3 Nephi 18:15–39; 19:19–29

“Mag-ampo Kanunay”

Daghang mga tawo ang nag-ampo matag adlaw. Ang ubang mga pag-ampo mas makahuloganon kay sa uban. Si Jesukristo wala lamang mitudlo sa Iyang mga sumusunod sa “[pag-ampo] sa kanunay ngadto sa Amahan” (3 Nephi 18:19), apan Iya usab gipakita kanila kon unsaon sa pag-ampo. Kini nga leksiyon makatabang nimo sa pagsunod sa mga pagtulun-an ug ehemplo ni Jesukristo sa pag-ampo sa kanunay ug sa pagbaton og mas makahuloganon nga mga pag-ampo.

Pag-ampo kanunay alang sa imong mga estudyante. Ang Langitnong Amahan nakaila sa matag usa sa imong mga estudyante. Samtang mag-ampo ka ngadto Kaniya mahitungod sa imong mga estudyante, makatabang Siya kanimo sa pag-ila sa ilang mga panginahanglan ug modasig kanimo og mga paagi sa pagtubag niadto nga mga panginahanglan. Paminaw sa mga pag-aghat nga mahimong moabot samtang nangandam ka sa pagtudlo o sa panahon sa leksiyon.

Pagpangandam sa estudyante: Dapita ang mga estudyante sa pagbasa o sa pagpaminaw sa pakigpulong ni Presidente M. Russell Ballard “Panagtukaw Kamo sa Tanang Panahon, ug Manag-ampo” (Liahona, Nob. 2020, 77–79), mangita og mga kamatuoran nga makatabang kanila sa ilang personal nga mga pag-ampo.

Mga Posibleng Kalihokan sa Pagkat-on

Mga ehemplo

Isulat ang kapahayag sa ubos nga adunay mga blangko diha sa pisara, ug tugoti ang pipila ka mga estudyante sa pagpakigbahin kon unsaon nila pagtubag ang mga blangko.

Paghunahuna og talento, kahanas, o hiyas nga gusto nimong mapalambo. Pagtino og mga tawo nga imong nailhan kinsa aduna niana nga talento, kahanas, o hiyas. Pinaagi sa paggamit niini nga mga hunahuna, tubagi ang mosunod nga mga blangko sa pipila ka nagkalain-laing mga paagi:

• Kon gusto ko makat-on bahin sa , sundon ko ang panig-ingnan ni tungod kay .

Balika ang kalihokan pinaagi sa pagtubag sa unang blangko sa mosunod nga kapahayag sa usa ka butang nga gusto nimong makat-onan gikan sa Manluluwas ug sa pagtubag kon ngano sa kataposan nga blangko.

• Kon gusto ko nga makat-on bahin sa , sundon ko ang panig-ingnan ni Jesukristo tungod kay .

Sa panahon sa Iyang pagpangalagad didto sa Amerika, ang Manluluwas mitudlo sa katawhan pinaagi sa pulong ug ehemplo.

Basaha ang 3 Nephi 18:16, 24, mangita og ehemplo nga gipakita ni Jesus.

• Unsa ang gusto sa Manluluwas nga makat-onan sa mga tawo gikan sa Iyang ehemplo?

Mahimong masukod sa mga estudyante ang ilang kaugalingon sa ilang kasamtangan nga mga pag-ampo gamit ang mosunod nga sukdanan. Ang pagbuhat niini makadapit sa Espiritu Santo sa pagtabang kanila nga masayod kon sa unsang paagi ang mga pagtulun-an ug ehemplo sa Manluluwas makatabang kanila sa pagpalambo sa ilang personal nga mga pag-ampo.

Gradohi ang mosunod sa sukdanan gikan sa 1 hangtod sa 5, nga ang 5 mao ang labing taas:

• Nag-ampo ko kada adlaw.

• Nakigsulti ko ug mibati nga duol sa Langitnong Amahan kon mag-ampo ko.

• Ako adunay tinguha sa pagpalambo sa akong personal nga mga pag-ampo.

