C. C. A. Christensen (1831–1912), Saints Driven from Jackson County Missouri, c. 1878, tempera on muslin, 77 ¼ × 113 inches. Brigham Young University Museum of Art, nodra isolisoli na makubui C. C. A. Christensen, 1970

12 ni Sepiteba

E Rawa Vakacava Ni Da Sotava na Dredre ena Vakabauta?

Vunau kei na Veiyalayalati 98–101

Veivakasalataki Vata

Liutaki mai na dua na lewe ni mataveiliutaki ni kuoramu se kalasi; rauta ni 10–20 na miniti

Ena itekivu ni soqoni, cavuta vata na iToko ni Kuoramu ni Matabete i Eroni se na iToko ni Goneyalewa. Qai liutaka e dua na veivosaki ena veika vakaoqo, ka tuvanaka na sala eso mera vakayacora kina na ka sa veivosakitaki (rawa ni o navuca ena dua na soqoni ni mataveiliutaki na veika me veivosakitaki):

• Noda kuoramu se kalasi. O cei e gadreva na noda veivuke kei na masu? Na cava eda rawa ni cakava meda vukei ira kina? O cei e dodonu me da sureta ki na itaviqaravi mai oqo?

• Noda itavi se icolacola. Na ilesilesi cava soti eda sa vakayacora rawa? Na ilesilesi cava so e gadrevi meda cakava? Eda a sureti ira vakacava na tani mera lako mai vei Karisito, ka da na sureti ira vakacava eso tale ena gauna oqo?

• Noda bula. Na cava so e sotavi wale tikoga oqo e sa vaqaqacotaka na noda ivakadinadina? Na cava e sa yaco tiko ki na noda bula, ka rawa vakacava ni da veitokoni vakai keda?

Ena itini ni lesoni, ke veiganiti, cakava na ka oqo:

• Vakadinadinataka na ivakavuvuli eso sa vakatavulici.

• Vakananumi ira na lewe ni kuoramu se kalasi ena ituvatuva kei na veisureti a caka ena gauna ni bose.

Vakavulica na iVunau

Liutaki mai vua e dua na iliuliu itabaqase se itabagone; rauta ni 25-35 na miniti

Vakarautaki Iko Vakayalo

Na vosa ni Kalou ena Vunau kei na Veiyalayalati 98 kei na 101 a solia na vakacegu vei ira na Yalododonu ka sotava tu na veivakatovolei dredre e Misuri ena 1830. Ni na rairai duidui tu na noda veivakatovolei mai vei ira na lewe ni Lotu taumada, eda sotava taucoko na veika dredre ena bula oqo, ia na vorati ni dredre ena yalodina sa rawa ni vukea na noda tubu vakayalo ka veiucui kei Jisu Karisito vakalevu cake.

Sa vakaukauwataka ka vakavinakataka vakacava na nomu veimaliwai kei Jisu Karisito na golevi ni Turaga ena veigauna ni dredre? Na bolebole kei na veivakatovolei cava so e sotava tiko na lewe ni nomu kuoramu se kalasi, ka rawa vakacava ni o vukei ira mera kune veivaqaqacotaki mai vua na iVakabula? Me vukea na nomu vakavakarau ni vakatavulica na veika dredre, o na via railesuva na itukutuku i Elder Neil L. Andersen “Mavoa Tu” (Liaona, Nove. 2018, 83–86) kei na “Dredre” ena Tudei ena Vakabauta ([2004], 8–11).

Sa rawa ni da kune vakacegu ena veigauna dredre ena vuki ki vua na iVakabula.

Vulica Vata

Sa sotavi dredre tiko na lewe ni nomu kuoramu se kalasi yadua ena nona bolebole eso. Na lomavinaka cava o nanuma era rawa ni raica ena Vunau kei na Veiyalayalati 98:1–3? O na via vakayagataka e dua se sivia na itaviqaravi e ra mo vukei ira ni kila vakamatata na sala mera vosota kina na veika dredre ena vakabauti ni Turaga.

