3 Nephi 19

“Silang Tanan Napuno sa Espiritu Santo”

Walay laing labaw nga gitinguha ang napulog duha ka mga tinun-an nga Nephite kay sa pagpakig-uban sa Espiritu Santo. Kini mao ang unod sa ilang mga pag-ampo ngadto sa Langitnong Amahan human sa pagtapos sa Manluluwas sa unang adlaw sa Iyang pangalagad taliwala kanila. Unsa ang kinahanglan natong buhaton aron ang Espiritu Santo magauban kanato? Unsaon man nato sa pagpahimulos sa Iyang pakig-uban sa atong mga kinabuhi? Ang katuyoan niini nga leksiyon mao ang pagtabang kanimo nga mas makasabot kon unsaon sa pagdawat sa mga panalangin sa Espiritu Santo.

Pagtabang sa mga tinun-an nga matudloan pinaagi sa Espiritu Santo. Alang sa mga tinun-an aron matudloan pinaagi sa Espiritu Santo, kinahanglan nga adunay angay nga palibot sa pagkat-on. Ang pagkahan-ay sa lingkoranan sa lawak klasehanan ug ang imong positibo nga mga pakig-uban sa mga estudyante makatabang sa pagtampo sa maayong palibot nga nagdapit sa presensiya sa Espiritu Santo.

Pagpangandam sa estudyante: Ikonsiderar ang pagdapit sa mga estudyante sa pagtuon sa “Ang mga disipulo ni Jesukristo magtinguha sa gasa sa Espiritu Santo” diha sa latid sa pagtuon alang sa 3 Nephi 17–19 sa Dali, Sunod Kanako—Alang sa Panimalay ug Simbahan: Basahon ni Mormon 2024 ug sa pagtambong nga andam sa pagpakigbahin sa unsay ilang nakat-onan ug gibati samtang sila nagbuhat niini.

Mga Posibleng Kalihokan sa Pagkat-on

Matarong nga mga tinguha sa tin-edyer

Imbis nga ipangutana lang ang mosunod nga pangutana ug ipatubag sa mga estudyante, mahimo nimong hatagan ang matag estudyante og usa ka piraso nga papel aron ilista ang ilang mga tubag. Mahimo dayon nimong kolektahon ang ilang mga tubag ug ipakigbahin ang uban sa klase. Ang mga estudyante mahimong motubag niini nga pangutana sa daghang mga paagi.

• Kon imong i-survey ang 100 ka tin-edyer gikan sa imong dapit, unsa sa imong hunahuna ang ilang labing komon nga matarong nga mga tinguha?

Pamalandongi kon hain niini nga mga tinguha ang imong masabtan. Samtang magtuon ka sa 3 Nephi 19, pangita og mga kamatuoran nga makatabang kanimo nga makab-ot ang imong matarong nga mga tinguha.

Human ang Manluluwas nangalagad, nagtudlo, nag-ayo, ug nagpanalangin sa mga katawhan, Siya “mibiya kanila, ug mikayab ngadto sa langit” (3 Nephi 18:39) nga adunay gisaad nga Siya mobalik pagkasunod nga adlaw. Ang mga katawhan mipauli, ug “sa tibuok gabii kini gibalita diha sa tanan nga dapit mahitungod kang Jesus,” ug “hilabihan ka daghan, ang naghago sa hilabihan nianang tibuok gabii, nga aron unta sila sa pagkabuntag anaa sa dapit diin si Jesus mopakita sa iyang kaugalingon ngadto sa pundok sa mga katawhan” (3 Nephi 19:3). Pagkasunod nga adlaw, ang napulog-duha ka tinun-an nga gipili ni Jesus mipundok sa mga tawo ug nagtudlo kanila sa “mga pulong nga gipamulong ni Jesus.” Ang mga tinun-an dayon miluhod ug “nag-ampo ngadto sa Amahan sa ngalan ni Jesus” (3 Nephi 19:8).

Basaha ang 3 Nephi 19:9 aron makita kon unsa ang ilang labing gitinguha samtang sila nag-ampo.

