3 Nifae 19

“Sa Faatumuina i Latou i le Agaga Paia”

Sa leai se mea na sili atu ona mananao i ai soo sa Nifaē e toasefululua nai lo le mauaina o le mafutaga a le Agaga Paia. O le mafuaaga lea o a latou tatalo i le Tama Faalelagi ina ua uma ona faaiuina e le Faaola le uluai aso o Lana galuega ia i latou. O le a le mea e tatau ona tatou faia ia maua ai le Agaga Paia e faatasi ma i tatou? E mafai faapefea ona tatou olioli i Lana mafutaga i o tatou olaga? O le faamoemoega o lenei lesona o le fesoasoani lea ia te oe ia malamalama atili i le auala e maua ai faamanuiaga a le Agaga Paia.

Fesoasoani i tagata a’oa’o ina ia aoaoina e le Agaga Paia. Mo tagata a’oa’o ina ia aoaoina e le Agaga Paia, e tatau ona i ai se siosiomaga talafeagai e aoao ai. O le faatulagaga o nofoa i le potuaoga ma au fegalegaleaiga lelei ma tagata aoga e mafai ona fesoasoani e saofagā i se siosiomaga e valaaulia ai le mafutaga a le Agaga Paia.

Sauniuniga a le tagata aoga: Mafaufau e valaaulia tagata aoga e suesue le “Ua saili e soo o Iesu Keriso le meaalofa o le Agaga Paia” i le otootoga o suesuega mo le 3 Nifae 17–19 i le Sau, Mulimuli Mai ia te A’u—Mo le Aiga ma le Ekalesia: Tusi a Mamona 2024 ma ia o mai saunia e faasoa mai mea sa latou aoaoina ma lagonaina a’o latou faia.

Gaoioiga e Mafai Ona Aoao Ai

Manaoga amiotonu o le talavou

Nai lo le na o le fai atu o le fesili lenei ma tuu atu i tagata aoga e tali mai, e mafai ona e tuu atu i tagata aoga taitasi se fasipepa e lisi ai a latou tali. Ona mafai lea ona e aoina mai a latou tali ma faasoa atu ni nai tali i le vasega. E mafai ona tali mai tagata aoga i lenei fesili i le tele o auala.

• Afai e te faia se sailiiliga i le 100 talavou mai la outou eria, o le a sou manatu o le a se manaoga taatele o le a i ai i o latou manaoga amiotonu?

Mafaufau loloto po o le fea o nei manaoga e mafai ona e fesootai i ai. A o e suesueina le 3 Nifae 19, vaavaai mo upumoni e mafai ona fesoasoani ia te oe e ausia ai ou manaoga amiotonu.

Ina ua uma ona auauna atu, aoao atu, faamalolo, ma faamanuiaina tagata e le Faaola, sa Ia “afio ese mai ia te i latou, ma afio ae i le lagi” (3 Nifae 18:39) ma le folafolaga o le a Ia toe foi mai i le aso e sosoo ai. Sa toe foi atu tagata i le fale, ma “sa salalau atu lava le tala e uiga ia Iesu i le po atoa,” ma sa “toatele lava le aofai o tagata, … sa galulue malosi i lena po atoa, ina ia mafai ona latou i ai i le aso e sosoo ai i le nofoaga lea o le a faaali mai ai e Iesu o ia lava i le motu o tagata” (3 Nifae 19:3). O le aso na sosoo ai, na faapotopoto ai e soo e toasefululua, o e na filifilia e Iesu, le nuu ma aoao atu ia i latou “upu na fetalaia e Iesu.” Ona tootutuli lea o le au soo ma “tatalo atu i le Tama i le suafa o Iesu” (3 Nifae 19:8).

Faitau le 3 Nifae 19:9 e vaai ai po o a mea na sili ona latou mananao i ai a o latou tatalo.

Mafaufau e faaali atu fesili nei. A uma ni nai minute a tagata aoga e tusi ai a latou tali ia latou api faamaumau mo suesuega, e mafai ona e faatulagaina tagata aoga i ni vaega toalaiti e talanoaina ai tali na latou maua.

• Aisea e te manatu ai na latou matuai manaomia ai le Agaga Paia?

• O a nisi o tulaga atonu e feagai ma oe i le lumanai o le a e manao ai e iloa ma malamalama i uunaiga a le Agaga Paia?

Mafaufau loloto pe e te manao moni i le Agaga Paia i lou olaga ma pe faapefea ona ese lou olaga pe afai e te manao soo i Lana faatosinaga.

Sailia o le Agaga Paia

Faitau le 3 Nifae 19:10–23, ma vaavaai mo auala e mafai ona e faaumaina ai le faamatalaga lenei:

• E mafai ona faatumulia i tatou i le Agaga Paia a o tatou …

Mafaufau e valaaulia tagata aoga e tusi i luga o le laupapa ni auala o le a latou faauma ai le faamatalaga. O auala talafeagai nei e lua e mafai ai ona faauma le faamatalaga.

