3 Նեփի 17

«Ես կարեկցանք ունեմ ձեզ վրա»

Քրիստոսը բժշկում է կնոջը

Արդեն բավական երկար օր էր անցկացրել Փրկիչը նեփիացի բազմության հետ, երբ հայտարարեց, որ Իր հեռանալու ժամանակն է։ Սակայն բազմությունն արցունքներով աղերսում էր մի փոքր երկար մնալ, ինչը հուզեց Նրա սիրտը։ Հրաշագործ կարեկցանքով Նա բժշկում էր նրանց, աղոթում էր նրանց համար և մեկ առ մեկ օրհնում էր նրանց երեխաներին։ Այս դասը կօգնի ձեզ զգալ, որ Հիսուս Քրիստոսը կարեկցանք ունի ձեր հանդեպ։

Օգտագործեք Մորմոնի Գրքի տեսանյութերը։ Մորմոնի Գրքի տեսանյութերը նախատեսված են օգնելու ուսանողներին՝ ավելի խորությամբ ընկալել տեքստը։ Այդ տեսանյութերը նախատեսված չեն փոխարինելու սուրբ գրությունների ընթերցմումը։ Իմաստուն կերպով որոշեք, թե ինչպես և երբ օգտագործել տեսանյութերը, որպեսզի դրանք նպաստեն ուսանողների սուրբ գրություններն ուսումնասիրելու փորձառությանը։

Ուսանողի նախապատրաստում․ ուսանողներին առաջարկեք մտածել, թե երբ են զգացել Աստծո ողորմածությունը, կարեկցանքը կամ սերը։ Նրանք կարող են պատրաստվել և կիսվել, թե այդ փորձառություններն ինչպես են ազդել Աստծո հետ ունեցած իրենց հարաբերությունների վրա։

Հնարավոր ուսումնական վարժություններ

Փրկչի ընկալումը

Պատկերացրեք, որ ուղղակի մեկ օր անցկացրել եք Փրկչի հետ, ու Նա հայտարարում է, որ Իր հեռանալու ժամանակն է։

Որպեսզի օգնեք ուսանողներին պատկերացնել այս իրադարձությունը, կարող եք ցուցադրել «Հիսուս Քրիստոսը և հրեշտակները ծառայում են կարեկցանքով» տեսանյութի (11:59) 0:12–1:30 հատվածը, որը հասանելի է ChurchofJesusChrist.org կայքում։

• Ինչպե՞ս կզգայիք ձեզ այդ իրավիճակում։

Օգնեք ուսանողներին վերհիշել, թե 3 Նեփի 11–16 գլուխներում ինչ են սովորել Փրկչի մասին։ Նրանք կարող են վերանայել իրենց օրագրերի «Սովորել Հիսուս Քրիստոսի մասին 3 Նեփի գրքում» վերնագրի ներքո գրվածը։

Նախքան ստորև բերված հարցերին պատասխանելը օգտակար կլինի, եթե ուսանողներին խնդրեք գրատախտակին գրել բայեր, որոնք նկարագրում են Փրկչի արածը։

• Փրկչի գործողություններն ինչպե՞ս են արտահայտում Նրա սերը նեփիացիների հանդեպ։

Այսօր ավելի մանրամասն կկարդաք այն մասին, թե ինչպես էր Փրկիչն Իր սիրով լի կարեկցանքն արտահայտում նեփիացիներին։ Ուսումնասիրելու ընթացքում մտածեք, թե Նրա գործերն ինչ են ուսուցանում Նրա բնավորության մասին։ Ուշադրություն դարձրեք, թե ինչ եք զգում Նրա հանդեպ։

Օգտակար կլինի իմանալ, որ 3 Նեփի 11–17 գլուխներում հիշատակվող բոլոր իրադարձությունները մեկ օրում են տեղի ունեցել։

Կարդացեք 3 Նեփի 17․1–6 հատվածները և փնտրեք, թե ինչ կարող եք սովորել Հիսուս Քրիստոսի մասին Նրա խոսքերից ու գործերից։

• Ի՞նչ գտաք այս հատվածներում։

Ուսանողները գուցե նման սկզբունք բացահայտեն․ Խորհելով և աղոթելով Հորը՝ մենք մեր միտքը պատրաստում ենք ավելի մեծ հասկացողություն ստանալուն։

Եթե ցանկանում եք ավելի խորությամբ աշխատել այս սկզբունքի վրա, օգտվեք «Օժանդակ ուսումնական վարժություններ» բաժնի նյութերից։

Գուցե նման ճշմարտություն եք բացահայտել․ Հիսուս Քրիստոսը կարեկցանքով է լցված իմ հանդեպ։ Կարող եք այս ճշմարտությունը գրել հատված 6-ի կողքին։

Տասներկու Առաքյալների Քվորումից երեց Ուլիսես Սոարեսն ուսուցանել է.

