3 Nifae 17

“Ua Ou Agaalofa Tele ia te Outou”

O se aso umi lea aso mo tagata sa Nifaē ae fetalai mai loa le Faaola ua oo i le taimi e tuumuli ai o Ia. Ae ui i lea, o loimata ma le naunau o le motu o tagata ina ia nofo umi teisi o Ia na ootia ai Lona loto. I se faaaliaga ofoofogia o le agaalofa, sa Ia faamaloloina ai i latou, tatalo faatasi ma i latou, ma faamanuia taitoatasi a latou fanau. O lenei lesona e mafai ona fesoasoani ia te oe e lagona ai le alofa o Iesu Keriso mo oe.

Faaaogaina o vitio o le Tusi a Mamona. O vitio o le Tusi a Mamona ua faamoemoe e fesoasoani i tagata aoga ia maua ai ni aafiaga anoa i tusiga. O nei vitio e le o faamoemoe e suia ai le faitauina o tusitusiga paia. Ia filimaoti ma le atamai po o afea ma pe faapefea ona faaaoga vitio e faaleleia ai aafiaga o tagata aoga i tusitusiga paia.

Sauniuniga a le tagata aoga: Valaaulia tagata aoga e mafaufau i taimi na latou lagonaina ai le alofa mutimutivale, agaalofa, po o le alofa mai le Atua. E mafai ona saunia tagata aoga e faasoa mai pe na faapefea e nei aafiaga ona aafia ai a latou sootaga ma Ia.

Gaoioiga e Mafai Ona Aoao Ai

O le finagalofaaalia o le Faaola

Vaai faalemafaufau e faapea, ua faatoa uma lava ona outou faaaluina se aso faatasi ma le Faaola, ma ua Ia fofoga mai ua o’o i le taimi e tuumuli ai o Ia.

Ina ia fesoasoani i tagata aoga e vaai faalemafaufau i lenei mea na tupu, e mafai ona e faaali atu le vitio “O Iesu Keriso ma Agelu ua Auauna Atu ma le Agaalofa” (11:59), o loo maua i le ChurchofJesusChrist.org, mai le faailo taimi 0:12 i le 1:30.

• Faamata o a ni ou lagona i lenei tulaga?

Fesoasoani i tagata aoga e manatua mea na latou aoaoina e uiga i le Faaola mai le 3 Nifae 11–16. E mafai ona latou iloiloina mea na latou tusia ia latou api talaaga i lalo o le “Aoao e uiga ia Iesu Keriso i le 3 Nifae.”

Ae latou te lei taliina le fesili lenei, atonu e fesoasoani le fai atu i tagata aoga e lisi i luga o le laupapa ia veape e faamatala ai mea na faia e le Faaola.

• Na faapefea ona faaalia i faatinoga a le Faaola Lona alofa mo sa Nifaē?

O le asō o le a e faitau atili ai e uiga i le ala na faaalia ai e le Faaola Lona agaalofa ia sa Nifaē. A o e suesue, mafaufau i mea ua aoao mai e Ana faatinoga e uiga i Lona tagata. Ia nofouta i ou lagona e uiga ia te Ia.

Atonu e fesoasoani le iloa o mea uma na tutupu o loo tusia i le 3 Nifae 11–17 na tutupu i se aso e tasi.

Faitau le 3 Nifae 17:1–6, ma vaavaai mo mea e mafai ona e aoaoina e uiga ia Iesu Keriso mai Ana afioga ma faatinoga.

• O a ni mea na e mauaina mai i nei fuaiupu?

Atonu e maua e tagata aoga se mataupu faavae e pei o lenei: E ala i le mafaufau loloto ma le tatalo i le Tama, tatou te saunia ai o tatou mafaufau ia maua le malamalama sili atu.

Afai e te manao e fai nisi mea se tele i lenei mataupu faavae, tagai i le vaega o “Gaioiga Faaopoopo e Aoao ai”.

Atonu ua e faailoa maia se upumoni e talitutusa ma lenei: Ua tele le mutimuti alofa o Iesu Keriso ia te au. Mafaufau e tusifaamaumau lenei upumoni i autafa o le fuaiupu 6.

Na aoao mai Elder Ulisses Soares o le Korama a Aposetolo e Toasefululua:

E taua le mata’ituina o faatinoga mutimuti alofa o Iesu, sa le o ni faailoaga sa le tupu soo pe na faatonuina e fai e faavae i se lisi o galuega e ao ona faamae’a, ae o faailoaga i aso uma o le moni o Lona alofa lē ponā mo le Atua ma Ana fanau ma Lona naunautaiga tumau e fesoasoani ia i latou. (Ulisses Soares, “O le Mutimuti Alofa Tumau o le Faaola,” Liahona, Nov. 2021, 14)

• I au lava upu, o le a le aoaoga a Elder Soares e uiga i le mutimuti alofa o le Faaola?