Ikonsiderar ang pagpakita sa mosunod nga mga pangutana. Human ang mga estudyante adunay pipila ka minuto aron irekord ang ilang mga tubag diha sa ilang mga journal sa pagtuon, mahimo nimong organisahon ang mga estudyante ngadto sa gagmay nga mga grupo aron hisgotan ang mga tubag nga ilang nakit-an.

• Sa imong hunahuna ngano kaha nga sila hilabihan nga nagtinguha sa Espiritu Santo?

• Unsa ang pipila ka mga kahimtang nga mahimo nimong atubangon sa umaabot diin imong tinguhaon nga mailhan ug masabtan ang mga pag-aghat sa Espiritu Santo?

Pamalandongi kon tinud-anay ka ba gayod nga nagtinguha sa Espiritu Santo diha sa imong kinabuhi ug sa unsang paagi nga ang imong kinabuhi mahimong lahi kon ikaw mas kanunay nga nagtinguha sa Iyang impluwensiyay.

Pagtinguha sa Espiritu Santo

Basaha ang 3 Nephi 19:10–23, ug pangitaa ang mga paagi nga mahimo nimong makompleto ang mosunod nga pamahayag:

• Kita mahimong mapuno sa Espiritu Santo samtang kita …

Ikonsiderar ang pagdapit sa mga estudyante sa pagsulat diha sa pisara og mga paagi nga ilang makompleto ang pamahayag. Ang mosunod mao ang duha ka posibleng paagi sa pagkompleto sa pamahayag.

• … kinasingkasing nga nagtinguha ug nag-ampo alang sa Iyang pakig-uban.

• … moapil sa mga ordinansa sa ebanghelyo.

Ang mga kalihokan A ug B makatabang sa mga estudyante nga makasabot kon unsa ang ilang mabuhat aron mapuno sa Espiritu Santo. Kini nga mga kalihokan mahimong buhaton isip usa ka klase. Ang mga estudyante mahimo usab nga mokompleto sa usa o sa duha ka mga kalihokan diha sa gagmay nga mga grupo ug ireport ang unsay ilang nakat-onan.

Hangyoa ang mga estudyante sa pagpakigbahin sa piho nga mga panglantaw o mga kasulatan nga ilang napalgan. Dapita ang mga estudyante sa pagpakigbahin og personal nga mga kasinatian mahitungod sa pagtinguha ug pag-ampo alang sa Espiritu Santo o pag-apil sa mga ordinansa.

Agig dugang sa mga kalihokan A ug B, mahimo usab nimong hisgotan kon sa unsang paagi ang pagtuo diha kang Jesukristo ug sa mga pulong sa Iyang mga sulugoon makatabang kanato nga mapuno sa Espiritu Santo.

Kalihokan A: Kita mahimong mapuno sa Espiritu Santo samtang kita kinasingkasing nga nagtinguha ug nag-ampo alang sa Iyang pakig-uban.

• Sa unsang paagi ang atong mga tinguha ug mga pag-ampo makatabang kanato nga mapuno sa Espiritu Santo?

Si Elder David A. Bednar sa Korum sa Napulog Duha ka Apostoles mipasabot kon sa unsang paagi ang tinguha ug pag-ampo makatabang kanato nga makabaton sa Espiritu uban kanato.

Kita ba … nahinumdom sa pag-ampo nga matinguhaon ug makanunayon alang sa labaw natong gitinguha, gani ang Espiritu Santo? O kita nalinga ba sa kalibotanong mga kabalaka ug sa inadlawng panginabuhi ug gikalimtan o wala na matagad kining pinakabililhon sa tanang mga gasa? Ang pagdawat sa Espiritu Santo magsugod sa atong sinsero nga tinguha ug sa padayon nga tinguha alang sa Iyang pakig-uban sa atong kinabuhi. (David A. Bednar, “Dawata ang Espiritu Santo,” Liahona, Nob. 2010, 96)

Mahimo nimong tan-awon ang “Having the Holy Ghost” (2:56), anaa sa ChurchofJesusChrist.org.

