Iesu ngke e teboki waeia Abotoro, iroun Del Parson

Eberi 25

N na Kanga n Riki n Aron Kristo n Au Ibuobuoki nakoia Tabeman?

Reirei ao Berita aika Tabu 41–44

Te Uaia ni Marooro

E kairaki irouia kaain te beretitentii n te kooram ke te kiraati; e na kabanea 10–20 te miniti

Ni moan waakin te bootaki, ikotaki ni kaokia riki Ana Botoniango Te Kooram n te Nakoanibonga ae te Aaron ke Ana Botoniango te Bootaki n Ataeinnaine. Ngkanne kaira te marooro ibukin bwaai n aron akana imwiina, ao bairei kawai ake kona mwakuri ni bwaai ake ko maroroakin (ko kona ni baireia tera bwaai ake a na maroroakinaki inanon te boowi ni beretitentii):

• Ara kooram ke ara kiraati. Antai aika a boou n ara uoote, ao ti na kanga ni buokiia n namakinna bwa a butimwaeaki? Tera ae ti karaoia bwa e aonga ni manena ara tai ni bootaki n ara kooram ke ara kiraati?

• Tibwangara ke mwiokoara. Baikara katabeara ao tibwangara ngkai ataeinimwaane ao ataeinnaine ngaira? Ti na kanga ni kakoroi nanoia?

• Maiura. Tera ae ti karaoia bwa ti aonga ni katotonga riki Iesu Kristo ao ni karekea Mwakana inanon maiura? Tera ae tina karaoia ni buokiia ara utu bwa ti na bane n nako Ina?

N tokin te reirei, ngkana e riai, karaoi waaki aikai:

• Kaota koauan te reirei are e reiakinaki.

• Kauringiia kain te kooram ke te kiraati iaon babaire ao kakao ake a karaoi n tain te bootaki.

Reirei te Reirei

Kairaki iroun te tia kairiiri ae ikawai ke te kairake; e na kabanea 25–35 te miniti

Katauraoiko n te Maiu n Tamnei

Ngke a tuangaki Aika Itiaki iroun te Uea bwa ana ikotiia i Kirtland, Ohio, a mwaiti aomata ake a kiitani mweengaia ma te onimaki ao a mwananga nako ikekei. Ma te mwananga aio tiaki tii ibukin te maeka n te tabo ae e boou—bon ibukin naba maeuakinan te kawai ae e boou. Kaain te kooram ke te kiraati a bae n tia ni kamatebwaia Reirei ao Berita aika Tabu 41–44 n te wiiki aio ao n tia n reiakiniia Aika Itiaki ake a mwaing nako Kirland ma ana tua te Uea are e a tia ni kaotaki nakoia ikekei. Iaon bwaai nako, te Uea e kaantaningaia Aika Itiaki bwa a na riki n tii teuana bwa e tuangiia te Uea bwa ana tangiriia ao ni buokiia bon irouia bwa aonga ni katiteuanaaki (taraa Reirei ao Berita aika Tabu 42:30–31, 38–39, 45; 44:6). Baikara taneiai aika ko kona n tibwauaia bwa e na ibuobuoki nakon am kooram ke am kiraati ni kona n namakina kakawakin ana mwakuri n ibuobuoki Kristo?

Ibukin buokam ni katauraoiko n reirei iaon ana mwakuri n ibuobuoki Kristo, ko kona ni manga rinanon aikai “Ibuobuoki” inanon Ibukin Kakorakoraia te Roronrikirake ([2011], 32–33) ao ana rongorongo Beretitenti Russell M. Nelson “The Second Great Commandment” (Liahona, Nobembwa 2019, 96–100).

Ti kona ni beku ibukiia tabeman n aron ae karaoia te Tia Kamaiu.

Te Uaia n Reirei

Ni moanakin te kabwarabwara iaon ana mwakuri ni ibuobuoki Kristo, ko na bae ni koroia iaon te burakibooti “Te Maeka Inanon te Tangira” (Reirei ao Berita aika Tabu 42:45). Kaoia kaain am kooram ke te kiraati bwa ana wareka Reirei ao Berita aika Tabu 42:30–31, 38–39, 45; 44:6 ao ni korei kawai ake e tangiria te Uea bwa a na karaoi Aika Itiaki n ibuobuoki imarenaia. Tera tibwangara, n ara utu ma inanon ara utu ao tabeman, ni buokiia naake iai kainnanon rabwataia, aia iango, ke tamneia? Rineia man iango aika inano ni kaungaia am kooram ke am kiraati n anga ana mwakuri n ibuobuoki Kristo nakoia tabeman.

