulesë?

Presidenti M. Rasëll Ballard, i Kuorumit të Dymbëdhjetë Apostujve, na mësoi:

“Është e rëndësishme të qëndroni të qetë dhe të dëgjoni e ta ndiqni Shpirtin. Ne thjesht kemi tepër shumë shpërqendrime që na e tërheqin vëmendjen, sikurse asnjë kohë tjetër në historinë e botës.

Çdo njeri ka nevojë për kohë që të meditojë e mendojë thellë. Edhe Shpëtimtari i botës, gjatë shërbesës së Tij në vdekshmëri, gjeti kohë për ta bërë këtë.” (M. Rasëll Ballard, “Rrini të Qetë dhe Dijeni se Unë Jam Perëndi” [takimi shpirtëror i Sistemit Arsimor të Kishës për të rinjtë në moshë madhore, 4 maj 2014], broadcasts.ChurchofJesusChrist.org)

• Cilat janë disa nga shpërqendrimet që mund ta bëjnë të vështirë të meditosh [përsiatësh] gjëra shpirtërore?

• Cilat janë disa nga “gjërat e Zotit” që mund të shpenzosh kohë t’i meditosh [përsiatësh]?

• Çfarë përvojash ke pasur apo di në të cilat meditimi [përsiatja] çoi në marrjen e zbulesës?

Mendo për një synim që mund të vendosësh për ta zbatuar këtë të vërtetë në jetën tënde. Merre parasysh ta shënosh synimin tënd në ditarin tënd të studimit.

Veprimtaria e 2‑të e Studimit: Përpjekja për të Bërë Vullnetin e Zotit Pa u Lodhur

Reflekto për një kohë kur të kanë kërkuar të bëje diçka që dukej shumë e vështirë. Zoti i dha profetit Nefi urdhërime të vështira kur Ai i kërkoi atij t’u bënte thirrje nefitëve të ligj për pendim. Edhe pse ishte e vështirë, Nefi punoi me zell për ta ndjekur vullnetin e Zotit.

Lexo te Helamani 10:4–5 dhe kërko atë që i tha Zoti Nefit si rrjedhojë e besnikërisë së tij.

• Cilat janë disa nga fjalët ose frazat që të bëjnë përshtypje në këto vargje? Përse?

Një e vërtetë që mund të mësojmë nga këto vargje është se kur kërkojmë të bëjmë vullnetin e Zotit dhe i shërbejmë Atij pa u lodhur, Zoti do të na bekojë në shumë mënyra.

• Çfarë mund ta bëjë të vështirë të duash të bësh vullnetin e Zotit?

• Çfarë mund të mbash mend rreth Zotit që do ta bënte më të lehtë të ndjekësh vullnetin e Tij dhe jo tëndin?

Togfjalëshi pa u lodhur që përdoret në këto vargje do të thotë me zell.

Mund të jetë e dobishme t’i ftoni nxënësit të lexojnë te Doktrina e Besëlidhje 64:33 dhe një mësim shoqërues që Zoti ka dhënë rreth të qenit i palodhur. Nxënësit mund ta shkruajnë këtë referencë pranë vargut te Helamani 10:4–5 në shkrimet e tyre të shenjta.

• Cilat janë disa nga mënyrat se si Jezu Krishti i shërbeu Atit Qiellor pa u lodhur?

• Si mund t’i shërbesh Atit Qiellor dhe Jezu Krishtit pa u lodhur në kohën tonë?

Mendo për një synim që mund të vendosësh për të kërkuar vullnetin e Atit Qiellor dhe për t’i shërbyer Atij pa u lodhur. Merre parasysh ta shënosh synimin tënd në ditarin tënd të studimit.

Veprimtaria e 3‑të e Studimit: Fuqia Vulosëse

Përfytyro sikur Zoti të jep fuqinë për të bërë çfarëdo gjëje që i kërkove Atij. Profetit Nefi, Perëndia i tha se do t’i jepte gjithçka që Nefi dëshironte për shkak se ai “nuk do të kërko[nte] atë që është në kundërshtim me vullnetin [e Perëndisë]” (Helamani 10:5).

Lexo te Helamani 10:7, duke kërkuar njërën nga gjërat që Zoti i dha Nefit fuqinë për ta bërë.

Fuqia që përshkruhet te vargu 7 quhet fuqia vulosëse. Nga ky varg, mësojmë se fuqia vulosëse lidh dhe zgjidh në tokë dhe në qiell. Mund të jetë e dobishme të dish se të lidhësh do të thotë të bashkosh dhe të zgjidhësh do të thotë të shkëputësh ose prishësh.

Merreni parasysh t’i shkruani vargjet që renditen në paragrafin vijues në tabelë dhe t’i ftoni nxënësit t’i shkruajnë ato si referenca‑kryq pranë vargut te Helamani 10:7 në shkrimet e tyre të shenjta.

Fuqia vulosëse që përmendet në vargun 7 është e njëjta fuqi vulosëse që mbahej nga Elia (shih te 1 Mbretërve 17:1), Pjetri dhe apostujt (shih te Mateu 16:15–19; 18:18) dhe Jozef Smithi (shih te Doktrina e Besëlidhje 132:46). Çelësat e po kësaj fuqie mbahen sot nga Presidenti i Kishës së Jezu Krishtit të Shenjtorëve të Ditëve të Mëvonshme dhe ata të cilëve ai mund t’ua delegojë. Me këtë fuqi, familjet mund të vulosen së bashku përgjithmonë nëpërmjet ordinancave të tempullit.

