te ataeinnaine ae kamatoaaki

Meei 23

N na Kanga ni Karekea ana Bwai n Tituaraoi te Tamnei ae Raoiroi?

Reirei ao Berita aika Tabu 51–57

te aikaon ibukin te uaia ni marooro

Uaia ni Marooro

Kairaki iroun kaain te beretitentii n te kooram ke te kiraati; e na kabanea 10–20 te miniti

Ni moan waakin te bootaki, manga atonga riki Ana Botoniango Te Kooram n te Nakoanibonga ae te Aaron ke Ana Botoniango te Bootaki n Ataeinnaine. Ngkanne kaira te marooro ibukin bwaai n aron akana imwiina, ao bairei kawai ake kona mwakuri iaon ake ko maroroakin (ko kona ni baireia tera bwaai ake a na maroroakinaki inanon te boowi ni beretitentii):

• Ara kooram ke ara kiraati. Tera ae ti kona ni karaoia ni karika te bonnano imarenaia kaain te kooram ke te kiraati? Baikara kouru ae ti tangiria ni bane n uaia ni mwakurii?

• Ara beku ke mwiokoara. Tera ae ti karaoia n tibwaua te euangkerio? Baikara baika ti a tia n rinanoi ni karaoan te mwakuri n te tembora ao n rongorongon te utu?

• Maiura. Ti kanga n tia n nora bain te Uea inanon maiura? Tera te namakin n tamnei ae e a tia n reke iroura inanon tain kamatebwaian booki aika tabu n te wiiki aei?

N tokin te reirei, ngkana e riai, karaoi waaki aikai:

• Kaota koauan te reirei are e reiakinaki.

• Kauringiia kain te kooram ke te kiraati iaon te baire ao te kakao are a karaoia n tain te bootaki.

te aikaon n reirei te reirei

Reirei te Reirei

Kairaki iroun te tia kairiiri ae ikawai ke te kairake; e na kabanea 25–35 te miniti

Katauraoiko n te Maiu n Tamnei

Imwiin tiara ni bwabetitoaki, kain te nakoanibonga a katokai baia iaon atuura n anga ana bwai n tituaraoi te Tamnei ae Raoiro. A bae n tia ni kauringaki kaain te kooram ke te kiraati ngke a kamatebwaia Reirei ao Berita aika Tabu 51–57 n te wiiki aei. E ngae n anne, karekean te Tamnei ae Raoiroi e kainnanoa ae mwaiti riki nakon anne. Ni karekea te Tamnei ae Raoiroi bwa rao ae teimatoa, ti riai n tangiria bwa E mena irarikira, kaoia nakon maiura, ao ni kakaonimaki ni kawakin tuua. Tera kakabwaia aika a na roko inanon maiuia naake ti reireinnia ngkai a ukora Ana anainano?

Ni buoka aron katauraoam n anga reirei, ko kona ni manga rinanoa “An Bwai n Tituaraoi te Tamnei ae Raoiroi” inanon Koaua nakon te Onimaki ([2004], 83–84) ke ana marooro Beretitenti Henry B. Eyring “Tamneina e Mena Iroumi” (Riaona, Meei 2018, 86–89).

ataeinnaine ao ataeinimwaane n te kiraati

Ni karekea ana kairi te Tamnei ae Raoiroi, ti riai ni ukora Ana anainano ni katoa bong.

Te Uaia n Reirei

Ni buokiia kaain te kooram ke te kiraati ni kamatataaki riki n ana bwai n tituaraoi te Tamnei ae Raoiroi, ko kona ni waaki ni maroroakinna bwa e kanga ni kanakoaki ana bwai n tituaraoi te Tamnei ae Raoiroi. A kona ni wareka Reirei ao Berita aika Tabu 52:10; 53:3; 55:1–3 ao ni maroroakin baike a reiakin. Katuruturua bwa kaain te nakoanibonga aki anga te Tamnei ae Raoiroi ma a kaoa kaain te aro bwa e na karekea te Tamnei ae Raoiroi. Tera te kaokoro? Waaki ni kakukurei aika inano a kona ni buokiia naake ko reireiniia ni kamatataaki riki bwa a na kanga ni karekea te bwai tituaraoi ae moan te kamiimi aei.

