3 Nifae 18:15–39; 19:19–29

“Tatalo E Le Aunoa”

E toatele tagata e tatalo i aso uma. O nisi tatalo e mafai ona sili atu ona anoa nai lo isi. Sa le gata ina aoao atu e Iesu Keriso Ona soo ia “tatalo atu e le aunoa i le Tama” (3 Nifae 18:19), ae sa Ia faaali atu foi ia i latou le ala e tatalo ai. O lenei lesona e mafai ona fesoasoani ia te oe e mulimuli ai i aoaoga ma faataitaiga a Iesu Keriso e tatalo e le aunoa ma ia maua ni tatalo e sili atu ona anoa.

Tatalo e le aunoa mo au tagata aoga. E silafia e le Tama Faalelagi au tagata aoga taitoatasi. A o e tatalo atu ia te Ia, e mafai ona Ia fesoasoani ia te oe e iloatino o latou manaoga ma musuia oe i auala e taulima ai na manaoga. Faalogo mo uunaiga e ono oo mai a o e sauni e aoao atu ma i le taimi o le lesona.

Sauniuniga a le tagata aoga: Valaaulia tagata aoga e faitau pe faalogologo i le saunoaga a Peresitene M. Russell Ballard “Ia Outou Mataala ma Tatalo e Le Aunoa” (Liahona, Nov. 2020, 77–79), ma vaavaai mo upumoni e mafai ona fesoasoani ia i latou i a latou tatalo faaletagata lava ia.

Gaoioiga e Mafai Ona Aoao Ai

Faataitaiga

Tusi le fuaiupu o loo i lalo ma laina avanoa i luga o le laupapa, ma tuu atu i ni nai tagata aoga e faasoa mai pe faapefea ona latou faatumuina avanoa.

Mafaufau i se taleni, tomai, po o se uiga e te manao e atiina ae. Faailoa tagata e te iloa o loo i ai lena taleni, tomai, po o uiga auaumama. I le faaaogaina o nei manatu, faatumu avanoa nei i ni nai auala eseese:

• Afai ou te manao e aoao e uiga i le , o le a ou mulimuli i le faataitaiga a ona .

Toe fai le gaoioiga e ala i le faatumuina o le fuaiupu muamua o loo i lalo i se mea e te manao e aoao mai le Faaola ma tali pe aisea i le avanoa mulimuli.

• Afai ou te manao e aoao e uiga i le , o le a ou mulimuli i le faataitaiga a Iesu Keriso ona .

I le taimi o Lana galuega i le atu Amerika, sa aoao atu ai e le Faaola tagata e ala i upu ma faataitaiga.

Faitau le 3 Nifae 18:16, 24, ma vaavaai mo se faataitaiga na faatuina e Iesu.

• O le a le mea na finagalo le Faaola i tagata e aoao mai Lana faataitaiga?

E mafai e tagata aoga ona iloilo e i latou lava a latou tatalo i le taimi nei e faaaoga ai le fuafaatatau lea. O le faia o lena mea e mafai ona valaaulia ai le Agaga Paia e fesoasoani ia i latou ia iloa pe mafai faapefea e aoaoga ma faataitaiga a le Faaola ona fesoasoani ia i latou e faaleleia a latou tatalo faaletagata lava ia.

Faatulaga mea nei i luga o se fua mai le 1 i le 5, o le 5 e aupito maualuga:

• Ou te tatalo i aso uma.

• Ou te fesootai atu ma lagona le latalata i le Tama Faalelagi pe a ou tatalo.

• Ou te lagonaina se manao e faaleleia a’u tatalo faaletagata lava ia.

Valaaulia tagata aoga e talanoaina luitau masani i le tatalo anoa—mo se faataitaiga, faaavanoa se taimi e tatalo ai, iloaina o mea e fai atu, mauaina o tali, po o isi luitau. Ona mafai lea e tagata aoga ona vaavaai mo tali ao latou suesue i tusitusiga paia.

A o faaauau pea ona e suesue i le 3 Nifae 18, saili le musumusuga a le Agaga Paia e fesoasoani ia te oe ia iloa mea e mafai ona e faia e faaleleia atili ai au tatalo faaletagata lava ia. Mulimuli i aoaoga ma faataitaiga a Iesu Keriso a o e saili e faaleleia atili.

O aoaoga a le Faaola e uiga i le tatalo

Faitau le 3 Nifae 18:15, 18–23, vaavaai mo mea na aoao mai e le Faaola e uiga i le tatalo. E mafai foi ona e faitau i faatonuga a le Faaola e uiga i le tatalo mai Lana lauga i le malumalu i le 3 Nifae 13:5–13.

