jun saaj ixq nak’ojob’aak

23 mayo

Chan ru tink’ul li maatan re li Santil Musiq’ej?

Tzol’leb’ ut Sumwank 51–57

reetalil li k’uub’ank na’leb’ sa’ komonil

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li molam malaj tzoleb’aal; 10-20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li molam re li Tijonelil re Aaron malaj li ch’ol aatin choq’ reheb’ li Saaj Ixq. Toja’ naq tex’aatinaq chirixeb’ li na’leb’ chanchaneb’ li tz’iib’anb’ileb’ arin, ut teek’uub’ eena’leb’ re naq toj teeb’aanu li k’a’ru nekeye (naru teesik’ ru k’a’ru tex’aatinaq wi’ sa’ li ch’utam re li awa’b’ejil):

• Sa’ qamolam malaj qatzoleb’aal. K’a’ru naru taqab’aanu re xjunajinkileb’ li saaj? K’a’ruheb’ li meta taqaj xk’ojob’ankil sa’ komonil?

• Li k’a’ru teneb’anb’il sa’ qab’een. K’a’ru yooko chixb’aanunkil re xwotzb’al li evangelio? Ma wan ani sa’ qayanq li naru tixseraq’i junaq na’leb’ li xk’ul chaq sa’ xb’aanunkil li k’anjel re li santil ochoch ut re li qaxe’ qatoon?

• Sa’ li qayu’am. B’ar ak xqil li ruq’ li Qaawa’ sa’ li qayu’am? K’a’ru xwaklesi qach’ool naq xqatzoleb’ li loq’laj hu chiru li xamaan a’in?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik k’a’ru li xeye sa’ li ch’utam a’in naq teeb’aanu.

reetalil xk’utb’al li tzol’leb’

Xkʼutb’al li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

Chirix naq nakub’e qaha’, eb’ laj k’amol re li tijonelil neke’xk’e li ruq’ sa’ xb’een li qajolom re xk’eeb’al li maatan re li Santil Musiq’ej. Maare xjultiko’ reheb’ li saaj li na’leb’ a’in naq xe’ril Tzol’leb’ ut Sumwank 51–57 chiru li xamaan a’in. A’b’anan, xk’ulb’al li Santil Musiq’ej ink’a’ naraj ka’ajwi’ a’an. Re xk’ulb’al li Santil Musiq’ej jo’ li qochb’een rajlal, tento taqaj naq toorochb’eeni, tento taqab’oq sa’ li qayu’am, ut tento taqapaab’eb’ li taqlahom. K’a’ruheb’ li osob’tesink te’xk’ul li saaj naq te’xsik’ lix wankil li Santil Musiq’ej?

Re taakawresi awiib’ chi k’utuk, naru taawil “Don del Espíritu Santo” sa’ Leales a la Fe ([2004], 73–74) malaj li raatin li Awa’b’ej Henry B. Eyring “Taawanq lix Musiq’ aawik’in” (Jolomil ch’utub’aj-ib’ re abril 2018).

eb’ li saaj sa’ li tzoleb’aal

Re toob’eresiiq xb’aan li Santil Musiq’ej, tento taqasik’ lix wankil rajlal kutan.

Tzolok sa’ komonil

Re xtenq’ankileb’ li saaj chixtawb’al ru li maatan re li Santil Musiq’ej, naru taaye reheb’ chan ru nak’eeman li maatan re li Santil Musiq’ej. Naru te’ril Tzol’leb’ ut Sumwank 52:10; 53:3; 55:1–3 ut te’aatinaq chirix li xe’xtzol. Ch’olob’ chi us naq li ani naxk’e li ruq’ sa’ xb’een li komon ink’a’ naxk’e li maatan re li Santil Musiq’ej; naxb’oq b’an li komon chixk’ulb’al li Santil Musiq’ej. K’a’ru xjalanileb’? Xb’aanunkil a’in naru tixtenq’aheb’ li saaj chixtawb’al ru chan ru te’xk’ul li xchaq’al ru maatan a’in.