• Kanus-a ang imong matarong nga mga tinguha ug mga pag-ampo nakatabang kanimo nga mobati sa impluwensiya sa Espiritu?

Kalihokan B: Kita mahimong mapuno sa Espiritu Santo samtang moapil kita sa mga ordinansa sa ebanghelyo.

Basaha ang 3 Nephi 18:7, 11; 27:20, mangita kon sa unsang paagi ang mga ordinansa makatabang kanato nga mapuno sa Espiritu Santo.

Si Propeta Joseph Smith (1805–44) mitudlo:

Ang bunyag usa ka balaan nga ordinansa pasiuna sa pagdawat sa Espiritu Santo, mao kini ang agianan ug yawe diin ang Espiritu Santo ipangalagad. Ang Gasa sa Espiritu Santo pinaagi sa pagpandong sa mga kamot, dili mahimong madawat pinaagi sa bisan unsa nga laing baroganan kay sa baroganan sa pagkamatarong. (Mga Pagtulun-an sa mga Presidente sa Simbahan: Joseph Smith [2007], 113.)

• Unsa ang imong nakat-onan mahitungod sa tahas sa mga ordinansa (sama sa bunyag ug sa sakramento) sa pagtabang kanato nga mapuno sa Espiritu Santo?

• Kanus-a ka napuno sa Espiritu Santo samtang nag-apil ka sa mga ordinansa sa ebanghelyo?

Personal nga paggamit

Ikonsiderar ang pagpakigbahin og personal nga kasinatian mahitungod sa unsay imong nabuhat sa pagtinguha sa Espiritu Santo.

Hunahunaa ang imong kaugalingong panginahanglan sa Espiritu Santo ug nganong nagtinguha ka sa Iyang impluwensiya sa imong kinabuhi. Pag-ila og usa ka butang nga imong gibati nga nadasig nga buhaton aron sa pagpabilin sa Espiritu Santo nga nagauban kanimo. Paningkamoti nga sundon kini nga impresyon.

Komentaryo ug Background nga Impormasyon

Sa unsa nga paagi nga ang Espiritu Santo mahimong atong kanunay nga kauban?

Si Elder David A. Bednar sa Korum sa Napulog Duha ka Apostoles mitudlo:

Kon kita naningkamot nga mahimo ug mahimong maayo—dili hingpit sa pagkakakron, apan anam-anam nga moarang-arang—kon kita nagtahod sa atong mga pakigsaad, nagtinguha sa pakig-uban sa Espiritu Santo, takos nga nag-ambit sa sakramento ug nagbaton og kapasayloan sa atong mga sala, ug nagpadayon sa unahan, nan sa pagkatinuod kita makabaton sa kanunay nga pakig-uban sa Espiritu Santo. Kita wala “nangandam sa pagdawat og pagpadayag”; kita “nagpuyo sa pagpadayag.” (David A. Bednar, The Spirit of Revelation [2021], 7)

Ang Doktrina ug mga Pakigsaad 121:45–46 nagtudlo usab kon unsaon nato pagbaton sa Espiritu Santo isip atong kanunay nga kauban.

3 Nephi 19:23. Sa unsang paagi makatabang ang Espiritu Santo kanato nga mahimong usa sa Amahan ug sa Anak?

Si Elder D. Todd Christofferson sa Korum sa Napulog Duha ka Apostoles mipasabot:

Segurado nga dili kita mahiusa sa Dios ug ni Kristo hangtod atong himoon ang Ilang kabubut-on ug interes nga atong labing dako nga tinguha. Ang ingon ka pagkamanunuton dili mahitabo sa usa ka adlaw, apan pinaagi sa Espiritu Santo, ang Ginoo maoy motudlo kanato kon kita mouyon hangtod sa pagdagan sa panahon, mamahimong tukma ang pag-ingon nga Siya anaa kanato ingon nga ang Amahan anaa Kaniya. Usahay ako mahadlok nga maghunahuna kon unsa ang gikinahanglan, apan ako nasayod nga niini lang nga hingpit nga panaghiusa nga ang hingpit nga kalipay mahimong makit-an. (D. Todd Christofferson, “Aron nga Sila Mausa Ngari Kanamo,” Liahona, Nob. 2002, 73)

