Mormon 3–6

Ang Pagbagsak ng Bansang Nephita

Ang huling digmaan ng mga Nephita

Nag-alala ka na ba tungkol sa isang taong mahal mo? Nangusap patungkol sa mga tao sa kanyang paligid, sinabi ni Mormon, “Sila ay pinamunuan ko … at minahal sila … nang buong puso ko” (Mormon 3:12). Subalit nag-alala at nagdalamhati si Mormon para sa kanyang mga tao habang papatungo sila sa pagkawasak dahil ayaw nilang humingi ng tulong sa Diyos. Ang lesson na ito ay makatutulong sa iyo na madama ang kahalagahan ng pagbaling sa Ama sa Langit at sa Tagapagligtas sa iyong buhay.

Magbigay ng buod ng mahahalagang kuwento sa banal na kasulatan. Mas mauunawaan ng mga estudyante ang konteksto at nilalaman ng mga banal na kasulatan kapag nakita nila ang kabuuan. Bigyang-diin ang mahahalagang tao, pangyayari, at mga turo ng propeta sa isang partikular na kuwento. Hikayatin ang mga estudyante na pag-isipan kung paano nakakaimpluwensya ang mga elementong ito sa kanilang pag-unawa sa ebanghelyo ng Panginoon.

Paghahanda ng estudyante: Sabihin sa mga estudyante na alalahanin ang isang pagkakataon na tinulungan sila ng Diyos na malampasan ang isang paghihirap dahil humingi sila ng tulong sa Kanya.

Mga Posibleng Aktibidad sa Pag-aaral

Ano ang gagawin mo?

Ikinuwento ni Elder Spencer J. Condie ng Pitumpu ang tungkol sa isang lalaking nagngangalang Murray Ling, na nagmamaneho patawid sa isang tulay sa gabi nang makita niyang biglang naglaho ang kotse sa harapan. Bumagsak sa harapan niya ang isang malaking bahagi ng tulay. Nagpreno si Murray at sakto ang pagtigil niya sa kotse niya.

• Kung ikaw ang nasa sitwasyon ni Murray, ano ang ilan sa mga unang bagay na gagawin mo matapos mong ihinto ang iyong kotse?

Basahin ang sumusunod na salaysay tungkol sa piniling gawin ni Murray. Maaari mong panoorin ang video na “Prophets Warning,” matatagpuan sa ChurchofJesusChrist.org, mula sa time code na 0:00 hanggang 0:58.

Elder Spencer J. Condie

Nagsimulang balaan ni Murray … ang mga paparating na sasakyan tungkol sa pagbagsak ng tulay. Habang balisang ikinakaway ang kanyang mga kamay, sa kanyang sindak, isang kotse ang “lumihis sa kanya at tuluy-tuloy na nahulog sa kailaliman” (Stephen Johnson, “Over the Edge!” Reader’s Digest, Nov. 1977, p. 128). Kamuntik nang hindi tumigil ang pangalawang kotse, ngunit ang pangatlong kotse ay tuluy-tuloy at sumalpok ito sa kotse ni Ling na nasa gilid ng tulay.

Bigla na lang, isang punong bus ang dumiretso patungo kay Murray, at binalewala ang kanyang pagkaway. (Spencer J. Condie, “A Mighty Change of Heart,” Ensign, Nob. 1993, 17)

• Kung ikaw ang nasa sitwasyon ni Murray, ano ang madarama mo kung binabalewala ka ng mga tao? Susuko ka ba sa pagsisikap na iligtas sila? Bakit oo o bakit hindi?

Tulad ni Murray Ling, nakita ni Mormon na ang kanyang mga tao ay patungo sa pagkalipol. Bilang pinuno ng mga hukbo ng mga Nephita, at bilang propeta ng Diyos, ginawa ni Mormon ang lahat ng makakaya niya para balaan sila, protektahan sila, at ituro sa kanila ang tungkol sa kanilang Tagapagligtas. Sa kasamaang-palad, binalewala o tinanggihan ng karamihan sa kanyang mga tao ang mga ginawa ni Mormon.

