Mormoni 8:27–41; 9:1–6, 27–37

Shkruar për Kohën Tonë

Moroni duke shkruar në fletë

Imagjino sikur të jetoje qindra vite më parë, por duke e ditur se si do të ishte të jetoje në kohën tonë. Moroni e përjetoi këtë; Zoti i tregoi atij kohën tonë. Moroni përshkroi mëkatet dhe qëndrimet që do të mbizotëronin në ditët e fundit. Ai na ftoi të “ktheh[emi] te Zoti” (Mormoni 9:6) dhe dha këshillë tjetër për të na ndihmuar ta ndjekim Jezu Krishtin. Ky mësim mund të të ndihmojë të kuptosh se Libri i Mormonit është shkruar për të na ndihmuar ne, në ditët e mëvonshme, që të drejtohemi te Zoti.

Arritja në njohjen e Jezu Krishtit nëpërmjet studimit të fjalës së Tij. Studimi i shkrimeve të shenjta mund të na ndihmojë të afrohemi më shumë te Jezu Krishti. Ndihmojini nxënësit të ushtrojnë kërkimin për Jezu Krishtin ndërsa studiojnë. Ndërsa e bëjnë këtë gjë, ata do ta forcojnë marrëdhënien e tyre me Të dhe do të gëzojnë bekimet e ungjillit.

Përgatitja e nxënësve: Merreni parasysh t’i ftoni nxënësit të vijnë në orën mësimore të përgatitur për të treguar një shkrim të shenjtë nga Libri i Mormonit që mund të na ndihmojë të drejtohemi te Jezu Krishti.

Veprimtari të Mundshme të të Mësuarit

Moroni na shkroi neve

Sillni një kuti që përfaqëson një kapsulë kohe.

Imagjino sikur jetove shumë kohë më parë dhe t’u kërkua të shkruash një mesazh që do të vendosej në një kapsulë kohe që do të hapej në kohën tonë.

Jepuni nxënësve një fletë letre të vogël për t’i shkruar përgjigjet e tyre për pyetjen vijuese. Kërkojuni nxënësve t’i vendosin letrat e tyre në kapsulën e kohës, më pas lexojuani disa klasës.

• Çfarë paralajmërimi, këshille ose nxitjeje do të jepje për ta ndihmuar dikë të orientohet në sfidat e sotme?

Para se të vdiste Mormoni, ia besoi birit të tij, Moronit, fletët e arta (shih te Mormoni 8:1). Moroni përshkroi një mënyrë se si Zoti e ndihmoi atë të dinte se çfarë të shkruante për njerëzit në kohën tonë. Lexo te Mormoni 8:34–35; 9:30, duke kërkuar mënyrat se si Zoti e bekoi Moronin në përgjegjësinë e tij të shenjtë.

• Çfarë i tregoi Zoti Moronit?

• Çfarë të vërtetash mund të mësojmë nga kjo?

Një e vërtetë që mund ta mësojmë, është se Jezu Krishti i frymëzoi profetët e Librit të Mormonit që të shkruanin duke pasur në mendje kohën tonë.

• Si mund të ndikojë njohuria se profetët e Librit të Mormonit e panë kohën tonë, në mënyrën se si e lexojmë Librin e Mormonit?

Lexoje thënien vijuese nga Presidenti Ezra Taft Benson (1899–1994) rreth profetëve të Librit të Mormonit:

Presidenti Ezra Taft Benson

“Nëse ata e panë kohën tonë dhe zgjodhën ato gjëra që do të ishin me vlerën më të madhe për ne, a nuk është ajo mënyra se si duhet ta studiojmë ne Librin e Mormonit? Ne duhet ta pyetim veten tonë vazhdimisht: ‘Përse Zoti e frymëzoi Mormonin (ose Moronin apo Almën) që ta përfshijë atë në analin e tij? Çfarë mësimi mund të mësoj nga kjo që të më ndihmojë të jetoj në këtë kohë dhe epokë?’” (Ezra Taft Benson, “The Book of Mormon—Keystone of Our Religion”, Ensign, nëntor 1986, f. 6; Mësime të Presidentëve të Kishës: Ezra Taft Benson, f. 147)

Bërja e pyetjeve si ato të sugjeruara nga Presidenti Benson është një aftësi e efektshme e studimit të shkrimeve të shenjta që mund t’i ndihmojë nxënësit të gjejnë më shumë kuptim dhe lidhje në studimin e tyre të Librit të Mormonit. Nxënësit mund t’i mbajnë shënim këto pyetje që t’u referohen në studimin e tyre sot dhe në studimin e tyre vetjak në të ardhmen.

• Si mendon se bërja e këtyre pyetjeve mund ta përmirësojë studimin tënd të shkrimeve të shenjta?

Merreni parasysh ta ndani klasën në gjysmë ose t’i vendosni nxënësit në dyshe, ku secilit t’i caktohet ta lexojë njërin prej fragmenteve vijues. Ftojini nxënësit ta shkruajnë atë që gjejnë në tabelë nën një titull si Problemet Shpirtërore në Kohën Tonë. Sipas nevojës, ndihmojini nxënësit ta kuptojnë kuptimin e fjalëve në përshkrimet e Moronit.

