3 Nifae 18:1–14

“E Fai ma Faamanatuga ia te A’u”

E masani ona tatou maua avanoa e aai ma feinu ai i le faamanatuga. I le 3 Nifae 18, na aoao mai ai e Iesu le ala e mafai ai e le faamanatuga ona faamanuiaina o tatou olaga ma faatonuina le ala e faatino ai lenei sauniga. O lenei lesona e mafai ona fesoasoani ina ia e maua ni aafiaga anoa i le manatuaina o le Faaola a o e ai ma inu i le faamanatuga.

Fesoasoani i tagata aoao ia maua se sootaga vavalalata i upumoni o le talalelei. Atonu e faigata i nisi tagata aoga ona vaai pe faapefea ona fesootai le talalelei i o latou olaga i aso uma. Saili ma le agaga tatalo ni auala e fesoasoani ai ia i latou ia lagona o mea o loo latou aoaoina e anoa ma aoga i o latou tulaga patino, fesili, ma manaoga.

Sauniuniga a le tagata aoga: Valaaulia tagata aoga e mafaufau loloto pe o le a le ānoa o o latou aafiaga i le faamanatuga. Faamalosi’au atu i tagata aoga e mafaufau loloto i mea e mafai ona latou faia latou te alualu ai i luma.

Gaoioiga e Mafai Ona Aoao Ai

O se sootaga malosi

O le manatu lenei e mafai ona fesoasoani i tagata aoga e mafaufau ai po o a mea o loo fausia ai i luga ia sootaga malolosi. O lenei faagasologa o manatu e mafai ona fesoasoani i tagata aoga e toe manatunatu ai i la latou sootaga ma le Faaola ma saili ai auala e faalatalata atili atu ai ia te Ia. O se tasi o auala e faia ai lenei mea e ala lea i le faamanatuga.

Mafaufau i nisi o tagata e te lagona le latalata tele i ai ma maua se sootaga malosi ma i latou.

• O le a se mea ua e faia pe na latou faia e faamalosia ai na sootaga?

Mafaufau la po o le a se latalata o e lagonaina i le Faaola.

• O le a sou manatu o le a se mea e mafai ona fesoasoani ia te oe e faamalosia ai lau sootaga ma le Faaola?

A o e suesue i le asō, valaaulia le Agaga Paia e aoao oe i le auala e faalatalata atili atu ai i le Faaola ma faamalosia ai lou sootaga ma Ia.

Ua faatuina e Iesu Keriso le faamanatuga

Sa faatumulia le Faaola i le agaalofa mo tagata ina ua Ia silafia lo latou naunau mo Ia e nofo umi faatasi ma i latou (tagai i le 3 Nifae 17:1–6). Ina ua uma ona faamanuia tamaiti ma e mama’i ma puapuagatia, sa saunia e le Faaola se ala mo tagata e maua ai pea Lona Agaga e faatasi ma i latou.

Faitau le 3 Nifae 18:1–11, ma vaavaai po o le a le mea na faia e le Faaola.

E mafai ona e mafaufau e tuu atu i se vaega se tasi o tagata aoga e faitau le 3 Nifae 18:1–7 ma se isi e faitau le 3 Nifae 18:8–11. Valaaulia tagata aoga e mafaufau i ni a latou fesili o i ai i uiga o fuaiupu latou te faitauina po o le sauniga o le faamanatuga. Afai e manaomia, e mafai ona e maua faamatalaga aoga i Autu o le Talalelei, “Faamanatuga,” topics.ChurchofJesusChrist.org.

Mafaufau e faaali le vitio “Ua Faailoa atu e Iesu Keriso le Faamanatuga i Tagata,” o loo maua i le ChurchofJesusChrist.org, mai le faailo taimi 0:12 i le 6:12 pe a uma ona faitau e tagata aoga ia fuaiupu pe a o latou mulimuli ai. O fesili nei e mafai ona fesoasoani i se talanoaga pe a uma le vitio: O le a se mea e tumatila ia te oe? O le a sou manatu i lagona o tagata a o latou aai ma feinu? Aisea? O le a sou manatu o le a se eseesega o lou aafiaga pe ana faapea o loo aveina atu e le Faaola le faamanatuga ia te oe?

