24 octubre

Chan ru tink’ul “lix wankilal li choxa” sa’ lin yu’am?

Tzol’leb’ ut Sumwank 121–123

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li molam malaj tzoleb’aal; 10-20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li molam re li Tijonelil re Aaron malaj li ch’ol aatin choq’ reheb’ li Saaj Ixq. Toja’ naq tex’aatinaq chirixeb’ li na’leb’ chanchaneb’ li tz’iib’anb’ileb’ arin, ut teek’uub’ eena’leb’ re naq toj teeb’aanu li k’a’ru nekeye (naru teesik’ ru k’a’ru tex’aatinaq wi’ sa’ li ch’utam re li awa’b’ejil):

• Sa’ qamolam malaj qatzoleb’aal. Aniheb’ li ak’ sa’ qateep, ut chan ru taqak’eheb’ chireek’a naq k’ulb’ileb’ qab’aan? K’a’ru yooko chixb’aanunkil re naq chaab’ilaq li ch’utam choq’ qe?

• Li k’a’ru teneb’anb’il sa’ qab’een. K’a’ru li k’anjel teneb’anb’il sa’ qab’een jo’ saaj winq malaj ixq? Chan ru naru taqab’aanu li k’anjel a’an chi chaab’il?

• Sa’ li qayu’am. K’a’ru yooko chixb’aanunkil re wank jo’ li Jesukristo ut re xk’ulb’al lix wankil sa’ li qayu’am? K’a’ru yooko chixb’aanunkil re xtenq’ankil li qajunkab’al chi chalk rik’in li Jesukristo?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik k’a’ru li xeye sa’ li ch’utam a’in naq teeb’aanu.

Xkʼutb’al li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

Li liceens re roksinkil li tijonelil ut lix wankilal li tijonelil moko juntaq’eeteb’ ta. Jun kristiaan naru tixk’ul li liceens re roksinkil li tijonelil naq nak’ehe’ li uq’ej sa’ xb’een xjolom—eb’ li winq naru te’k’ojob’aaq sa’ jun opiis re li tijonelil, ut xkab’ichaleb’ li winq ut li ixq neke’ru chi k’ojob’aak sa’ jun b’oqb’il k’anjel. A’b’an lix wankilal li tijonelil—a’ lix wankilal li Dios, malaj “lix wankilal li choxa”—naru taa’oksimanq ka’ajwi’ “rik’in li na’leb’ re tiikilal” (Tzol’leb’ ut Sumwank 121:36). Xkab’ichaleb’ li winq ut li ixq neke’ru chiroksinkil li wankilal a’in. Wi naqaj naq nim ru li k’anjel naqab’aanu choq’ reheb’ li qas qiitz’in, tento naq k’ulub’ejo re xb’oqb’al lix wankilal li choxa.

Ma neke’xnaw li saaj chan ru naru te’roksi lix wankilal li tijonelil? K’a’ raj ru taajale’q sa’ xyu’ameb’ ut sa’ xk’anjeleb’ wi ta te’xtaw ru li na’leb’ a’an? K’oxlaheb’ li patz’om a’in naq nakawil Tzol’leb’ ut Sumwank 121. Maare usaq ajwi’ rilb’al wiib’ li aatin kixye li Awa’b’ej Russell M. Nelson. Jun kiyehe’ reheb’ li neke’k’amok re li tijonelil—“Lix tz’aq lix wankilal li tijonelil” (Jolomil ch’utub’aj-ib’ re abril 2016). Li jun chik reheb’ li ixq—“Li musiq’ejil b’ihomal” (Jolomil ch’utub’aj-ib’ re octubre 2019).

Lix wankilal li tijonelil nachal rik’in li tiikilal.

Tzolok sa’ komonil

Re aatinak chirix lix wankilal li tijonelil, naru taapatz’ reheb’ li saaj naq te’xye junaq na’leb’ li xe’xtzol chirix li wankilal a’in naq xe’ril Tzol’leb’ ut Sumwank 121 chiru li xamaan a’in. Wi na’ajman, taaye reheb’ naq te’rileb’ li raqal 34–46 re te’xsik li aatin wankilal yalaq ta b’ar nak’utun, toja’ naq te’xwotz li xe’xtzol. Naru xb’aanunkil a’in re xtenq’ankileb’ li saaj chixtawb’al ru chan ru te’roksi lix wankilal li Dios sa’ xyu’ameb’.

