« មរ៉ូណៃ ៧:១–១៩ ៖ ‹ ស្វែងរកដោយឧស្សាហ៍នៅក្នុងពន្លឺនៃព្រះគ្រីស្ទ › » ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤ )
« មរ៉ូណៃ ៧:១–១៩ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន
មរ៉ូណៃ ៧:១–១៩
« ស្វែងរកដោយឧស្សាហ៍នៅក្នុងពន្លឺនៃព្រះគ្រីស្ទ »
ពេលខ្លះ វាអាចមានការលំបាកក្នុងការដឹងអ្វីដែលត្រឹមត្រូវ និងអ្វីដែលមិនត្រូវ ។ ទោះជាយ៉ាងណា ព្រះបានប្រទានជំនួយសម្រាប់ពួកយើង ។ មរ៉ូណៃ ប្រើប្រាស់ពាក្យរបស់ឪពុករបស់លោក ដែលបានលើកទឹកចិត្តពួកយើងឲ្យប្រើពន្លឺនៃព្រះគ្រីស្ទ ដើម្បីដឹងខុសត្រូវ ។ មេរៀននេះអាចជួយអ្នកឲ្យពឹងផ្អែកលើព្រះយេស៊ូវគ្រីស្ទដើម្បីវិនិច្ឆ័យរវាងសេចក្តីល្អ និងសេចក្តីអាក្រក់ ។
សូមលើកទឹកចិត្តសិស្សឲ្យគិតឲ្យបានស៊ីជម្រៅអំពីគោលការណ៍នៃដំណឹងល្អ ។ ការសិក្សាបទគម្ពីរដោយយកចិត្តទុកដាក់អាចបំផុសគំនិតសិស្សឲ្យចងចាំអំពីរបៀបដែលគោលការណ៍នៃដំណឹងល្អបាន ជះឥទ្ធិពលដល់ជីវិតរបស់ពួកគេ ។ សូមអញ្ជើញសិស្សឲ្យរំឭកពីបទពិសោធន៍នៅអតីតកាល ដែលបានជួយពួកគេឲ្យចូលទៅជិតព្រះយេស៊ូវគ្រីស្ទ ។
ការរៀបចំសិស្ស ៖ សូមអញ្ជើញសិស្សឲ្យមករៀនដោយរៀបចំខ្លួនចែកចាយអំពីរបៀប ដែលជម្រើសដែលពួកគេជ្រើសរើសត្រូវបានទទួលឥទ្ធិពលមកពីជំនឿរបស់ពួកគេលើព្រះយេស៊ូវគ្រីស្ទ ។
សកម្មភាពរៀនសូត្រដែលអាចមាន
តើប្រអប់មួយណាស្រាលជាង ?
សូមពិចារណាចាប់ផ្តើមបង្រៀនដោយបង្ហាញរូបភាពខាងក្រោម ។ សូមអញ្ជើញសិស្សឲ្យមើលប្រអប់ពណ៌ប្រផេះពីរ ហើយប្រាប់ទៅដៃគូថា ប្រអប់មួយណាដែលស្រាលជាង ។
តើវាធ្វើឲ្យអ្នកមានការភ្ញាក់ផ្អើលទេ ដែលដឹងថា ប្រអប់ពណ៌ប្រផេះទាំងពីរមានស្រមោលដូចគ្នា ? ខួរក្បាលរបស់អ្នកធ្វើឲ្យអ្នកយល់ឃើញថា ប្រអប់ពណ៌ប្រផេះពីរមានស្រមោលផ្សេងគ្នាដោយសារតែពន្លឺ ឬពណ៌ងងឹតជុំវិញប្រអប់ទាំងនោះ ។
ជំនួសឲ្យការអានកថាខណ្ឌខាងក្រោម សូមពិចារណាអញ្ជើញសិស្សឲ្យអាន អេសាយ ៥:២០ ហើយសុំឲ្យពួកគេប្រៀបធៀបរូបភាពប្រអប់ពណ៌ប្រផេះបំភាន់ភ្នែកទៅនឹងការព្យាករណ៍របស់អេសាយអំពីសម័យរបស់យើង ។
ដូចជារូបភាពបំភាន់នេះ អាចមានស្ថានភាពដែលពិបាកក្នុងការវិនិច្ឆ័យឲ្យបានត្រឹមត្រូវ ។ អេសាយបានព្យាករណ៍ថា នៅថ្ងៃចុងក្រោយ មនុស្សមួយចំនួននឹង « រាប់សេចក្តីអាក្រក់ថាជាល្អ ហើយសេចក្តីល្អថាជាអាក្រក់វិញ [ ហើយ ] យកសេចក្តីងងឹតជាពន្លឺ ហើយយកពន្លឺជាងងឹត » ( អេសាយ ៥:២០; សូមមើល នីហ្វៃទី២ ១៥:២០ ផងដែរ) ។
ដើម្បីជួយសិស្សគិតអំពីរបៀបដែលពួកគេមើលឃើញពីការព្យាករណ៍របស់អេសាយត្រូវបានសម្រេចក្នុងជំនាន់របស់យើង សូមពិចារណាពិភាក្សាអំពីសំណួរមួយ ឬច្រើនទាំងនេះជាមួយសិស្ស ។
-
តើមានវិធីមួយណាដែលអ្នកបានមើលឃើញថាមនុស្សនៅជំនាន់យើង « រាប់សេចក្តីអាក្រក់ថាជាល្អ ហើយសេចក្តីល្អថាជាអាក្រក់វិញ » ?