E mafai e tagata aoga ona faauma le fuaiupu lenei i luga o le laupapa:

• E mafai ona ou mulimuli i aoaoga a le Faaola i le tatalo e ala i le …

Ia lava se taimi e talanoaina ai aoaoga a le Faaola. Ia naunau e tatai le talanoaga i mea e lagona e tagata aoga latou te manaomia. Mo se faataitaiga, atonu e faaalu e le vasega se taimi e talanoa ai e uiga i auala e fesoasoani ai le tatalo ia i tatou e tetee atu ai i faaosoosoga, auala e faamanuiaina ai aiga e le tatalo, po o auala e mafai ona tatou ole atu ai mo faamanuiaga i le tatalo. E mafai ona e suesue atili i aoaoga a le Faaola e uiga i le tatalo i le Luka 11:1–13.

E mafai foi ona e faaaogaina nisi o faamatalaga i le vaega o “Faamatalaga ma Talaaga” o se vaega o le talanoaga.

• O le fea o aoaoga a Iesu e uiga i le tatalo e te manatu e mafai ona sili ona fesoasoani ia te oe? Aisea?

O le faataitaiga a le Faaola o le tatalo

Vaai faalemafaufau pe faape’i le faalogo atu o tatalo le Faaola mo oe. O le a sou manatu o le a se mea o le a Ia tatalo ai mo oe? Mafaufau i ou lagona e ono i ai ma pe mafai faapefea ona latou aafia ai au lava tatalo.

E mafai ona e vaevaeina le vasega i ni vaega toalaiti ma tofi atu i vaega taitasi se tasi o seti o fuaiupu nei e faitau ma lipoti mai ai.

Fesoasoani i tagata aoga ia iloa po o ai na tatalo i ai Iesu, mo ai sa Ia tatalo ai, o mea sa Ia tatalo atu ai, aisea na Ia tatalo ai, o Ona uiga faaalia i le tatalo, ma isi mea. O se tasi auala e faia ai lenei mea o le tuu atu lea i tagata aoga e tali le fesili “O Ai?” “O le a?” “Aisea?” ma le “E Faapefea?”

Pe a talanoaina pe aisea na tatalo ai Iesu, e mafai ona e fesoasoani i tagata aoga ia iloa o se tasi o mafuaaga na tatalo ai Iesu o le talanoa lea ma Lona Tama, o le e alofa i ai o Ia.

E mafai ona e faaali atu le vitio “Ua Auauna Atu le Au Soo ma ua Tatalo Iesu Keriso mo Tagata” mai le faailo taimi 3:05 i le 7:18, o loo maua i le ChurchofJesusChrist.org, ma valaaulia tagata aoga e mulimuli faatasi ma fuaiupu o loo i le 3 Nifae 19.

• 3 Nifae 17:14–17

• 3 Nifae 19:19–23

• 3 Nifae 19:27–29

• Mataio 26:39–42

• Ioane 17:1, 4, 8–9

• Mataupu Faavae ma Feagaiga 45:3–5

Valaaulia tagata aoga e faauma le fuaiupu lenei i luga o le laupapa:

• E mafai ona ou mulimuli i le faataitaiga a le Faaola i le tatalo e ala i le …

• O le a se mea ua e aoao mai i lagona o le Faaola e uiga ia te oe?

• O le a sou manatu e mafai faapefea i le mulimuli i Ana faataitaiga ona faia se eseesega i au tatalo?

O a tatou tatalo faaletagata lava ia

Fesoasoani i tagata aoga e mafaufau i ni aafiaga anoa na latou maua i le tatalo. E mafai ona mafaufau tagata aoga i se taimi atonu na latou tatalo ai e tetee atu i faaosoosoga pe mo se fesoasoani i se luitau. E mafai ona latou mafaufau i se taimi na faamanuiaina ai lo latou aiga e ala i le tatalo, pe na latou tatalo mo se isi tagata, pe ina ua latou ole atu mo ni faamanuiaga. Valaaulia tagata aoga e faasoa mai pe na faapefea ona faamanuiaina i latou e le tatalo. Faamanatu i tagata aoga e aua nei faasoa maia ni aafiaga e paia naua pe patino a’ia’i.

Faasoa atu i le vasega pe na faapefea ona faamanuiaina oe a o e mulimuli i le faataitaiga a le Faaola ma Ana aoaoga e uiga i le tatalo. Tagai i faamatalaga ua maea i luga o le laupapa, ma talanoaina pe mafai faapefea e aoaoga ma faataitaiga a le Faaola ona fesoasoani i luitau o le tatalo na ta’ua muamua.