Thënia nga Motra Oskarson te pjesa “Komente dhe Informacion për Rrethanat” mund t’i ndihmojë nxënësit t’i kuptojnë këto vargje.

Lexo te Mormoni 8:27–33 ose Mormoni 8:36–41, duke kërkuar se si e përshkroi Moroni gjendjen shpirtërore të popullit në kohën tonë.

• Cilën prej gjendjeve të përshkruara nga Moroni e sheh në shoqërinë tonë?

• Si mund të ndikojnë këto qëndrime dhe sjellje në besimin tonë në Jezu Krishtin?

Zgjidhjet shpirtërore në kohën tonë

Ftojini nxënësit ta shkruajnë atë që gjejnë në vargjet vijuese në tabelë nën një titull si Zgjidhjet Shpirtërore në Kohën Tonë. Ndihmojini nxënësit ta diskutojnë se si zgjidhje të veçanta mund të na ndihmojnë të kapërcejmë probleme shpirtërore të veçanta. Sigurohuni që nxënësit ta diskutojnë se si Moroni na drejton te Jezu Krishti.

Mormoni 9:7–26 do të studiohet në mësimin e radhës.

Lexo te Mormoni 9:6, 27–31, duke kërkuar se çfarë e frymëzoi Zoti Moronin të shkruante për të na ndihmuar t’i kapërcejmë gjendjet shpirtërore negative.

• Çfarë dha mësim Moroni që mund të na ndihmojë t’i mposhtim mëkatet dhe qëndrimet e përhapura në kohën tonë?

• Cili prej këtyre mësimeve mund t’i ndihmojë më mirë të rinjtë e këtij brezi të mbështeten më shumë te Jezu Krishti?

• Qëllimi i pyetjes së radhës është reflektimi vetjak, jo diskutimi si klasë.

  Cili prej këtyre mësimeve mendon se mund të të ndihmojë më së shumti pikërisht tani? Përse?

Mësime nga Libri i Mormonit

Libri i Mormonit u shkrua për të na ndihmuar të besojmë dhe të drejtohemi te Jezu Krishti (shih te 1 Nefi 6:4; Mormoni 7:5; Moroni 10:30, 32).

Ftojini disa nxënës t’i gjejnë dhe t’i tregojnë fragmentet e Librit të Mormonit që mund të na ndihmojnë të drejtohemi te Jezu Krishti. Nxënësit mund të mbështeten te përgatitja e tyre për orën mësimore. Nxënësit mund të tregojnë në një shumëllojshmëri mënyrash – për shembull, duke i shkruar referencat e shkrimit të shenjtë në tabelë ose në një letër që qarkullon nëpër klasë.

Ftojini nxënësit të tregojnë përse fragmentet janë domethënëse për ta. Mund të diskutoni gjithashtu se si fragmentet mund të na ndihmojnë të besojmë te Jezu Krishti dhe të drejtohemi tek Ai (shihni te Mormoni 9:6).

Mund t’i ftoni gjithashtu nxënësit të vendosin në kapsulën e kohës një shënim me një shkrim të shenjtë dhe mesazh rreth Shpëtimtarit. Ju mund t’i lexoni këto mesazhe në një seancë të ardhshme të orës mësimore.

Jepni dëshminë tuaj për Jezu Krishtin. Ftojini nxënësit të bëjnë pyetjet që u nxitën nga Presidenti Benson.

Komente dhe Informacion për Rrethanat

Për kë u shkrua Libri i Mormonit?

Plaku Geri E. Stivenson, i Kuorumit të Dymbëdhjetë Apostujve, tregoi:

Plaku Geri E. Stivenson

“A e kuptoni se Libri i Mormonit u shkrua për ju – dhe për kohën tuaj? Ky libër është një nga bekimet e të jetuarit në atë që ne e quajmë periudha ungjillore e plotësisë së kohëve. Edhe pse Libri i Mormonit u shkrua nga autorë të frymëzuar të lashtë – shumë nga të cilët qenë profetë – ata dhe njerëzit e kohës së tyre nuk e kishin përfitimin e pasjes së të gjithë librit. Ju tani e keni lehtësisht të arritshëm analin e shenjtë që profetët, priftërinjtë dhe mbretërit e mbajtën si thesar, e përqafuan dhe e ruajtën! Ju keni përfitimin që ta mbani të plotë në duart tuaja Librin e Mormonit. Është interesante, një nga profetët e Librit të Mormonit, Moroni, e pa kohën tonë – kohën tuaj. Ai madje ju pa ju, në vegim, shumë qindra vite më parë!” (Geri E. Stivenson, “Shihni te Libri, Shihni te Zoti”, Ensign ose Liahona, nëntor 2016, f. 46)

Si i përshkroi Moroni ditët e fundit?