• Tera ae e karaoia Riaai ma ana utu ibukin kairaia iroun te Riaona bon ti te arona naba ma ae ti riai ni karaoia bwa e aonga n reke ana kairi n anainano te Tamnei ae Raoiroi. Ko kona ni kaota tamnein Riaai ao te Riaona (taraa Bokin Tamnein te Euangkerio [2009], no. 68) ao n tuangiia kaain te kooram ke te kiraati bwa a na tibwaua aia atatai iaon te Riaona. Ngkanne, ko kona ni kaoiia iteran am kiraati bwa a na wareka 1 Nibwaai 16:14–29 ao are te iterana bwa a na wareka 1 Nibwaai 18:8–22, n tarai kawai ake kanga ti te arona te Riaona ma te Tamnei ae Raoiroi. Tera ae ti reiakinna ma aia katooto ana utu Riaai are e kona ni buokiira ni karekea te Tamnei ae Raoiroi n ae bwanin?

• Mwakoron tatabeua inanon Ibukin Kakorakoraia Kairake iai inanona reirei ibukin ana kainibaire ao ana tua te Uea. Maiuakinan tuua aikai e kaoa mwaakan te Tamnei ae Raoiroi nako nanon maiura. Iangoia kaooia kaain te kooram ke te kiraati n rinea teuana te mwakoro inanon Ibukin Kakorakoraia Kairake, warekia, ao ni mwaakeni bwaai ake a na riai ni karaoi ke ake a na aki karaoi ni buokiia bwa aonga ni karekea te Tamnei ae Raoiroi. Ngkanne a kona n tibwauai baike a reiakin ma nikiraia kaain te kooram ke te kiraati. Kaoiia bwa a na katea aia kouru are a na buokaki ni karekea te Tamnei ae Raoiroi n ae bwanin. Bukin tera ngkai ti tangiria bwa e na raonira te Tamnei ae Raoiroi? (taraa Ioane 14:26–27; 15:26; 16:13; 2 Nibwaai 32:3).

• Inanon ana rongorongo “Tamneina e Mena Iroumi” (Riaona, Meei 2018, 86–89), e taku Beretitenti Henry B. Eyring, “Au kantaninga bwa ko na karikirakea nanom ao am konabwai ibukin te Tamnei ae Raoiroi” (iteraniba 86). Tuangiia kaain te kooram ke te kiraati bwa a na wareka te ka ruaiua ni barakarabe inanon ana rongorongo ae moanaki ma “Ana taneiai te Burabeti Iotebwa Timiti” (iteraniba 88). Kaoiia bwa a na tarai bwaai ake e a tia ni karaoi Iotebwa Timiti ni karekea ana anainano te Tamnei ae Raoiroi. A kona ni koroi iaon te burakibooti bwaai ake a kunei. N aron ae riai, ko kona ni kaoiia bwa a na tibwauai aia taneiai ni karekean ana kairi te Tamnei ae Raoiroi. Tera ae a karaoia n tain taneiai aikai are e a kairiiri nakon karekean ana kairi te Tamnei ae Raoiroi? Ko kona naba n tibwaua am taneiai.

Mwakuri inanon te Onimaki

Kaungaiia kain te kooram ke te kiraati ni iangoia ao korea mwiin te bwai are a na karaoia ni karaoa nanon te namakin are a karekea n te bong aei. E kanga te reirei n te bong aei n irekereke ma oin aia kouru are a tia ni karaoia? Ngkana a tangiria, a kona kaain te kooram ke te kiraati n tibwa aia iango.

Reitan Bwaai n Mwakuri

• Moronaai 8:25–26; Reirei ao Berita aika Tabu 20:77, 79; 121:45–46 (Ko na kanga ni karekea te Tamnei ae Raoiroi)

• David A. Bednar, “Karekea te Tamnei ae Raoiroi,” Riaona, Noembwa. 2010, 94–97

• Douglas D. Holmes, “Ana Bwai n Tituaraoi te Tamnei ae Raoiroi” (Ana Taromauri ni Kakiritimati te Moan Beretitentii, Ritembwa 4, 2016), broadcasts.ChurchofJesusChrist.org

Reirei n ana Kawai te Tia Kamaiu

Ni katauraoana ibukin Ana mwakuri iaon te aba, te Tia Kamaiu “e kairaki iroun te Tamnei nakon te rereua” n aki mamatam, n tataro, ao ni mena irarikin te Atua” (Ana Rairairi Iotebwa Timiti, Mataio 4:1 [ni Mataio 4:1, bwaai aika a na taraaki mai inano b]). Te anga reirei n te euangkerio ae korakora tiaki tii te katauraoi n te reirei ma bon katauraoara naba. (Taraa Reirei n ana Kawai te Tia Kamaiu [2016], 11.)