Filifili ia le itiiti ifo ma le tasi se aoaoga a le Faaola po o se mea na Ia faataitaia i le tatalo e mafai ona e faia i au tatalo faaletagata lava ia. Fatu se faamanatu ma amata ona faatino i le asō. A o e faia, matau pe faapefea ona fesoasoani nei vaega i au tatalo ia sili atu ona anoa ma pe faapefea ona aafia ai lou sootaga ma le Tama Faalelagi.

Atonu e te manao e faaopoopo nisi o mea na e aoaoina i le asō i lau tusiga i lau api talaaga “Aoao e uiga ia Iesu Keriso i le 3 Nifae.”

Atonu e te manao e valaaulia tagata aoga e faaopoopo i a latou tusiga i a latou api talaaga le “Aoao e uiga ia Iesu Keriso i le 3 Nifae.”

Manatu ma Talaaga o Faamatalaga

E faapefea ona faamanuiaina aiga e le tatalo?

Na faasoa mai e Peresitene Henry B. Eyring o le Au Peresitene Sili:

Pe a e tatalo faatasi ma mo tagata o le aiga, o le a e lagonaina lou alofa ma le alofa o le Faaola mo i latou. O le a avea atili lena mea ma au meaalofa faaleagaga a o e sailiaina. O le a lagona e tagata o lou aiga a o e tatalo ma se faatuatua tele atu. (Henry B. Eyring, “O Tamaitai ma le Aoaoina o le Talalelei i le Aiga,” Liahona, Nov. 2018, 60)

O a mea e mafai ona ou tatalo ai?

Na aoao mai Peresitene M. Russell Ballard o le Korama a Aposetolo e Toasefululua:

Ou te valaaulia outou ia tatalo e le aunoa. Tatalo mo lou aiga. Tatalo mo taitai o malo. Tatalo mo tagata totoa o e o saoaluma i taua o fai nei e faasagatau i mala faaagafesootai, faalesiosiomaga, faaupufai, ma faapaiolosi o loo aafia ai tagata uma i le lalolagi atoa, o e mauoa ma e matitiva o le autalavou ma le au matutua.

Na aoao mai e le Faaola ia i tatou e aua nei fuapauina i latou tatou te talosia. Na Ia fetalai mai “Ia outou alolofa atu i e ua ita mai ia te outou, ia outou faamanuia atu i e ua fetuu mai ia te outou, ia outou agalelei atu i e ua inoino mai ia te outou, ia outou tatalo foi mo e ua tuuai fua mai ma faasaua mai ia te outou” [Mataio 5:44]. (M. Russell Ballard, “Ia Outou Mataala ma Tatalo e le Aunoa,” Liahona, Nov. 2020, 78)

Na tautino mai e Elder David A. Bednar o le Korama a Aposetolo e Toasefululua e faapea:

O le aioi atu i le Tama Faalelagi mo faamanuiaga tatou te mananao ai i o tatou olaga patino, e lelei ma o le mea tatau. E ui i lea, o le tatalo ma le faamaoni mo isi, mo i latou tatou te alolofa i ai ma i latou e agaleaga mai ia te i tatou, o se elemene taua foi o le tatalo anoa. E pei lava o le faaalia soo o le lotofaafetai i a tatou tatalo e faateleina ai le auala mo faaaliga, e faapena foi ona faateleina e le tatalo mo isi ma le malosi atoa o o tatou agaga lo tatou gafatia e faalogo ai ma usitai i le siufofoga o le Alii. (David A. Bednar, “Tatalo e le Aunoa,” Liahona, Nov. 2008, 43)

Aisea tatou te tatalo ai i le Tama Faalelagi?

Ua aoaoina i tatou ia tatalo atu i le Tama Faalelagi. Tatou te le tatalo ia Iesu Keriso po o se isi lava tagata. Ina ia lagona le latalata atu i o tatou matua faalelagi, atonu e lagona e nisi tagata se manao e tatalo atu i le Tina Faalelagi. Ua talanoaina e taitai o le Ekalesia lenei mea e ala i le faasino atu i le faataitaiga a Iesu Keriso.