• … naunau ma le faamaoni ma tatalo mo Lana mafutaga.

• … auai i sauniga o le talalelei.

O gaoioiga A ma le E e mafai ona fesoasoani i tagata aoga ia malamalama ai i mea e mafai ona latou faia ina ia faatumulia ai i le Agaga Paia. O nei gaoioiga e mafai ona faia o se vasega. E mafai foi e tagata aoga ona faamaea se gaoioiga se tasi po o gaoioiga uma e lua i ni vaega toalaiti ma lipoti mai mea ua latou aoaoina.

Fai atu i tagata aoga e faasoa mai ni malamalamaaga patino po o ni mau latou te maua. Valaaulia tagata aoga e faasoa mai ni aafiaga patino e uiga i le manao ma tatalo mo le Agaga Paia po o le auai i sauniga.

E faaopoopo atu i gaoioiga A ma le E, e mafai foi ona outou talanoaina pe faapefea e le talitonu ia Iesu Keriso ma upu a Ana auauna ona fesoasoani e faatumuina i tatou i le Agaga Paia.

Gaoioiga A: E mafai ona faatumulia i tatou i le Agaga Paia pe a tatou mananao ma le faamaoni ma tatalo mo Lana mafutaga.

• E mafai faapefea e o tatou manaoga ma tatalo ona fesoasoani ia i tatou ia faatumulia i le Agaga Paia?

Na faamalamalama mai e Elder David A. Bednar o le Korama a Aposetolo e Toasefululua le auala e mafai ai e le manao ma le tatalo ona fesoasoani ia i tatou ia maua le Agaga e faatasi ma i tatou.

Pe tatou te … manatua e tatalo faatauanau ma tatalo e le aunoa mo le mea e aupito sili ona manaomia, o le Agaga Paia lea? Pe o faalavelaveina ea i tatou i mana’oga o le lalolagi ma aga masani o le olaga i aso taitasi ma lē amanaia ai ia lea meaalofa e aupito sili ona taua i lo meaalofa uma? O le mauaina o le Agaga Paia e amata i lo tatou naunau ma le faamaoni e le aunoa mo Lana mafutaga i o tatou olaga. (David A. Bednar, “Ia Maua le Agaga Paia,” Liahona, Nov. 2010, 96)

Atonu e te manao e matamata i le “Ia Maua le Agaga Paia,” (2:56), o loo maua i le ChurchofJesusChrist.org.

Having the Holy Ghost

You can invite the Holy Spirit into your life through prayer, scripture study and being obedient to God’s commandments.

• O anafea na fesoasoani ai ou manaoga amiotonu ma tatalo, e te lagonaina ai le uunaiga a le Agaga?

Gaoioiga E: E mafai ona faatumulia i tatou i le Agaga Paia a o tatou auai i sauniga o le talalelei.

Faitau le 3 Nifae 18:7, 11; 27:20, ma vaavaai pe mafai faapefea e sauniga ona fesoasoani ia i tatou ia faatumulia i le Agaga Paia.

Sa aoao mai le Perofeta o Iosefa Samita (1805–44):

O le papatisoga o se sauniga paia lea e sauniuni ai mo le mauaina o le Agaga Paia; o se auala lea ma le ki o le a auauna mai ai le Agaga Paia. O le mea foaifua o le Agaga Paia e ala i le faaee atu o lima, e le mafai ona mauaina i se isi lava mataupu faavae nai lo le mataupu faavae o le amiotonu. (Aoaoga a Peresitene o le Ekalesia: Iosefa Samita [2007], 95–96.)

• O le a se mea na e aoaoina e uiga i le matafaioi o sauniga (e pei o le papatisoga ma le faamanatuga) e fesoasoani ia i tatou ia faatumulia i le Agaga Paia?

• O anafea na faatumulia ai oe i le Agaga Paia a o e auai i sauniga o le talalelei?

Faaaogaina patino

Mafaufau e faasoa atu se aafiaga patino e uiga i mea ua e faia e saili ai le Agaga Paia.

Mafaufau i lou lava manaomia o le Agaga Paia ma pe aisea e te manao ai i Lana uunaiga i lou olaga. Faailoa mai se mea ua musuia oe e fai e faatumau ai le Agaga Paia ia te oe. Taumafai e mulimuli i lena uunaiga.

Faamatalaga o Manatu ma Talaaga

E faapefea ona avea le Agaga Paia ma a tatou soa tumau?

Na aoao mai Elder David A. Bednar o le Korama o Aposetolo e Toasefululua:

Afai o loo tatou taumafai e avea ma tagata lelei—e le atoatoa i le taimi nei, ae faasolosolo malie lava ona lelei atu—pe afai o tatou faamamaluina a tatou feagaiga, saili mo le mafutaga a le Agaga Paia, aai ma feinu ma le agavaa i le faamanatuga ma faatumauina se faamagaloga o a tatou agasala, ma fetaomi atu i luma, ona mafai lea ona tatou maua le mafutaga faifai pea ma le Agaga Paia. Tatou te le o “sauni e maua faaaliga”; o loo tatou “ola i faaaliga.” (David A. Bednar, O le Agaga o Faaaliga [2021], 7)

Ua aoao mai foi e leMataupu Faavae ma Feagaiga 121:45–46 le ala e mafai ai ona tatou maua le Agaga Paia e fai ma a tatou soa tumau.

