3 Nephi 28

Nagtinguha sa Pagdala sa Uban ngadto ni Jesukristo

Usa sa labing dako nga tinguha nga atong mabatonan sa atong kinabuhi mao ang pagtabang sa uban nga makadawat sa mga panalangin nga gitanyag ni Jesukristo ug sa Iyang Pag-ula (tan-awa sa Doktrina ug mga Pakigsaad 15:6). Tulo sa mga tinun-an nga mga Nephite ang mipakita niini sa talagsaon nga paagi sa dihang sila nagtinguha nga magpabilin sa yuta ug modala sa mga kalag ngadto kang Jesukristo hangtod sa Iyang Ikaduhang Pag-anhi. Kini nga leksiyon gituyo aron matabangan ka nga mobati og dugang nga tinguha sa pagdala sa uban ngadto kang Jesukristo.

Pagtabang sa mga estudyante nga makat-on sa pagsalig ni Jesukristo. Samtang ang mga estudyante maningkamot sa pagsunod ni Jesukristo, sila mahimong mobati nga dili sigurado sa ilang mga abilidad sa pagtuman sa ilang mga katungdanan o mga buluhaton. Ipahinumdom sa mga estudyante nga samtang sila molihok diha sa hugot nga pagtuo, sila mapalig-on pinaagi sa Ginoo. Dasiga sila sa pagtinguha og giya ug kaisog pinaagi sa pagdangop ngadto sa Langitnong Amahan diha sa pag-ampo.

Pagpangandam sa estudyante: Dapita ang mga estudyante sa paghunahuna sa mga kasinatian nga ilang nasinati sa pagpakigbahin sa ebanghelyo ug sa unsay nakatabang kanila sa pagtinguha sa pagbuhat sa ilang gibuhat.

Mga Posibleng Kalihokan sa Pagkat-on

Unsay imong gitinguha?

Ikonsiderar ang pagdapit sa mga estudyante sa pagpamalandong sa mosunod nga mga pangutana.

• Unsaon nimo sa pagtubag kon si Jesukristo magpakita kanimo ug mangutana, “Unsa ang imong gitinguha kanako?”

• Nganong gipili nimo ang unsay imong napili?

Ikonsiderar ang pagdapit og pipila ka mga estudyante nga komportable sa pagbuhat niini sa pagpakigbahin sa ilang mga tubag.

Atol sa pagpangalagad sa Manluluwas taliwala sa mga Nephite, Siya nangutana niini nga pangutana ngadto sa Iyang mga tinun-an (tan-awa sa 3 Nephi 28:1).

Basaha ang 3 Nephi 28:2–6, mangita kon giunsa pagtubag sa mga tinun-an nga Nephite ang pangutana sa Manluluwas.

• Unsay imong nakaplagan?

Sa bersikulo 6, ang Manluluwas naghisgot nga tulo sa mga tinun-an nga Nephite nagtinguha sa sama nga butang nga gitinguha ni Juan nga Hinigugma. Basaha ang Doktrina ug mga Pakigsaad 7:1–3, mangita sa tinguha ni Juan.

• Ngano kaha sa imong hunahuna nga kining tulo ka mga tinun-an gusto nga magpabilin sa yuta?

Hunahunaa ang imong kaugalingong tinguha sa pagdala sa mga tawo ngadto kang Jesukristo. Ang mosunod nga pagsusi sa kaugalingon makatabang kanimo sa pagbuhat niini.

Ikonsiderar ang pagpakita sa mosunod nga kalihokan ug dapita ang mga estudyante sa hilom nga pagsusi sa ilang kaugalingon. Ayaw hangyoa ang mga estudyante sa pagpakigbahin sa ilang mga tubag sa klase.

Tubaga ang matag usa sa mosunod nga mga pamahayag gamit ang usa niining mga tubag: “kanunay,” “usahay,” o “talagsa ra.”

1. Nangita ko og mga kahigayonan nga makasulti sa mga tawo mahitungod ni Kristo.

2. Nag-ampo ako alang sa mga oportunidad nga makakita og mga tawo nga masultihan mahitungod kang Kristo.

3. Ako adunay tinguha sa pagtabang sa uban sa pagsunod ni Jesukristo.

Pagpalambo sa imong tinguha sa pagtabang sa uban sa pagduol ngadto kang Kristo

Agig dugang sa mga estudyante nga nagdrowing sa mosunod nga hulagway diha sa ilang mga journal sa pagtuon, mahimo nimo kini idrowing sa pisara.