Dapita ang mga estudyante sa paghisgot sa komon nga mga hagit sa makahuloganon nga pag-ampo—pananglitan, paggahin og panahon sa pag-ampo, pagkahibalo unsay isulti, pagdawat og mga tubag, o uban pang mga hagit. Ang mga estudyante mahimo dayon nga mangita og mga solusyon samtang sila nagtuon sa mga kasulatan.

Sa imong pagpadayon sa pagtuon sa 3 Nephi 18, tinguhaa ang inspirasyon sa Espiritu Santo aron matabangan ka nga mahibalo unsay imong mahimo aron mapalambo ang imong personal nga mga pag-ampo. Sunda ang mga pagtulun-an ug ehemplo ni Jesukristo sa imong mga pagpaningkamot nga molambo.

Ang mga pagtulun-an sa Manluluwas mahitungod sa pag-ampo

Basaha ang 3 Nephi 18:15, 18–23, mangita kon unsa ang gitudlo sa Manluluwas mahitungod sa pag-ampo. Mahimo usab nimo nga basahon ang panudlo sa Manluluwas bahin sa pag-ampo gikan sa Iyang wali didto sa templo sa 3 Nephi 13:5–13.

Mahimong kompletohon sa mga estudyante ang mosunod nga kapahayag diha sa pisara:

• Makasunod ako sa mga pagtulun-an sa Manluluwas sa pag-ampo pinaagi sa …

Paggahin og igong panahon sa paghisgot sa mga pagtulun-an sa Manluluwas. Pagmahimong andam nga tugotan ang diskusyon nga moabot sa kon unsa ang gibati sa mga estudyante nga gikinahanglan nila. Pananglitan, ang klase mahimong mogahin og panahon sa paghisgot kon sa unsang paagi ang pag-ampo makatabang kanato sa pagsukol sa tentasyon, kon sa unsang paagi ang pag-ampo mopanalangin sa mga pamilya, o kon sa unsang paagi kita makapangayo og mga panalangin sa pag-ampo. Mahimo kang makakat-on og dugang pa bahin sa mga pagtulun-an sa Manluluwas mahitungod sa pag-ampo diha sa Lucas 11:1–13.

Mahimo ka usab mogamit sa pipila ka mga pamahayag diha sa seksiyon nga “Komentaryo ug Background nga Impormasyon” isip kabahin sa panaghisgotan.

• Hain sa mga pagtulun-an ni Jesus mahitungod sa pag-ampo sa imong hunahuna ang labing makatabang kanimo? Ngano man?

Ang ehemplo sa Manluluwas sa pag-ampo

Hunahunaa kon unsa kaha ang pagbati nga makadungog kang Jesukristo nga nag-ampo alang kanimo. Unsa kaha ang iyang iampo alang kanimo? Hunahunaa kon unsa kahay imong bation ug kon sa unsang paagi kini makaapektar sa imong mga pag-ampo.

Mahimo nimong bahinon ang klase ngadto sa gagmay nga mga grupo ug i-assign ang matag grupo sa usa sa mosunod nga mga hugpong sa mga bersikulo nga basahon ug ireport.

Tabangi ang mga estudyante nga makakita kon kang kinsa si Jesus nag-ampo, kinsa ang Iyang giampo, unsa ang Iyang giampo, nganong Siya nag-ampo, ang Iyang kinaiya sa pag-ampo, ug daghan pa. Usa ka paagi sa pagbuhat niini mao ang pagpatubag sa mga estudyante sa “Kinsa?” “Unsa?” “Ngano?” ug “Unsaon?”

Kon hisgotan kon nganong nag-ampo si Jesus, makatabang ka sa mga estudyante nga makakita nga ang usa sa mga rason kon nganong nag-ampo si Jesus mao ang pagpakigsulti sa Iyang Amahan, kinsa Iyang gihigugma.

Mahimo nimong ipakita ang bidyo nga “Ang mga Disipulo Nangalagad ug si Jesukristo Nag-ampo alang sa Katawhan” gikan sa time code 3:05 hangtod sa 7:18, anaa sa ChurchofJesusChrist.org, ug dapita ang mga estudyante sa pagsubay sunod sa mga bersikulo diha sa 3 Nephi 19.