• Sa umani tu ena ivolanikalou e vuqa na ivakaraitaki ni tamata ka a vosota ena yalodina na veivakatovolei. Sa rawa ni vulica na lewe ni kuoramu se kalasi na sala mera vosota kina ena yalodina na veika dredre ena vulici ni so na ivakaraitaki oqo (raica eso ena “iVurevure Veitokoni”). Era rawa ni digitaka yadua e dua na tiki ni ivolanikalou ka kaya vakalekaleka na ka e sotava na tamata oya ki na kuoramu se kalasi. Na veivakararamataki cava so eda rawata tu me baleta na vuna eda sotava kina na dredre? Na cava eda vulica me baleta na sala meda vosota kina ena yalodina na veika dredre? Sureta na lewe ni kuoramu se kalasi mera vola yadua e dua na veivakatovolei era sotava tiko se na nodra daulomani ka vakasamataka vagumatua na sala era rawa ni dreta mai kina na kaukauwa ni iVakabula me vukei ira ena gauna ni veivakatovolei oqo.

• Mo vulica eso na vu ni dredre kei na ka eda rawa ni vulica mai na noda veivakatovolei, rawa mo ni wilika vata na matai ni rua na parakaravu ni “Dredre” ena Tudei ena Vakabauta (tabana e 8). Kerea na lewe ni kuoramu se kalasi me wasea na ka era sa vulica. Rawa ni qai railesuva na tamata yadua e dua vei ira na vo ni tolu na wase ni “Dredre” ka vakarau mo vakavulica na kena vo ena ka era sa vulica, oka kina na sala e rawa ni vukei keda kina na iVakabula ena gauna eso ni veivakatovolei. Vakauqeti ira ni wasea e dua na ka era sotava e semati ki na ka era sa wilika kevaka era lomavinaka kina.

• Dua na sala me vakauqeti kina na veivosakitaki ni veika dredre oya me droinitaki e dua na laini ena lomadonu ni papa ka vola Cava na vuna e tiko kina na dredre? ena dua na yasana kei na E rawa vakacava ni da sotava na dredre ena yalodina? ena yasana kadua. Sa rawa ni wilika na lewe ni nomu kuoramu se kalasi yadua e dua na wase mai na itukutuku i Elder Neil L. Andersen “Mavoa Tu,” ni vakaraici na isaunitaro ki na taro eso ena papa. Na cava eda vulica me baleta na iVakabula mai na itukutuku i Elder Andersen?

• A vakayagataka o Elder Stanley G. Ellis na ivakaraitaki ni luve ni toa kei na bebe me vakavulica kina na veika dredre ena nona itukutuku “Eda Nuitaki Koya Li? Dredre E Vinaka“ (Liaona, Nove. 2017, 112–14). Rawa ni o vakaraitaka na yaloyalo ni diridiri ni dua na luve ni toa se basika mai ni dua na bebe ena kena bola ka veivosakitaka na ka a vakavulica o Elder Ellis. Sa rawa ni ra qai cakacaka vata vakaveisa o ira o vakavulica ni railesuva na vosa i Elder Ellis. Rawa ni vola na veisa yadua na ka kecega era raica rawa e a vakavulica ena vuna e tiko kina na dredre kei na sala meda vorata kina. E sa vukei keda vakacava ni toro volekata na iVakabula na kena vosoti ena yalodina na gauna ni dredre eso?

Cakacaka ena Vakabauta

Vakauqeti ira na lewe ni kuoramu se kalasi mera vakasamataka vagumatua ka vola na ka era na cakava mera vakayacora kina na veivakauqeti era ciqoma nikua. E semati vakacava na lesoni nikua ki na veilalawa era sa cakava? Kevaka era vinakata, sa rawa ni wasea na lewe ni kuoramu se kalasi na nodra vakasama.

iVurevure Veitokoni

• 1 Samuela 1; 1 Tui 17; Luke 23:33–34; 1 Nifai 5:1–9; Mosaia 24:8–17; 3 Nifai 1:4–21; Moronai 1; iDusidusi ki na iVolanikalou, “Ruci” kei “Esiteri,” scriptures.ChurchofJesusChrist.org (iVakaraitaki ni tamata era sotavi dredre)

• Joni 14:18; Roma 8:28, 35–39; Alama 36:3 (Sa rawa ni vukei keda na iVakabula ena gauna ni dredre)

• Vidio “God Will Lift Us Up,” “The Will of God,” ChurchofJesusChrist.org

Veivakavulici ena iVakarau ni iVakabula

Na iVakabula e kilai ira vinaka e vakavulica—ka kila o Koya o cei era rawa ni vakataka. Ni ra sotavi dredre tu, e sega ni vakuwai ira o Koya ia a tomana ga me lomani ira. Na dredre cava so era sotava tiko na itabagone? O rawa vakacava ni vakaraitaka na loloma kei na veitokoni?