• O le a se mea na e maua e uiga i le faamanatuga mai aoaoga a le Faaola?

• O le a le mea ua folafola mai e le Faaola i tatalo o le faamanatuga pe afai tatou te manatua pea o Ia?

Atonu e te mafaufau e faailoga le mataupu faavae o loo i le 3 Nifae 18:7, 11 e faapea, a o tatou aai ma feinu i le faamanatuga ma manatua pea le Faaola, o le a tatou maua Lona Agaga e faatasi ma i tatou.

Ina ua faasino mai Iesu Keriso ia i tatou e mauaina Lona Agaga e faatasi ma i tatou, o loo Ia faatatau atu i le meaalofa o le Agaga Paia.

• O a nisi o auala e mafai ai ona tatou manatua pea le Faaola i o tatou olaga i aso taitasi? E mafai faapefea e le manatuaina pea o le Faaola ona fesoasoani ia i tatou ia maua le Agaga Paia e faatasi ma i tatou?

• E mafai faapefea e le i ai o le Agaga Paia e faatasi ma oe ona faamanuiaina ai lou olaga i le taimi nei?

O lo tatou aafiaga i le faamanatuga

Mafaufau e tusi nei aitema o le sailiiliga i luga o le laupapa po o luga o ni pepa. E mafai ona tali mai tagata aoga i le sailiiliga ia latou api talaaga; o le a le faasoaina atu a latou tali.

Mafaufau pe mafai faapefea ona faamalosia lou sootaga ma le Faaola pe afai e tele atu ni ou aafiaga anoa i le ai ma inu i le faamanatuga. Tali atu i faamatalaga taitasi i “taimi uma,” “o nisi taimi,” “e seāseā,” po o le “leai lava.”

1. Ou te faaaluina se taimi a o lei amata le lotu e saunia ai mo le faamanatuga.

2. I le taimi o le faamanatuga, ou te taumafai e manatua Iesu Keriso.

3. O lo’u aafiaga i le faamanatuga e aafia ai le ala ou te amio ai i le aluga o le vaiaso.

O le gaoioiga lenei e mafai ona fesoasoani i le autalavou e fatufatu ai ni auala anoa e manatua ai Keriso i le taimi o le faamanatuga. Mafaufau e fatu le siata lenei i luga o le laupapa ma valaaulia tagata aoga e tusi ai tali. O nisi tagata aoga atonu ua i ai ni manatu mo mea e fesoasoani ia i latou e manatua ai le Faaola. Fai atu i tagata aoga e faasoa mai mea ua uma ona latou faia e fesoasoani e faatupu ai ni manatu.

E mafai foi e tagata aoga ona faamaea se siata e sili atu ona patino i a latou api faamaumau mo suesuega. E mafai ona latou pueina ata o a latou siata mulimuli ane o se faamanatu pe a toe aai ma feinu i le faamanatuga.

O se aafiaga e sili atu ona anoa i le faamanatuga

• O le a se mea ou te manao ia manatua e uiga ia Iesu Keriso?

  Mafaufau i tulaga nei:

  • O mea na Ia puapuagatia ai

  • O mea ua Ia faia mo a’u po o isi ou te iloa

• E mafai faapefea ona ou saunia mo le faamanatuga?

• O le a se mea e mafai ona ou faia i le taimi o le faamanatuga e manatua ai Iesu Keriso?

O folafolaga o le aai ma feinu i le faamanatuga

Faitau le 3 Nifae 18:12–14, ma vaavaai mo mea na folafola atu e le Faaola ia i latou o e manatuaina o Ia ma aai ma feinu i le faamanatuga.