• 3 Nephi 17:14–17

• 3 Nephi 19:19–23

• 3 Nephi 19:27–29

• Mateo 26:39–42

• Juan 17:1, 4, 8–9

• Doktrina ug mga Pakigsaad 45:3–5

Dapita ang mga estudyante sa pagkompleto sa mosunod nga kapahayag diha sa pisara:

• Makasunod ako sa ehemplo sa Manluluwas sa pag-ampo pinaagi sa …

• Unsa ang imong nakat-onan mahitungod sa unsay gibati sa Manluluwas mahitungod kanimo?

• Sa unsang paagi sa imong hunahuna nga ang pagsunod sa Iyang ehemplo makahimo og kalainan sa imong mga pag-ampo?

Ang atong personal nga mga pag-ampo

Tabangi ang mga estudyante sa paghunahuna sa makahuluganon nga mga kasinatian nga aduna sila sa pag-ampo. Ang mga estudyante mahimong maghunahuna sa higayon diin nag-ampo sila nga makasukol sa tentasyon o alang sa tabang sa usa ka hagit. Mahimo silang maghunahuna sa dihang ang ilang pamilya gipanalanginan pinaagi sa pag-ampo, sa dihang nag-ampo sila alang sa laing tawo, o sa dihang nangayo sila og mga panalangin. Dapita ang mga estudyante sa pagpakigbahin kon sa unsang paagi ang pag-ampo nakapanalangin kanila. Pahinumdomi ang mga estudyante nga dili ipakigbahin ang mga kasinatian nga sagrado ra kaayo o pribado.

Ipakigbahin sa mga estudyante kon sa unsang paagi ka napanalanginan samtang nagsunod ka sa ehemplo sa Manluluwas ug sa Iyang mga pagtulun-an mahitungod sa pag-ampo. Tan-awa ngadto sa nahuman nga mga pamahayag diha sa pisara, ug hisgoti kon sa unsang paagi ang mga pagtulun-an ug ang ehemplo sa Manluluwas makatabang sa mga hagit sa pag-ampo nga bag o lang nahisgotan.

Pagpili og bisan usa sa mga pagtulun-an sa Manluluwas o usa ka butang nga Iyang gipakita sa pag-ampo nga mahimo nimong iapil sa imong personal nga mga pag-ampo. Paghimo og pahinumdom ug sugdi ang paglihok niini karon. Samtang imong buhaton, himatikdi kon sa unsang paagi kini nakatabang sa imong mga pag-ampo nga mahimong mas makahuloganon ug kon sa unsang paagi kini nakaapekto sa imong relasyon ngadto sa Langitnong Amahan.

Mahimo nimong idugang ang pipila sa imong nakat-onan karon sa imong entry sa journal nga “Pagkat-on mahitungod ni Jesukristo diha sa 3 Nephi.”

Mahimo nimong dapiton ang mga estudyante sa pagdugang diha sa ilang entry sa journal nga “Pagkat-on mahitungod ni Jesukristo diha sa 3 Nephi.”

Komentaryo ug Background nga Impormasyon

Sa unsang paagi ang pag-ampo mopanalangin sa mga pamilya?

Si Presidente Henry B. Eyring sa Unang Kapangulohan mipakigbahin:

Sa dihang mag-ampo kamo uban ug alang sa mga sakop sa inyong pamilya, inyong mabati ang gugma ninyo ug sa Manluluwas alang kanila. Anam-anam kanang mahimong inyong espirituhanong gasa samtang inyo kanang tinguhaon. Mobati niini ang mga sakop sa inyong pamilya samtang kamo mag-ampo uban sa mas hugot nga pagtuo. (Henry B. Eyring, “Kababayen-an ug Pagkat-on sa Ebanghelyo diha sa Panimalay,” Liahona, Nob. 2018, 60)

Unsa may akong iampo?