Sa tunga-tunga sa pahina diha sa imong journal sa pagtuon, pagdrowing og gamay nga stick figure nga nagrepresentar sa tin-edyer nga walay tinguha nga mopakigbahin sa ebanghelyo ngadto sa uban. Sa blangko nga luna sa palibot sa stick figure, isulat ang pipila ka mga rason nga kini nga tin-edyer tingali dili gusto nga mopakigbahin sa ebanghelyo. Pagbilin og luna aron masulatan sa mga kamatuoran nga imong makat-onan samtang magtuon ka karon.

Samtang magpadayon ka sa pagtuon, pangitaa ang mga pagtulun-an nga makatabang sa usa ka tawo nga mobati og mas dakong tinguha sa pagpakigbahin sa ebanghelyo.

Basaha ang 3 Nephi 28:7–10, mangita sa unsay gisaad sa Ginoo sa mga tinun-an nga Nephite kinsa nagtinguha nga magpabilin sa yuta aron sa pagdala sa mga kalag ngadto Kaniya.

• Unsa nga panalangin ang gihatag ni Jesus kanila sa bersikulo 7–8 aron sila makatuman sa ilang mga tinguha?

• Unsa ang gisaad sa Manluluwas sa Iyang mga tinun-an nga ilang madawat sa mga bersikulo 9–10 tungod sa ilang matarong nga mga tinguha?

Sa atong dispensasyon, ang Ginoo misaad og mga panalangin niadtong kinsa nagtinguha sa pagdala og mga kalag ngadto Kaniya. Basaha ang Doktrina ug mga Pakigsaad 18:15–16, mangita sa mga panalangin nga atong masinati sa pagdala og mga kalag ngadto ni Jesukristo.

• Unsa ang kamatuoran nga atong makat-onan gikan niini nga mga bersikulo mahitungod kon sa unsang paagi kita mapanalanginan samtang kita nagtinguha sa pagdala og mga kalag ngadto ni Jesukristo?

Usa ka kamatuoran nga atong makat-onan gikan niini nga mga bersikulo mao ang samtang kita maningkamot sa pagdala og mga kalag ngadto kang Jesukristo, kita makasinati og hingpit nga kalipay. Ikonsiderar ang pagsulat niini nga kamatuoran diha sa hulagway nga imong gihimo.

• Ngano sa imong hunahuna nga ang pagdala og mga kalag ngadto kang Jesukristo usa ka tinubdan sa kalipay?

• Sa unsang paagi nga ang pagkasabot niini nga kamatuoran makatabang sa usa ka tawo nga mobati og mas dakong tinguha sa pagpakigbahin sa ebanghelyo?

Pangita og ubang mga kasulatan o mga pamahayag sa mga lider sa Simbahan nga makatabang sa pagpalambo sa atong tinguha sa pagpakigbahin sa ebanghelyo. Mahimo nimong gamiton ang mga himan sa pagtuon sama sa Giya ngadto sa mga Kasulatan​aron sa pagpangita sa mga hilisgotan sama sa “Misyonaryo nga Buhat,” o mahimo nimong tun-an ang pipila o ang tanan sa mosunod nga mga bersikulo. Idugang ang mga kamatuoran nga imong napalgan ngadto sa hulagway diha sa imong journal sa pagtuon.

Ipakita ang mosunod nga mga bersikulo. Hatagi ang mga estudyante og panahon sa pagtuon niini o sa ubang mga bersikulo o sa mga pamahayag sa mga lider sa Simbahan nga ilang napalgan sa ilang kaugalingon.

• 2 Nephi 2:8

• Doktrina ug mga Pakigsaad 33:8–10

• Doktrina ug mga Pakigsaad 84:88

• Doktrina ug mga Pakigsaad 123:12–14

Dapita ang mga estudyante sa pagpakigbahin sa unsay ilang nakat-onan gikan sa ilang mga pagtuon. Dugang pa sa pagpangutana sa mosunod nga pangutana, mahimo nimo silang dapiton sa pagsulat sa mga kamatuoran nga ilang nadiskobrehan sa palibot sa drowing diha sa pisara.

• Unsa nga mga pagtulun-an ang imong nakaplagan nga makatabang sa usa ka tawo nga mobati og mas dakong tinguha sa pagpakigbahin sa ebanghelyo? Ngano kaha sa imong hunahuna nga kini nga mga pagtulun-an makatabang?

• Unsa nga mga kasinatian ang nakatabang kanimo nga makakita sa mga panalangin nga madawat kon atong ipakigbahin ang ebanghelyo?

Aron makakita og mga ehemplo kon sa unsang paagi napanalanginan ang mga indibidwal pinaagi sa mga paningkamot sa misyonaryo, ikonsiderar ang pagtan-aw sa “Your Day for a Mission” (3:31) o “By Small and Simple Things: Sharing the Gospel” (3:19). Kini nga mga bidyo makita sa ChurchofJesusChrist.org.