-
តើមានអ្វីខ្លះដែលវាពិបាកសម្រាប់នរណាម្នាក់ក្នុងការមើលឃើញសេចក្តីពិតដោយងាយ ឬច្បាស់លាស់នោះ ?
សូមអញ្ជើញសិស្សឲ្យសញ្ជឹងគិតទៅលើចម្លើយរបស់ពួកគេទៅនឹងសំណួរដូចខាងក្រោមដោយស្ងប់ស្ងាត់ ។
-
តើអ្នកកំណត់ដោយរបៀបណា ថាអ្វីមួយត្រូវ ឬខុសនោះ ?
-
តើអ្នកមានទំនុកចិត្តកម្រិតណាថា អ្នកអាចស្គាល់សេចក្តីល្អ និងសេចក្តីអាក្រក់ ? ហេតុអ្វី ?
សូមគិតអំពីអ្វីមួយដែលអ្នកចង់បែងចែកឲ្យបានកាន់តែច្បាស់អំពីសេចក្តីល្អ ឬសេចក្តីអាក្រក់ ។ ឧទាហរណ៍ នរណាម្នាក់អាចគិតថា ជម្រើសនៃការស្តាប់តន្ត្រីរបស់ពួកគេគឺល្អ ប៉ុន្តែឪពុកម្តាយរបស់ពួកគេ ប្រហែលជាមិនយល់ស្របអ៊ីចឹងនោះទេ ។ តើបុគ្គលណាត្រូវ ? ឧទាហរណ៍ផ្សេងទៀតអាចជាការសម្រេចចិត្តថា តើត្រូវប្រកាន់ជំហរមួយណាចំពោះបញ្ហាសង្គម ដោយជ្រើសរើសអ្នកណាដែលត្រូវធ្វើជាមិត្តជាមួយ ចូលរួមការធ្វើអ្វីមួយជាការកំសាន្ត ជាដើម ។
នៅពេលអ្នកសិក្សានៅថ្ងៃនេះ សូមរកមើលអ្វីដែលអាចជួយអ្នកឲ្យដឹងថា អ្វីមួយដែលល្អ ឬមិនល្អ ។
ភាពខុសគ្នារវាងសេចក្តីល្អ និងសេចក្តីអាក្រក់
ដូចអេសាយ មរ៉ូណៃក៏បានមើលឃើញពីជំនាន់របស់យើងផងដែរ ( សូមមើល មរមន ៨:៣៥ ) ។ ទ្រង់បានបញ្ចូលជំនួយសម្រាប់ពួកយើងនៅក្នុងព្រះគម្ពីរមរមន ។ បន្ទាប់ពីបានបង្រៀនអំពីសារៈសំខាន់នៃការធ្វើល្អដោយស្មោះអស់ពីចិត្ត ( សូមមើល មរ៉ូណៃ ៧:១–១១ ) លោកបានកត់ត្រាពាក្យដែលឪពុករបស់លោក គឺមរមន បានបង្រៀនដល់សមាជិកសាសនាចក្រអំពីការវិនិច្ឆ័យរវាងសេចក្តីល្អ និងសេចក្តីអាក្រក់ ។
សូមអាន មរ៉ូណៃ ៧:១២–១៧ ហើយពិចារណាគូសចំណាំអ្វី ដែលអ្នករកឃើញសម្រាប់ការជំរុញទឹកចិត្តនីមួយៗដូចខាងក្រោម ៖
-
របៀបដែលយើងអាចដឹងពីអ្វីមួយដែលជាសេចក្តីល្អ
-
របៀបដែលយើងអាចដឹងពីអ្វីមួយដែលជាសេចក្តីអាក្រក់
-
អ្វីដែលព្រះអង្គសង្គ្រោះធ្វើដើម្បីជួយដល់យើង