Motra Boni L. Oskarson, ish‑Presidente e Përgjithshme e Të Rejave, dha mësim:

Presidentja Boni L. Oskarson

“Moroni thotë se ka parë ditët tona dhe ato përfshijnë luftëra dhe zhurma luftërash, ndotje të madhe, vrasje, grabitje dhe njerëz që na thonë se nuk ka gjëra të drejta ose të gabuara në sytë e Perëndisë. Ai përshkruan njerëz që janë të mbushur me krenari, që i janë dhënë veshjes me rroba të shtrenjta dhe që tallen me fenë. Atij iu treguan njerëz që janë kaq të varur ndaj gjërave të botës, saqë lejojnë që ‘nevojtari dhe i zhveshuri, dhe i sëmuri, dhe fatkeqi t’[i]u kalojnë pranë’ [Mormoni 8:39] pa i vënë re.

Moroni na bën një pyetje që përshkon shpirtin – neve që po jetojmë në këto kohë. Ai thotë: ‘Përse keni turp të merrni mbi vete emrin e Krishtit?’ [Mormoni 8:38.] Kjo akuzë e përshkruan saktësisht gjendjen laike në rritje, në botën tonë.” (Boni L. Oskarson, “Rrituni në Forcë, Motra në Sion”, Ensign ose Liahona, nëntor 2016, f. 12)

Në çfarë gjuhe u shkrua Libri i Mormonit?

Moroni deklaroi se ai kishte aftësinë për të shkruar në të paktën dy gjuhë: gjuhën hebraike dhe gjuhën egjiptiane të reformuar. Ai vuri në dukje se, “po të kishin qenë fletët … mjaft të mëdha”, ai do të kishte shkruar në hebraisht; megjithatë, ata që e mbajtën analin, përdorën gjuhën “egjiptiane të reformuar” për shkak të mungesës së hapësirës (Mormoni 9:32–33). Më parë në Librin e Mormonit, si Nefi, edhe mbreti Beniamin, e pranuan përdorimin e gjuhës egjiptiane nga ana e tyre. Nefi shpalli se ai shkroi në “gjuh[ën] e Egjiptianëve” kur gdhendi fletët e vogla (1 Nefi 1:2).

Megjithatë, Moroni pranoi se ai shkroi në gjuhën “egjiptiane të reformuar” që kishte qenë “pasua[r] dhe … ndryshua[r] …, sipas mënyrës [së tyre] të të folurit” (Mormoni 9:32), duke treguar se kishin ndodhur disa përshtatje në gjuhë gjatë një mijë viteve që nga koha e Lehit. Kjo mund të shpjegojë arsyen përse Moroni përfundoi me komentin se “asnjë popull tjetër nuk e di gjuhën tonë”, por që Perëndia kishte “përgatitur mjetet për” interpretimin dhe përkthimin përfundimtar të analit (Mormoni 9:34).

Veprimtari Plotësuese të të Mësuarit

Mormoni 8:33–41. Perëndia do të na mbajë përgjegjës për mënyrën se si i trajtojmë të varfrit dhe nevojtarët

Këtu gjendet një mënyrë për të studiuar një parim shtesë te Mormoni 8. Nxënësit mund të shkruajnë një fjali për ta përmbledhur atë që mësojnë te Mormoni 8:33–41 rreth përgjegjësisë sonë për t’u kujdesur për të varfrit dhe nevojtarët. Nxënësit mund të përcaktojnë se Perëndia do të na mbajë përgjegjës për mënyrën se si i trajtojmë të varfrit dhe nevojtarët.

Diskutojini llojet e ndryshme të nevojave që kanë njerëzit dhe se si adoleshentët mund të ndihmojnë për plotësimin e atyre nevojave. Ju mund të diskutoni gjithashtu se si Shpëtimtari kujdeset për nevojtarët.

Kërkojuni nxënësve t’i tregojnë përvojat që kanë pasur duke e ndihmuar dikë në nevojë ose duke marrë ndihmë në një kohë nevoje.

Mormoni 8:34–35. Shkruar për kohën tonë

Merreni parasysh t’i përdorni fragmentet e zotërimit doktrinor për t’i ndihmuar nxënësit të shohin se si Libri i Mormonit u shkrua për kohën tonë. Nxënësve mund t’u caktohet ose mund të përzgjedhin një ose më shumë fragmente të zotërimit doktrinor në Librin e Mormonit. Ftojini nxënësit ta lexojnë fragmentin dhe të bëjnë pyetjen: Përse mund ta ketë përfshirë një profet i Librit të Mormonit këtë në analin e tij? Çfarë mësimi mund të nxjerr unë nga ajo, që të më ndihmojë të jetoj në këtë kohë?

Ftoni disa nxënës të japin mendimet e tyre.

Një mënyrë për t’i analizuar shkrimet e shenjta

Sa vijon mund t’i ndihmojë nxënësit ta analizojnë tekstin te Mormoni 8–9.

Një mënyrë për t’i analizuar disa fragmente të shkrimit të shenjtë, është t’i lexoni ato sikur të ishit një doktor që po diagnostikon një sëmundje dhe po jep trajtimin.

Për shembull, kur nxënësit lexojnë te Mormoni 8:27–33 ose Mormoni 8:36–41, ata mund të kërkojnë sëmundje shpirtërore që kanë nevojë për trajtim. Më pas ata mund t’i gjejnë kurat te Mormoni 9:6, 27–29.