Երեց Ուլիսես Սոարես

Իմաստ ունի նկատել, որ Հիսուսի կարեկից գործողությունները ոչ թե պատահական կամ պարտադրված դրսևորումներ էին՝ հիմնված անելիքների ցուցակի վրա, այլ Աստծո և Նրա զավակների հանդեպ Իր մաքուր սիրո և նրանց օգնելու անխախտ ցանկության իրականության ամենօրյա արտահայտություններ: (Ուլիսես Սոարես, «Փրկչի անփոփոխ կարեկցանքը», Լիահոնա, նոյ. 2021 թ․, 14)։

• Սեփական բառերով բացատրեք, թե ինչ է ուսուցանում երեց Սոարեսը Փրկչի կարեկցանքի մասին։

Փրկիչի կարեկցանքը

3 Նեփի 17 գլխի մնացած մասում ներկայացվում է Փրկչի կարեկցող էությունը։ Հիշեք, որ Հիսուս Քրիստոսն արեց այն, ինչ նկարագրվում է 3 Նեփի 17 գլխում, որովհետև Նա ընդունել էր նեփիացիների արդար ցանկություններն ու անկեղծորեն ուզում էր նրանց հետ լինել և օրհնել նրանց։

Ստորև ներկայացված վարժության նպատակն է օգնել ուսանողներին մեծացնել իրենց սերը Փրկչի հանդեպ՝ պատկերացնելով Նրա կարեկցող էությունը։ Ուսանողները այս հմտության վրա միգուցե աշխատած լինեն 3 Նեփի 11 գլուխն ուսումնասիրելու ընթացքում։ Հմտությունը կրկնելը կարող է օգնել ուսանողներին ավելի հաճախ օգտագործել այն։

Ցուցադրեք հետևյալ հարցերը և հատվածները։ Առաջարկեք ուսանողներին ընտրել այն հատվածը, որ ցանկանում են ուսումնասիրել և խնդրեք նրանց ուսումնասիրելիս մտածել հարցերի մասին։ Նրանք կարող են հարցերին պատասխանել իրենց օրագրի «Սովորել Հիսուս Քրիստոսի մասին 3 Նեփի գրքում» վերնագրով բաժնում։

Թույլ տվեք ուսանողներին ընտրել, թե ինչպես են ուզում ուսումնասիրել՝ մենակ կամ դասընկերոջ հետ լռությամբ։

• Ո՞ր պահն էր հատկապես առանձնահատուկ ձեզ համար։ Ինչո՞ւ։

• Ի՞նչը տպավորեց ձեզ Հիսուսի ծառայության մեջ։

• Նրա խոսքերն ու գործերն ինչպե՞ս են ազդում Նրա հանդեպ ձեր վերաբերմունքի վրա։

• 3 Նեփի 17․7–10․ Բժշկելով նրանց հիվանդներին և նրանց չարչարվածներին

• 3 Նեփի 17․13–20․ Աղոթելով նրանց հետ և նրանց համար

• 3 Նեփի 17․11–12, 21–25․ Օրհնելով երեխաներին

Կարող եք ցուցադրել հետևյալ հարցերը և ուսանողներին ժամանակ տալ պատասխանելուց առաջ մտածել դրանց շուրջ։

• Եթե այնտեղ լինեիք, ինչպե՞ս կազդեր այդ փորձառությունը Փրկիչ Հիսուս Քրիստոսի հետ ունեցած ձեր հարաբերության վրա։