Si Presidente M. Russell Ballard sa Korum sa Napulog Duha ka Apostoles mitudlo:

Dapiton ko kamo sa pag-ampo kanunay. Pag-ampo alang sa inyong pamilya. Pag-ampo alang sa mga lider sa mga nasod. Pag-ampo alang sa maisogong mga tawo nga nagtrabaho sa kasamtangang pagpakig-away batok sa sosyal, kalikopanhon, politikanhon, ug biyolohikal nga mga sakit nga mihampak sa tanang katawhan sa tibuok kalibotan, sa mga adunahan ug mga kabos, sa mga batan-on ug sa tigulang.

Ang Manluluwas mitudlo kanato sa dili paglimita kinsay atong iampo. Siya miingon, “Higugmaa ninyo ang inyong mga kaaway, panalangini sila nga nagtunglo kaninyo, buhata ang maayo sa mga nagadumot kaninyo, ug pag-ampo alang kanila nga nagatamay kaninyo, ug nagalutos kaninyo.” [Mateo 5:44]. (M. Russell Ballard, “Panagtukaw Kamo sa Tanang Panahon, ug Manag-ampo,” Liahona, Nob. 2020, 78)

Si Elder David A. Bednar sa Korum sa Napulog Duha ka mga Apostoles mipahayag:

Mangamuyo sa Langitnong Amahan alang sa mga panalangin nga atong gitinguha sa atong personal nga mga kinabuhi maayo ug angay. Hinoon, ang pag-ampo sa matinguhaon nga paagi alang sa uban, niadtong kinsa atong gihigugma ug niadtong matamayon nga naggamit kanato, usab usa ka importante nga butang sa makahuloganon nga pag-ampo. Sama nga ang pagpahayag og pasalamat nga mas makanunayon diha sa atong mga pag-ampo makapadako sa agianan alang sa pagpadayag,mao usab ang pag-ampo alang sa uban sa tanang kusog sa atong mga kalag modugang sa atong kapasidad sa pagpaminaw ug sa pagsunod sa tingog sa Ginoo. (David A. Bednar, “Pag-ampo sa Kanunay,” Liahona, Nob. 2008, 43)

Ngano nga mag-ampo kita ngadto sa Langitnong Amahan?

Kita gisugo sa pag-ampo ngadto sa Langitnong Amahan. Dili kita mag-ampo ngadto ni Jesukristo o ngadto ni bisan kinsa nga indibidwal. Aron mobati nga suod ngadto sa atong Langitnong mga ginikanan, ang pipila ka mga tawo tingali mobati og tinguha sa pag-ampo ngadto sa Langitnong Inahan. Ang mga lider sa Simbahan nagtubag niini pinaagi sa pagdirekta ngadto sa ehemplo ni Jesukristo.

Si Elder Dale G. Renlund sa Korum sa Napulog Duha ka Apostoles mitudlo:

Ang Manluluwas nagtudlo sa Iyang mga disipulo, “Kamo kinahanglan gayod nga mag-ampo sa kanunay ngadto sa Amahan sa akong ngalan” [3 Nephi 18:19]. Kita mosunod niining sumbanan ug modirekta sa atong pagsimba ngadto sa atong Langitnong Amahan sa ngalan ni Kristo ug dili mag-ampo ngadto sa Langitnong Inahan. (Dale G. Renlund, “Ang Inyong Diosnong Kinaiya ug Mahangtorong Padulngan,” Liahona, Mayo 2022, 70-75)

3 Nephi 19:18, 22. Nganong ang mga disipulo nag-ampo ngadto ni Jesus?

Si Elder Bruce R. McConkie (1915–1985) sa Korum sa Napulog Duha ka Apostoles mipasabot:

Adunay usa ka espesyal nga rason ngano nga kini gihimo sa kini nga higayon ug sa usa ka higayon nga basehan. Gitudloan na sila ni Jesus sa pag-ampo sa iyang ngalan ngadto sa Amahan, nga una nilang gibuhat. … Si Jesus diha sa ilang atubangan ingon nga simbolo sa Amahan…. Sa pagtan-aw kaniya, ingon og ilang nakita ang Amahan; sa pag-ampo ngadto kaniya, ingon og sila nag-ampo ngadto sa Amahan. Usa kadto ka talagsaon ug espesyal nga sitwasyon. (Bruce R. McConkie, The Promised Messiah: The First Coming of Christ [1978], 560–61)