Paparating na panganib para sa mga tao ni Mormon

Sa Kanyang kaalaman noon pa man, binalaan na ng Diyos ang mga Nephita sa loob ng daan-daang taon tungkol sa mangyayari kung patuloy silang maghihimagsik laban sa Kanya.

Para makakita ng isang halimbawa, basahin ang Helaman 13:8–10, at alamin ang propesiya na sinabi ng Diyos sa pamamagitan ni Samuel, ang Lamanita, mahigit 300 taon bago isinilang si Mormon. Habang nagbabasa ka, pansinin kung kailan matutupad ang propesiya. (Tingnan sa 1 Nephi 12:6, 11–19 at 3 Nephi 27:30–32 para sa karagdagang mga halimbawa ng kaalaman noon pa man at mga babala ng Diyos na matutupad sa panahon ni Mormon.)

• Sa iyong palagay, bakit ipinaalam ito ng Diyos nang napakaaga?

Sabihin sa mga estudyante na basahin ang mga sumusunod na passage at pag-isipan kung bakit talagang nagsikap si Mormon na tulungan ang kanyang mga tao kahit alam niya ang mga propesiya tungkol sa kanilang pagkalipol. Pagkatapos ay sabihin sa kanila na ibahagi ang kanilang mga ideya sa kapartner. Maaaring kabilang sa mga sagot ang hangarin ni Mormon na magligtas ng maraming tao hangga’t makakaya niya kahit alam niyang malilipol ang bansang Nephita.

• Mormon 3:1–3, 12

• Moroni 9:3–5, 18–22 (Ibinahagi ni Moroni ang isang liham na isinulat ng kanyang amang si Mormon.)

• Anong mga pagkakatulad ang nakikita mo sa mga pagsisikap at hangarin ni Mormon at ng mga pagsisikap at hangarin ng Tagapagligtas?

Pagtawag sa Diyos

Maaari mong isulat sa pisara ang sumusunod na hindi kumpletong pangungusap at anyayahan ang mga estudyante na pumunta sa pisara at punan ang patlang ng mga karaniwang paghihirap ng tinedyer.

• “Maraming tinedyer ngayon ang nahihirapan sa .”

Ibinahagi ni Mormon ang isa sa mga dahilan kung bakit nahihirapan ang mga Nephita. Basahin ang Mormon 5:2, at alamin ang HINDI ginawa ng mga Nephita habang nahihirapan sila.

• Paano naaangkop ang ibinahagi ni Mormon sa talata 2 sa maraming tao ngayon?

Tapusin ang pahayag sa pisara para mabasa nang ganito:

• “Maraming tinedyer ngayon ang nahihirapan sa dahil hindi humihingi ng tulong sa Diyos.”

Tulungan ang mga estudyante na maunawaan na hindi palaging aalisin ng Diyos ang mga bagay na nahihirapan tayo ngunit tutulungan Niya tayong malampasan ang mga ito kung babaling tayo sa Kanya. Anyayahan ang mga boluntaryo na magbahagi ng mga pagkakataon na humingi sila ng tulong sa Diyos sa isa sa mga paghihirap sa pisara at kung paano sila tinulungan ng Diyos na malampasan ito. Paalalahanan ang mga estudyante na huwag magbahagi ng anumang masyadong personal sa klase.

Sabihin sa mga estudyante na pag-isipan kung may mga paghihirap sa kanilang buhay na hindi nila inihihingi ng tulong sa Diyos. Hikayatin silang hingin ang Kanyang tulong sa isa sa mga aspetong iyon at pansinin ang kaibhang nagagawa nito sa paglipas ng panahon.

Ang pagkalipol ng mga Nephita

Maaari mong i-display ang larawang ito at anyayahan ang isang estudyante na ibahagi kung ano ang inilalarawan nito. Gamitin ang materyal sa sumusunod na talata kung kinakailangan.