ប្រសិនបើអ្នកគិតថា វាមានប្រសិទ្ធភាពល្អជាងនេះ សូមសរសេរការជំរុញទឹកចិត្តបីខាងលើនៅលើក្ដារខៀន ហើយអញ្ជើញសិស្សឲ្យសរសេរឃ្លាត្រឹមត្រូវដែលពួកគេបានរកឃើញនៅខាងក្រោមការជំរុញទឹកចិត្តនីមួយៗ ។
-
ផ្អែកលើអ្វីដែលអ្នកបានរកឃើញនៅក្នុងខគម្ពីរទាំងនេះ តើអ្នកសង្ខេបគោលការណ៍ដែលបានពិភាក្សាដោយរបៀបណា ?
ចេញពី មរ៉ូណៃ ៧:១២–១៧ យើងអាចរកឃើញថា អ្វីៗទាំងអស់ដែលជារបស់ព្រះអញ្ជើញយើងឲ្យធ្វើសេចក្តីល្អ ជឿលើព្រះយេស៊ូវគ្រីស្ទ ហើយស្រឡាញ់ និងបម្រើដល់ព្រះ ។ ផ្ទុយទៅវិញ សេចក្តីអាក្រក់បញ្ចុះបញ្ចូលពួកយើងឲ្យប្រព្រឹត្តអំពើបាប បដិសេធព្រះយេស៊ូវគ្រីស្ទ ឬប្រយុទ្ធប្រឆាំងនឹងព្រះ ។
សិស្សអាចធ្វើសកម្មភាពខាងក្រោមជាលក្ខណៈបុគ្គល ជាក្រុមតូចៗ ឬជាថ្នាក់ទាំងមូល ។
ដើម្បីជួយអ្នកឲ្យយល់ពីការបង្រៀនរបស់មរមន ឧបមាថា បុគ្គលម្នាក់ជឿថា តន្ត្រីដែលពួកគេស្តាប់ និងវិធីដែលពួកគេប្រើប្រាស់ទូរសព្ទ និងបច្ចេកវិទ្យាផ្សេងទៀត គឺល្អ ប៉ុន្តែឪពុកម្តាយ ឬថ្នាក់ដឹកនាំរបស់ពួកគេ មិនយល់ស្របបែបនេះទេ ។
-
ផ្អែកលើសេចក្តីពិតដែលអ្នកបានស្គាល់ តើសំណួរអ្វីដែលបុគ្គលនេះអាចសួរខ្លួនឯងដើម្បីស្វែងយល់ថា តើការប្រើប្រាស់តន្ត្រី និងបច្ចេកវិទ្យារបស់ពួកគេ គឺល្អ ឬមិនល្អ ?
សូមស្តាប់ចម្លើយរបស់សិស្សហើយពិចារណាសរសេរវានៅលើក្ដារខៀន ។ ប្រសិនបើសិស្សមិនរៀបរាប់ពីចម្លើយទេ សូមពិចារណាប្រើប្រាស់ឧទាហរណ៍ខាងក្រោម ៖
-
តើការស្តាប់តន្ត្រី ឬការប្រើប្រាស់ទូរសព្ទ និងបច្ចេកវិទ្យារបស់ខ្ញុំនេះ អាចធ្វើឲ្យខ្ញុំ…
-
… បំពេញនូវចិត្តគំនិតរបស់ខ្ញុំឲ្យធ្វើសេចក្តីល្អ ឬប្រព្រឹត្តនូវអំពើបាបដែរឬទេ ?
-
… លើកទឹកចិត្តខ្ញុំឲ្យធ្វើអ្វីក្នុងនាមជាអ្នកដើរតាមព្រះយេស៊ូវគ្រីស្ទនឹងត្រូវធ្វើ ឬមិនត្រូវធ្វើដែរឬទេ ?
