3 Nephi 17

“Ako Adunay Kaluoy diha Kaninyo”

Kini usa ka taas nga adlaw alang sa mga pundok sa mga katawhan sa mga Nephite sa diha nga ang Manluluwas mipahibalo nga panahon na alang Kaniya sa pagbiya. Bisan pa niana, ang mga luha ug tinguha sa pundok sa mga katawhan nga Siya magpabilin og diyutay pang panahon mitandog sa Iyang kasingkasing. Sa usa ka katingalahang pagpakita og kaluoy, giayo Niya sila, nag-ampo uban kanila, ug gipanalanginan ang ilang mga anak sa tagsa-tagsa. Kini nga leksiyon makatabang kanimo nga mobati sa kaluoy ni Jesukristo alang kanimo.

Paggamit sa mga bidyo sa Basahon ni Mormon. Ang mga bidyo sa Basahon ni Mormon gituyo sa pagtabang aron sa mga estudyante nga makabaton og makahuloganon nga mga kasinatian sa teksto. Kini nga mga bidyo wala gituyo aron ipuli sa pagbasa sa kasulatan. Maalamong tinoa kon kanus-a ug kon unsaon sa paggamit ang mga bidyo aron mapalambo ang mga kasinatian sa mga estudyante sa mga kasulatan.

Pagpangandam sa estudyante: Dapita ang mga estudyante nga maghunahuna og mga higayon diin sila mibati og kaluoy, kapuangod, o gugma gikan sa Dios. Ang mga estudyante mahimong mangandam sa pagpakigbahin kon sa unsang paagi kini nga mga kasinatian nakaapekto sa ilang mga relasyon ngadto Kaniya.

Mga Posibleng Kalihokan sa Pagkat-on

Ang panglantaw sa Manluluwas

Handurawa nga bag-o ka lang migahin og usa ka adlaw uban sa Manluluwas ug Siya mipahibalo nga panahon na nga Siya mobiya.

Aron matabangan ang mga estudyante nga mahanduraw kini nga panghitabo, mahimo nimong ipakita ang bidyo nga “Si Jesukristo ug ang mga Anghel Nangalagad uban sa Kaluoy” (11:59), anaa sa ChurchofJesusChrist.org, gikan sa time code 0:12 hangtod sa 1:30.

• Unsa kaha ang imong bation niini nga sitwasyon?

Tabangi ang mga estudyante sa paghinumdom unsay ilang nakat-onan mahitungod sa Manluluwas gikan sa 3 Nephi 11–16. Mahimo nilang ribyohon ang unsay ilang gisulat diha sa ilang mga journal ubos sa “Pagkat-on mahitungod ni Jesukristo diha sa 3 Nephi.”

Sa dili pa sila motubag sa mosunod nga pangutana, mahimong makatabang nga hangyoon ang mga estudyante nga ilista diha sa pisara ang mga punglihok nga naghulagway kon unsay gihimo sa Manluluwas.

• Sa unsang paagi ang mga lihok sa Manluluwas mipakita sa Iyang gugma alang sa mga Nephite?

Karon imong mabasa og dugang kon giunsa pagpakita sa Manluluwas ang Iyang mahigugmaong kaluoy taliwala sa mga Nephite. Samtang magtuon ka, hunahunaa kon unsay gitudlo sa Iyang mga lihok bahin sa Iyang kinaiya. Hatagi og pagtagad ang imong gibati mahitungod Kaniya.

Mahimong makatabang ang pagkahibalo nga ang tanan nga mga hitabo nga natala diha sa 3 Nephi 11–17 nahitabo sa usa ka adlaw.

Basaha ang 3 Nephi 17:1–6, mangita kon unsay imong makat-onan mahitungod ni Jesukristo gikan sa Iyang mga pulong ug mga buhat.

• Unsa ang imong nakit-an dinhi niini nga mga bersikulo?

Ang mga estudyante mahimong makakaplag og usa ka baroganan nga susama sa mosunod: Pinaagi sa pagpamalandong ug pag-ampo ngadto sa Amahan, atong giandam ang atong mga hunahuna aron makadawat og mas dakong panabot.