Hunahunaa kon unsay imong nakat-onan o gibati karon nga mahimong nakaimpluwensiya sa imong kaugalingong tinguha sa pagtabang sa uban sa pagduol ngadto kang Kristo. Irekord diha sa imong journal sa pagtuon ang bisan unsang mga hunahuna o espirituhanong mga impresyon nga imong naangkon ug paghimo og plano sa pagbuhat sa imong mga impresyon.

Ikonsiderar ang pagpamatuod sa kalig-on nga atong madawat ug sa gugma sa Dios nga atong mabati samtang kita molihok sa tinguha sa pagtabang sa uban nga moduol ngadto kang Jesukristo.

Komentaryo ug Background nga Impormasyon

Ngano nga ang atong tinguha sa pagtabang sa pagdala sa uban ngadto kang Kristo importante kaayo karon?

Si Presidente Russell M. Nelson mitudlo:

Ang ebanghelyo ni Jesukristo wala pa sukad mas gikinahanglan kaysa karon. Ang panagbingkil milapas sa tanang gibarogan ug gitudlo sa Manluluwas. Gihigugma nako si Ginoong Jesukristo ug nagpamatuod nga ang Iyang ebanghelyo mao lamang ang malahutayong kasulbaran alang sa kalinaw.

Ang Iyang ebanghelyo mao lamang ang tubag sa dihang daghan sa kalibotan ang panguyapan sa kalisang. … Kita adunay sagrado nga responsibilidad sa pagpakigbahin sa gahom ug kalinaw ni Jesukristo ngadto sa tanan kinsa maminaw ug kinsa mopatigbabaw sa Dios diha sa ilang kinabuhi. …

… Ang espirituhanon nga kangitngit sa kalibotan nakapahimo sa kahayag ni Jesukristo nga mas gikinahanglan karon. Ang tanan angayan nga hatagan og kahigayonan nga mahibalo bahin sa gipahiuli nga ebanghelyo ni Jesukristo. Ang matag tawo angayan nga makahibalo asa sila makakaplag sa paglaom ug sa kalinaw nga ‘dili matugkad sa tawo’[Mga Taga-Filipos 4:7]. (Russell M. Nelson, “Pagsangyaw sa Ebanghelyo sa Kalinaw,” Liahona, Mayo 2022, 6, 7)

Malipay ba ang uban kon akong ipakigbahin ang ebanghelyo?

Si Elder Marcus B. Nash sa Seventy mitudlo:

Kon ang usa ka tawo makakat-on sa mahimayaon nga katuyoan sa kinabuhi, makasabot nga si Kristo mopasaylo ug motabang niadtong kinsa mosunod Kaniya, ug dayon mopili sa pagsunod ni Kristo ngadto sa mga tubig sa bunyag, ang kinabuhi mausab aron mahimong mas maayo—bisan kon ang nagpalibot nga mga sikumstansiya sa kinabuhi dili mausab.

Usa ka madasigong malipayon nga sister nga akong nahimamat sa Onitsha, Nigeria, misulti kanako nga sa dihang siya nakat-on sa ebanghelyo ug nagpabunyag (ug karon gamiton ko ang iyang mga pulong), “ang tanang butang maayo ra para nako. Malipayon ko. Ania ko sa langit.” Ang pagpakigbahin sa ebanghelyo mopukaw sa hingpit nga kalipay ug paglaom sa mga kalag sa tighatag ug sa tigdawat. Sa tinuod, “unsa ka dako ang imong hingpit nga kalipay” [Doktrina ug mga Pakigsaad 18:15] samtang ikaw mopakigbahin sa ebanghelyo! Ang pagpakigbahin sa ebanghelyo modugang og hingpit nga kalipay ngadto sa hingpit nga kalipay, paglaom ngadto sa paglaom. (Marcus B. Nash, “Ipakita Ninyo ang Inyong Kahayag,” Liahona, Nob. 2021, 71)

Unsa ang kalainan tali sa pagkausab [translation], pagkahimaya, ug pagkabanhaw?

Ang tulo ka mga tinun-an nga Nephite unang gihimaya [transfigured] aron “makakita sa mga butang sa Dios” (3 Nephi 28:13–15) ug dayon giusab [translated] aron sila magpabilin sa yuta hangtod sa Ikaduhang Pag-anhi (3 Nephi 28:37–40).

Ang mosunod nga mga kahulogan makatabang sa pagpasabot sa kalainan tali sa pagkausab, pagkahimaya, ug pagkabanhaw.