Na aoao mai Elder Dale G. Renlund o le Korama a Aposetolo e Toasefululua:

Na aoao e le Faaola ona so’o, “E tatau ona outou tatalo pea i le Tama i lo’u igoa” [3 Nifae 18:19]. Tatou te mulimuli i lenei mamanu ma tatou tapuai sa’o atu i lo tatou Tama Faalelagi i le suafa o Iesu Keriso ma aua le tatalo atu i le Tina Faalelagi. (Dale G. Renlund, “O Lou Natura Paia ma le Taunuuga e Faavavau,” Liahona, Me 2022, 70)

3 Nifae 19:18, 22. Aisea na tatalo atu ai so’o ia Iesu?

Na faamalamalama mai e Elder Bruce R. McConkie (1915–1985) o le Korama a Aposetolo e Toasefululua:

Sa i ai se mafuaaga faapitoa na ala ai ona faia lea tulaga i lenei faataitaiga, ma mo na o le tasi lava le taimi. Ua uma ona aoao atu e Iesu i latou ina ia tatalo e ala i lona suafa i le Tama, lea na latou faia muamua. … O Iesu sa faatasi ma i latou, o se faailoga o le Tama…. O le vaai ai ia te ia, sa faapei lava o loo latou vaai i le Tama, o le tatalo ai ia te ia, sa faapei lava o loo latou tatalo atu i le Tama. O se tulaga faapitoa ma tulaga ese. (Bruce R. McConkie, The Promised Messiah: The First Coming of Christ [1978], 560–61)

Gaoioiga Faaopoopo e Aoao Ai

O aafiaga i le tatalo

Ina ia saunia tagata aoga e faasoa mai o latou lava aafiaga i le tatalo, mafaufau e faasoa atu le tusiga e uiga i se alii talavou i Jamaica e igoa ia Amona (tagai i le “Connect,” Mo le Malosi o le Autalavou, Iuni 2021, itulau i totonu pito i luma), pe matamata le vitio “Prayer” (4:12).

3 Nifae 18:15, 18. “Mataala ma tatalo e le aunoa, ne’i faaosoosoina outou e le tiapolo”

Ina ia fesoasoani i tagata aoga ia iloa le aogā ma le taua o le tatalo e tetee atu ai i faaosoosoga, e mafai ona latou suesue ma fesootai fuaiupu nei i le 3 Nifae 18:15, 18: Mataio 26:41; Alema 34:39; Mataupu Faavae ma Feagaiga 10:5; 20:33; 61:39.

Ina ia fesoasoani i tagata aoga ia malamalama pe mafai faapefea ona fesoasoani le tatalo ia i tatou e tetee atu ai i faaosoosoga, e mafai ona e faaali atu se faamalu, se peleue, se pea totigilima, po o isi ofu puipui. Ia talanoaina pe faapefea e na aitema ona tuuina atu le puipuiga ma le auala e mafai ai ona talitutusa le faia po o le faaaogaina o na mea i le tatalo.

3 Nifae 18:22–25, 30–35. “Aua o tagata faapena ia outou galulue pea i ai”

E mafai ona manuia tagata aoga mai se talanoaga e uiga i le auauna atu i isi. Valaaulia i latou e mafaufau e uiga i tagata taitoatasi i o latou aiga po o a latou uarota po o paranesi o e atonu e le o olioli i faamanuiaga atoatoa o le talalelei. Faitau le 3 Nifae 18:22–25, 30–32, ma vaavaai mo mea na aoao mai e le Faaola e uiga i le auala e fesoasoani atu ai. Talanoa i aoaoga a le Faaola ma auala e mafai ona tatou auauna atu ai i isi.

3 Nifae 19:24. “Sa tuuina atu ia te i latou mea e tatau ona latou tatalo atu ai”

O nisi taimi tatou te tauivi ai ia iloa le mea e tatalo ai, ma o a tatou tatalo e mafai ona lagonaina le fai soo. Mafaufau e faitau le 3 Nifae 19:24 ma le Roma 8:26 ma talanoaina pe mafai faapefea e le Agaga Paia ona musuia i tatou i mea e tatalo atu ai. Valaaulia tagata aoga e faasoa mai mea e mafai ona latou faia e tuu atu ai i le Agaga Paia e musuia i latou i a latou tatalo. Mo se faataitaiga, e mafai ona latou faamaumauina manatu i se api talaaga pe mafaufau loloto i mea e tatalo ai a o lei tatalo. E mafai foi e tagata aoga ona faasoa mai ni aafiaga patino ina ua latou mauaina lenei faamanuiaga.

Tatalo i le taeao ma le afiafi

Afai o le a manuia tagata aoga mai le vaaia o se sootaga i le va o a latou tatalo i le taeao ma le afiafi, e mafai ona latou suesue i vaega o le “Tatalo e le Aunoa” saunia e Elder David A. Bednar (Liahona, Nov. 2008, 41–44). E mafai foi e le vasega ona matamata i le vitio o lana lauga mai le taimi faailo1:56 i le 5:55.