Kon gusto kang mobuhat og dugang pa niini nga baroganan, tan-awa ang seksiyon nga “Dugang nga mga Kalihokan sa Pagkat-on”.

Tingali nakakita ka og kamatuoran nga susama sa mosunod: Si Jesukristo puno sa kaluoy kanako. Ikonsiderar ang pagrekord niini nga kamatuoran duol sa bersikulo 6.

Si Elder Ulisses Soares sa Korum sa Napulog Duha ka Apostoles mitudlo:

Makahuluganon nga obserbahan nga ang mga buhat sa pagkamanggiluluy-on ni Jesus dili ra panagsa o gibuhat dili tungod kay gisugo, nga gibase sa lista sa mga buluhaton nga kompletohon, apan kada adlaw kini nga mga pagpahayag sa Iyang putli nga gugma alang sa Dios ug sa Iyang mga anak ug sa Iyang malungtaron nga tinguha sa pagtabang kanila. (Ulisses Soares, “Ang Malungtarong Kaluoy sa Manluluwas,” Liahona, Nob. 2021, 14)

• Sa imong kaugalingong mga pulong, unsa ang gitudlo ni Elder Soares mahitungod sa kaluoy sa Manluluwas?

Ang kaluoy sa Manluluwas

Ang nahibilin sa 3 Nephi 17 nagpakita sa maluluy-on nga kinaiya sa Manluluwas. Hinumdomi nga ang unsay gibuhat ni Jesukristo diha sa 3 Nephi 17 nahitabo tungod kay Siya nakasabot sa matarong nga mga tinguha sa mga Nephite ug Siya sa pagkatinuod gusto nga makauban ug makapanalangin kanila.

Ang tuyo sa mosunod nga kalihokan mao ang pagtabang sa mga estudyante sa pagpalambo og mas dako nga gugma alang sa Manluluwas pinaagi sa pagpakita sa Iyang maluluy-on nga kinaiya. Ang mga estudyante tingali nakabansay niini nga kahanas samtang nagtuon sa 3 Nephi 11. Ang pagsubli sa kahanas makatabang sa mga estudyante nga madugangan ang ilang abilidad sa paggamit niini.

Ipakita ang mosunod nga mga pangutana ug mga tudling. Dapita ang mga estudyante sa pagpili sa tudling nga gusto nilang tun-an, ug hangyoa sila sa pagpamalandong sa mga pangutana samtang nagtuon sila. Ang mga estudyante mahimong motubag niini nga mga pangutana diha sa ilang mga journal sa pagtuon ubos sa “Pagkat-on mahitungod ni Jesukristo diha sa 3 Nephi.”

Ikonsiderar ang pagtugot sa mga estudyante sa pagpili sa pagtuon nga mag-inusara o sa hilom nga adunay kapares.

• Hain nga mga gutlo ang mahimong labing espesyal alang kanimo? Ngano man?

• Unsay nakadani nimo bahin sa paagi sa pag-alagad ni Jesus?

• Sa unsang paagi nga ang Iyang mga pulong ug mga buhat makaapekto sa imong pagbati mahitungod Kaniya?

• 3 Nephi 17:7–10:Pag-ayo sa ilang mga masakiton ug may mga balatian

• 3 Nephi 17:13–20: Pag-ampo uban ug alang kanila

• 3 Nephi 17:11–12, 21–25: Pagpanalangin sa mga bata

Ikonsiderar ang pagpakita sa mosunod nga mga pangutana ug sa paghatag og panahon sa mga estudyante sa paghunahuna mahitungod niini sa dili pa motubag.

• Kon anaa ka didto, sa unsang paagi kini nga kasinatian makaapekto sa imong relasyon ngadto sa imong Manluluwas nga si Jesukristo?

• Sa unsang paagi sa imong hunahuna si Jesukristo nagpakita og kaluoy kanato karon?

• Unsa ang imong gibati nga nadasig nga buhaton aron sa pagpakita sa imong gugma alang ni Jesukristo?

