3 Nifae 17–19

Vaaiga Aoao

Ina ua uma ona aoao atu le motu o tagata, sa ta’u atu e le Faaola ua oo i le taimi e alu ai o Ia. Ae ui i lea, o o latou loimata ma moomooga mo Ia ina ia nofo umi teisi na ootia ai Lona loto. I se faaaliaga ofoofogia o le agaalofa, sa Ia faamaloloina ai i latou, tatalo faatasi ma i latou, ma faamanuia taitoatasi a latou fanau. Na Ia aoaoina i latou e uiga i le sauniga o le faamanatuga, ma sa Ia faaali atu ia i latou le ala e tatalo ai. Ona Ia tuumuli ai lea, ma o le aso na sosoo ai, na toe faapotopoto ai le motu o tagata. Sa papatisoina i latou ma sa faatumulia i le Agaga Paia, ma sa auauna atu agelu ia i latou. Sa toe faaali atu Iesu ma faaauau pea ona aoao i latou.

Saunia e Aoao Atu

O nei faamatalaga e tuuina atu ai i faiaoga ni manatu o mea atonu e manaomia ona muai saunia mo lesona taitasi.

3 Nifae 17

Faamoemoega o le lesona: O lenei lesona e mafai ona fesoasoani i tagata aoga ia lagona le agaalofa o Iesu Keriso mo i latou.

• Sauniuniga a le tagata aoga: Valaaulia tagata aoga e mafaufau i taimi na latou lagonaina ai le alofa mutimutivale, agaalofa, po o le alofa mai le Atua. E mafai ona saunia tagata aoga e faasoa mai pe na faapefea e nei aafiaga ona aafia ai a latou sootaga ma Ia.

• Vitio: “O loo Auauna Atu Iesu Keriso ma Agelu ma le Agaalofa” (11:59; matamata mai le faailo taimi 0:12 i le 1:30 ma le 1:30 i le 11:45)

• Anotusi e faaali atu: O poloka mau mo tagata aoga e faataitai ai le vaai faalemafaufau

• Fautuaga faafaiaoga faavitio: Ina ia fesoasoani i tagata aoga e faataitai le vaai faalemafaufau i mea na faia e le Faaola i le 3 Nifae 17:7–25, e mafai ona e tuuina i luga sootaga i vitio ma faailo taimi. Afai e mananao i ai tagata aoga, e mafai ona latou tapeina a latou faaleotele leo ma tape a latou meapueata a o latou matamata i vitio. A uma ua lava se taimi, valaaulia tagata aoga e faasoa mai po o le fea o taimi sa sili ona i ai se aafiaga loloto ia i latou.

3 Nifae 18:1–14

Faamoemoega o le lesona: O lenei lesona e mafai ona fesoasoani i tagata aoga ia maua ni aafiaga taua o le manatuaina o le Faaola a o latou aai ma feinu i le faamanatuga.

• Sauniuniga a le tagata aoga: Valaaulia tagata aoga e mafaufau loloto pe o le a le anoa o o latou aafiaga i le faamanatuga. Faamalosi’au atu i tagata aoga e mafaufau loloto i mea e mafai ona latou faia latou te alualu ai i luma.

• Vitio: “Ua Faailoa Atu e Iesu Keriso le Faamanatuga i Tagata” (10:49; matamata mai le faailo taimi 0:12 i le 6:12)

• Anotusi e faaali atu: O le iloiloga a le tagata lava ia e faatatau i le faamanatuga

• Fautuaga faafaiaoga faavitio: Mafaufau e faaaoga le polokalama o le laupapa paepae e fatu ai le siata e uiga i le i ai o se aafiaga e sili atu ona anoa o le faamanatuga. Lisi tali a tagata aoga i itu taitasi o le siata.

3 Nifae 18:15–39; 19:19–29

Faamoemoega o le lesona: O lenei lesona e mafai ona fesoasoani i tagata aoga e mulimuli ai i aoaoga ma faataitaiga a Iesu Keriso ia tatalo e le aunoa ma ia faia ni tatalo e sili atu ona anoa.