-
… ជួយខ្ញុំឲ្យស្រឡាញ់អ្វីដែលជារបស់ព្រះដែរឬទេ ?
-
សូមចំណាំថា អ្នកប្រហែលជាត្រូវគិតគូរពីតន្ត្រីករ ឬចម្រៀងខ្លះៗរៀងៗខ្លួន ព្រមទាំងគិតពីកម្មវិធី ល្បែង ឬប្រព័ន្ធផ្សព្វផ្សាយមួយចំនួនផងដែរ ។ បន្ថែមពីនេះទៀត ចំនួនម៉ោងដែលអ្នកចំណាយលើសកម្មភាពក៏អាចជាកត្តាសំខាន់ដែលត្រូវពិចារណាផងដែរ ។
ពន្លឺជួយឲ្យអ្នកមើលឃើញ
អ្នកប្រហែលជាបានសម្គាល់ឃើញថា ក្នុងស្ថានភាពខ្លះ វាអាចនឹងពិបាកវិនិច្ឆ័យរវាងត្រូវ ឬខុស ។
សូមពិចារណាជួយសិស្សឲ្យទទួលបទពិសោធន៍ទៅលើអ្វីដែលនឹងត្រូវសុំឲ្យពួកគេគិតស្រមៃនៅក្នុងកថាខណ្ឌខាងក្រោម ។
ការណ៍នេះអាចធ្វើបានតាមរយៈការបិទភ្លើង ហើយសុំឲ្យសិស្សព្យាយាមពិពណ៌នាពីរូបភាព ឬអានអ្វីមួយ ។ បន្ទាប់មកបើកភ្លើងវិញ ហើយអញ្ជើញឲ្យពួកគេពិពណ៌នា ឬអានវាម្តងទៀត ។
ដោយគិតស្រមៃពីរូបភាពនេះក្នុងចិត្ត សូមកត់ចំណាំឃ្លានៅក្នុង ខទី ១៦ ដែលបង្ហាញអំពីរបៀបដែលព្រះអង្គសង្គ្រោះជួយដល់ពួកយើង ។
សូមអានសេចក្តីថ្លែងការណ៍ខាងក្រោមពីប្រធានហិនរី ប៊ី អាវរិង នៃគណៈប្រធានទីមួយ ដើម្បីជួយដល់អ្នកឲ្យយល់អំពីពន្លឺនៃព្រះគ្រីស្ទ ៖
បុត្រគ្រប់រូបរបស់ព្រះវរបិតាសួគ៌ដែលកើតក្នុងពិភពលោកនេះត្រូវបានប្រទានអំណោយទានពិសេសមួយដោយឥតគិតថ្លៃ គឺពន្លឺនៃព្រះគ្រីស្ទ ។ អ្នកធ្លាប់មានអារម្មណ៍បែបនោះ ។ នេះគឺជាអំណោយពិសេសជួយអ្នកឲ្យដឹងពីអ្វីដែលត្រូវ និងអ្វីខុស ហើយអ្វីដែលពិត និងអ្វីដែលមិនពិត ។ អ្នកមានអំណោយនេះចាប់តាំងពីអ្នកបានចាប់ផ្ដើមដំណើរជីវិតរបស់អ្នកមកម៉្លេះ …
… អ្នកធ្វើការជ្រើសរើសជារៀងរាល់ថ្ងៃ និងស្ទើរតែរៀងរាល់ម៉ោង ដែលធ្វើឲ្យអ្នកបន្តដើរនៅក្នុងពន្លឺ ឬដើរចេញពីពន្លឺឆ្ពោះទៅកាន់ភាពងងឹត ។ ( ហិនរី ប៊ី អាវរិង « Walk in the Light » Liahona ខែឧសភា ឆ្នាំ ២០០៨ ទំព័រ ១២៣–១២៤ )
-
តើអ្នកបានរៀនអ្វីខ្លះអំពីពន្លឺនៃព្រះគ្រីស្ទ ?