Kon itugot sa panahon, ikonsiderar ang pag-awit og usa ka himno mahitungod sa gugma ug kaluoy sa Manluluwas. Ang uban nga mga ehemplo naglakip sa “Jesus, ang Paghunahuna Ko Kanimo Katam-is” (Mga Himno,, nu. 83), “Bililhon nga Manluluwas, Mahal nga Manunubos” (Mga Himno, nu. 58), ug “Gugma sa Atong Manluluwas” (Mga Himno, nu. 63).

Kon angay, dapita ang mga estudyante sa pagpakigbahin kon unsay ilang gibati panahon sa leksiyon karon. Dasiga sila sa pagpadayon sa pagpangita og ebidensiya sa kaluoy sa Manluluwas sa ilang mga kinabuhi.

Komentaryo ug Background nga Impormasyon

Gikan sa unsa nga mga matang sa mga sakit sa mga tawo ang giayo sa Manluluwas?

Si Presidente Dallin H. Oaks sa Unang Kapangulohan mitudlo:

Niadto nga ang Manluluwas mipakita ngadto sa mga matarong sa Bag-ong Kalibotan, Siya nanawag og mga tawo sa pagpaduol kinsa mga bakol o buta o may laing pisikal nga mga balatian. Siya usab miabiabi og sama nga pagdapit niadtong “gitakboyan sa tanan nga mga matang sa sakit” (3 Nephi 17:7). “Dad-a sila ngari,” Siya miingon, “ug Ako moayo kanila” (b. 7). Ang Basahon ni Mormon nag-istorya kon giunsa sa pundok sa katawhan pagpaduol sa “tanan kanila nga gitakboyan sa tanan nga matang sa sakit” (b. 9). Kini naglakip gayod sa mga tawo nga may tanang matang sa balatian sa pisikal o emosyonal o sa panghunahuna, ug ang balaang kasulatan nagpamatuod nga si Jesus “miayo kanila matag usa kanila” (b. 9). (Dallin H. Oaks, “Iyang Papahulayon ang Nag-antos,” Liahona, Nob. 2006, 6)

Si Sister Bonnie H. Cordon, Kinatibuk-ang Presidente sa Young Women, mitudlo usab sa mosunod nga bidyo mahitungod sa abilidad ug kaandam sa Manluluwas sa pag-ayo.

Unsaon nako pagtubo diha sa Kristohanong kaluoy?

Si Elder Ulisses Soares sa Korum sa Napulog Duha ka Apostoles mipakigbahin:

Ang maluluy-on nga kinaiya ni Jesus nakagamot sa gugma nga putli, diha sa Iyang tiunay ug hingpit nga gugma, nga mao ang mahinungdanong bahin sa Iyang maulaon nga sakripisyo. Ang kamanggiloloy-on usa ka sukaranang kinaiya niadtong nanlimbasog alang sa pagkabalaan ug kini nga balaanong kinaiya naglambigit sa uban pang Kristohanon nga mga kinaiya sama sa pagbangotan uban niadto nga nagbangotan ug pagbaton og pagsabot, kaluoy, ug pagkamabination. Ang pagpahayag og kamanggiloloy-on alang sa uban mao, sa tinuod, ang mahinungdanon nga bahin sa ebanghelyo ni Jesukristo ug ang klaro nga ebidensiya sa atong espirituwal ug emosyonal nga kasuod ngadto sa Manluluwas. Dugang pa, gipakita niini ang lebel sa impluwensiya nga anaa Siya sa atong pamaagi sa kinabuhi ug gipakita ang potensiyal sa atong mga espiritu. (Ulisses Soares, “Ang Malungtarong Kaluoy sa Manluluwas,” Liahona, Nob. 2021, 14)

Dugang nga mga Kalihokan sa Pagkat-on

3 Nephi 17:1–3. “Palandonga kini nga mga butang nga Ako miingon”

Ang mosunod makatabang sa pag-andam sa mga estudyante sa pagpamalandong sa mga kasulatan.