• Ըստ ձեզ՝ Հիսուս Քրիստոսն ինչպե՞ս է այսօր կարեկցանք ցուցաբերում մեր հանդեպ։

• Ի՞նչ եք ոգեշնչված անելու, որպեսզի արտահայտեք ձեր սերը Հիսուս Քրիստոսի հանդեպ։

Եթե ժամանակը թույլ տա, կարող եք Փրկչի սիրո և կարեկցանքի մասին որևէ հիմն երգել։ Ահա մի քանի օրինակ․ «Jesus, the Very Thought of Thee» (Հիմներ, թիվ 141), «Precious Savior, Dear Redeemer» (Հիմներ, թիվ 103) և «Our Savior’s Love» (Հիմներ, թիվ 113)։

Եթե կարիք լինի, ուսանողներին առաջարկեք կիսվել, թե ինչ զգացին այսօրվա դասի ընթացքում։ Խրախուսեք նրանց շարունակել իրենց կյանքում Փրկչի կարեկցանքի ապացույց փնտրել։

Բացատրական և պատմական տեղեկություններ

Փրկիչը ի՞նչ չարչարանքներից բժշկեց մարդկանց։

Առաջին նախագահությունից նախագահ Դալլին Հ. Օուքսն ուսուցանել է.

Նախագահ Դալլին Հ. Օուքս

Երբ Նոր աշխարհում Փրկիչը հայտնվեց արդարակյացներին, Նա կոչ արեց, որ առաջ գան այն մարդիկ, որոնք կաղ են կամ կույր կամ ֆիզիկական այլ տկարություն ունեն։ Նա նույն կոչն արեց նրանց, «որ չարչարված են ինչ-որ ձևով» (3 Նեփի 17․7)։ «Բերե՛ք նրանց այստեղ, և ես կբժշկեմ նրանց» (հ․ 7)։ Մորմոնի Գիրքը պատմում է մեզ, թե բազմությունն ինչպես առաջ եկավ «բոլոր նրանց հետ, ովքեր չարչարված էին ինչ-որ ձևով» (հ. 9)։ Նրանց թվում ամեն տեսակի ֆիզիկական, հուզական կամ մտավոր չարչարանք ունեցող մարդիկ կային, և սուրբ գիրքը վկայում է, որ Հիսուսը «բժշկեց նրանցից ամեն մեկին» (հ. 9) (Դալլին Հ․ Օուքս, «Նա բժշկվում է ծանր բեռ կրողին», Լիահոնա, նոյեմբեր 2006 թ., 6)։

Երիտասարդ կանանց գերագույն նախագահ քույր Բոննի Հ․ Քորդոնը հետևյալ տեսանյութում նույնպես ուսուցանել է Փրկչի բժշկելու ունակության և պատրաստակամության մասին։

Ինչպե՞ս կարող եմ զարգացնել քրիստոսանման կարեկցանք։

Տասներկու Առաքյալների Քվորումից երեց Ուլիսես Սոարեսը կիսվել է․

Երեց Ուլիսես Սոարես

Հիսուսի կարեկից վերաբերմունքը արմատավորված է գթության մեջ, այսինքն՝ Նրա մաքուր և կատարյալ սիրո մեջ, որը Նրա քավիչ զոհաբերության էությունն է։ Կարեկցանքը հիմնարար բնութագրիչ է նրանց համար, ովքեր ձգտում են սրբագործման և այս աստվածային հատկանիշը զուգորդվում է քրիստոնեական այլ հատկանիշների հետ, օրինակ՝ սգալ նրանց հետ, ովքեր սգում են, ունենալ կարեկցանք, ողորմածություն և բարություն։ Ուրիշների հանդեպ կարեկցանքի դրսևորումը, փաստորեն, Հիսուս Քրիստոսի ավետարանի էությունն է և ակնհայտ ապացույց՝ Փրկիչի հետ մեր հոգևոր և հուզական մտերմության: Ավելին, այն ցույց է տալիս ազդեցության այն մակարդակը, որ Նա ունի մեր կյանքի ուղու վրա և ցուցադրում է մեր հոգիների մեծությունը: (Ուլիսես Սոարես, «Փրկչի անփոփոխ կարեկցանքը», Լիահոնա, նոյ. 2021 թ․, 13–14)։

Օժանդակ ուսումնական վարժություններ

3 Նեփի 17․1–3: «Խորհեք այն բաների մասին, որոնք ես ասացի»

Հետևյալը կարող է օգնել պատրաստելու ուսանողներին խորհել սուրբ գրությունների շուրջ։