• Ni buokiia kaain te kooram ke te kiraati n reiakiniia man ana banna ni katoto te Tia Kamaiu iaon te mwakuri n ibuobuoki, ko kona n katabeia aomata n tatabemaniia bwa a na wareka te kibuntaeka iaon ana ibuobuoki te Tia Kamaiu nakon temanna te aomata, (taraa “Reitan Bwaai n Mwakuri”). A kona aomata n tatabemaniia nako ni kauarerekea te kibuntaeka man koroboki aika tabu ao ni kabwarabwara bwa tera ae e a tia ni karaoia Te Tia Kamaiu ni buokiia tabeman. Tera ae e reiakinaki man katooto aikai iaon nanon te mwakuri n ibuobuoki n te kawai are e karaoia Te Tia Kamaiu? Tera te kaokoro imarenan aron ana mwakuri n ibuobuoki te Tia Kamaiu ma aron aia kawai n ibuobuoki riki tabeua? A kona kaain te kooram ke kaain te kiraati n tibwauai aia taneiai ngke a kataia ni karaoi ibuobuoki n aron ae karaoia te Tia Kamaiu ke ngke a tia tabeman ni buokiia n te kawai aio.

• E na kona ni ibuobuoki ibukin am kooram ke am kiraati ni manga rinanon bwaai ake e a tia te Uea ma ana burabeti n reirei iaon te mwakuri ni ibuobuoki. Aikai tabeua kibuntaeka man booki aika tabu aika a kona n ikotaki ni wareki: Mataio 25:31–46; Ruka 10:25–37; Ioane 13:34–35; Iakobo 1:27; Motiaea 2:17; 18:8–10. Kaungaia bwa a na korea te bwai ae a riakinna man buokakiia tabeman ao n tibwauai aia iango ao aia taneiai ni kaineti nakon te bwai ae a tia n reiakinna. Ngkanne a kona ni bairei kawai n anga te ibuobuoki n aron Kristo. (A kona n karekei iango man te mataku n teuana ke e mwaiti riki witeo ibukin “Reitan Bwaai n Mwakuri” ke nakon JustServe.org.)

• Ni buokiia kaain te kooram ke te kiraati n aia ibuobuoki nakoia tabeman, iangoia ni ikotaki n rinanon ana rongorongo Beretitenti Bonnie H. Cordon “N Riki bwa te Tia Kawakin Tiibu” (Riaona, Nobembwa 2018, 74–76). Ko kona ni moanna man kaotakin tamnei tabeua iaon te Tia Kamaiu ngke e ibuobuoki (Beretitenti Cordon e kaoti tabeua inanon ana rongorongo). Tera ae ti reiakinna man tamnei aikai bwa ti na karaoi n ibuobuoki n aron Kristo? Ngkanne iangoia ni kaoia kaain te kooram ke te kiraati bwa a na wareware n ikatoatoa teuana te mwakoro n te rongorongo ao n tibwauaa te bwai ae a tia n reiakinna iaon aron te ibuobuoki n aron te Tia Kamaiu. A kona naba n tibwaua te bwai ae a tia n reiakinna man ana mwakuri ni ibuobuoki Kristo inanon aia tai ni buokiia tabeman.

Mwakuri inanon te Onimaki

Kaungaiia kain te kooram ke te kiraati ni iangoia ao ni korea mwiin te bwai are a na karaoia ni karaoi nanon namakin ake a karekei n te bong aei. E kanga te reirei n te bong aei ni irekereke ma oin aia kouru are a tia ni karaoia? Ngkana a tangiria, a kona kaain te kooram ke te kiraati n tibwauai aia iango.

Reitan Bwaai n Mwakuri

• Mataio 14:13–21; Ioane 9:1–11; 13:4–5, 12–17; 1 Nibwaai 11:31; 3 Nibwaai 17:5–10 (Ana katooto Iesu Kristo ni buokiia tabeman)

• Joy D. Jones, “For Him,” Riaona, Nobembwa 2018, 50–52

• “If We Forget Ourselves,” “Teachings of Thomas S. Monson: Rescuing Those in Need,” “Youth in Action,” “Opportunities to Do Good” (witeo), ChurchofJesusChrist.org

Anga Reirei n Ana Kawai te Tia Kamaiu

N Ana tai ni mwakuri iaon te aba, Iesu Kristo e kabanea Ana tai ni beku ao ni buokiia naake Irarikina. Ana reirei Kristo ni koaua a karaoa naba ae aekan aei (taraa Ioane 13:35). Tarai aanga ibukin kaoaia kaain te kooram ke kaain te kiraati bwa a na tibwauaia bwa a kanga ni buokiia tabeman ao tera bwaai ae kaungaia bwa a na anga aia ibuobuoki. (Taraa Reirei n Ana Kawai te Tia Kamaiu [2016], 4–5.)