• Si mendon, përse Ati Qiellor dëshiron që ne të bëjmë besëlidhje që zbatohen në këtë jetë dhe tjetrën?

• Në ç’mënyra je bekuar nga njohuria se familjet mund të vulosen përjetësisht?

• Si ndikon njohuria se familjet mund të bashkohen përjetësisht në të menduarit apo zgjedhjet e tua tani?

Pasi nxënësit t’i kenë plotësuar veprimtaritë e të mësuarit, merreni parasysh të ftoni nxënës të shumtë të tregojnë diçka që e ndien se ishte veçanërisht e rëndësishme ose kuptimplotë nga studimet e tyre. Nëse koha e lejon, mund të jetë gjithashtu e dobishme të lexoni te Helamani 10:11–19 për të parë atë që bëri Nefi pas kësaj përvoje të shenjtë me Zotin.

Dëshmoni për të vërtetat që u studiuan sot dhe nxitini nxënësit të veprojnë sipas çdo mbrese shpirtërore që patën.

Komente dhe Informacion për Rrethanat

Si mund ta kuptoj dhe përdor më mirë përsiatjen?

Presidenti Henri B. Ajring, i Presidencës së Parë, shpjegoi:

“Por kur përsiatemi, ne ftojmë zbulesë nga Shpirti. Përsiatja, për mua, është mendimi dhe lutja që bëj, pasi i lexoj e i studioj me kujdes shkrimet e shenjta.” (Henri B. Ajring, “Shërbeni me Shpirtin”, Liahona, nëntor 2010, f. 60)

Plaku Dejvid A. Bednar, i Kuorumit të Dymbëdhjetë Apostujve, dha mësim:

“Fjala përsiat do të thotë të marrësh parasysh, të mendosh thellë, të reflektosh ose mendosh për diçka. Përsiatja e shkrimeve të shenjta, atëherë, është reflektimi me nderim mbi të vërtetat, përvojat dhe mësimet që përmbahen në veprat standarde. Procesi i përsiatjes kërkon kohë dhe nuk mund të bëhet me detyrim, nxitim ose ngut. …

Të shkruarit e asaj që mësojmë, mendojmë dhe ndiejmë ndërsa studiojmë shkrimet e shenjta është një formë tjetër e përsiatjes dhe një ftesë e fuqishme ndaj Frymës së Shenjtë për udhëzim të vazhdueshëm.” (David A. Bednar, “Because We Have Them before Our Eyes”, New Era, prill 2006, f. 6–7)

Si mund ta vendos vullnetin e Zotit mbi vullnetin tim?

Plaku Dejll G. Renland, i Kuorumit të Dymbëdhjetë Apostujve, shpjegoi:

“Kur e kemi parasysh mirësinë e Atit tonë Qiellor dhe Jezu Krishtit, mirëbesimi ynë tek Ata rritet. Lutjet tona ndryshojnë ngaqë e dimë se Perëndia është Ati ynë dhe ne jemi fëmijët e Tij. Ne nuk kërkojmë ta ndryshojmë vullnetin e Tij, por që ta përputhim vullnetin tonë me vullnetin e Tij dhe të sigurojmë për veten tonë bekimet që Ai dëshiron të na i japë, me kushtin që ne t’i kërkojmë ato. Ne përpiqemi të jemi më të përulur, më të pastër, më të palëkundur, më shumë si Krishti. Këto ndryshime na kualifikojnë për bekime të tjera qiellore.” (Dejll G. Renland, “Kini Parasysh Mirësinë dhe Madhështinë e Perëndisë”, Liahona, maj 2020, f. 43)

Cilët janë disa shembuj bashkëkohorë të të vërtetave të studiuara sot?

Plaku D. Tod Kristoferson, i Kuorumit të Dymbëdhjetë Apostujve, dha mësim rreth dashurisë dhe kohës së Perëndisë në dhënien e zbulesës.

Materiali filmik vijues ilustron vlerën e fuqisë vulosëse në dispozicion në tempujt e Zotit.

Veprimtari Plotësuese të të Mësuarit

Helamani 10:11–12. Të përgjigjemi menjëherë ndaj drejtimit të Zotit

Mendoni rreth theksimit të shembullit të një përgjigjeje të shpejtë të Nefit ndaj drejtimit të Zotit. Merreni parasysh t’i ftoni nxënësit të lexojnë te Helamani 10:11–12 dhe të përcaktojnë atë që Zoti e urdhëroi Nefin të bënte dhe se si reagoi ai. Pyetjet vijuese mund të jenë të dobishme për diskutimin e këtyre vargjeve:

Kur e keni parë dikë t’i përgjigjet menjëherë drejtimit të Zotit?

Cilët janë disa shembuj të mënyrave se si një adoleshent mund t’i përgjigjet menjëherë drejtimit të Zotit?

Helamani 10:2–3. Përsiatja na përgatit për zbulesë

Për ta theksuar më tej parimin se përsiatja na përgatit për zbulesë, mund t’i vini nxënësit të përcaktojnë të njëjtin model te 1 Nefi 11:1; Doktrina e Besëlidhje 76:19 dhe Doktrina e Besëlidhje 138:1–2, 11.