Si Presidente Henry B. Eyring sa Unang Kapangulohan mitudlo nga “ang pagbasa, pagtuon, ug pagpamalandong dili pareho. Mahimo kitang mobasa sa mga pulong ug tingali makakuha kita og mga ideya. Magtuon kita ug tingali makadiskobre og mga sundanan ug mga koneksyon diha sa kasulatan. Apan kon kita mamalandong, atong gidapit ang pagpadayag pinaagi sa Espiritu. Ang pagpamalandong, alang kanako, mao ang paghunahuna ug pag-ampo nga akong buhaton human sa mainampingon nga pagbasa ug pagtuon sa mga kasulatan” (Henry B. Eyring, “Pagserbisyo uban sa Espiritu,” Liahona, Nob. 2010, 60).

Mahimo nimong dapiton ang mga estudyante sa pagtuon sa 3 Nephi 17:1–3, mangita sa mga panudlo nga gihatag sa Ginoo ngadto sa mga Nephite aron sila “[ma]andam [sa ilang] mga hunahuna alang sa ugma.” Mahimo dayon silang makaila og usa ka kamatuoran sama sa pinaagi sa pagpamalandong ug sa pag-ampo ngadto sa Amahan, atong giandam ang atong mga hunahuna aron makadawat og mas dakong panabot.

Ipakigbahin ang pamahayag ni Presidente Eyring, ug dapita ang mga estudyante sa paghisgot kon sa unsang paagi ang pagtuon, pag-ampo, ug pagpamalandong mahimong magtinabangay sa pag-andam sa atong mga hunahuna aron makadawat og mas dakong panabot. Ang mga estudyante makahimo dayon sa paggamit sa unsay ilang nakat-onan mahitungod sa pagpamalandong samtang ilang tun-an ang nahibilin sa 3 Nephi 17. Pananglitan, mahimo nilang handurawon ang mga panghitabo diha sa mga kasulatan o maghunahuna kon unsaon sila pagtagad sa Manluluwas. Human niana, hisgoti kon sa unsang paagi ang ilang pagpamalandong nagdugang sa ilang pagsabot sa mga kasulatan ug sa paghigugma sa Ginoo.

3 Nephi 17:5. “Siya milibot sa iyang mga mata pag-usab”

Usa sa balaanong mga hiyas sa Manluluwas mao ang Iyang abilidad sa pag-ila o pagsabot sa mga panginahanglan sa uban ug dayon mosangkap niadto nga mga panginahanglan uban sa gugma ug kamabination.

Dapita ang mga estudyante sa pagtuon sa 3 Nephi 17:5, mangita kon giunsa ni Jesukristo pagpakita sa Iyang abilidad sa pagsabot sa mga panginahanglan sa uban. Ikonsiderar ang pagpakita sa bidyo ni Presidente Bonnie H. Cordon diha sa seksiyon nga “Komentaryo ug Background nga Impormasyon”. Samtang magtan-aw ang mga estudyante, dapita sila sa paghunahuna kon unsaon nila pagpalambo ang ilang abilidad sa pagsabot sa mga panginahanglan sa uban ug pag-atiman kanila sama sa buhaton sa Manluluwas.

Ikonsiderar ang pag-awit o ang pagbasa sa mga pulong sa “Maninguha Kong Mahimong Mahisama Kang Jesus” (Songbook sa mga Bata, 40).

Hisgoti kon sa unsang paagi kita makasunod sa ehemplo sa Manluluwas pinaagi sa pagmatikod sa mga panginahanglan sa uban ug dayon sa pagtabang kanila.

3 Nephi 17:12. “Ug si Jesus mitindog sa ilang taliwala”

Aron matabangan ang mga estudyante nga mobati nga ang Manluluwas duol kanila, dapita sila sa pagtuon sa 3 Nephi 11:8; 3 Nephi 20:22; 3 Nephi 27:2; Doktrina ug mga Pakigsaad 38:7; 88:13; ug Abraham 3:22–23, mangita kon sa unsang paagi kana nga mga bersikulo susama sa 3 Nephi 17:12. Mahimong i-link sa mga estudyante kini nga mga bersikulo. Dayon hisgoti kon unsay nadiskobrehan sa mga estudyante mahitungod sa Manluluwas ug sa Iyang relasyon ngari kanato.