O le agaalofa o le Faaola

O le vaega o totoe o le 3 Nifae 17 ua faaalia ai le natura agaalofa o le Faaola. Manatua o le mea na faia e Iesu Keriso i le 3 Nifae 17 na oo mai ona sa Ia silafia manaoga amiotonu o sa Nifaē ma sa Ia finagalo moni lava e faatasi ma faamanuia i latou.

O le faamoemoega o le gaoioiga lenei o le fesoasoani lea i tagata aoga e atiina ae le alofa sili atu mo le Faaola e ala i le vaai faalemafaufau i Lona natura agaalofa. Atonu na faataitaia e tagata aoga lenei tomai a o suesueina le 3 Nifae 11. O le toe faia o le tomai e mafai ona fesoasoani i tagata aoga e faateleina ai lo latou gafatia e faaaoga ai.

Faaali atu fesili ma fuaitau o loo i lalo. Valaaulia tagata aoga e filifili po o le fea fuaitau latou te mananao e suesue i ai, ma fai atu ia i latou e tomanatu i fesili a o latou suesue. E mafai e tagata ona tali nei fesili ia latou api faamaumau mo suesuega i lalo o le “Aoao e uiga ia Iesu Keriso i le 3 Nifae.”

Mafaufau e tuu atu i tagata aoga e filifili e suesue toatasi pe suesue filemu ma se paga.

• O le a le taimi atonu e sili ona faapitoa le taua mo oe? Aisea?

• O le a se mea na faagaeetia ai oe e uiga i le ala na auauna atu ai Iesu?

• E faapefea e Ana afioga ma faatinoga ona aafia ai ou lagona e uiga ia te Ia?

• 3 Nifae 17:7–10: Faamaloloina o o latou tagata mama’i ma puapuagatia

• 3 Nifae 17:13–20: Tatalo faatasi ma mo i latou

• 3 Nifae 17:11–12, 21–25: Faamanuiaina o tamaiti

Mafaufau e faaali atu fesili nei ma tuu atu i tagata aoga se taimi e mafaufau i ai ae latou te le’i taliina.

• Afai sa e i ai iina, o le a faapefea e lenei aafiaga ona aafia ai lou sootaga ma lou Faaola o Iesu Keriso?

• O le a sou manatu o faapefea ona faaalia e Iesu Keriso le agaalofa mo i tatou i aso nei?

• O le a se mea ua musuia oe e fai e faaali ai lou alofa mo Iesu Keriso?

Pe a lava le taimi, mafaufau e usu se viiga e uiga i le alofa ma le agaalofa o le Faaola. O nisi o faataitaiga e aofia ai “Iesu, a mafaufau ia oe” (Viiga, nu. 103), “Precious Savior, Dear Redeemer” (Hymns, no. 103), ma le “Our Savior’s Love” (Hymns, no. 113).

Pe a talafeagai ai, valaaulia tagata aoga e faasoa mai mea na latou lagonaina i le taimi o le lesona o le aso. Fautuaina i latou e faaauau pea ona vaavaai mo faamaoniga o le agaalofa o le Faaola i o latou olaga.

Manatu ma Talaaga o Faamatalaga

O a ituaiga o puapuaga na faamalolo mai ai e le Faaola ia tagata?

Sa aoao mai Peresitene Dallin H. Oaks o le Au Peresitene Sili:

Ina ua faaali atu le Faaola i e amiotonu i le Lalolagi Fou, sa Ia valaau i tagata e o mai o e pipili pe tauaso pe o aafia i soo se ma’i faaletino. Na Ia tuuina atu le valaaulia lava lea e tasi ia i latou sa “puapuagatia i soo se ala” (3 Nifae 17:7). “Aumai i latou iinei,” sa Ia fetalai atu ai, “o le a ou faamaloloina i latou” (f. 7). O loo faamatala mai e le Tusi a Mamona le oo mai o le motu o tagata uma ma aumai i latou “uma na puapuagatia i soo se ala” (f. 9). Atonu na aofia ai i lenei vaega ia tagata sa i ai soo se ituaiga mafatiaga faaletino pe faalelagona pe faalemafaufau, ma o loo molimau mai le mau na “faamaloloina [e Iesu] i latou uma taitoatasi” (f. 9). (Dallin H. Oaks, “Na te Faamaloloina i Latou e Mafatia i Avega,” Liahona, Nov. 2006, 6)

Sa aoao mai foi Sister Bonnie H. Cordon, Peresitene Aoao o Tamaitai Talavou, i le vitio lenei e uiga i le gafatia ma le naunautai o le Faaola e faamalolo.

E mafai faapefea ona ou tuputupu ae i le agaalofa faaKeriso?