Առաջին նախագահությունից նախագահ Հենրի Բ. Այրինգն ուսուցանել է, որ «կարդալը, ուսումնասիրելը և խորհելը նույն բանը չեն»։ Մենք կարդում ենք խոսքերը և կարող ենք մտքեր ունենալ: Մենք ուսումնասիրում ենք և սուրբ գրքերում կարող ենք հայտնաբերել օրինակներ և հարաբերություններ: Բայց, երբ մենք խորհում ենք, հայտնություն ենք հրավիրում Հոգու միջոցով: Խորհելը ինձ համար մտածելն ու աղոթելն է, որ ես անում եմ սուրբ գրություններն ուշադիր կարդալուց և ուսումնասիրելուց հետո» (Հենրի Բ. Այրինգ, «Ծառայեք Հոգով», Լիահոնա, նոյ. 2010 թ․, 60)։

Կարող եք առաջարկել ուսանողներին ուսումնասիրել 3 Նեփի 17․1–3 հատվածները և փնտրել, թե ինչ ցուցումներ էր տվել Տերը նեփիացիներին, որպեսզի նրանք կարողանան «պատրաստել [իրենց] մտքերը վաղվա օրվա համար»։ Նրանք կարող են նման ճշմարտություն բացահայտել․ խորհելով և աղոթելով Հորը՝ մենք մեր միտքը պատրաստում ենք ավելի մեծ հասկացողություն ստանալուն։

Կիսվեք նախագահ Այրինգի խոսքով և առաջարկեք ուսանողներին քննարկել, թե ուսումնասիրելը, աղոթելը և խորհելը միասին ինչպես կարող են մեր միտքը պատրաստել ավելի մեծ հասկացողություն ստանալուն։ Հետո ուսանողները կարող են խորհելու մասին սովորածը կիրառել 3 Նեփի 17 գլխի մնացած մասի ուսումնասիրության ժամանակ։ Օրինակ՝ նրանք կարող են պատկերացնել սուրբ գրությունների իրադարձությունները կամ մտածել, թե Փրկիչն ինչպես կվերաբերվեր նրանց։ Հետո քննարկեք, թե խորհելու արդյունքում ինչպես խորացավ նրանց հասկացողությունը սուրբ գրությունների մասին և սերը Տիրոջ հանդեպ։

3 Նեփի 17․5: «Նա կրկին աչք ածեց շուրջբոլորը»

Փրկչի աստվածային հատկություններից մեկը ուրիշների կարիքները ճանաչելու կամ ընկալելու Նրա ունակությունն է և այդ կարիքներին սիրով ու բարությամբ վերաբերվելը։

Ուսանողներին առաջարկեք ուսումնասիրել 3 Նեփի 17․5 հատվածը և փնտրել, թե Հիսուս Քրիստոսն ինչպես է դրսևորում ուրիշների կարիքներն ընկալելու Իր ունակությունը։ Կարող եք ցուցադրել «Բացատրական և պատմական տեղեկություններ» բաժնում ներկայացված նախագահ Բոննի Հ․ Քորդոնի տեսանյութը։ Դիտելու ընթացքում առաջարկեք ուսանողներին մտածել, թե ինչպես կարող են մեծացնել ուրիշների կարիքներն ընկալելու իրենց ունակությունը և վերաբերվել դրանց Փրկչի նման։

Կարող եք երգել «Փորձում եմ լինել Հիսուսի նման» երգը կամ կարդալ երգի բառերը (Մանկական երգարան, 78–79)։

Քննարկեք, թե ինչպես կարող ենք հետևել Փրկչի օրինակին, երբ նկատենք ուրիշների կարիքները և օգնենք նրանց։

3 Նեփի 17․12: «Հիսուսը կանգնեց մեջտեղում»

Որպեսզի օգնեք ուսանողներին զգալ, որ Փրկիչը մոտ է նրանց, առաջարկեք ուսումնասիրել 3 Նեփի 11․8, 3 Նեփի 20․22, 3 Նեփի 27․2, Վարդապետություն և Ուխտեր 38․7, 88․13 և Աբրահամ 3․22–23 հատվածները և փնտրել, թե այդ հատվածներն ինչով են նման 3 Նեփի 17․12 հատվածին։ Ուսանողները կարող են կապել այդ հատվածները։ Հետո քննարկեք, թե ինչ նրանք բացահայտեցին Փրկչի և մեզ հետ Նրա ունեցած հարաբերության մասին։