Mormon Bids Farewell to a Once Great Nation [Si Mormon ay Nagpapaalam sa Isang Dating Dakilang Bansa], ni Arnold Friberg

Matapos mahalin, turuan, at pamunuan ang mga hukbo ng mga Nephita nang ilang dekada, si Mormon ay malubhang nasugatan sa huling pakikidigma sa mga Lamanita. Mula sa tuktok ng isang burol, sinuri niya kung ano ang natira sa bansa ng mga Nephita. Tanging 24 na kawal na Nephita lamang ang nakaligtas sa malupit na pagpatay, kabilang si Mormon at ang kanyang anak na si Moroni (tingnan sa Mormon 6:9–15).

Sa Mormon 6, isinulat ni Mormon ang “huling pakikipaglaban ng [kanyang] mga tao” (Mormon 6:6). Basahin ang Mormon 6:7, 10–15, at alamin ang nangyari sa mga Nephita sa huling digmaang ito.

Maaari mong sabihin sa mga estudyante na alamin kung ilang Nephita ang nagtipon sa simula ng digmaan at ilan ang natira pagkatapos ng digmaan. Maaaring mapansin nila na may 23 Nephitang komandante na may tig-10,000 kawal para sa kabuuang 230,000 Nephita. Tanging 24 na Nephita lamang ang nakaligtas sa huling digmaang ito.

Ipagpalagay na nasa katayuan ka ni Mormon, na nagdadalamhati sa pagkawala ng mga taong mahal mo pero batid na maaari ka pa ring mag-iwan ng maikling mensahe para sa mga susunod na henerasyon. Ano ang gusto mong malaman ng mga tao sa mga huling araw?

Basahin ang Mormon 5:10–11, 16–18; 6:16–20 para makita ang ilan sa mga mensahe na nahikayat si Mormon na itimo sa atin. Maaari mong markahan ang mga parirala na sa palagay mo ay pinakakailangang marinig ng mga tao sa ating panahon.

Maaari mong sabihin sa mga estudyante na ibahagi sa isang kapartner ang mga pariralang nakita nila. Habang tumutukoy ang mga estudyante ng mga alituntunin, maaari mong isulat sa pisara ang mga ito. Ang natitirang bahagi ng lesson na ito ay nakatuon sa sumusunod na katotohanan. Maaaring madama mo na magtuon sa ibang katotohanan na natukoy ng mga estudyante.

Ang isang katotohanang itinuro ni Mormon ay si Jesucristo ay nakatayong bukas ang mga bisig upang tanggapin ang mga taong pinipiling magsisi at lumapit sa Kanya (tingnan sa Mormon 6:17).

Maaari mong ipikit sandali ang iyong mga mata at isipin na nakatayo si Jesus at nakatingin Siya sa iyo nang bukas ang mga bisig. Isulat sa iyong journal ang iyong mga saloobin, nadarama, at impresyon tungkol sa kahulugan sa iyong buhay na nakatayo si Jesus nang bukas ang mga bisig para tanggapin ka.

Hikayatin ang mga estudyante na huwag magbahagi ng anumang masyadong personal kung tatalakayin ninyo sa klase ang mga sumusunod na tanong.

• Alin sa mga turo ni Mormon ang pinakakailangan mo sa iyong buhay? Bakit?

• Ano ang gusto ni Mormon na nauunawaan mo tungkol sa Ama sa Langit at kay Jesucristo?

• Sa iyong palagay, paano maiiba ang ating mundo kung mas maraming tao ang maniniwala sa isinulat ni Mormon?

Komentaryo at Impormasyon ng Konteksto

Ano ang ibig sabihin ng “niyakap sila [nang mahigpit] ng mga bisig ni Jesus” (Mormon 5:11)?