• Sauniuniga a le tagata aoga: Valaaulia tagata aoga e faitau pe faalogologo i le saunoaga a Peresitene M. Russell Ballard “Ia Outou Mataala ma Tatalo e Le Aunoa” (Ensign po o le Liahona, Nov. 2020, 77–79), ma vaavaai mo upumoni e mafai ona fesoasoani ia i latou i a latou tatalo faaletagata lava ia.

• Anotusi e faaali atu: O le fuaiupu lenei e tusia i luga o le laupapa: Afai ou te manao e aoao e uiga i le , o le a ou mulimuli i le faataitaiga a ona .

• Vitio: “Ua Auauna Atu le Au Soo ma ua Tatalo Iesu Keriso mo Tagata” (7:30; matamata mai le faailo taimi 3:05 i le 7:18)

• Fautuaga faafaiaoga faavitio: Valaaulia tagata aoga e faaaoga le matapule o talanoaga e faauma ai fuaiupu “E mafai ona ou mulimuli i aoaoga a le Faaola e uiga i le tatalo e ala i le …” ma le “E mafai ona ou mulimuli i le faataitaiga a le Faaola i le tatalo e ala i le …”

3 Nifae 19

Faamoemoega o le lesona: O le faamoemoega o lenei lesona o le fesoasoani lea i tagata aoga ia malamalama atili i le auala e maua ai faamanuiaga a le Agaga Paia.

• Sauniuniga a le tagata aoga: Mafaufau e valaaulia tagata aoga e suesue le “Ua saili e soo o Iesu Keriso le meaalofa o le Agaga Paia” i le otootoga o suesuega mo le 3 Nifae 17–19 i le Sau, Mulimuli Mai ia te A’u—Mo le Aiga ma le Ekalesia: Tusi a Mamona 2024 ma ia o mai saunia e faasoa mai mea sa latou aoaoina ma lagonaina a’o latou faia o lea.

• Vitio: “Mauaina o le Agaga Paia” (2:56)

• Fautuaga faafaiaoga faavitio: Mafaufau e tofi le afa o au tagata aoga e fai le gaoioiga A ma le isi afa e fai le gaoioiga E. Fai atu i tagata aoga e saunia e faasoa atu mea na latou aoaoina i se tagata o le vasega. A uma ua lava se taimi e suesue ai, vaevae tagata aoga i ni potu ina ia mafai ona latou aoao atu le tasi ma le isi. Afai e mafai, faapaga tagata aoga sa suesue i gaoioiga eseese.

Iloiloga 20 o le Atamai i Aoaoga Faavae

Faamoemoega o le lesona: O lenei lesona o le a tuu atu ai i tagata aoga se avanoa e tauloto ai mau o le atamai i aoaoga faavae ma a latou fasifuaitau autu o mau ma taulotoina ai fuaitau atoa.

• Sauniuniga a le tagata aoga: Valaaulia tagata aoga e iloilo fuaitau faaiu e 12 o le atamai i aoaoga faavae o le Tusi a Mamona ma filifili se tasi (po o ni nai fasifuaitau autu o mau) latou te lagona o le a aoga mo i latou e tauloto. Fai atu ia i latou e o mai saunia e faasoa mai ni tulaga e ono fesoasoani ai le taulotoina o lenei fuaitau (po o nei fasifuaitau) ia i latou ma pe aisea foi.

• Anotusi e faaali atu: O le siata o mau o le atamai i aoaoga faavae mai ia Alema e oo atu ia Moronae

• Fautuaga faafaiaoga faavitio: Mafaufau e vaevae tagata aoga i ni potu e faataitai ai le taulotoina o mau o le atamai i aoaoga faavae. O se tasi o auala e mafai ona latou faataitai ai o le toe fai o le fasifuaitau autu o le mau po o le fuaitau atoa e ala i le fesuia’i o upu.