• Maare usaq raj xtz’ilb’al rix chan ru na’oksiman li “wankilal” ut li “teneb’ank” sa’ li ruchich’och’ ut chan ru na’oksiman li tijonelil jo’ yeeb’il resil sa’ tasal 121. Naru taatz’iib’a wiib’eb’ li na’leb’ sa’ li pizarron: Xwankilal li ruchich’och’, ut Xwankilal li choxa. Eb’ li saaj naru te’xtz’iib’a junqaqeb’ li aatin re Tzol’leb’ ut Sumwank 121:34–46 rub’eleb’ li na’leb’ a’an. Chan ru taqasik’ xtoch’b’aleb’ xch’ool li qas qiitz’in naq naqataw ru li na’leb’ sa’eb’ li raqal a’in? Jo’ naxye sa’ li raqal a’in, chan ru tooxtenq’a li Santil Musiq’ej chixtoch’b’aleb’ xch’ool li qas qiitz’in sa’ tiikilal?

• Re xtenq’ankileb’ li saaj winq chixnawb’al chan ru te’k’anjelaq rik’in wankilal sa’ li tijonelil, naru taak’ut jalan jalanq li k’a’ru loq’b’il chiruheb’, ut taapatz’ reheb’ naq te’xq’ehi jo’ nimal xtz’aq li junjunq. K’a’ut naq jalan jalanq xtz’aqeb’? K’a’ru jwal nim xloq’al sa’ qayu’am, ut k’a’ru tz’aqul “naqatoj” wi’? Eb’ li saaj winq naru te’ril li raatin li Awa’b’ej Russell M. Nelson “Lix tz’aq lix wankilal li tijonelil,” re te’xtaw k’a’ru tz’aqul tento taqatoj choq’ re lix wankilal li tijonelil. K’a’ru nak’ulman sa’ qayu’am ut sa’ xyu’ameb’ li qas qiitz’in naq nokok’anjelak rik’in lix wankilal li Kolonel?

• Re xtenq’ankileb’ li saaj ixq chixtawb’al ru chan ru neke’roksi lix wankilal li tijonelil, naru taapatz’ reheb’ naq te’xk’oxla jo’q’e xe’reek’a lix wankilal li Dios sa’ xyu’ameb’. Ye reheb’ naq lix wankilal li tijonelil, a’an lix wankilal li Dios. Naru te’ril li raatin li Awa’b’ej Russell M. Nelson “Li musiq’ejil b’ihomal” re te’xtaw li na’leb’ chirixeb’ li ixq ut lix wankilal li tijonelil. K’a’ru kixpatz’ li Awa’b’ej Nelson naq te’xb’aanu li ixq re li Iglees re naq te’ruuq “chiroksinkil chi anchaleb’ xch’ool lix wankil li Kolonel”? (che’ilmanq li kaahib’ chi raqal li neke’tikla rik’in “Chixjunqaleb’ li ixq ut winq”). Jo’q’e xqab’oq chaq li wankilal a’in sa’ qayu’am malaj choq’ re xyu’ameb’ li qas qiitz’in? K’a’ru naxk’ut Tzol’leb’ ut Sumwank 121:39–43 chirix roksinkil lix wankilal li Qaawa’ sa’ li qayu’am?

K’anjelak rik’in paab’aal.

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’. Chan ru naq li tzolok xe’xb’aanu anajwan tixtenq’aheb’ sa’eb’ lix meta choq’ re xyu’am? Wi te’raj, eb’ li saaj naru te’xwotz li neke’xk’oxla.

Xkomon chik li tenq’

• Russell M. Nelson, “Roksinkil lix wankil li Jesukristo sa’ li qayu’am,” Jolomil ch’utub’aj-ib’ re abril 2017.

• David A. Bednar, “Los poderes del cielo,” Liahona, mayo 2012, 48–51

Li k’utuk jo’ li Kolonel

Naq nakasik’ xtaaqenkil li Jesukristo ut wank chi k’ulub’ej re roksinkil lix wankilal, tatruuq chi k’utuk rik’in wankilal.