Sinabi ni Elder Kent F. Richards ng Pitumpu:

Elder Kent F. Richards

Lahat ng lalapit ay maaaring “[mayakap] ng mga bisig ni Jesus” [Mormon 5:11]. Lahat ng kaluluwa ay mapapagaling ng Kanyang kapangyarihan. Lahat ng sakit ay mapapaginhawa. Sa Kanya, maaaring “masumpungan [natin] ang kapahingahan sa [ating] mga kaluluwa” [Mateo 11:29]. Maaaring hindi kaagad magbago ang ating sitwasyon sa mundo, ngunit ang sakit na nararamdaman natin, pangamba, pagdurusa, at takot ay maaaring mapawi ng Kanyang kapayapaan at nagpapagaling na balsamo. (Kent F. Richards, “Sakop ng Pagbabayad-sala ang Lahat ng Nararamdaman Nating Sakit,” Liahona, Mayo 2011, 16)

Mormon 6:17. Ano ang matututuhan mo mula sa paglalarawan kay Jesus na nakatayong “bukas ang mga bisig upang kayo ay tanggapin”?

Ibinahagi ni Elder Neil L. Andersen ng Korum ng Labindalawang Apostol:

Elder Neil L. Andersen

Mga kapatid, ipinapangako ko sa inyo na ang pagpapalakas ng inyong pananampalataya sa Panginoong Jesucristo ay magbibigay sa inyo ng dagdag na katatagan at pag-asa. Para sa inyo, na matwid, ang Manggagamot ng ating kaluluwa, sa Kanyang panahon at paraan, ay pagagalingin ang lahat ng inyong sugat. Walang kaapihan, walang pag-uusig, walang pagsubok, walang kalungkutan, walang pighati, walang pagdurusa, walang sugat—gaano man kalalim, gaano man kalawak, gaano man kasakit—na hindi bibigyan ng kapanatagan, kapayapaan, at walang-hanggang pag-asa Niya na ang bukas na mga bisig at sugatang mga kamay ay tatanggapin tayo sa Kanyang kinaroroonan. (Neil L. Andersen, “Sugatan,” Liahona, Nob. 2018, 86)

Ipinaliwanag ni Elder Neal A. Maxwell (1926–2004) ng Korum ng Labindalawang Apostol na si Jesus mismo ang tanod ng pasukan at “wala siyang inuupahang tagapaglingkod doon” (2 Nephi 9:41). … Sasabihin ko sa inyo—mula sa malalim na pananalig ng aking kaluluwa—kung ano sa palagay ko ang pangunahing dahilan, tulad ng nakapaloob sa isa pang talata sa Aklat ni Mormon na nagsasabing hinihintay niya kayo nang “bukas ang mga bisig” (Mormon 6:17). Kaya naroon siya! … Ang paglalarawang iyan ay napakamakapangyarihan na hindi natin maaaring balewalain. … Siya ay talagang naghihintay sa atin na bukas ang mga bisig, sapagkat ang pagmamahal niya sa atin ay ganap (Neal A. Maxwell, “But a Few Days” [mensahe sa Church Educational System religious educators, Set. 10, 1982; isinamoderno ang pagbabantas], 9–10).

Mga Karagdagang Aktibidad sa Pag-aaral

Mormon 5:11. “Niyakap … ng mga bisig ni Jesus”

Kung makatutulong sa mga estudyante na magtuon sa hangarin ng Tagapagligtas na yakapin tayo sa Kanyang mga bisig, maaari kang mag-display ng larawan Niya na niyayakap ang isang tao, tulad ng sumusunod:

niyayakap ni Jesucristo ang isang bata

Pagkatapos ay sabihin sa mga estudyante na saliksikin ang Mormon 5:11 at Mormon 6:17, at hanapin ang mga parirala na maaaring maglarawan sa larawan. Sabihin sa mga estudyante na ibahagi kung ano sa palagay nila ang ibig sabihin ng mga pariralang nahanap nila. (Kung makatutulong, maaari mong ibahagi ang pahayag nina Elder Richards, Elder Andersen, o Elder Maxwell sa bahaging “Komentaryo at Impormasyon ng Konteksto”.)

Opsiyon sa video

Kung makatutulong sa mga estudyante na makita ang isang visual na representasyon nina Mormon at Moroni na nagdadalamhati sa pagkalipol ng mga Nephita, maaari mong ipanood ang video na “O Ye Fair Ones” (5:21).