• O le a sou manatu o le a le uiga o le fausia i luga o le papa a le Faaola?

  Afai e manaomia e tagata aoga le malamalama i le uiga o le fausia i luga o le papa a le Faaola, e mafai ona e faamalamalama atu o lona uiga tatou te osia ma tausia feagaiga ma Ia, saili e mulimuli i Lana faataitaiga, ma o se taunuuga e olioli i faamanuiaga o Lona alofa mutimutivale ma le malosi.

• E mafai faapefea e le aai ma feinu i le faamanatuga ona fesoasoani ia i tatou e fausia i luga o le papa a le Faaola?

• O le a se mea e mafai ona e faia ia atili anoa ai le ai ma inu i le faamanatuga i vaiaso taitasi?

Molimau atu e uiga i le auala e mafai ai e le faamanatuga ona fesoasoani ia i tatou e fausia o tatou olaga i luga o le papa a le Faaola. Mafaufau e faasoa atu se mea e te faia ina ia anoa ai le faamanatuga mo oe. Fai i le vasega e mafaufau loloto ma faasoa mai pe o a faamanuiaga e mafai ona latou maua pe afai latou te manatua le Faaola a o latou sauniuni mo le ma aai ma feinu i le faamanatuga.

Manatu ma Talaaga o Faamatalaga

3 Nifae 18:7, 11. O le a se mea e mafai ona atili anoa ai lo’u aafiaga i le faamanatuga?

Na aoao mai Elder Peter F. Meurs o le Fitugafulu:

Ou te valaaulia i tatou uma ina ia mafaufau i ni auala se lima e faateleina ai le aafiaga ma le malosi o la tatou auai e le aunoa i le sauniga paia o le faamanatuga, o se sauniga e mafai ona fesoasoani ia i tatou e avea ma tagata paia.

1. Saunia Mamao. …

2. Ia Vave Taunuu. …

3. Usu ma Aoao mai Upu o le Pese Faamanatuga. …

4. Auai Faaleagaga i Tatalo o le Faamanatuga. …

5. Mafaufau ma Manatua o Ia ao Tufaina mai ia Faatusa o le Faamanatuga. …

Ou te molimau atu i le tele naua o faamanuiaga o loo avanoa mo i tatou pe a faateleina a tatou sauniuniga ma lo tatou auai faaleagaga i le sauniga o le faamanatuga. (Peter F. Meurs, “E Mafai Ona Fesoasoani le Faamanatuga ia i Tatou ia Avea ma Tagata Paia,” Liahona, Nov. 2016, 85–87)

Ina ia aoao pe mafai faapefea e nei auala e lima ona faia lou aafiaga o le faamanatuga ia sili atu ona mamana, faitau pe matamata i le “E Mafai Ona Fesoasoani le Faamanatuga ia i Tatou ia Avea ma Tagata Paia,” o loo maua i le ChurchofJesusChrist.org.

3 Nifae 18:28–29. O le a se mea e mafai ona ou faia pe afai ou te lagona le le agavaa e ai ma inu i le faamanatuga?

“E taua le manatua e le manaomia ona e atoatoa ina ia e ai ai ma inu i le faamanatuga, ae e tatau ona i ai sou agaga o le lotomaualalo ma le salamo i lou loto” (Faamaoni i le Faatuatua [2004], 148). I le tele o tulaga e le o aofia ai ni agasala matuia, afai na e manatunatu i au amioga ma le naunau ma le lotomaualalo ma le faamaoni e salamo ma mulimuli i le Faaola, e tatau ona e ai ma inu i le faamanatuga. Ona mafai lea ona e iloa le aafiaga o le faamamaina o lenei sauniga ma faafou lau feagaiga e tauave i ou lava luga le suafa o Iesu Keriso ma tausi Ana poloaiga. Afai e i ai ni au fesili, talanoa i lou epikopo” (“When Should I Not Partake of the Sacrament?,” New Era, Nov. 2017, 48).