3 Nfiae 19:23. E mafai faapefea ona fesoasoani le Agaga Paia ia i tatou ia tasi ma le Tama ma le Alo?

Na faamalamalama mai e Elder D. Todd Christofferson o le Korama a Aposetolo e Toasefululua:

That They May Be One in Us

We will not be one with God and Christ until we make Their will and interest our greatest desire.

O le mea moni lava o le a le mafai ona tatou tasi ma le Atua ma Keriso, seiiloga tatou te avea o Laua finagalo ma faamoemoe, e fai ma o tatou manaoga silisili. O lea usiusitai e le mafai ona ausia i se aso se tasi, peitai e ala mai i le Agaga Paia, o le a aoaoina ma taitaiina i tatou e le Alii, pe afai tatou te naunau i ai, seia oo i le taimi tonu, e mafai ona faapea mai ai ma le faamaoni, o Ia ua i totonu ia i tatou, e pei o le Tama o i totonu ia te Ia. E i ai taimi ou te lagonaina ai le fefe e mafaufau i mea atonu o le a manaomia mai, ae ou te iloa, e na o totonu o lenei tuufaatasiga atoatoa e mafai ona maua ai le atoaga o le fiafia. (D. Todd Christofferson, “Ina ia Tasi i Latou i Totonu o i Ta’ua,” Liahona, Nov. 2002, 73)

Gaoioiga Faaopoopo e Aoao Ai

3 Nifae 19:1–15. O le a faatasi le Faaola ma i tatou a o tatou auauna atu ma faasoa atu Ana afioga i isi

E mafai ona faamanuiaina tagata aoga e ala i le malamalama ma le lagonaina o le a faatasi le Faaola ma i tatou a o tatou auauna atu i isi ma faasoa atu Ana afioga ia i latou. O le gaoioiga lenei e mafai ona fesoasoani ia te oe e ausia ai lenei mea.

Valaaulia tagata aoga e faasoa mai e uiga i se tagata latou te iloa sa avea ma se faataitaiga faaKeriso ia i latou. Fai atu ia i latou e faamatala mai pe na faapefea e lenei tagata ona faatosinaina i latou mo le lelei sili atu. Valaaulia i latou e suesue le 3 Nifae 19:1–15, ma vaavaai mo mea na faia e le au soo e mulimuli ai i le faataitaiga a le Faaola ma pe o le a le taunuuga. Valaaulia i latou e taumafai e auauna atu ma faasoa atu afioga a Keriso i isi e pei ona Ia faia.

3 Nifae 19:19–23, 27–30. O aafiaga mama a le Agaga Paia

Afai o le a manuia tagata aoga mai le malamalama atili i le faatosinaga faamamaina a le Agaga Paia e mafai ona i ai ia i latou, mafaufau e fai mea nei:

Faamatala i le vasega o le faamamaina o se mea o lona uiga o le faamamaina po o le faasaoloto mai elemene e le manaomia (tagai Merriam-Webster.com Dictionary, “purify”). Valaaulia le vasega e faasoa mai ni mea atonu latou te mananao e faamamaina (e pei o ipu, fale, lavalava, po o tino). O le a se mea o le a latou faaaogaina e fai ai?

Valaaulia tagata e suesue le 3 Nifae 19:19–23, 27–30 e vaai ai i mea ua saunia e le Alii e fesoasoani ai ia i tatou ia mama atili. Afai e manaomia, e mafai foi ona latou faasino i le Mosaea 3:19; 4:1–3.

Valaaulia i latou e talanoaina faatinoga e mafai ona tatou faia e maua ai lenei faamanuiaga. Fautuaina i latou e faatino ia uunaiga latou te maua.

3 Nfiae 19:23. O le avea ia tasi ma le Tama Faalelagi ma Iesu Keriso

O mea nei e mafai ona fesoasoani i tagata aoga e faamalolosia ai o latou sootaga ma le Tama Faalelagi ma Iesu Keriso.

Valaaulia tagata aoga e suesue le 3 Nifae 19:23 ma le saunoaga a Elder Christofferson i le vaega o “Faamatalaga o Manatu ma Talaaga” Tuu atu i tagata aoga e faasoa mai mea na latou aoaoina. O le tatalo a le Faaola mo Ona soo ma isi i le Ioane 17:11–23 e mafai foi ona fesoasoani i le vasega e malamalama ai i lenei aoaoga faavae taua.

A uma ona latou suesue, valaaulia tagata aoga e talanoaina pe faapefea e le malamalama i le tasi o le aigaAtua ona tosina ai lagona o tagata aoga e uiga i le Agaga Paia. E mafai foi ona outou talanoaina auala e faatosinaina ai a tatou amioga e lenei malamalamaaga.