Dugang nga mga Kalihokan sa Pagkat-on

Mga Kasinatian sa Pag-ampo

Aron maandam ang mga estudyante sa pagpakigbahin sa ilang kaugalingong mga kasinatian sa pag-ampo, ikonsiderar ang pagpakigbahin sa artikulo bahin sa usa ka batan-ong lalaki sa Jamaica nga ginganlan og Ammon (tan-awa ang Alang sa Kalig-on sa Kabatan-onan, Hunyo 2021, sulod sa atubangan nga hapin), o tan-awa ang bidyo nga “Prayer” (4:12).

3 Nephi 18:15, 18. “Magbantay ug mag-ampo sa kanunay, tingali unya og kamo matintal sa yawa”

Aron matabangan ang mga estudyante nga makita ang kamahinungdanon ug ang bili sa pag-ampo aron makasukol sa tentasyon, mahimo nilang tun-an ug i-link ang mosunod nga mga bersikulo ngadto sa 3 Nephi 18:15, 18: Mateo 26:41; Alma 34:39; Doktrina ug mga Pakigsaad 10:5; 20:33; 61:39.

Aron matabangan ang mga estudyante nga makasabot kon sa unsang paagi ang pag-ampo makatabang kanato sa pagsukol sa tentasyon, mahimo kang magpakita og payong, pangsapaw [coat], gwantes, o uban pang sinina nga gigamit aron panalipod. Hisgoti kon sa unsang paagi ang maong mga butang naghatag og panalipod ug kon sa unsang paagi ang pagsul-ob niini o paggamit niini mahimong susama sa pag-ampo.

3 Nephi 18:22–25, 30–35. “Kay ngadto kanila kamo magpadayon sa pag-alagad”

Ang mga estudyante mahimong makabenepisyo gikan sa usa ka panaghisgot mahitungod sa pagpangalagad ngadto sa uban. Dapita sila sa paghunahuna mahitungod sa mga indibidwal diha sa ilang mga pamilya o sa ilang ward o branch kinsa tingali wala makatagamtam sa hingpit nga mga panalangin sa ebanghelyo. Basaha ang 3 Nephi 18:22–25, 30–32, mangita sa unsay gitudlo sa Manluluwas mahitungod sa unsaon sa pagtabang. Hisgoti ang mga pagtulun-an sa Manluluwas ug ang mga paagi nga kita makapangalagad sa uban.

3 Nephi 19:24. “Kini gihatag ngadto kanila unsa ang kinahanglan nga ilang iampo”

Usahay maglisod kita sa pagkahibalo kon unsay iampo, ug ang atong mga pag-ampo daw binalik-balik. Ikonsiderar ang pagbasa sa 3 Nephi 19:24 ug sa Mga Taga-Roma 8:26 ug hisgoti kon sa unsang paagi ang Espiritu Santo makadasig kanato sa unsay atong iampo. Dapita ang mga estudyante sa pagpakigbahin kon unsay ilang mabuhat aron sa pagtugot sa Espiritu Santo sa pagdasig kanila diha sa ilang mga pag-ampo. Pananglitan, mahimo silang magrekord og mga ideya diha sa journal o mamalandong kon unsay iampo sa dili pa mag-ampo. Ang mga estudyante mahimo usab nga mopakigbahin og personal nga mga kasinatian sa dihang ilang nadawat kini nga panalangin.

Mga pag-ampo sa buntag ug gabii

Kon ang mga estudyante makabenepisyo sa pagkakita og koneksiyon tali sa ilang mga pag-ampo sa buntag ug sa gabii, mahimo nilang tun-an ang mga bahin sa “Pag-ampo sa Kanunay” ni Elder David A. Bednar (Liahona, Nob. 2008, 41–44). Mahimo usab tan-awon sa klase ang bidyo sa iyang pakigpulong gikan sa time code 1:56 hangtod sa 5:55.