13 junio

Chan ru tintz’eqtaana li pornografia?

Tzol’leb’ ut Sumwank 63

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li molam malaj tzoleb’aal; 10-20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li molam re li Tijonelil re Aaron malaj li ch’ol aatin choq’ reheb’ li Saaj Ixq. Toja’ naq tex’aatinaq chirixeb’ li na’leb’ chanchaneb’ li tz’iib’anb’ileb’ arin, ut teek’uub’ eena’leb’ re naq toj teeb’aanu li k’a’ru nekeye (naru teesik’ ru k’a’ru tex’aatinaq wi’ sa’ li ch’utam re li awa’b’ejil):

• Sa’ qamolam malaj qatzoleb’aal. K’a’ruheb’ li k’anjel ak xqab’aanu sa’ komonil? Ma chaab’il x’el? K’a’ru li chaab’il x’el, ut k’a’ru li naru xchaab’ilob’resinkil?

• Li k’a’ru teneb’anb’il sa’ qab’een. Ani naraj ru li qatenq’? Chan ru taqatenq’aheb’?

• Sa’ li qayu’am. K’a’ruheb’ li meta xqak’ojob’ qajunes qib’? Ma wan k’a’ru xqak’ul li naru xyeeb’al resil? K’a’ru li osob’tesink ak xqak’ul?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik k’a’ru li xeye sa’ li ch’utam a’in naq teeb’aanu.

Xkʼutb’al li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

Eb’ li saaj maare xe’ril Tzol’leb’ ut Sumwank 63 chiru li xamaan a’in, b’ar wi’ li Qaawa’ kixtijeb’ laj santil paab’anel chirix li rahink-u—a’an jun na’leb’ li ak naxk’e k’iila sut (chi’ilmanq Tzol’leb’ ut Sumwank 63:13–16; Mateo 5:27–28; 3 Nefi 12:27–30). Us ta li na’leb’ a’in wan xyaalalil chalen chaq xtiklajik, aajel wi’chik ru sa’ li qakutankil laa’o, naq natawman li pornografia yalaq b’ar. K’a’ruheb’ li ch’a’ajkilal chirix li pornografia maare neke’xk’ul li saaj li nakatzoleb’? K’a’ru junaq na’leb’ re li evangelio malaj junaq kawresink-ib’ li tixtenq’aheb’ li saaj chixramb’al ru li k’a’ru tz’aj sa’ xk’oxlahom ut xb’aanuhom?

Sa’ xkawresinkil li tzolok, naru taawil “Li ajsink-u ut li k’a’ru wan sa’ internet” ut “Xsaqal ru li tib’elej” sa’ Choq’ re Xkawilaleb’ li Saaj ([2011], 11–13, 35–37) ut Deja que la virtud engalane tus pensamientos (hu, 2006).

Eb’ li saaj naru te’xkawob’resi rib’ chirib’ileb’ rib’ re te’xtz’eqtaana li pornografia.

Tzolok sa’ komonil

Re aatinak chirix li pornografia, naru taapatz’ reheb’ li saaj naq te’ril Tzol’leb’ ut Sumwank 63:13–16 ut naq te’xye k’a’ru xe’xtaw sa’ li raqal a’in li naxtenq’aheb’ chixtawb’al ru li rahob’tesink naxb’aanu li pornografia. Re xtenq’ankileb’ li saaj chixtz’eqtaanankil li pornografia, naru xb’aanunkil a’in. Sa’ xraqik li aatinak, maare taawaj xyeeb’al reheb’ li k’a’ru naru tixb’aanu li obiisp re xtenq’ankileb’ li neke’ril li pornografia (chi’ilmanq Choq’ re Xkawilaleb’ li Saaj, 12, 37).