Dugang nga mga Kalihokan sa Pagkat-on

3 Nephi 19:1–15. Ang Manluluwas magauban kanato samtang mangalagad kita ug mopakigbahin sa Iyang mga pulong ngadto sa uban

Ang mga estudyante mahimong mapanalanginan pinaagi sa pagsabot ug pagbati nga ang Manluluwas magauban kanato samtang mangalagad kita sa uban ug mopakigbahin sa Iyang mga pulong ngadto kanila. Ang mosunod nga kalihokan makatabang sa pagtuman niini.

Dapita ang mga estudyante sa pagpakigbahin mahitungod sa usa ka tawo nga ilang nailhan kinsa usa ka Kristohanong ehemplo ngadto kanila. Hangyoa sila sa pagpasabot kon sa unsang paagi kini nga tawo nakaimpluwensiya kanila alang sa mas maayo. Dapita sila sa pagtuon sa 3 Nephi 19:1–15, mangita sa unsay gihimo sa mga tinun-an sa pagsunod sa ehemplo sa Manluluwas ug kon unsa ang resulta. Dapita sila sa pagpaningkamot sa pagpangalagad ug pagpakigbahin sa mga pulong ni Kristo ngadto sa uban sama sa Iyang buhaton.

3 Nephi 19:19–23, 27–30. Ang makaputli nga impluwensiya sa Espiritu Santo

Kon ang mga estudyante makabenepisyo gikan sa mas maayo nga pagsabot sa makaputli nga impluwensiya sa Espiritu Santo diha kanila, ikonsiderar ang pagbuhat sa mosunod:

Ipasabot sa mga estudyante nga ang paghimong putli sa usa ka butang nagpasabot sa paghimo og lunsay o sa pagwagtang sa dili maayong mga elemento (tan-awa sa Merriam-Webster.com Dictionary, “purify”). Dapita ang mga estudyante sa pagpakigbahin sa mga butang nga gusto nila nga limpyohan (sama sa mga pinggan, mga balay, mga sinina, o mga lawas). Unsa kaha ang ilang gamiton sa paghimo niini?

Dapita ang mga estudyante sa pagpangita diha sa 3 Nephi 19:19–23, 27–30 aron makita kon unsa ang gihatag sa Ginoo aron sa pagtabang kanato nga mahimong mas putli. Kon gikinahanglan, mahimo usab silang motan-aw ngadto sa Mosiah 3:19; 4:1–3.

Dapita sila sa paghisgot sa mga buhat nga atong mahimo aron makadawat niini nga panalangin. Awhaga sila sa pagbuhat sa bisan unsa nga mga pag-aghat nga ilang madawat.

3 Nephi 19:23. Pagkahimong mahiusa ngadto sa Langitnong Amahan ug ni Jesukristo

Ang mosunod makatabang sa mga estudyante nga malig-on ang ilang relasyon ngadto sa Langitnong Amahan ug ni Jesukristo.

Dapita ang mga estudyante sa pagtuon sa 3 Nephi 19:23 ug sa pamahayag ni Elder Christofferson diha sa seksiyon nga “Komentaryo ug Background nga Impormasyon”. Tugoti ang mga estudyante sa pagpakigbahin unsay ilang nakat-onan. Ang pag-ampo sa Manluluwas alang sa Iyang mga tinun-an ug sa uban diha sa Juan 17:11–23 makatabang usab sa mga estudyante nga makasabot niining mahinungdanong doktrina.

Human sila magtuon, dapita ang mga estudyante sa paghisgot kon sa unsang paagi ang pagsabot sa pagkahiusa sa Dios nga Kapangulohan makaimpluwensiya sa mga pagbati sa mga estudyante mahitungod sa Espiritu Santo. Mahimo usab nimong hisgotan kon sa unsang paagi ang atong mga lihok mahimong maimpluwensiyahan niini nga pagsabot.