Eberi 11

N na Kanga ni Kaoiia ni Kabane bwa A na Nako Nakon Kristo?

Reirei ao Berita aika Tabu 30–36

Uaia ni Marooro

Kairaki iroun kaain te beretitentii n te kooram ke te kiraati; e na kabanea 10–20 te miniti

Ni moan waakin te bootaki, manga atonga riki Ana Botoniango Te Nakoanibonga ae te Aaron ke Ana Botoniango te Bootaki n Ataeinnaine. Ngkanne, irarikin are kam na marooro imarenami iaon te kainnano ae e onoti n te kooram ke te kiraati, ko na tangiria n taekin bwai ake a namakinaki ao botoniango man te maungatabu ni kabuta. Titiraki aika imwina a kona n ibuobuoki.

• Tera botoniango ke rongoron ae rangi n teretere nakoira?

• Tera ae ti namakina kairakira bwa ti na karaoia ibukin baike ti reiakin ke n namakini?

• Iai te bwai ae ti kona ni karaoia ngaira kaain te kooram ke kiraati ni karaoi nanon reirei ake ti ongo n te maungatabu ni kabuta?

N tokin te reirei, ngkana e riai, karaoi waaki aikai:

• Kaota koauan te reirei are e reiakinaki.

• Kauringiia kain te kooram ke te kiraati iaon te baire ao te kakao are a karaoia n tain te bootaki.

Reirei te Reirei

Kairaki iroun te tia kairiiri ae ikawai ke te kairake; e na kabanea 25–35 te miniti

Katauraoiko n te Maiu n Tamnei

Tabeua te namwakaina imwiin barongaan te Ekaretia are e a tia ni kaokaki n Eberi 6, 1830, i Fayette, New York, e moanna te Uea ni weteia mitinare bwa a na ikotiia “naake e a tia n rineia man mwakoron te aonaba ake aua” (Reirei ao Berita aika Tabu 33:6). Tera ae moan waakinaki n aron aia mwakuri korakora taan rairaki aika boou n aonon te aonaaba are e rikirake nakon aia taanga ni buaka mitinare are a tataekina te euangkerio ni kabuta te aonaaba. Ma te mwakuri ni mitinare e aki tiatianaki nakoia naake a karaoa aia mwakuri ni mitinare aebwanin taina. Te Uea e tangiriia n tatabemaniira bwa ti na kaoiia naake irarikira n nakomai Nakoina.

Tera taneiai ake ko a tia ni karekei inanon kaoaia tabeman bwa a na reiakina taekan ana euangkerio te Tia Kamaiu? Tera ae ko kona ni karaoia n ana inanoia kaain te kooram ke te kiraati bwa a na kakoroi bukin aia beku ni kairiia aomata nakon Iesu Kristo? Ngkai ko katauraoi n reirei, iangoia manga rinanoa “What Is My Purpose as a Missionary?” in Tataekina Au Euangkerio ([2019] 1–16) ao ana rongorongo Unimwaane Dieter F. Uchtdorf’ “Mwakuri ni Mitinare: Tibwa te Bwai Are i Nanom,” Riaona, Meei 2019, 15–18).

Man kaoaia raoraora bwa a na ira bootakin te Ekaretia ke waaki ni kakukurei, ti buokiia n reiakina taekan Kristo.

Te Uaia n Reirei

Reirei ao Berita aika Tabu 30–36 e taekini araia tabeman aomata ake a weteaki bwa a na karaoa aia mwakuri ni mitinare n ana bong te Ekaretia n taai ake ngkoa. Tabeua te bong imwaain am boowi, ko kona n anganiia kaain te kooram ke te kiraati teuana mai buakon aara aikai (taraa atuun te rongorongo nakon mwakoro 30–36) ao kaoka teuanne ke neienne n reireinna tera ana reirei te Uea are e anga bwa e na buoka te aomata anne n tibwaua te euangkerio. Ti na kanga ni kairekerekea te reirei anne nakoira? A kona iango akana inano ni moantai n anai nanoia naake ko reireiniia ni kaoiia naake irarikiia bwa a na nako nakon Kristo.