• Maare wankeb’ xpatz’om li saaj chirix xtz’eqtaanankil li pornografia. Re xtenq’ankileb’ chixsumenkil, naru taatz’iib’a a’in chiru li pizarron: K’a’ru li pornografia? Chan ru naq narahob’tesin? Chan ru naru taqatz’eqtaana li pornografia? Re xtenq’ankileb’ li saaj chixsumenkil li xb’een ut li xkab’ patz’om, patz’ reheb’ naq te’ril “Pornografía” sa’ Leales a la Fe (146–147) ut “Li ajsink-u ut li k’a’ru wan sa’ internet” ut “Xsaqal ru li tib’elej” sa’ Choq’ re Xkawilaleb’ li Saaj (pages 11–13, 35–37). Re xtenq’ankileb’ chixsumenkil li rox patz’om, patz’ reheb’ naq te’ril Genesis 39:1–12; Romanos 12:21; 2 Timoteo 2:22; Alma 39:3–9; Moroni 10:30; Tzol’leb’ ut Sumwank 27:15–18; 121:45–46. Patz’ reheb’ naq te’xwotz li xe’xtzol.

• Re xtenq’ankileb’ li saaj chixtawb’al ru chan ru te’xtz’eqtaana li pornografia, naru taapatz’ reheb’ naq te’ril li raatin li Elder Jeffrey R. Holland “No hay lugar para el enemigo de mi alma” (Liahona, mayo 2010, 44–46) ut li raatin li Hermana Linda S. Reeves “Chanru xkolb’al qib’ chirix li tz’aj aj na’leb’: Jun junkab’al sa’ xsutam li Kristo” (Jolomil ch’utub’aj-ib’ re abril 2014). Naru te’xk’oxla naq yookeb’ chi aatinak rik’in junaq ralal majal xrab’in chirix li pornografia, ut chixch’olob’ankil li rahob’tesink naxb’aanu, ut chan ru xramb’al ru. Ma wan li na’leb’ sa’ li raatin li Elder Holland malaj li Hermana Reeves li te’xye re? Patz’ reheb’ naq sa’ ka’kab’il te’xwotz li k’a’ru xe’xtaw. Patz’ ajwi’ reheb’ naq te’xtz’iib’a li k’a’ru te’xb’aanu re xramb’al ru li pornografia.

• Patz’ reheb’ naq te’ril 1 Korintios 10:13 ut Alma 13:28. Patz’ reheb’ k’a’ru neke’xk’ut li raqal a’in chirix xtz’eqtaanankil li pornografía sa’ qakutankil anajwan. Naru ajwi’ taapatz’ reheb’ naq te’xk’oxla naq wan jun ramiiw li wan xch’a’ajkilal rik’in li pornografia ut li naraj xjalb’al xk’a’uxl. K’a’ru xe’xtaw sa’eb’ li raqal sa’ “Xkomon chik li tenq’,” jo’ ajwi’ sa’eb’ li perel 1–4 re li hu Deja que la virtud engalane tus pensamientos li tixtenq’a raj li ramiiw? Ma wan k’a’ru li tixtenq’a raj li ramiiw chixtawb’al ru naq li obiisp naru taatenq’anq re? (chi’ilmanq Choq’ re Xkawilaleb’ li Saaj, 12, 37).

K’anjelak rik’in paab’aal.

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’. Chan ru naq li tzolok xe’xb’aanu anajwan tixtenq’aheb’ sa’eb’ lix meta choq’ re xyu’am? Wi te’raj, eb’ li saaj naru te’xwotz li neke’xk’oxla.

Xkomon chik li tenq’

• Isaias 1:18; Mosiah 4:2; Tzol’leb’ ut Sumwank 58:42–43 (Naru taakuye’q qamaak wi taqajal qak’a’uxl)

• 1 Nefi 17:3; Mosiah 24:14–15; Alma 26:12 (Li Dios tooxkawob’resi sa’ lix yalb’al qaq’e chixpaab’ankileb’ li taqlahom)

• “Ayuda para personas involucradas en la pornografía” sa’ AddressingPornography.ChurchofJesusChrist.org

• “Cuida tus pasos,” “Volcar la mirada,” “La castidad: ¿Cuáles son los límites?” “La redención de los muertos me redimió a mí” (eb’ li video), ChurchofJesusChrist.org

Li k’utuk jo’ li Kolonel

Naq nakatk’utuk jo’ li Kolonel, eb’ li saaj te’xk’e xna’aj li iyaj re li evangelio chi awmank, chi siipook, ut chi k’iik sa’ raameb’. K’a’ru naru taab’aanu re xtenq’ankileb’ chiroksinkileb’ li loq’laj hu re te’xtaw ru naq nim xwankil ut ch’ina-us xnumsinkil li qayu’am chi saq ru li qach’ool?