• Li kixb’aanu laj Lehi ut lix junkab’al re te’xk’ul xb’eresinkil xb’aan li Liahona, a’an chanchan li tento taqab’aanu laa’o re taqak’ul qab’eresinkil xb’aan li Santil Musiq’ej. Naru taak’ut xjalam-uuch laj Lehi ut li Liahona (chi’ilmanq Hu reheb’ li Jalam-uuch re li Evangelio [2009], 68), ut taapatz’ reheb’ li saaj naq te’xye li k’a’ru neke’xnaw chirix li Liahona. Chirix a’an, taapatz’ re xyijacheb’ li saaj naq te’ril 1 Nefi 16:14–29 ut li jun yijach chik naq te’ril 1 Nefi 18:8–22, re naq te’xk’e reetal chan ru naq chanchaneb’ rib’ li Liahona ut li Santil Musiq’ej. K’a’ru naqatzol rik’in lix junkab’al laj Lehi li naru tooxtenq’a chixk’ulb’al li Santil Musiq’ej?

• Sa’ Choq’ re Xkawilaleb’ li Saaj wan li na’leb’ chirix xpaab’ankileb’ lix chaq’rab’ ut lix taqlahom li Qaawa’. Xpaab’ankileb’ li taqlahom a’an naxb’oq lix wankil li Santil Musiq’ej sa’ li qayu’am. Naru taapatz’ reheb’ li saaj naq sa’ junjunqal te’ril jalan jalanq li tasal re Choq’ re Xkawilaleb’ li Saaj, ut naq te’xtz’iib’a jun eetalil chiru li k’a’ru te’xb’aanu ut li ink’a’ te’xb’aanu re taawanq li Santil Musiq’ej rik’ineb’. Naru te’xwotz li k’a’ru xe’xtzol. B’oqeb’ chixk’oxlankil jun li meta li tixtenq’aheb’ chixb’aanunkil li na’ajman re te’xk’ul li Santil Musiq’ej. K’a’ut naq naqaj naq taawanq qik’in li Santil Musiq’ej? (chi’ilmanq Jwan 14:26–27; 15:26; 16:13; 2 Nefi 32:3).

• Sa’ li raatin “Taawanq lix Musiq’ aawik’in” (Jolomil ch’utub’aj-ib’ re abril 2018), li Awa’b’ej Henry B. Eyring kixye, “Lin yo’onihom anajwan, a’an naq naru tinwaklesi li rajom aach’ool jo’ ajwi’ laa seeb’al chixk’ulb’al li Santil Musiq’ej.” Patz’ reheb’ li saaj naq te’rileb’ li beleeb’ raqal re li raatin; te’xtikib’ rik’in li aatin “Li kixk’ul li Profeet aj Jose Smith.” Patz’ reheb’ naq te’xsik’ k’a’ru li kixb’aanu laj Jose Smith re xk’ulb’al lix wankil li Santil Musiq’ej. Naru te’xtz’iib’a chiru li pizarron li k’a’ru neke’xtaw. Wi ta us raj, naru taapatz’ reheb’ naq te’xye resil jo’q’e xe’b’eresiik xb’aan li Santil Musiq’ej. K’a’ru yookeb’ chixb’aanunkil sa’ li hoonal a’an li xtenq’aheb’ chixk’ulb’al xb’eresinkil xb’aan li Santil Musiq’ej? Laa’at ajwi’ naru tatwotzoq.

K’anjelak rik’in paab’aal.

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’. Chan ru naq li tzolok xe’xb’aanu anajwan tixtenq’aheb’ sa’eb’ lix meta choq’ re xyu’am? Wi te’raj, eb’ li saaj naru te’xwotz li neke’xk’oxla.

Xkomon chik li tenq’

• Moroni 8:25–26; Tzol’leb’ ut Sumwank 20:77, 79; 121:45–46 (Chan ru taqak’ul li Santil Musiq’ej)

• David A. Bednar, “Recibe el Espíritu Santo,” Liahona, noviembre 2010, 94–97

• Douglas D. Holmes, “Li Maatan re li Santil Musiq’ej” (Xch’utam li Xb’eenil Awa’b’ejil re li Ralankil, 4 diciembre, 2016), broadcasts.ChurchofJesusChrist.org

Li k’utuk jo’ li Kolonel

Sa’ xkawresinkil rib’ choq’ re xk’anjel sa’ ruchich’och’, li Kolonel “kib’eresiik xb’aan li Musiq’ej” re tixkuy lix sa’, re taatijoq, ut re “taawanq rik’in li Dios” (JJS, Mateo 4:1). Xk’utb’al li evangelio rik’in wankilal ink’a’ ka’ajwi’ naraj naxye xkawresinkil jun tzol’leb’, naraj ajwi’ naxye xkawresinkil qib’ laa’o. (Chi’ilmanq Li k’utuk jo’ li Kolonel [2016], 12.)