Na faasoa mai Elder Ulisses Soares o le Korama a Aposetolo e Toasefululua:

O le uiga mutimuti alofa o Iesu sa maua’a i le alofa mamā,e pei o Lona alofa lē ponā ma le atoatoa, o le fatu lea o Lana taulaga togiola. O le mutimuti alofa o se uiga faavae lea o i latou o ē tinoū mo le faapaiaga ma e femilosa’i faatasi ma isi uiga faaKerisiano e pei o le faanoanoa faatasi ma i latou o ē faanoanoa ma i ai le lotomalamalama, alofa mutimutivale, ma le agalelei. O le faaalia o le mutimuti alofa mo isi, o le mea moni, o le ute lea o le talalelei a Iesu Keriso ma o se faailoga manino o lo tatou latalata faaleagaga ma faalelagona i le Faaola. E le gata i lea, e faaalia ai le maualuga o Lana tosinaga i le ituaiga olaga tatou te ola ai ma faapupula mai ai le tele o mea e gafatia o o tatou agaga. (Ulisses Soares, “O le Mutimuti Alofa Tumau o le Faaola,” Liahona, Nov. 2021, 13–14)

Gaoioiga Faaopoopo e Aoao Ai

3 Nifae 17:1–3. “Mafaufau i mea ia na ou fai atu ai”

E mafai ona fesoasoani mea nei e saunia ai tagata aoga e mafaufau loloto i tusitusiga paia.

Na aoao mai Peresitene Henry B. Eyring o le Au Peresitene Sili: “O le faitau, suesue, ma le manatunatu loloto e le tutusa. Tatou te faitau i upu ma mafai ona maua ai ni manatu. Tatou te suesue ma maua ai manatu ma sootaga o mau. Ae a tatou manatunatu loloto ua tatou valaaulia faaaliga e ala i le Agaga. Ia te au, o le manatunatu loloto, o le mafaufau lea ma le tatalo ou te faia pe a uma ona ou faitau ma suesue ma le faaeteete i tusitusiga paia” (Henry B. Eyring, “Auauna Atu ma le Agaga,” Liahona, Nov. 2010, 60).

E mafai ona e valaaulia tagata aoga e suesue le 3 Nifae 17:1–3, ma vaavaai mo faatonuga na tuuina mai e le Alii ia sa Nifaē ina ia mafai ai ona latou “saunia o [latou] mafaufau mo a taeao.” Ona mafai lea ona latou faailoa mai se upumoni e pei o le mafaufau loloto ma le tatalo i le Tama, tatou te saunia ai o tatou mafaufau ia maua le malamalama sili atu.

Faasoa atu le saunoaga a Peresitene Eyring, ma valaaulia tagata aoga e talanoaina pe mafai faapefea e le suesue, tatalo, ma le mafaufau loloto ona galulue faatasi e saunia o tatou mafaufau ia maua le malamalama sili atu. Ona mafai lea e tagata aoga ona faaaoga mea na latou aoaoina e uiga i le mafaufau loloto a o latou suesue i le vaega o totoe o le 3 Nifae 17. Mo se faataitaiga, e mafai ona latou vaai faalemafaufau i mea na tutupu i tusitusiga paia pe mafaufau pe o le a faapefea ona taulima e le Faaola. A uma, talanoaina pe na faapefea e lo latou mafaufau loloto ona faalolotoina lo latou malamalama i tusitusiga paia ma le alofa mo le Alii.

3 Nifae 17:5. “Sa toe silasila solo faataamilo ona fofoga”

O se tasi o uiga auaumama paia o le Faaola o Lona gafatia lea e silafia ai pe iloa manaoga o isi ona tali atu lea i na manaoga i le alofa ma le agalelei.

Valaaulia tagata aoga e suesue le 3 Nifae 17:5, ma vaavaai pe na faapefea ona faaalia e Iesu Keriso Lona gafatia e iloa ai manaoga o isi. Mafaufau e faaali le vitio a Peresitene Bonnie H. Cordon i le vaega o “Faamatalaga ma Talaaga”. A o matamata le vasega, valaaulia i latou e mafaufau pe mafai faapefea ona latou faaleleia lo latou gafatia e iloa ai manaoga o isi ma faatasi atu ia i latou e pei ona faia e le Faaola.

Mafaufau e usu pe faitau upu o le “O Loo Ou Taumafai e Avea e Pei o Iesu” (Tusipese a Tamaiti, 40).

Talanoaina pe mafai faapefea ona tatou mulimuli i le faataitaiga a le Faaola e ala i le matau o manaoga o isi ona fesoasoani lea ia i latou.

3 Nfiae 17:12. “Sa tulai Iesu i le totonugalemu”

Ina ia fesoasoani i tagata aoga ia lagona e latalata atu le Faaola ia i latou, valaaulia i latou e suesue le 3 Nifae 11:8; 3 Nifae 20:22; 3 Nifae 27:2; Mataupu Faavae ma Feagaiga 38:7; 88:13; ma le Aperaamo 3:22–23, ma vaavaai pe faapefea ona talitutusa na fuaiupu ma le 3 Nifae 17:12. E mafai e tagata aoga ona faafesootai nei fuaiupu. Ona talanoaina lea o mea na maua e tagata aoga e uiga i le Faaola ma Lana sootaga ma i tatou.