Na aoao mai Elder John H. Groberg o le Fitugafulu:

O le a le uiga o le aai ma feinu ma le tatau i le faamanatuga? Pe e faapefea ona tatou iloa tatou te le agavaa?

Afai tatou te mananao e faaleleia i tatou lava (o le salamo lea) ma e lē o i lalo o se vaavaaiga a le perisitua, o lona uiga, i lo’u lava manatu, o loo agavaa i tatou. Ae afai tatou te lē fia salamo ma faaleleia, ma afai tatou te lē naunau e mulimuli i le taitaiga a le Agaga, e ao ona tatou fesili: Pe o tatou agavaa ea e tagofia le faamanatuga, pe o tatou tauemuina ea le faamomoega tonu o le faamanatuga, o le a avea lea ma sui o le salamo patino ma le faaleleia? (John H. Groberg, “The Beauty and Importance of the Sacrament,” Ensign, Me 1989, 38)

Gaoioiga Faaopoopo e Aoao Ai

3 Nifae 18:1–2. Saunia e talia le faamanatuga

O mea nei e mafai ona fesoasoani i tagata aoga e saunia ai e aai ma feinu i le faamanatuga.

I le 3 Nifae 18:1–2, tatou te vaai ai na faia e le Faaola se taumafaiga e saunia tagata e talia le faamanatuga. Sa ia valaaulia muamua le motu o tagata e nonofo i lalo. Afai e te manao e talanoaina atili lenei manatu, atonu e fesoasoani le faamanatu i tagata aoga e mafai ona latou saunia mo le faamanatuga i le Aso Sa e ala i le faia o mea i le Aso Toonai. Fai atu fesili i tagata aoga e pei o nei:

“O a nisi o sauniuniga e mafai ona e faia i le Aso Toonai ina ia mafai ai ona faatotonugalemu atili le Aso Sa ia Keriso?”

“O a ni suiga e mafai ona e faia i lau faiga masani a o lei amataina le lotu e fesoasoani ia te oe e saunia ai e manatua le Faaola i le taimi o le faamanatuga?”

Viiga o le faamanatuga

Ina ia fesoasoani i tagata aoga ia malamalama pe mafai faapefea e viiga o le faamanatuga ona fesoasoani ia i latou e manatua ai le Faaola, valaaulia tagata aoga e sue se viiga o le faamanatuga e anoa ia i latou. Talanoaina le taua o le viiga o le faamanatuga ma pe mafai faapefea ona fesoasoani ia i tatou e manatua ai le Faaola. Fautuaina le vasega e usu viiga o le faamanatuga i le lotu.

Ia manatua pea o Ia.

O mea nei e mafai ona fesoasoani i tagata aoga e maua ai manatu o mea e manatua e uiga i le Faaola.

Talanoaina mea e taumafai tagata aoga e manatua e uiga i le Faaola pe a latou aai ma feinu i le faamanatuga. E mafai foi ona outou talanoaina pe mafai faapefea e tagata aoga ona manatua mea na faia e le Faaola mo i latou lava ia.

E mafai foi ona outou faitau ma talanoaina vaega o le “Tou te Faia le Mea Nei e Fai ma Faamanatuga ia te A’u,” o se saunoaga a Elder Jeffrey R. Holland o le Korama a Aposetolo e Toasefululua (Ensign, Nov. 1995, 67–69), pe matamata le vitio mai le faailo taimi 10:35 i le 17:12.

3 Nifae 18:12–14. Fausia i luga o le papa

Mafaufau e faafesootai le 3 Nifae 18:12–14 ma le Helamana 5:12. Fai atu i se tagata o le vasega e faitau leotele le Helamana 5:12 , ma talanoaina mea e talitutusa ai fuaiupu e lua. Talanoaina pe faapefea ona fesoasoani le tagofia o le faamanatuga i vaiaso taitasi e avea ai le Faaola ma faavae o olaga o tagata aoga.