• A ataia naae ko reireiniia bwa tera ae nanonaki bwa a na nako nakon Kristo? Ko kona n tuangiia bwa a na tibwauai aia iango. Ngkana e na kona n ibuobuoki, ko kona n tibwaua te kabwarabwara aei: “N nakomai nakon te Tia Kamaiu, a riai aomata n iai aia onimaki Irouna nakon te rairannano—karaoi bitaki aika a riai ni kaboraoi maiuia ma Ana reirei” (Taetaekina Au Euangkerio, 2). A kona kaain te kooram ke te kiraati ni wareki koroboki aika tabu ake a kairaki inanona kibuntaeka n aron “nakomai nakoiu” ke “nako nakon Kristo” ni buoka ni kaeka te titiraki aei—n aron te katooto, Mataio 11:28–30; Ominai 1:26; Moronaai 10:32; Reirei ao Berita aika Tabu 20:59. Bukin tera ngkai ti tangiriia aomata bwa a na nako nakon Kristo? Tera tabeua bwaai aika uarereke aika ti kona ni karaoi ni buokiia iai? A kona kaain te kooram ke te kiraati ni karaoi aia babaire ni kaoa temanna are a kinaa ni kaniaki riki ma Kristo.

• Reiakinaia tabeman n tia n tibwaua te euangkerio bon te kawai ae moan te nakoraoi n anainanoia naake ko reireiniia. Ko kona ni kaota teuana ke ae mwaiti man taian witeo ake a kuneaki iaan “Bwaai ni Mwakuri” ke kaoiia kaain te kooram ke te kiraati bwa a na wareka te reirei ao te katooto are e kuneaki n ana rongorongo Titita Cristina B. Franco “Kunean te Kimwareirei n Tibwauaan te Euangkerio” (Riaona, Nob. 2019, 83–86). Tera ae ti reiakinna man katooto aikai? Uaia marooro tera ae a kona ni karaoia kaain am kooram ke am kiraati ni kaoiia tabeman bwa a na nako nakon Kristo.

• Ngkana e roko n tibwauakin te euangkerio, e taku Unimwaane Dieter F. Uchtdorf bwa tabeman mai ibuakora a bae n “namakina te nanououa bwa a na kanga ni karaoia. Ke ti na bae n namakina te mamaa n otinako man ara tabo ae kamweengara raoi” (“Mwakuri ni Mitinare: Tibwa te Bwai are i Nanom,” Riaona, Meei 2019, 16). Ngkana aio ae a namakinna kaain te kooram ke te kiraati, a kona ni buokaki man nimaua iango aika bebete are e anga n ana marooro Unimwaane Uchtdorf . Ko kona ni kaoiia kaain te kiraati n tatabemaniia bwa a na wareka teuana mai buakon ana iango ao n tibwauaia tera are a reiakinaki iai.

Mwakuri inanon te Onimaki

Kaungaiia kain te kooram ke te kiraati ni iangoia ao korea mwiin te bwai are a na karaoia ni karaoa nanon te namakin are a karekea n te bong aei. E kanga te reirei n te bong aei ni irekereke ma oin aia kouru are a tia ni karaoia? Ngkana a tangiria, a kona kaain te kooram ke te kiraati n tibwa aia iango.

Reitan Bwaai n Mwakuri

• 1 Timoteo 4:12 (Ko na riki bwa aia tia kakairi aomata aika onimaki)

• Aramwa 17:2–4 (Natin Motiaea mwaane a katauraoiia bwa a na tibwaua te euangkerio)

• Reirei ao Berita aika Tabu 42:6–7 (Taetaekina te euangkerio man mwaakan te Tamnei)

• Russell M. Nelson ao Wendy Nelson, “Hope of Israel” (aia taromauri te roronrikirake n te aonaaba, Tuun 3, 2018), karinaki n te New Era ao Ensign, HopeofIsrael.ChurchofJesusChrist.org

• “Kaoiia ni Kabane bwa a na Nako nakon Kristo: Tibwaua te Euangkerio,” “Kaoiia Tabeman n ‘Nakomai ao n Nooria,’” “Kaoiia Tabeman n ‘Nakomai ao n Ibuobuoki,’” “Kaoiia Tabeman n ‘Nakomai ao n Tiku’” (witeo), ChurchofJesusChrist.org

Reirei n ana Kawai te Tia Kamaiu

Te Tia Kamaiu e kaoiia tabeman bwa a na tataekina taekan te koaua are a reiakinna bwa e aonga te Tamnei n ringi nanoia. “Kam taku ba antai Ngai?” E titiraki. Ngke e kaeka Betero, e a kakorakoraaki riki ana koaua: “Bon te Kristo Ngkoe, are Natin te Atua are e maiu” (Mataio 16:15–16). E na kanga tibwaan te euangkerio ni kakorakorai aia koaua kaain te kooram ke te kiraati?