• Nabalhin sa Pagkahimaya nga mga Binuhat. “Mga tawo ngagiusab aron dili sila makasinati og sakit o kamatayon hangtod sa ilang pagkabanhaw sa pagka-imortal” (Giya ngadto sa mga Kasulatan, “Nabalhin sa Pagkahimaya nga mga Binuhat,” scriptures.ChurchofJesusChrist.org).

• Pagkahimaya sa Panagway. “Ang kahimtang sa mga tawo kinsa sa mubo nga panahon nausab ang panagway ug kinaiyahan—nga, gibayaw sa usa ka labaw nga taas nga espirituhanon nga kahimtang—aron sila makalahutay sa atubangan ug himaya sa langitnon nga mga binuhat” (Giya ngadto sa mga Kasulatan, “Pagkahimaya sa Panagway,” scriptures.ChurchofJesusChrist.org).

• Pagkabanhaw. “Ang pagkahiusa sa espiritu nga lawas ngadto sa yutan-on nga lawas sa unod ug mga bukog human sa kamatayon. Human sa pagkabanhaw, ang espiritu ug ang lawas dili na gayod magbulag, ug ang tawo mahimong imortal” (Giya ngadto sa mga Kasulatan, “Pagkabanhaw,” scriptures.ChurchofJesusChrist.org).

Dugang nga mga Kalihokan sa Pagkat-on

Posibleng mga kabalaka bahin sa pagserbisyo og misyon

Isip alternatibo sa kalihokan sa stick figure, mahimo nimong dapiton ang mga estudyante sa pagtan-aw o pagbasa sa mosunod nga pamahayag ni Presidente Russell M. Nelson. Dapita ang mga estudyante sa paghunahuna nga ang usa ka higala nga nakadungog niini nga pamahayag adunay mga kabalaka bahin sa pagserbisyo og misyon. Ang mga estudyante mahimong maghunahuna kon unsa kaha kadto nga mga kabalaka. Dayon mahimo silang mangita og mga kasulatan o mga pamahayag sa mga lider sa Simbahan nga makatabang niini nga tawo sa pagbuntog sa iyang mga kabalaka ug mobati og mas dakong tinguha sa pagserbisyo og misyon.

Ubang mga detalye bahin sa tulo ka mga tinun-an nga Nephite

Mahimo nimong dapiton ang mga estudyante sa pagbasa sa 3 Nephi 28:18–23 ug sa pagpangita kon giunsa pagpanalangin sa Ginoo ang tulo ka Nephite nga mga tinun-an aron sila makahimo sa ilang matarong nga mga tinguha. Mahimo usab basahon sa mga estudyante ang 3 Nephi 28:25–32, mangita og mga tawo kinsa nakabenepisyo ug gani makabenepisyo pa gikan sa pangalagad niini nga mga tinun-an. Ikonsiderar ang pagdapit sa mga estudyante sa paghisgot uban sa usa ka pares sa usa ka butang nga ilang nakat-onan mahitungod sa pangalagad niini nga mga tinun-an nga Nephite.

3 Nephi 29. Mga panagna sa ulahing mga adlaw

Kon gusto nimong mogahin og panahon sa pagtuon sa 3 Nephi 29 sa klase, mahimo nimong gamiton ang mosunod nga tsart. Ang mga estudyante mahimong motukma sa mga pulong sa wala ngadto sa ilang mga kahulugan diha sa tuo. Mahimo dayon silang mobasa sa 3 Nephi 29, mangita unsay gitagna ni Mormon nga mahitabo sa ulahing mga adlaw. Dapita ang mga estudyante sa paghisgot kon sa unsang paagi nila nakita kini nga mga butang nga nahitabo karon.

1. Mga Hentil	a. Duha ka mga kahulogan: (1) ang mga kaliwat sa propeta sa Daang Tugon nga si Jacob (Israel), kang kinsa ang Ginoo mihimo og pakigsaad ug (2) matinuoron nga mga nagtuo kang Jesukristo kinsa mihimo og pakigsaad ngadto sa Dios
2. Balay ni Israel	b. Usa ka saad ngadto sa matinud-anon nga naglakip sa mga panalangin sa ebanghelyo, awtoridad sa pagkapari, mahangtorong mga pamilya, ug usa ka yuta nga kabilin
3. Motamay	c. Grabe nga kasubo ug pagmahay
4. Moyubit	d. Pagbaliwala o pagsalikway inubanan sa pagsaway
5. Ang pakigsaad sa Ginoo uban sa Israel	e. Pagpahayag sa kawalay pagtahod o pagsupak
6. Alaot	f. Duha ka kahulogan: (1) mga katawhan nga dili Israelite o dili Judeo ang kaliwatan ug (2) mga katawhan nga walay ebanghelyo

(Mga tubag: 1–f, 2–a, 3–d, 4–e, 5–b, 6–c)