សម្រាប់ព័ត៌មានបន្ថែមទៀតអំពីពន្លឺនៃព្រះគ្រីស្ទ សូមមើល Gospel Topics «°Light of Christ°» topics.ChurchofJesusChrist.org°។
សូមអាន មរ៉ូណៃ ៧:១៨–១៩ ដោយស្វែងរកដំបូន្មានបន្ថែម ដែលមរមនបានផ្តល់អំពីការវិនិច្ឆ័យរវាងល្អ និងអាក្រក់ ។
-
តើអ្នកគិតថា « ស្វែងរកដោយឧស្សាហ៍នៅក្នុងពន្លឺនៃព្រះគ្រីស្ទ » មានន័យយ៉ាងដូចម្តេច ?
សូមស្តាប់ចម្លើយសិស្សដោយយកចិត្តទុកដាក់ ។ សិស្សអាចនឹងនិយាយអំពីការជញ្ជឹងគិតដោយស្ងៀមស្ងាត់ ការគិតតាមរយៈការសម្រេចចិត្ត និងការស្តាប់ទៅលើសម្បជញ្ញៈ ឬសំឡេងខាងក្នុងរបស់យើង ។ គំនិតមួយទៀត គឺគិតអំពីអ្វីដែលនឹងនាំយើងឲ្យខិតទៅជិតព្រះយេស៊ូវគ្រីស្ទ ។ បើមានប្រយោជន៍ សូមពិចារណាលើការសួរសំណួរមួយចំនួនដូចខាងក្រោម ៖
-
តើគំរូ និងការបង្រៀនរបស់ព្រះអង្គសង្គ្រោះអាចប្រៀបដូចជាពន្លឺមួយដើម្បីជួយដល់យើងឲ្យវិនិច្ឆ័យបានត្រឹមត្រូវរវាងត្រូវ និងខុសនៅថ្ងៃនេះយ៉ាងដូចម្ដេច ?
-
តើមានវិធីអ្វីខ្លះទៀតដែលយើងអាចស្តាប់ឮព្រះបន្ទូលរបស់ទ្រង់ ហើយមានអារម្មណ៍ថាឥទ្ធិពលរបស់ទ្រង់កំពុងដឹកនាំយើង ?
វាក៏ប្រហែលជាអាចមានប្រយោជន៍ផងដែរក្នុងការសួរសំណួរថា « តើនៅពេលណាអ្នកអាចស្គាល់អ្វីមួយដែលជាសេចក្តីល្អ ឬសេចក្តីអាក្រក់បាន ដោយសារពន្លឺរបស់ព្រះគ្រីស្ទនៅក្នុងជីវិតរបស់អ្នក ? »
ការអនុវត្តអ្វីដែលអ្នកបានរៀន
សូមរំឭកពីស្ថានភាពដែលអ្នកបានគិតកាលពីមុន នៅពេលដែលបានសុំឲ្យអ្នកគិតអំពីអ្វីមួយ ដែលអ្នកចង់បែងចែកឲ្យបានកាន់តែប្រសើរឡើងថា ល្អ ឬមិនល្អនោះ ។ សូមចំណាយពេលពីរបីនាទី ដើម្បីពិចារណាដោយអធិស្ឋានអំពីរបៀបដែលអ្នកអាចប្រើប្រាស់គោលការណ៍ដែលអ្នកបានរៀននៅថ្ងៃនេះ ដើម្បីកំណត់ថា តើវាត្រូវ ឬខុស ។ សូមព្យាយាមស្វែងរកដោយឧស្សាហ៍នៅក្នុងពន្លឺនៃព្រះគ្រីស្ទនៅពេលដែលអ្នកជញ្ជឹងគិតពីស្ថានភាពនេះ ។ សូមកត់ត្រាគំនិតរបស់អ្នកនៅក្នុងសៀវភៅកំណត់ហេតុការសិក្សារបស់អ្នក ។
សំណួរខាងក្រោមអាចប្រើប្រាស់ដើម្បីបញ្ចប់ម៉ោងរៀនដោយពិភាក្សាអំពីអ្វីខ្លះដែលសិស្សបានរៀន ។
-
តើអ្នកបានរៀនសូត្រអ្វីខ្លះនៅថ្ងៃនេះ ដែលអាចជួយដល់អ្នកបង្កើនសមត្ថភាពរបស់អ្នកក្នុងការជ្រើសរើសរវាងត្រូវ និងខុស ?
-
តើចំណុចពីរ ឬបីនៃផ្នែកណាខ្លះក្នុងជីវិតដែលអ្នកចេះបែងចែកពីសេចក្តីល្អ និងសេចក្តីអាក្រក់ដោយជោគជ័យ ? ហេតុអ្វី ?